Ia Faataatitia ni Sini Faaleagaga
1 Maʻeu se faaeaga mamalu o le a iai pe afai e vivii atu iā Ieova e oo lava i le faavavau! Ina ia faataunuuina lenā sini, e mafai ona tatou faatutūina loa i le taimi nei nisi sini faaleagaga e sili atu, ma taumafai ina ia ausia. O le faia faapea o le a mafai ai ona faaaogā ma le atamai lo tatou malosi. (1 Kori. 9:26) O ā ni sini e mafai ona e ausia?
2 Suʻesuʻega Faale-Tusi Paia: Pe e te sauniuni mo sauniga taʻitasi a le faapotopotoga? Afai o lea, pe e te faaaluina se taimi e fai ai ni au iloiloga ma mafaufau loloto i ai pe a fai lau suʻesuʻega? Mo se faaaʻoaʻoga, pe afai e te sauniuni mo le suʻesuʻega faalevaiaso o Le Olomatamata ma le Suʻesuʻega Tautusi a le Faapotopotoga, pe e na ona vase lava o au tali, po o le mea e te faitauina foʻi mau na e taʻua ai ma mafaufau loloto i uiga o faamatalaga o loo aumaia ai? Pe e mafai ona fai ma ou sini le faia o ni iloiloga i vaiaso taʻitasi i nisi o manatu mai le faitau Tusi Paia mo le Aʻoga o le Faiva Faatiokarate? O na iloiloga faaleagaga e mautinoa e alu ai le taimi ma taumafaiga, ae e tele ni taui faaleagaga e maua mai ai.—Faata. 2:4, 5.
3 Sauniga a le Faapotopotoga: O le isi sini, o le auai e lē aunoa i sauniga e lima a le faapotopotoga. O le vave ona taunuu, e lava ai se taimi e auaufaatasi ai ma uso talitonu ma auai i le pese ma le tatalo amata, e fesoasoani lea i le faaleleia o mafaufauga ma faalogona o le faapotopotoga. E mafai foʻi ona tatou tauivi e faia se tali i sauniga taʻitasi ma taumafai ina ia faaleleia a tatou tali. Atonu e mafai ona e faailoa mai le auala e fesootaʻi ai le mau i le palakalafa ma le manatu o loo talanoaina, pe faailoa mai foʻi le auala e aogā ai lea mataupu i o tatou olaga i aso faisoo.—Epe. 10:24, 25.
4 Auaunaga i le Fanua: E sili atu ona faaleleia la tatou faiva pe a tatou faatutūina ni sini. Po o iai sou lava sini o ni itula ua e fuafuaina e faaalu i le auaunaga i masina taʻitasi? Ua iloa e nisi le aogā o lenā mea. Pe e mafai ona faaleleia nisi vala o lau faiva, e pei o le faaaogāina o le Tusi Paia i le galuega mai lea fale i lea fale, le faia atili o nisi toe asiga uigā, le taumafai e amata se suʻesuʻega faale-Tusi Paia, pe fai ia sili atu ona uigā lau aʻoaʻo atu pe a faia suʻesuʻega?
5 Mātua e, po o outou faalaeiauina ea a outou fanau ina ia faatutū ni sini i le auaunaga a Ieova? Fesoasoani iā i latou ia iloa o le auauna o se paeonia, misionare, po o se tasi i le aiga Peteli, o se auala aupito sili lea ona lelei e faailoa atu ai lo latou matuā lotofaafetai iā Ieova.—Fai. 12:1.
6 A o tatou iloiloina a tatou gaoioiga, ia faatutū ni sini faaleagaga, ona galue loa lea ina ia ausia, o le a sili atu ona tatou olioli i la tatou auaunaga ma avea ai ma puna o faalaeiauga i isi.—Roma 1:12.