E Tatau i Tagata Uma Ona ‘Talia le Upu ma le Loto Fiafia’!

¹ E faitau miliona tagata o loo suesueina le Tusi Paia ma Molimau a Ieova. Ina ia agavaa mo le ola e faavavau, e tatau ona latou ‘talia le upu ma le loto fiafia,’ e pei ona sa faia e le 3,000 o i latou o ē na salamō ma papatisoina i le aso o le Penetekoso i le 33 T.A. (Galu. 2:41) O le ā le avega tauave ua tuuina mai e lenei mea ia i tatou i aso nei?

² E manaomia ona tatou fesoasoani atu i a tatou tagata suesue o le Tusi Paia ina ia ati ae le tuutoina ia Ieova. (1 Timo. 4:7-10) I lea fuafuaga, ua aumaia ai se fautuaga i le faaopoopoga o La Tatou Faiva o le Malo o Iuni 1996, palakalafa e 20, e faapea: “I le suesuega atoa, vaai mo avanoa e atiina aʻe ai le talisapaia mo uiga o Ieova. Faamatala atu ou lava lagona loloto mo le Atua. Fesoasoani i le tagata suesue ina ia mafaufau i auala e atiina aʻe ai se faiā māfana ma Ieova. Pe a oo ina ia iloa moni ma alofa i le Atua, ona auauna atu ai lea o ia i le Atua ma le faamaoni, auā o le amioatua e fesootai atu lea ma le auala o tatou manatu ai e faatatau ia Ieova o se peresona.”

³ Le Luʻi ua Fesagai ma i Tatou: O le toatele o tagata ua taaʻina i lotu sese, ua loto malilie lava i se ituaiga o tapuaiga e itiiti se taimi ma ni taumafaiga e faaalu ai, e aunoa ma le manaomia ona suia o auala o o latou olaga. (2 Timo. 3:5) O le luʻi la o loo fesagai ma i tatou, o le fesoasoani atu lea i a tatou tagata suesue o le Tusi Paia e iloa e faapea, o le tapuaiga moni, e aofia ai mea e sili atu na i lo le tau ina faalogologo i le afioga a le Atua. E tatau ona latou faatatauina i o latou olaga mea ua latou aʻoaʻoina. (Iako. 1:22-25) Afai e iai se mea i a latou amioga totino e lē fiafia i ai le Atua, e manaomia ona latou iloa la latou matafaioi ina ia ‘liliu ese’ ma faia le mea e tonu ina ia faafiafia ai o ia. (Galu. 3:19) Ina ia maua le ola e faavavau, e tatau ona ‘latou finafinau ma faamalolosi’ ma ia tutū mausalī mo le upu moni.—Luka 13:24, 25.

⁴ Pe a talanoaina vala eseese o le mataupu i amioga tatau, ia fesili atu i lau tagata suesue o le Tusi Paia po o le ā moni lava sona manatu i nei mataupu ma le mea e tatau ona ia faia pe afai na te iloa e manaomia ona faia ni suiga i lona olaga. Tataʻi lona manatu i le faalapotopotoga lea na te aʻoaʻoina mai ai le upu moni, ma faalaeiau o ia ina ia auai e lē aunoa i sauniga a le faapotopotoga.—Epe. 10:25.

⁵ Seʻi avea ma o tatou sini le pāʻia o le loto o la tatou tagata suesue i a tatou aʻoaʻoga. O le a avea o se mea tatou te olioli ai a o tatou uunaia tagata fou ina ia talia ma le loto fiafia le upu a le Atua ma ia papatisoina!—1 Tesa. 2:13.