O Tagata e Sili Ona Fiafia i le Lalolagi
1 “Amuia [“E fiafia,” NW] le nuu e fai Ieova mo latou Atua.” (Sala. 144:15) Ua faamatalaina e na upu ia Molimau a Ieova o ni tagata e sili ona fiafia i le lalolagi. E leai se isi olioli e sili atu na i lo lea e sau mai i le auauna atu iā Ieova le Atua moni e toʻatasi o loo soifua. Ona o ia “o le Atua manuia [“fiafia,” NW],” o i latou la e tapuaʻi iā te ia e faaatagiaina ai lona fiafia. (1 Timo. 1:11) O ā nisi o vala o la tatou tapuaʻiga lea e saosaolaumea i lo tatou fiafia?
2 Māfuaaga Tatou te Fiafia Ai: Ua faamautinoa mai iā i tatou e Iesu faapea o lo tatou fiafia e sau mai le “manatu mamafa i o [tatou] manaʻoga faaleagaga.” (Mataio 5:3, NW) O le faaauau ona suʻesuʻeina o le Tusi Paia ma auai i a tatou sauniga faa-Kerisiano e faamalieina ai lenā manaʻoga. O le aʻoaʻoina o le upu moni o le Afioga a le Atua ua faasaʻolotoina ai i tatou mai i pepelo ma mea sesē a lotu. (Ioa. 8:32) Ua aʻoaʻoina foʻi i tatou e le Tusi Paia i le auala e sili ona lelei e ola ai. (Isa. 48:17) Ona o lenā, ua tatou olioli ai i le mafutaga mamā faa-Kerisiano i le lotolotoi o la tatou aufaatasiga fiafia ma o tatou uso.—1 Tesa. 2:19, 20; 1 Pete. 2:17.
3 Ua tatou mauaina le matuā faamalieina mai i le usitaia o tapulaa maualuluga tau amio a le Atua, auā ua tatou iloa e puipuimaluina ai i tatou ma faafiafiaina ai Ieova. (Faata. 27:11) Na taʻua e se tusitala o se nusipepa e faapea: “E ui lava i a latou tapulaa maumaututū, ae e lē o foliga mai e faanoanoa ai Molimau a Ieova. I lona tuufaafeagai, o i latou o ē iti faapena foʻi ma tagata matutua [i latou o loo iai ma i latou] ua foliga mai e uiga ese lo latou fiafia ma iai i se tulaga paleni lelei.” E faapefea la ona tatou fesoasoani atu i isi ina ia faasoa atu i ai le auala fiafia o loo tatou ola ai?
4 Fesoasoani i Isi Ina ia Maua le Fiafia: Ua faatumulia le lalolagi i le lē fiafia, ma ua masani ona iai i tagata se vaaiga puaoa i le lumanaʻi. Peitaʻi, ua iā i tatou se vaaiga manino, i le iloaina e faapea o le a iai se aso o le a mavae atu ai faanoanoaga. (Faaa. 21:3, 4) O lea la, ua tatou faia se sao maelega i le faiva, i le saʻilia o ē loto faamaoni e tufa atu i ai lo tatou faamoemoe ma o tatou talitonuga e faatatau iā Ieova.—Eseki. 9:4.
5 Na faapea mai se tuafafine paeonia: “E leai se isi mea e sili atu ona faamalieina ai na i lo o le fesoasoani atu i tagata ina ia iloa Ieova ma lana upu moni.” Seʻi o tatou faia mea uma tatou te mafaia ina ia faalaeiauina ai le toʻatele e taliaina ni suʻesuʻega faale-Tusi Paia i aiga. O le auauna iā Ieova ma le ofoina atu o i tatou e fesoasoani ai i isi e auauna iā te ia e aumaia ai le fiafiaga sili.—Galu. 20:35.