E Lava Mea Taumafa mo Tagata Uma!
TUSIA E LE SUI O LE ALA MAI! I PASILI
E MAFAI ona olioli i le anoanoai o mea taumafa lelei, peitai o loo tumau pea i le lē fiafia. Ina ia maua le fiafia moni ma le tumau, e iai se isi mea e manaomia—o meaʻai faaleagaga. Sa taʻua e Iesu: “E le na o mea e ʻai e ola ai le tagata, a o afioga uma e tulei mai i le fofoga o le Atua.”—Mataio 4:4.
Ae i le isi itu, o le teena o le Afioga a le Atua e taʻitaʻiina atu ai i le oge faaleagaga, e pei ona taʻua i le Amosa 8:11: “Ou te tuuina atu ai le oge i le nuu; e le se oge i mea e ʻai, po o se gālala i le fia inu vai, a o le oge i le faalogologo i afioga a Ieova.” Peitai, o le maʻi ona o le lē mauaina o meaʻai aogā faaleagaga e mafai ona alofia. Sa folafola mai e Iesu: “E fiafia ē amanaia o latou manaoga faaleagaga . . . E fiafia ē fia aai ma fia inu i le amiotonu; aua e maoona i latou.” (Mataio 5:3, 6, NW) E pei ona faamalieina o tatou tino i meaʻai tatau fuafuaina lelei mo le tino, o meaʻai lelei faaleagaga e faamalosia ai lo tatou faatuatua, ma lo tatou faamoemoe mo le lumanai. O le ā le ituaiga o lalolagi e mafai ona tatou faamoemoe atu i ai?
E Tele Meaʻai mo Tagata Uma
Seʻi mafaufau i se lalolagi o loo iai le anoanoai o taumafa susua ma le lelei. Se lalolagi e aunoa ma taua, mala, po o faalavelave tutupu e māfua ai le matelaina po o maʻi ua maua ona o le lē mauaina o meaʻai aogā, e māfua ai le vaivai po o le mafatia o tagata. O le a lē toe iai i latou e leai ni mea e nonofo ai, po o i latou e leai ni galuega o loo faalagolago atu i le tufatufaina mai o ni nai meaʻai po o sina mea e maua fua, o le a lē toe oso maualuga le tau o mea taumafa ua faamalosia ai tagata e ʻai so o se mea tau ina ia tali ai le laualo. “E taumafa o saito i le nuu i tumutumu lava o mauga.” (Salamo 72:16) Ae o le a faapefea ona oo mai lenei mea? O ai o le a foiaina le faafitauli o le maʻi e māfua mai i le lē mauaina o meaʻai aogā?
O le a liuliualo mai ma le alofa, Lē na Faia i tatou i manaoga o tagata mo meaʻai ua lava saunia. E oo lava i le tau o le lalolagi o le a pulea lelei, o lea ua faamautinoa mai ai o le a lē toe faaleagaina so o se mea totō. “E foaiina mai e Ieova lava le manuia; e fua mai foi e lo tatou laueleele ona lava fua.’’ (Salamo 85:12) E lē gata i lea, e ui ina lava meaʻai ua fuaina mai e le laueleele, ae e na o le Malo o le Atua o le a ia faaiuina le matapeapea ma pulega sauā, lea ua taʻitaʻiina atu ai i le lē lava o le faasoasoa, maʻi ona o le lē mauaina o meaʻai aogā, ma tulaga pagatia.
Ioe, o le a faamautinoa e le malo faalelagi o Ieova so o se faiga tau faifaatoaga ma auala o felauaiga o le a iai o le a aumaia ai meaʻai lelei i so o se vaipanoa e manaomia ai. O le pulega o le Malo o le a lē maumea ai ni nai tagata ae lafoai le toatele e galulue mamafa ina ia ola ai. Nai lo le lē mautinoa, ma le leai o se faamoemoe, o faamanuiaga o le Malo o le a aumai ai le olioli ua faaalia i le faigaʻai tele o mea lelei na folafola mai i le Isaia 25:6: “E faia e Ieova o ʻau i lenei mauga mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu.”
I le taimi nei, seʻi tepa faalemafaufau atu i le mou atu e faavavau o faiga tauva, omiga, ma le olaga ua leai se alofa. O le a leai se tasi e lē tausia lelei i meaʻai e aogā mo le tino pe toe maʻi. O lea la, afai e te manao moni e olioli i le olaga i lena lalolagi fou, ia utagia upu a Iesu: “Aua tou te galulue i mea e ʻai e pala, a o mea e ʻai e tumau i le ola faavavau.’’—Ioane 6:27.