Tala o Mea na Tutupu Mai i le Tusi Tausaga 2011
PAPUA NIU KINI
Itulau 96, palakalafa 1-2
UA FAALOGO ISI I LE TALA LELEI
O se paeonia talavou Ausetalia o Glenn Finlay, na galue toʻatasi o ia mo le 18 masina i le aai o Kerema, o se nuu tū matafaga e tusa o le 140 maila le mamao mai i Port Moresby i Papua Niu Kini. Na faapea mai Glenn, “O se taimi sili lea ona faigatā mo aʻu, ma i nisi taimi ou te taumasalosalo ai po o taulau manuia laʻu galuega. Peitaʻi, sa iai se mea na tupu na suia ai loʻu manatu.”
“O se tasi o tamāloa na ma suʻesuʻe i le Tusi Paia, o se tagata matua o le nuu e fai falaoa, e suafa iā Hevoko. E matuā lē iloa faitau ma tusitusi. Ae ina ua mavae ni nai masina, sa mafai ona ia aʻoaʻoina na o ni nai mataupu faavae o le Tusi Paia. Sa ou taumānatu pe tatau ona faaauau pea ona aʻoaʻo o ia. Peitaʻi i se tasi taeao, a o oʻu latalata atu i lona fale na ou faalogoina ai se leo, ma sa ou tū ma tau faalogo. Na ou lagona ai le leo o Hevoko o loo tatalo ma le lotoatoa iā Ieova, e faafetai atu ai i lona aʻoaʻoina o ia i le upu moni e uiga i Lona suafa ma le Malo. O lana tatalo faamaoni ua faamanatu mai ai iā te aʻu e silasila Ieova i le loto, ae lē o le lē iloa faitau ma tusitusi. E silafia lelei e Ia i latou e alolofa iā te ia.”—Ioa. 6:44.
Itulau 113, palakalafa e 2 e oo i le itulau 114, palakalafa e 3
UA FUA MAI FATU O LE MALO NA LŪLŪ
I le amatamataga o le vaitausaga o le 1970, na faavae ai se vaega toʻaitiiti o Molimau i le mauga o Hagen, e tusa ma le 80 maila [130 km] i Sisifo o Goroka. Sa lauiloa lenei aai i lona maketi telē. I vaiaso taʻitasi e gasolo atu i ai le toʻatele o tagata mai i mea mamao. Na faapea mai Dorothy Wright o se paeonia lototele, “E faitau selau lomiga e matou te tufaina atu i lenei maketi.” Ma pe a toe foʻi atu tagata i o latou nuu, e latou te ō ma ave le feʻau o le Malo i nuu maotua, lea e faigatā ona oo atu i ai le talaʻiga.
Mulimuli ane, na tofia le tama tama a Dorothy o Jim Wright, ma lona soa paeonia o Kerry Kay-Smith e galulue i Banz, o se itumalo lafulemu e totō ai le lautī ma le kofe i le vanu o Wahgi i le itu i sasaʻe o le mauga o Hagen. O i inā na latou fetaiaʻi ai ma teteega malolosi mai i faifeʻau lotu, o ē na faaoso tamaiti e fetogi i laʻua i maa ma tutuli ese mai i lo latou nuu. Ina ua alu atu Kerry i le isi ona tofiga, sa nofo pea Jim i Banz ma paeonia ai na o ia. Sa ia faapea mai: “E tele pō ou te taotooto ai i loʻu fale lauvao ma tatalo, e tau lē mafai ona ou moe. ʻIeova e, aiseā ua ou saga nofo ai pea i inei?’ Na faatoʻā ou maua le tali o lenei fesili ina ua mavae le tele o tausaga.”
“I le tausaga e 2007, na ou toe malaga atu ai i Banz mai i Ausetalia ina ia ou auai i se tauaofiaga itumalo,” na faapea atili mai Jim “I tafatafa i le mea sa iai loʻu fale lauvao o loo tū ai se Maota fou matagofie mo Sauniga, e mafai ona faatelē mo fonotaga e ofi ai nofoa e 1,000. Ina ua ou taunuu atu i le lotoā, na tamoʻe faavave mai se uso, fusi aʻu ma tagi. Ina ua toʻafilemu le uso, na ia faamatala mai, o ia o Paul Tai, sa ma suʻesuʻe ma lona tamā i le 36 tausaga ua mavae. Sa mulimuli ane faitau e Paul tusi na suʻesuʻe ai lona tamā ma iʻu ai ina talia le upu moni. Ma ua ia faapea mai iā te aʻu, o lea ua avea nei o ia ma toeaina.
Ua faapea mai Jim: “I le taimi o le tauaofiaga, na faatalanoa ai aʻu i luga o le pulelaa, ma faamatala atu sauāga na ma onosaia i aso ua mavae i le nuu o Banz. Na fetagisi le toʻatele o le aofia. Ina ua uma le polokalame, na o mai nisi o uso ma fusi aʻu, fetagisi ma faatoese mai, ona o nisi o i latou nei sa fetogia aʻu i maa ma lafo atu upu faifai. E lē gata i lea, o Mange Samgar o se toeaina, o ia lea o le faifeʻau o le lotu Luteru, lea na ia faaoso tamaiti e fetogia i maʻua i maa! Maʻeu se matagofie o le faatasitasiga i lenei tauaofiaga!”