Le Galuega Aupito i Sili Ona Tāua
1. O ā ni gaoioiga o le a uunaʻia i tatou e fai ona o le loloto o lo tatou talisapaia o le faiva?
1 Aiseā e faalaeiauina ai e lē aunoa i tatou e tuutō atu lo tatou taimi, malosi, ma alagaʻoa mo le faiva? Ona e leai se isi galuega e sili atu lona tāua nai lo le faiva! O le tomānatu i tele o ona aafiaga, o le a faateleina ai lo tatou faanaunauga e fai se sao i lenei galuega e lē toe faia i le lumanaʻi.—Galu. 20:24.
2. E faapefea ona faapaia le suafa sili o Ieova i la tatou talaʻiga?
2 E Faapaia ai le Suafa o Ieova: O loo faamamafa i le galuega talaʻi, o le Malo o Ieova e ala iā Keriso Iesu o le a suia ai malo uma faaletagata ma saunia vaifofō mo faafitauli uma o le fanau a tagata. (Mata. 6:9, 10) O le a faamamaluina ai Ieova e na o ia lava e mafai ona laveaʻia i tatou mai i faamaʻi ma le oti. (Isa. 25:8; 33:24) Talu ai o loo tatou tauaveina lona suafa, a mātauina mai e isi la tatou amio lelei ma le maelega, e latou te vivii atu ai iā te ia. (1 Pete. 2:12) Maʻeu le faamalieina ai o i tatou i lo tatou faailoaina atu i le lalolagi atoa le suafa o le Alii Silisili Ese o Ieova!—Sala. 83:18.
3. O ā faamanuiaga e maua e i latou e tali fiafia mai i le feʻau o le Malo?
3 E Faasaoina ai Ola: E “lē finagalo [Ieova] e faaumatia se tasi, ae e finagalo ia oo uma lava i le salamō.” (2 Pete. 3:9) Peitaʻi, a leai se tasi e aʻoaʻoina i latou, o le a faapefea ona aʻoaʻoina e tagata amioga tatau ma amioga lē tatau e pei ona faafinagaloina e Ieova? (Iona 4:11; Roma 10:13-15) Pe a tali mai tagata taʻitoʻatasi i le tala lelei, o le a faaleleia ai le auala e ola ai a o latou lafoaʻia faiga e faaleagaina ai. (Mika 4:1-4) E lē gata i lea, e latou te maua ai le faamoemoe matagofie o le ola e faavavau. O la tatou talaʻiga maelega ma le aʻoaʻoina o tagata, e faaolaina ai i tatou ma i latou e faalogo mai iā i tatou. (1 Timo. 4:16) Maʻeu la se vaega faamamaluina ua tatou maua i lenei galuega aupito i sili ona tāua!
4. Aiseā e ao ai ona fai le mea sili tatou te mafai i le galuega o le talaʻia o le Malo ma le faia o soo?
4 Ua toe lava o se aga ona aumaia loa lea e le puapuaga tele le iʻuga i lenei lalolagi amioleaga. O i latou e tapuaʻi iā Ieova o le a faasaoina. O le mea lea, o le talaʻiga ma le faia o soo o se galuega ua sili ona faanatinati, tāua, ma aogā o loo faia i le taimi nei. Tau ina ia tatou faamuamua lenei galuega i o tatou olaga!—Mata. 6:33.