Le Suafa o Ieova—Aiseā e Tāua ai iā i Tatou?

1-2. E faapefea ona tatou iloa e tāua iā Iesu le suafa o Ieova?

NA AUPITO i sili ona tāua iā Iesu le suafa o Ieova. E leai se isi na sili atu ona faailoaina mai le suafa o Ieova nai lo o Iesu. E pei ona talanoaina i le suʻesuʻega ua mavae, na lotomalie Iesu e maliu mo le suafa o Ieova ma faamaonia ai le tonu o Ona ala uma. (Mare. 14:36; Epe. 10:​7-9) Pe a uma le Pulega o le Afe Tausaga a Iesu, o le a lotomalie o ia e tuu atu le pule uma iā Ieova ina ia faapaiaina ai le suafa o lona Tamā. (1 Kori. 15:​26-28) O le naunau o Iesu i le suafa o le Atua, ua tatou malamalama lelei ai foʻi i le māfana o le faiā a Iesu ma lona Tamā. Ua matuā faamaonia ai le alofa o Iesu i Lē e ou lenā suafa.

² Na afio mai Iesu i le suafa o lona Tamā. (Ioa. 5:43; 12:13) Na ia faailoa atu i ona soo le suafa o lona Tamā. (Ioa. 17:​6, 26) Na ia aʻoaʻo atu ma faia vavega i le suafa o Ieova. (Ioa. 10:25) O le mea moni, na talosaga atu Iesu iā Ieova ina ia leoleo i ona soo “ona o [Lona] suafa.” (Ioa. 17:11) O lea, pe afai o faalogona loloto na o Iesu i le suafa o Ieova, e faapefea la ona faapea mai se tasi o ia o se soo moni o Keriso, ae e na te lē iloa pe faaaogā le suafa o Ieova?

3. O le ā o le a tatou talanoaina i lenei suʻesuʻega?

³ I le avea ai o i tatou o ni Kerisiano o loo taumafai e mulimulituʻi i tulaga aao o Iesu, e pele foʻi iā i tatou le suafa o lona Tamā. (1 Pete. 2:21) I lenei suʻesuʻega, o le a tatou iloa ai pe e faapefea i le suafa o Ieova, ona mātaulia ai i latou o loo folafolaina atu le “tala lelei o le Malo.” (Mata. 24:14) O le a tatou talanoaina foʻi po o le ā le tāua o le suafa o Ieova iā i tatou taʻitoʻatasi.

“TAGATA MO LONA SUAFA”

4. (a) O le ā le faatonuga na avatu e Iesu i ona soo a o leʻi toe afio aʻe i le lagi? (e) O le ā le fesili ua tulaʻi mai ai?

⁴ A o leʻi afio aʻe Iesu i le lagi, na ia fetalai atu i ona soo: “O le a maua e outou le mana pe a oo ifo iā te outou le agaga paia, ma o le a fai outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:8) O lona uiga, e lē na o Isaraelu o le a talaʻia ai le tala lelei, ae o le a oo ina maua e tagata o atunuu uma le avanoa e avea ai ma soo o Iesu. (Mata. 28:​19, 20) Peitaʻi, na fetalai Iesu: “O le a fai outou ma molimau iā te aʻu.” Pe e manaʻomia ona iloa e nei soo fou le suafa o Ieova, pe e na o Iesu e manaʻomia ona latou molimau e faatatau i ai? O mea na tutupu o loo faamatalaina i le Galuega mataupu 15, o le a fesoasoani iā i tatou ina ia taliina ai lenā fesili.

5. Na faapefea ona faailoa mai e aposetolo ma toeaina i Ierusalema e manaʻomia ona iloa e tagata uma le suafa o Ieova? (Tagaʻi foʻi i le ata.)

⁵ I le 49 T.A., na feiloaʻi ai aposetolo ma toeaina i Ierusalema, ina ia talanoaina po o le ā e manaʻomia ona faia e tagata o Nuu Ese e leʻi peritomeina, ina ia avea ai o ni Kerisiano. I le faaiʻuga o lenā talanoaga, na faapea atu ai Iakopo le ʻafa uso o Iesu: “Ua uma ona faamatala auʻiliʻili atu e [Peteru] le uluaʻi taimi na silasila ai le Atua i nuu ese, ina ia filifilia mai ai ni tagata mo lona suafa.” O le suafa o ai lea na faasino atu i ai Iakopo? Na ia siiina mai upu a le perofeta o Amosa e faapea: “Ina ia mafai ai e tagata ua totoe ona matuā saʻili iā Ieova, faatasi ma tagata o nuu uma, ia ua faaigoaina i loʻu igoa, ua fetalai mai ai Ieova.” (Galu. 15:​14-18) E lē gata na manaʻomia ona aʻoaʻoina nei soo fou e faatatau iā Ieova, ae e ao foʻi ona ʻfaaigoaina i lona igoa.’ O lona uiga e ao ona latou tauaveina le suafa o le Atua, ma o le a mātaulia i latou i lenā suafa.

6-7. (a) Aiseā na afio mai ai Iesu i le lalolagi? (e) O le ā se isi māfuaaga e sili atu ona tāua na afio mai ai Iesu?

⁶ O le uiga o le suafa o Iesu, “O Ieova o le Faaolataga,” auā na faaaogā o ia e Ieova ina ia laveaʻia ai i latou e faaalia le faatuatua. Na afio mai Iesu i le lalolagi ina ia maliu mo tagata. (Mata. 20:28) O le faia e Iesu o le togiola, ua mafai ai ona laveaʻia tagata ma maua le ola e faavavau.—Ioa. 3:16.

⁷ Ae aiseā na manaʻomia ai ona laveaʻia tagata? Talu ai ona o le mea na tupu i le faatoʻaga o Etena. E pei ona taʻua i le mataupu ua mavae, na fouvale o tatou uluaʻi mātua o Atamu ma Eva iā Ieova, ma melea ai le avanoa e ola ai e faavavau. (Kene. 3:​6, 24) Peitaʻi, e iai se isi mea e sili atu ona tāua na aofia ai, e ese mai i le laveaʻiga o tagata agasala. Na taʻuleagaina le suafa o Ieova. (Kene. 3:​4, 5) O lea, e fesootaʻi atu le laveaʻiina o fanau a Atamu ma Eva i se mataupu e sili atu ona tāua, o le faapaiaina lea o le suafa o Ieova. Talu ai na fai Iesu ma sui o Ieova ma tauaveina Lona suafa, na iai la lana matafaioi tāua i le faapaiaina o le suafa o Ieova.

8. O le ā e tatau i soo uma o Iesu ona amanaʻia?

⁸ O i latou uma e faaalia le faatuatua iā Iesu, e tusa po o se Iutaia po o se tagata o Nuu Ese, e tatau ona latou amanaʻia o le Puna o lo latou faaolataga, o Ieova le Atua. (Ioa. 17:3) E lē gata i lea, i le pei o Iesu, e ao ona mātaulia i latou i le suafa o Ieova. E manaʻomia foʻi ona latou amanaʻia le tāua o le faapaiaina o lenā suafa, ona e faalagolago i ai lo latou faaolataga. (Galu. 2:​21, 22) O lea, e ao ona aʻoaʻoina soo faamaoni uma o Iesu e faatatau iā Ieova faapea ma Iesu. E lētioa faaiʻu e Iesu lana tatalo o loo faamauina i le Ioane 17 i upu nei: “Ua ou faailoa atu lou suafa iā i latou, ma saga faailoa atu, ina ia iā i latou le alofa lea na e alofa mai ai iā te aʻu, ma ou autasi ai ma i latou.”—Ioa. 17:26.

“O OUTOU O AʻU MOLIMAU”

9. E faapefea ona iloa e sili atu ona tāua le suafa o Ieova iā i tatou?

⁹ O lea, e manaʻomia i soo faamaoni uma o Iesu ona naunau i le faapaiaina o le suafa o Ieova. (Mata. 6:​9, 10) E tatau ona latou vāai i le suafa o Ieova o le suafa e sili ona tāua nai lo o isi igoa uma, ma e tatau ona atagia atu lenā mea i a latou gaoioiga. Ae e faapefea ona faia so tatou sao i le faapaiaina o le suafa o Ieova, ma faalēaogāina ai tuuaʻiga pepelo a Satani lea ua taʻuleagaina ai Lona suafa?

10. O le ā le faamasinoga faafaatusa o loo faamatalaina i le Isaia mataupu e 42 e oo i le 44? (Isaia 43:9; 44:​7-9) (Tagaʻi foʻi i le ata.)

¹⁰ O loo faamatilatila mai i le mataupu e 42 e oo i le 44 o le tusi o Isaia, le tāua o la tatou matafaioi i le faapaiaina o le suafa o Ieova. I na mataupu, o loo faamatala ai se faamasinoga faafaatusa, lea o loo finauina ai po o ai le Atua moni. O loo luʻia e Ieova isi uma o loo faapea mai o ni atua, ina ia faamaonia atu o i latou moni o ni atua. I le pei o se faamasinoga, o loo valaauina ai e Ieova pe e iai ni molimau e aumaia ni faamaoniga o le iai moni o nei atua. Peitaʻi, e leai se tasi na faia faapea.—Faitau le Isaia 43:9; 44:​7-9.

11. O le ā le fetalaiga a Ieova na fai atu i ona tagata, e pei ona faamauina i le Isaia 43:​10-12?

¹¹ Faitau le Isaia 43:​10-12. Ua faapea mai Ieova e faatatau i ona tagata: “O outou o aʻu molimau, ma o aʻu o le Atua.” Na fesiligia e Ieova i latou e faapea: “Pe e iai se isi Atua e ese mai iā te aʻu?” (Isa. 44:8) Ua iā i tatou foʻi le faaeaga e taliina ai lenā fesili. E mafai ona tatou faamaonia atu o Ieova o le Atua moni, e ala i a tatou upu ma gaoioiga. E silisili atu lona suafa nai lo o isi igoa uma. E faamaonia atu i le auala e tatou te ola ai, e tatou te faamaoni ma alolofa moni iā Ieova, e tusa lava po o ā omiga e tatou te fesagaʻia ona o Satani. O le faia faapea, e faia ai so tatou sao i le faapaiaina o le suafa o Ieova.

12. Na faapefea ona faataunuuina le valoaga i le Isaia 40:​3, 5?

¹² O lo tatou lagolagoina o le itu a Ieova e ala i le faamamaluina o lona suafa po o lona talaaga, ua tatou faaaʻoaʻo ai iā Iesu Keriso. Na valoia e Iesu o le a iai se tasi e na te “faalaulelei [po o le, “saunia,” fpl.] le ala o Ieova.” (Isa. 40:3) Na faapefea ona faataunuuina lenā valoaga? Na sauniunia e Ioane le Papatiso le ala mo Iesu, o lē na afio mai i le suafa o Ieova ma talaʻi atu lenā suafa. (Mata. 3:3; Mare. 1:​2-4; Luka 3:​3-6) Ua faapea atili mai lenā lava valoaga: “O le a faaalia le mamalu o Ieova.” (Isa. 40:5) E faapefea? Ina ua afio mai Iesu i le lalolagi, na atoatoa ona ia faaatagia mai Ieova, ma na tai pei ai o Ieova lava ia lea na afio mai i le lalolagi.—Ioa. 12:45.

13. E faapefea ona tatou faaaʻoaʻo iā Iesu?

¹³ I le pei o Iesu, o i tatou foʻi o ni molimau a Ieova. O loo tatou tauaveina le suafa o Ieova ma taʻutaʻu atu i isi ana galuega mamana. Peitaʻi, ina ia avea o ni molimau lelei a Ieova, e manaʻomia foʻi ona tatou faailoa atu i isi le matafaioi tāua a Iesu i le faamamaluina o le suafa o Ieova. (Galu. 1:8) O Iesu o le molimau silisili a Ieova, ma e tatou te mulimuli i lana faaaʻoaʻoga. (Faaa. 1:5) O ā isi auala e faaalia atu ai e tāua iā i tatou le suafa o Ieova?

ISI AUALA E ILOA AI LE TĀUA IĀ I TATOU O LE SUAFA O IEOVA

14. O ā o tatou faalogona i le suafa o Ieova e pei ona faamatilatila mai i le Salamo 105:3?

¹⁴ E tatou te mitamita i le suafa o Ieova. (Faitau le Salamo 105:3.) E fiafia le finagalo o Ieova pe a silasila mai o loo tatou mitamita i lona suafa. (Iere. 9:​23, 24; 1 Kori. 1:31; 2 Kori. 10:17) O le “mitamita . . . iā Ieova,” e uiga atu i lo tatou mitamita i le avea ai o ia ma o tatou Atua. E tatou te vaai i ai o se matuā faaeaga lo tatou faamamaluina o lona suafa ma puipuia lona talaaga. E lē tatau ona tatou matamumuli e faailoa atu o i tatou o Molimau a Ieova, i ē e tatou te faigaluega ma aʻoʻoga faatasi, o tuaoi faapea ma isi. E naunau le Tiapolo ia aua neʻi o tatou faailoa atu i isi le suafa o Ieova. (Iere. 11:21; Faaa. 12:17) O le mea moni, e mananaʻo Satani ma ana perofeta pepelo ina ia faagaloina e tagata le suafa o Ieova. (Iere. 23:​26, 27) Peitaʻi, e tatou te fiafia i le suafa o Ieova “i le aso atoa,” ona o lo tatou matuā naunau i lona suafa.—Sala. 5:11; 89:16.

15. O le ā le uiga o le valaau i le suafa o Ieova?

¹⁵ E faaauau ona tatou valaau i le suafa o Ieova. (Ioe. 2:32; Roma 10:​13, 14) E tele isi mea e aofia ai i le valaau i le suafa o Ieova, nai lo o le tau ina iloa ma faaaogāina. E aofia ai lo tatou iloa lelei o le ituaiga o Atua e iai Ieova, maufaatuatuaina o ia, ma saʻili atu iā te ia mo le fesoasoani ma le taʻitaʻiga. (Sala. 20:7; 99:6; 116:4; 145:18) E tatou te faailoa atu foʻi i isi lona suafa ma ona uiga, ma apoapoaʻi atu iā i latou ina ia salamō ma gaoioi i se auala e maua ai le finagalo malie o Ieova.—Isa. 12:4; Galu. 2:​21, 38.

16. E faapefea ona e faamaonia atu e pepelo Satani?

¹⁶ E tatou te lotomalilie e sauāina ona o le suafa o Ieova. (Iako. 5:​10, 11) Pe a tatou tumau faamaoni iā Ieova e ui i sauāga, e tatou te faamaonia ai e pepelo Satani. I aso o Iopu, na tuuaʻia ai e Satani i latou e auauna iā Ieova e faapea: “E avatu e le tagata mea uma ua iā te ia e sui ai lona ola.” (Iopu 2:4) Na faapea mai Satani, e na o taimi e sologa lelei ai mea e auauna ai tagata iā Ieova, ae o le a latou tuua o Ia pe a feagai ma faigatā. Na faamaonia atu e le tagata faamaoni o Iopu le lē saʻo o lenā tuuaʻiga. Ua iā i tatou foʻi le faaeaga e faamaonia atu ai e lē taitai o tatou fulitua iā Ieova, e tusa lava po o ā omiga e tatou te fesagaʻia ona o Satani. E tatou te mautinoa o le a leoleoina i tatou e Ieova ona o lona suafa.—Ioa. 17:11.

17. O le ā le isi auala e tatou te faamamaluina ai le suafa o Ieova e pei ona taʻua i le 1 Peteru 2:12?

¹⁷ E tatou te faaalia le faaaloalo mo le suafa o Ieova. (Faata. 30:9; Iere. 7:​8-11) Talu ai o loo fai i tatou ma sui o Ieova ma tatou tauaveina lona suafa, e mafai la ona tatou faamamaluina lona suafa, pe taʻuleagaina foʻi. (Faitau 1 Peteru 2:12.) O lea, e ao ona tatou faia mea uma ina ia faamamaluina ai Ieova, e ala i a tatou upu ma gaoioiga. O le faia faapea, e tatou te faamamaluina ai lona suafa i le mea sili e tatou te mafaia, e ui i lo tatou tulaga lē lelei atoatoa.

18. O le ā se isi auala e faaalia atu ai e tatou te faatāua le suafa o Ieova? (Tagaʻi foʻi i le faamatalaga pito i lalo.)

¹⁸ E sili atu ona tatou faatāua le suafa o Ieova nai lo o ni manatu o isi e faatatau iā i tatou. (Sala. 138:2) Aiseā e tāua ai lo tatou faia faapea? Talu ai o lo tatou faamamaluina o le suafa o Ieova, e ono lē fiafia mai ai isi iā i tatou.a Ina ua maliu Iesu, na vaai tagata iā te ia o sē e solitulafono ma e inosia. Ae na lotomalie Iesu e maliu i lenā auala, ina ia faamamaluina ai le suafa o Ieova. “Na lē amanaʻia e ia le mā” pe popole foʻi i manatu o isi e faatatau iā te ia. (Epe. 12:​2-4) Nai lo o lea, na ia uaʻi atu i le faia o le finagalo o le Atua.—Mata. 26:39.

19. O ā ou faalogona i le suafa o Ieova, ma aiseā?

¹⁹ E tatou te mitamita i le suafa o Ieova, ma o se faaeaga le taʻua o i tatou o Molimau a Ieova. O le māfuaaga lea e tatou te onosaia ai so o se tauemuga e tatou te fesagaʻia. E sili atu ona tatou faatāua le suafa o Ieova nai lo o manatu o isi e faatatau iā i tatou. O lea, seʻi faaauau ona tatou maumauaʻi e faamamaluina le suafa o Ieova, e tusa lava po o ā taumafaiga a Satani e faavaivaia i tatou. O le faia faapea e iloa ai, o le suafa o Ieova o le mea lenā e aupito i silisili ona tāua iā i tatou, e pei foʻi ona faia e Iesu Keriso.