Le Auala E te Sao Atu ai i le Lalolagi Fou

Na faailoa mai i le mataupu ua mavae, ua toeitiiti ona faaumatia lea e le Atua tagata amioleaga ma faaiʻuina faafitauli uma. E mafai ona tatou mautinoa o le a tupu moni lenā mea. Aiseā? Auā ua folafola mai e le Afioga a le Atua, le Tusi Paia:

“E mavae atu foʻi le lalolagi.”—1 IOANE 2:17.

E tatou te mautinoa e iai i latou o le a faasaoina, auā ua folafola mai foʻi i lenei mau:

“O lē e faia le finagalo o le Atua e tumau e faavavau.”

O lea, pe a fia faasaoina i tatou, e tatau ona tatou faia le finagalo o le Atua. Ina ia iloa po o le ā le finagalo o le Atua, e tatau ona tatou iloa muamua o ia.

FAASAOINA MAI LE IʻUGA E ALA I LE “ILOA” O LE ATUA

Tuufaatasiga o ata: 1. O se tausimaʻi o loo saofaʻi, ua foliga lē lavā ma mafatia. 2. O loo fai lana mālōlōga i le faleʻaiga ma iloa atu ai sana uō i le galuega o loo faitau ma le fiafia se mekasini. 3. O loo faitau atu e sana uō i le galuega se mau, ma avatu iā te ia se pepa o faamatalaga mo le jw.org.

Na fetalai Iesu: “O le ola e faavavau foʻi lenei, ia latou iloa oe, le Atua moni e toʻatasi.” (Ioane 17:3) Ina ia faasaoina mai le iʻuga ma maua le ola e faavavau, e tatau ona tatou “iloa” le Atua. E tele mea e aofia ai nai lo le tau ina talitonu e iai le Atua, po o le iloaina o ni nai faamatalaga e faatatau iā te ia. E tatau ona tatou faauō atu iā te ia. Pe a tatou mananaʻo e faamalosia se faigāuō, e tatau ona faaalu ai le tele o le taimi. E faapena foʻi le auala e faamalosia ai se faigāuō ma le Atua. Mātau nisi o upu moni tāua e tatou te aʻoaʻoina mai i le Tusi Paia, e fesoasoani iā i tatou e atiaʻe ma faatumauina ai le faauōga ma le Atua.

Upu Moni Tatou te Aʻoaʻoina Mai i le Tusi Paia

Tatou te aʻoaʻoina mai ai, na finagalo le Atua ia tatou ola e faavavau i le Parataiso.

Na ia foafoaina le uluaʻi ulugalii o Atamu ma Eva, ma tuu i se nofoaga matagofie e taʻua o le faatoʻaga o Etena. Na lelei atoatoa i laʻua, ma na saunia e le Atua mea uma na la manaʻomia ina ia maua ai le olioli i le olaga. Na mafai ona la ola e faavavau. E lē oo iā i laʻua le oti, pe a tumau ona avea ma uō a le Atua. Peitaʻi, na la filifili e lē usiusitaʻi i le faatonuga faigofie na tuuina atu e le Atua iā i laʻua.

Tatou te aʻoaʻoina mai ai le māfuaaga ua tatou mafatia ai.

O le lē usiusitaʻi o le uluaʻi tagata o Atamu i le Atua, e lē gata ua ia lē maua ai le ola e faavavau, ae ua lē maua ai foʻi e tagata uma lava. Ua faapea mai le Tusi Paia: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma.” (Roma 5:12) E pei lava ona aafia se tagata i se faamaʻi na tuufaasolo mai i ona mātua, ua faapena foʻi ona aafia ē uma na tupuga mai iā Atamu i le tulaga lē lelei atoatoa na tuufaasolo mai iā te ia. O le iʻuga, ua faasolo ai ina tatou matutua ma feoti.

Tatou te aʻoaʻoina mai ai le fesoasoani ua saunia e le Atua mo i tatou.

Ua faapea mai le Tusi Paia: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, ae ia maua le ola e faavavau.” (Ioane 3:16) Na auina mai e le Atua Iesu i le lalolagi e foaʻi mai lona ola mo i tatou. Na faapea mai se tamāloa e 86 tausaga mai Initia e igoa iā Prabhakar e faatatau i lenā gaoioiga alofa: “Ua faailoa mai ai le alofa tele o Ieovaa mo aʻu. O lona alofa ua ou maua ai le faamoemoe o le ola e faavavau.”

Tatou te aʻoaʻoina mai ai le auala e faaalia ai le talisapaia o mea ua faia e le Atua mo i tatou.

Ua faapea mai le Tusi Paia, e mafai ona faaalia lo tatou talisapaia o mea ua faia e le Atua mo i tatou, pe a tatou “tausi i ana poloaʻiga.” (1 Ioane 2:3) Ua faailoa mai e Ieova le Atua alofa iā i tatou mea e mafai ona tatou faia ina ia maua ai le fiafia i le taimi lenei. (Isaia 48:17, 18) E lē finagalo le Atua e tatou te mafatia. Ua ia folafola mai o le a tatou maua le olioli i le taimi lenei ma le avanoa e ola ai e faavavau, pe a mulimuli i ana faatonuga.

FAITAU E LĒ AUNOA LE AFIOGA A LE ATUA, LE TUSI PAIA

O le tausimaʻi lava lea o loo vaai atu i le lagi ina ua uma ona faitau lana Tusi Paia, i le taimi o lana mālōlōga. — E mafai ona faasaoina oe i le iʻuga o le lalolagi, pe a e tatalo i le Atua mo lana fesoasoani ma faia lona finagalo

E tatou te aai i aso uma ina ia faatumauina ai le ola. Ae ua faapea mai Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.”—Mataio 4:4.

I aso nei, e tatou te maua afioga a Ieova i le Tusi Paia. A o e suʻesuʻeina le Tusi Paia, o le a e aʻoaʻoina ai upu moni tāua e faatatau i le faiā a le Atua ma tagata i le taimi ua teʻa, taimi lenei, ma le lumanaʻi.

TATALO I LE ATUA MO LE FESOASOANI

O le ā e mafai ona e faia pe a e manaʻo e mulimuli i le taʻitaʻiga a le Atua, ae e faigatā ona tuua mea e sesē i lana silafaga? E mafai ona fesoasoani iā te oe le iloa lelei o le Atua.

Seʻi tatou talanoa e faatatau i se fafine e igoa iā Sakura, sa ola i se olaga lē mamā. Ina ua amata ona ia suʻesuʻeina le Tusi Paia, na ia iloa ai le faatonuga a le Atua ina ia “sosola ese mai i amioga lē mamā taufeusuaʻiga.” (1 Korinito 6:18) Na tatalo Sakura i le Atua mo le malosi ina ia mafai ai ona ia tuua lenei masaniga leaga. Ae na faaauau pea ona ia tauivi ma faaosoosoga. Na ia faapea mai, “Pe a oso ane mafaufauga lē mamā, ou te tatalo atu ma le faamaoni iā Ieova, auā ou te iloa e lē mafai ona ou fesagaʻia na o aʻu lenei faafitauli. O le malosi o le tatalo na ou vavalalata atu ai iā Ieova.” I le pei o Sakura, e faitau miliona tagata ua latou iloa le Atua. E na te foaʻi atu le malosi e latou te manaʻomia e faia ai suiga i o latou olaga, ma ola i se auala e faafiafiaina ai o ia.—Filipi 4:13.

O le tele e te iloa lelei ai le Atua, o le tele foʻi lenā o le a ʻiloa ai oe e le Atua’ o se uō alofa. (Kalatia 4:9; Salamo 25:14) O le a mafai ona e agavaa ai e ola i lana lalolagi fou. Ae o le a faapeʻī lenā lalolagi fou? O le a faamatala mai i le mataupu o loo sosoo mai.

a O Ieova, o le suafa lea o le Atua ua faailoa mai i le Tusi Paia.