Le Motu o Tagata e Toʻatele o Isi Mamoe o Loo Vivii i le Atua ma Faaalia le Lotofaafetai i le Keriso

1. O le ā se aafiaga i se tama talavou ina ua ia faalogo i se lauga na faia i le tauaofiaga i le 1935?

NA PAPATISO se tama talavou i le 1926 i le 18 o ona tausaga. O ona mātua o ni Tagata Aʻoga o le Tusi Paia lea na iloa ai Molimau a Ieova i lenā taimi. Na tausia aʻe e lenei ulugalii se fanau tama se toʻatolu ma ni teine se toʻalua ina ia auauna iā Ieova le Atua ma faaaʻoaʻo iā Iesu Keriso. Na ʻai ma inu lenei tama talavou faamaoni i le areto ma le uaina o le Talisuaga Afiafi a le Alii i tausaga uma, e pei ona faia e Tagata Aʻoga uma o le Tusi Paia i lenā taimi. Peitaʻi, na suia atoa lona faamoemoe i le lumanaʻi ina ua ia faalogo i se tasi o lauga iloga ua faamauina i le talafaasolopito o Molimau a Ieova na faamatuaina i le faa-Peretania “The Great Multitude.” Na faia lenā lauga e le uso o J. F. Rutherford i Washington, D.C., i Amerika i le 1935. O le ā na faalauiloa mai i lenā tauaofiaga?

2. O le ā le upu moni mataʻina na faailoa mai e le uso o Rutherford i lana lauga?

² Na faamatalaina e le uso o Rutherford i lenā lauga i latou o le a faia aʻe ai le “motu o tagata e toʻatele” o loo taʻua i le Faaaliga 7:9. I le taimi muamua, na manatu i lenei vaega o se vasega lona lua faalelagi o ni tagata e itiiti lo latou faamaoni. Na faaaogā e le uso o Rutherford le Tusi Paia e faamatala ai e leʻi filifilia le motu o tagata e toʻatele e ola i le lagi. Ae o i latou o se vaega o isi mamoe a Keriso,b lea o le a faasaoina atu i le “puapuaga tele” ma ola e faavavau i le lalolagi. (Faaa. 7:14) Na folafola mai e Iesu: “Ua iā te aʻu isi mamoe, o ē e lē o i lenei lotoā; e tatau foʻi ona ou aumaia i latou, ma latou te faalogo i loʻu leo, ona avea ai lea o i latou ma lafu e tasi, ma le leoleo mamoe e toʻatasi.” (Ioa. 10:16) O nei tagata e pei o ni mamoe o ni molimau faamaoni a Ieova ma ua iā i latou le faamoemoe e ola e faavavau i le Parataiso i le lalolagi. (Mata. 25:31-33, 46) Seʻi o tatou talanoa pe faapefea i lenei malamalamaga faaleagaga ona suia ai olaga o le toʻatele o tagata o Ieova, e aofia ai le uso talavou lea e 18 tausaga.​—Sala. 97:11; Faata. 4:18.

O SE MALAMALAMAGA FOU NA SUIA AI LE TOʻATELE

3-4. O le ā na iloa e le toʻatele mai i le tauaofiaga i le 1935, ma aiseā?

³ Na matuā faafiafiaina i latou uma na auai i le tauaofiaga ina ua talosaga atu le failauga: “O i latou uma e faamoemoe e ola e faavavau i le lalolagi, tutulaʻi mai faamolemole.” Na taʻua e se uso na auai i lenā tauaofiaga, e silia ma le afa o le 20,000 o tagata na auai na tutulaʻi. Ona faapea atu lea o le uso o Rutherford: “Faauta! O le motu o tagata e toʻatele!” Na alalaga fiafia le aofia. Na iloa e i latou na tutulaʻi, e leʻi filifilia i latou e ola i le lagi. Na latou iloa foʻi e leʻi faauuina i latou e le agaga paia o le Atua. I le aso na sosoo ai i le tauaofiaga, e toʻa 840 molimau na papatisoina ma o le toʻatele o i latou o isi mamoe.

⁴ Ina ua uma le lauga, e leʻi toe tagofia e le uso talavou lea na taʻua i le amataga ma le faitau afe o isi uso ma tuafāfine le areto ma le uaina o le Talisuaga Afiafi a le Alii. Na faaleo mai e se uso lotomaulalo faalogona o le toʻatele: “O le Faamanatuga i le 1935, o le taimi mulimuli lenā na ou tagofia ai le areto ma le uaina. Na ou iloa e leʻi tofia aʻu e le agaga paia o Ieova e ola i le lagi. Ae na iā te aʻu le faamoemoe o le ola i le lalolagi ma fesoasoani i le galueaʻiina o le lalolagi e avea ma parataiso.” (Roma 8:16, 17; 2 Kori. 1:21, 22) Talu mai lenā taimi ua matuā faatupulaʻia le aofaʻi o le motu o tagata e toʻatele ma o loo latou galulue soosootauʻau ma le vaega totoe o le ʻaufaauuina.c

5. O le ā le silafaga a Ieova iā i latou ua lē o toe tagofia le areto ma le uaina o le Faamanatuga?

⁵ O le ā le silafaga a Ieova iā i latou e leʻi toe tagofia le areto ma le uaina o le Faamanatuga talu mai le 1935? Ae e faapefea pe a tagofia e se molimau papatiso faamaoni a Ieova le areto ma le uaina o le Talisuaga Afiafi a le Alii ae mulimuli ane ia iloa e leʻi faauuina o ia e le agaga paia? (1 Kori. 11:28) O nisi na tagofia le areto ma le uaina ona e latou te leʻi malamalama lelei i lo latou faamoemoe. Ae pe a latou taʻutino ma le faamaoni lo latou sesē, ʻalofia le toe tagofia o le areto ma le uaina ma auauna faamaoni pea iā Ieova, e mautinoa o le a faaaofia e Ieova i latou i isi mamoe. O lea la, e ui e latou te lē o toe tagofia le areto ma le uaina, ae e latou te auai pea i le Faamanatuga ona e latou te matuā talisapaia mea ua faia e Ieova ma Iesu mo i latou.

SE FAAMOEMOE MATAʻINA

6. O le ā ua faatonuina e Iesu agelu e fai?

⁶ Talu ai ona ua matuā latalata mai lava le puapuaga tele, o lea, seʻi o tatou talanoaina atili mea o loo taʻua i le Faaaliga mataupu e fitu e faatatau i Kerisiano faauuina ma le motu o tagata e toʻatele o isi mamoe. I le amataga o le mataupu e fitu o Faaaliga, o loo faatonu ai e Iesu agelu ina ia taofimau pea i matagi e fā o le lalolagi. E tatau ona latou taofia pea nei matagi ina ia aua neʻi agi atu i le lalolagi seʻia māeʻa le faamaufaailogaina mulimuli o Kerisiano faauuina uma, o lona uiga ua faamaonia e Ieova lo latou faamaoni. (Faaa. 7:1-4) O uso faauuina o Keriso, o le a avea i latou ma tupu ma ositaulaga faatasi ma Iesu i le lagi. O le taui lenā o lo latou faamaoni. (Faaa. 20:6) Ua matuā naunau le vaega faalelagi o le aiga o le Atua e feiloaʻi atu i le 144,000 o Kerisiano faauuina pe a maua lo latou taui i le lagi.

7. E pei ona taʻua i le Faaaliga 7:9, 10, o ai na vaaia e Ioane i lenā faaaliga, ma o le ā o loo latou faia? (Tagaʻi i le ata i le faavaa.)

⁷ Ina ua uma ona faamatala mai e Ioane tupu ma ositaulaga e 144,000, ona ia vaaia ai lea o se mea mataʻina, “o se motu o tagata e toʻatele” ua faasaoina mai iā Amaketo. E ese le vaega lenei mai i le vaega muamua, e matuā toʻatele ma e lē mafaitaulia. (Faitau le Faaaliga 7:9, 10.) O loo latou “oofu i ofu talaloa papaʻe” e faailoa ai o loo tausia pea lo latou mamā ma e latou ʻte leʻi pisia’ mai i le lalolagi a Satani. O loo latou faamaoni pea i le Atua ma Keriso. (Iako. 1:27) O loo latou alalaga atu foʻi, ua latou maua le faaolataga ona o mea ua faia e Ieova ma Iesu le Tamaʻi Mamoe a le Atua mo i latou. O loo latou uuina foʻi laupama e faaalia ai lo latou talia ma le olioli o Iesu le Tupu tofia a Ieova.​—Faatusatusa i le Ioane 12:12, 13.

8. O le ā ua taʻua i le Faaaliga 7:11, 12 e faatatau i le aiga faalelagi o Ieova?

⁸ Faitau le Faaaliga 7:11, 12. O le ā na tupu ina ua vaaia e i latou i le lagi le motu o tagata e toʻatele? Na vaaia e Ioane le olioli tele o le aiga faalelagi o Ieova ina ua latou vaaia le motu o tagata e toʻatele ma o loo latou vivii atu i le Atua. O le a matuā fiafia le aiga faalelagi o Ieova pe a latou vaaia le faataunuuina o lenei faaaliga, o se motu o tagata e toʻatele o le a faasaoina mai i le puapuaga tele.

9. E tusa ai ma le Faaaliga 7:13-15, o le ā o loo faia e le motu o tagata e toʻatele i le taimi lenei?

⁹ Faitau le Faaaliga 7:13-15. Na lipotia mai e Ioane ua tatā e le motu o tagata e toʻatele o “latou ofu talaloa, ma faapaʻepaʻeina i le toto o le Tamaʻi Mamoe.” O lona uiga ua iā i latou se lotofuatiaifo mamā ma ua latou maua le finagalo malie o Ieova. (Isa. 1:18) O i latou o ni Kerisiano tuuina atu ma papatisoina ma e latou te faatuatua malosi i le taulaga togiola a Iesu. Ua iai foʻi sa latou faiā ma Ieova. (Ioa. 3:36; 1 Pete. 3:21) O lea, ua latou agavaa ai e tutū i luma o le nofoālii o le Atua ina ia latou tuuina atu ai iā te ia le auaunaga paia i le ao ma le pō i le lalolagi po o le lotoā o le malumalu faaleagaga. Ua latou faia foʻi ma le maelega i le taimi lenei le vaega tele o le talaʻia o le Malo ma le faia o isi ma soo. O lea, ua latou faamuamuaina ai manaʻoga o le Malo nai lo o latou lava manaʻoga.​—Mata. 6:33; 24:14; 28:19, 20.

10. O le ā ua mautinoa i ai le motu o tagata e toʻatele, ma o le ā le folafolaga o le a latou vaaia lona faataunuuina?

¹⁰ E mautinoa o le a faaauau pea ona tausia e le Atua le motu o tagata e toʻatele lea o le a faasaoina mai i le puapuaga tele, auā o le a ʻfofola atu e Lē o loo afio i le nofoālii lona faleʻie i luga iā i latou.’ O le a faataunuuina atoatoa ai le folafolaga lenei ua leva ona moomoo i ai isi mamoe: O le a “soloiesea foʻi [e le Atua] loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”​—Faaa. 21:3, 4.

11-12. (a) E pei ona taʻua i le Faaaliga 7:16, 17, o ā faamanuiaga o le a maua e le motu o tagata e toʻatele? (e) O le ā e mafai ona faia e isi mamoe i le Faamanatuga ma aiseā?

¹¹ Faitau le Faaaliga 7:16, 17. I le taimi lenei o loo mafatia nisi o tagata o Ieova i le fia aai ona o tulaga tau tamaoaiga e māfua ona o fetauaʻiga ma taua. O nisi ua faafalepuipuiina ona o latou talitonuga. E ui i lea, ua matuā faafiafiaina le motu o tagata e toʻatele ona ua latou iloa, o le a fau ma soloi meaʻai faaletino ma meaʻai faaleagaga e latou te maua pe a faasaoina atu i latou i le faaumatiaga o lenei faiga leaga o mea. Pe a faaumatia le lalolagi a Satani, o le a lē afāina le motu o tagata e toʻatele i le toʻasā o Ieova lea e faatusaina i se mea e “matuā vevela” tele. Pe a uma le puapuaga tele, o le a taʻitaʻia ai e Iesu le motu o tagata e toʻatele i “vai o le ola” e faavavau. Seʻi mafaufau: E mataʻina le faamoemoe mo le motu o tagata e toʻatele. E na o i latou o le a faasaoina mai i le faitau piliona o tagata.​—Ioa. 11:26.

¹² Maʻeu le lotofaafetai o isi mamoe iā Ieova ma Iesu ona o lenei faamoemoe mataʻina! E ui e leʻi filifilia i latou e ola i le lagi ae e lē faapea ai ua itiiti lo latou tāua iā Ieova. O lea la, e mafai uma e le ʻaufaauuina ma isi mamoe ona vivii i le Atua ma faailoa atu lo latou alolofa ma le lotofaafetai iā te ia ma Keriso. O se tasi o auala e latou te viia ai le Atua ma faailoa atu lo latou alolofa ma le lotofaafetai iā te ia ma Keriso, o le auai lea i le Talisuaga Afiafi a le Alii.

IA VIVII MA LOU LOTOATOA I LE FAAMANATUGA

13-14. Aiseā e tatau ai i isi mamoe ma le vaega totoe faauuina ona auai i le Faamanatuga o le maliu o Keriso?

¹³ I tausaga talu ai nei, i se fua faatatau e pe ā ma le toʻatasi mai i le toʻaafe o i latou e auai i le Faamanatuga e tagofia le areto ma le uaina. O le tele o faapotopotoga i le lalolagi aoao, e leai se tasi e tagofia le areto ma le uaina o le Faamanatuga. O le toʻatele la o tagata e auai i le Faamanatuga e faamoemoe e ola i le lalolagi. Ae aiseā la e latou te auai ai fua i le Faamanatuga? E tutusa māfuaaga e latou te auai ai i le Faamanatuga ma le māfuaaga e auai ai tagata i se faaipoipoga a sa latou uō. E auai na tagata i le faaipoipoga ona e latou te mananaʻo e faailoa atu lo latou alofa ma lo latou lagolagoina o le ulugalii faaipoipo. O le māfuaaga foʻi lenā e auai ai isi mamoe ona e latou te mananaʻo e faailoa atu lo latou alofa ma lo latou lagolagoina o le Keriso ma le ʻaufaauuina. E auai foʻi isi mamoe i le Faamanatuga e faaalia atu ai lo latou talisapaia o le taulaga togiola a Iesu. O lenā taulaga ua maua ai e i latou le avanoa e ola ai e faavavau i le lalolagi.

¹⁴ O le isi māfuaaga tāua e auai ai isi mamoe i le Faamanatuga, ina ia latou usitaʻia le faatonuga a Iesu. Ina ua faavaeina e Iesu lenei talisuaga faapitoa ma ona aposetolo faamaoni, na ia fetalai atu: “Ia faia pea lenei mea e fai ma faamanatuga iā te aʻu.” (1 Kori. 11:23-26) O lea, e faaauau pea ona latou faamanatuina le Talisuaga Afiafi a le Alii a o soifua pea nisi o le ʻaufaauuina i le lalolagi. E valaaulia foʻi e isi mamoe isi tagata e auai faatasi ma i latou i le Faamanatuga.

15. E faapefea ona tatou vivii i le Atua ma faailoa atu lo tatou alolofa ma le lotofaafetai iā te ia ma Keriso i le Faamanatuga?

¹⁵ I le Faamanatuga, e mafai ona tatou maua ai le avanoa e vivii ai i le Atua ma faailoa atu lo tatou alolofa ma le lotofaafetai iā te ia ma Keriso e ala i pese ma tatalo. O le lauga o lenei tausaga ua faamatuaina “Ia Lotofaafetai mo Mea ua Faia e le Atua ma Keriso mo Oe!” O le a faalolotoina i lenā lauga lo tatou lotofaafetai mo Ieova ma Keriso. Pe a tufa le areto ma le uaina i le Faamanatuga, o le a faamanatu mai ai i le aofia, e faaāta e le areto ma le uaina le tino ma le toto o Iesu. O le a faamanatu mai ai foʻi iā i tatou, na faataga e Ieova lona Alo e maliu mo i tatou ina ia tatou maua ai le ola. (Mata. 20:28) O le a auai i le Faamanatuga i latou uma e alolofa i lo tatou Tamā i le lagi ma lona Alo.

IA FAAFETAI IĀ IEOVA I LE FAAMOEMOE UA IA AUMAIA

16. O ā mea e tutusa ai le ʻaufaauuina ma isi mamoe?

¹⁶ E lē sili le alofa o Ieova i le ʻaufaauuina nai lo o isi mamoe. E tautele uma i latou iā Ieova, ona na ia totogiina le tau e tasi, o le ola o lona Alo pele e faatau mai ai le ʻaufaauuina ma isi mamoe. O le eseesega o nei vaega, e eseese lo latou faamoemoe. E tatau i nei vaega ona faamaoni pea i le Atua ma Keriso. (Sala. 31:23) Ia manatua, e foaʻi e Ieova lona agaga paia i tagata taʻitoʻatasi o le ʻaufaauuina ma isi mamoe e tusa ma o latou manaʻoga.

17. O le ā o le a tulimataʻia e le vaega totoe o le ʻaufaauuina?

¹⁷ E leʻi fananau mai Kerisiano faauuina ma le faamoemoe e ola i le lagi. E tuu e le Atua i totonu o latou loto lenā faamoemoe. E latou te manatunatu loloto ma tatalo e faatatau i lenā faamoemoe ma e latou te naunau foʻi i le mauaina o lo latou taui i le lagi. E latou te lē iloa le ituaiga tino agaga o le a liua i ai i latou. (Fili. 3:20, 21; 1 Ioa. 3:2) E ui i lea, e latou te tulimataʻia le taimi e latou te feiloaʻi ai ma Ieova, Iesu, le ʻauagelu ma isi ʻaufaauuina. E latou te naunau foʻi i le taimi e latou te pule faatasi mai ai i le Malo i le lagi.

18. O le ā e tulimataʻia e isi mamoe?

¹⁸ E tulimataʻia e isi mamoe le faamoemoe e naunau i ai tagata uma, o le ola e faavavau i le lalolagi. (Fai. 3:11) E latou te naunau ia oo mai le aso e latou te galueaʻiina ai le lalolagi e avea ma parataiso. E latou te tulimataʻia foʻi le aso e latou te fausia ai fale, totō ai togālaau ma tausia aʻe fanau i se siʻomaga soifua mālōlōina lelei atoatoa. (Isa. 65:21-23) E latou te tulimataʻia foʻi le taimi e latou te aʻea ai mauga, savalia togāvao, folau i vasa ma suʻesuʻeina le anoanoaʻi o foafoaga a Ieova i le lalolagi. Ae o le mea e sili ona faafiafiaina ai i latou ona o le a faamalosia pea ma o le a matuā vavalalata ai la latou faiā ma Ieova.

19. O le ā le avanoa e maua e i tatou taʻitoʻatasi mai i le Faamanatuga, ma o afea e faia ai le Faamanatuga i lenei tausaga?

¹⁹ Ua tuuina atu e Ieova i ana auauna tuuina atu uma se faamoemoe matagofie i le lumanaʻi. (Iere. 29:11) O le Faamanatuga o le maliu o Keriso, ua maua ai e i tatou taʻitoʻatasi se avanoa faapitoa e vivii ai i le Atua ma faailoa atu ai le lotofaafetai iā te ia ma Keriso mo mea ua la faia mo i tatou ina ia tatou maua ai le ola e faavavau. O le Faamanatuga, o se sauniga e sili ona tāua i Kerisiano moni e faapotopoto faatasi ai. O le a faia le Faamanatuga i le Aso Toonaʻi, Mati 27, 2021, pe a goto le lā. I lenei tausaga, e toʻatele e saʻoloto e auai i lenei sauniga faapitoa. O nisi e mafai ona auai e ui i teteega, a o nisi o le a feagai ma luʻi a o latou faamanatuina le Faamanatuga i falepuipui. O lea, tau ina ia maua e faapotopotoga uma, o vaega, ma tagata taʻitoʻatasi uma se Faamanatuga fiafia, a o silasila mai Ieova, Iesu ma le vaega faalelagi o le aiga o le Atua!