Tusi Tausaga 2011

TALAʻI MA AʻOAʻO ATU I LE LALOLAGI AOAO

“E Iai ni aʻu Fesili.” Na tusi se tuafafine paeonia mai i Kuperu e faapea: “I se tasi taeao o le aso Lulu, sa ou lagona ai le lē atoatoa o le malosi, ae nai lo o le nofo i le fale, na ou naunau ai lava ia ou talaʻi atu i le ala tele. O lea, na ou tatalo ai iā Ieova ina ia auina mai se tasi e avanoa sona taimi e ma te nonofo faatasi i le nofoa, ma amata ai se suʻesuʻega faale-Tusi Paia. E leʻi pine ae sau loa se tamāloa Nepale. Sa ou uuina mekasini i loʻu lima, a o leʻi fai atu saʻu tala, na ia fesili po o le a o loo faatatau iai mekasini. Ina ua ou taʻu atu iā te ia o nei lomiga e faavae i le Tusi Paia, na ia faapea mai: ʻTinā, o lea ou te avanoa, pe e mafai ona ou nofo atu i ou tafatafa? O loo iai fesili e faatatau i le Tusi Paia ou te fia fesili atu ai iā te oe.’

“Ioe, e mafai, o le mea lenā na ou talosaga atu ai iā Ieova! Na faaauau mai le tamāloa: ʻO laʻu fesili muamua, O le ā tonu o loo aʻoaʻo e le Tusi Paia? Na matuā faateʻia aʻu ma na faafaigatā ai ona ou tali atu! Na ou avaʻe mai i laʻu ato le tusi O Ā Aʻoaʻoga Moni o le Tusi Paia? ma faaali atu iā te ia. Na ia autilo i le tusi, ona ia tilotilo mai lea iā te aʻu ma fesili mai, ʻPe e lē o le ulutala o lenei tusi o le fesili lea na ou fesili atu ai iā te oe? O lea na ou amata i le taimi lava lenā se suʻesuʻega faale-Tusi Paia, i le nofoa o le paka! O loo faaauau pea ona suʻesuʻe e lenei tamāloa le Tusi Paia, ma auai e lē aunoa i sauniga, ma ua ia faailoa mai lona faanaunauga e fia auai i le Aʻoga o le Faiva Faatiokarate. Ou te matuā talisapaia lava le tāua o le faalagolago atoatoa atu i le malosi ma le taʻitaʻiga a Ieova, e faatinoina ai la tatou faiva faa-Kerisiano, e ui lava e lagona le vaivai i nisi taimi.”

Ua Silia ma le 100 Tausaga: O Eline, o le tagata talaʻi e sili ona matua i Suetena, ua 110 ona tausaga—o le matua foʻi lenā na oo i ai le soifua o Iosua. (Iosua 24:29) E nofo o ia i le nofoaga o tagata matutua, ma e na te faaaogā avanoa uma e talanoa atu ai i tagata asiasi, ma ē uma na ia feiloaʻi i ai. Na ia ofoina atu le tele o tusi. Ina ua talaʻi atu mai i lea fale i lea fale se toeaina ma lona afafine i le oganuu e latalata ane, na la feiloaʻi ai ma se teine talavou o lē na faapea atu, na talaʻi atu Eline iā te ia ma tuu se tusi. O lenā na oo atu ai i se talanoaga manaia.a

Papua Niu Kini: Tauiviga ma Agaga Leaga: Na faaaogā e Kora Leke faiga faataulāitu ma lau laau e togafiti ai maʻi. Ae ina ua ia suʻesuʻeina le Tusi Paia, sa ia tauivi ai e saʻoloto mai i le agaga leaga, lea sa fesoasoani iā te ia i ana faiga faataulāitu. Sa taumafai malosi Kora e vavae ese mai i sootaga ma temoni—ma na taulau o ia ona o le fesoasoani a Ieova. Mulimuli ane na avea o ia ma paeonia sauatoa ma o se paeonia faapito. E oo lava ina ua matua, ma ua vaivai ona vae, sa faaauau e lenei uso faamaoni ona talaʻi atu le tala lelei i ona tuaoi.

Na faapefea ona oo Kora i lona nofoaga e fiafia e talaʻi ai? E faaaogā e uso se uilipaelo e toso ai, e pau lenā o le auala e maua. Mulimuli ane, sa iai se uso alofa e galue i le lālā na ia fausia se nofoa faataavale, e faaaogā ai uʻamea o se nofoa masani, uili o se uila, ma se tapoleni mo le nofoa. O lana fausaga fou e faaaogā i femalagaaʻiga na avatu ai iā Kora se fesoasoani tele, ma na ia faaaogāina atoatoa! Ioe, maʻeu ni faaaʻoaʻoga faagaeeina mo ē e matutua i aso nei, i le auala o loo latou faafiafiaina ai le finagalo o Ieova!—Faata. 27:11.

[Faaopoopoga i lalo]