Po o Lelei Lau Taumafa Faaleagaga?

“O le paleni lelei o meaʻai o le manaoga sili lea o le tagata. . . . Pe a lē lava meaʻai, o le a tatou feoti foi.”—Food and Nutrition.

O LENA faamatalaga moni autū ua faaatagia manino mai i tino paeee o tane, o fafine, ma tamaiti ua matelaina, o ē ua lē mauaina lenei “manaoga sili o le tagata.” Ua mafai e nisi ona faamalieina sina vaega o lenei manaoga, ae o loo iai pea i se tulaga matuia o le lē lava o meaʻai paleni. Peitai, o le toatele o tagata o ē o loo mafai ona lelei a latou meaʻai, ua faamalieina lava i latou i na o meaʻai e leai se lelei o le tino e maua ai (junk food) lea e itiiti se aogā e maua mai ai. Ua faapea mai le Healthy Eating: “O meaʻai ua foliga mai o se tasi lea o a tatou mea totino ua sili ona faaaogaseseina.”

Ua tutusa lava lenei tulaga ma meaʻai faaleagaga—le upu moni o loo maua i le Afioga a le Atua, le Tusi Paia. E oo lava i meaʻai autū faaleagaga ua lē mauaina e nisi tagata; ua matelaina faaleagaga i latou. O isi ua latou lafoaia le faaaogaina o meaʻai faaleagaga o loo iai. Ae faapefea oe? Po o lelei ea ona e fafagaina faaleagaga oe lava? Pe o le mea ea, e te musu e fafagaina oe faaleagaga? E tāua tele lo tatou faamaoni ia i tatou lava i lenei mataupu auā e sili atu ona tatou manaomia meaʻai faaleagaga nai lo o meaʻai faaletino.—Mataio 4:4.

Meaʻai mo le Tuputupu aʻe Faaleagaga

Ua taʻu mai ia i tatou e le tusi Food and Nutrition, lea e talanoaina ai le tāua o le iai o ni meaʻai paleni lelei, ni mafuaaga se tolu e ao ai ona taumafa lelei. O se tasi o mafuaaga, talu ai tatou te manaomia meaʻai “e atili ai ona tatou tutupu aʻe ma faaleleia ai le tino pe a oo ina faaleagaina nisi sela.” Pe e te iloa, o aso taitasi o lou olaga, e tiliona sela o lou tino e lē toe faaaogaina ma e manaomia ona toe faia nisi sela fou? O le lelei o le tuputupu aʻe ma le tausia lelei o le tino e manaomia ai le lelei o meaʻai.

Ua moni foi lena i le itu faaleagaga. Mo se faaaoaoga, ina ua tusi atu le aposetolo o Paulo i le faapotopotoga i Efeso, sa ia faamamafaina ai le manaomia e Kerisiano taitoatasi o ni meaʻai lelei faaleagaga ia avea ai ma “tagata matua.” (Efeso 4:11-13) Pe a lelei ona tatou fafagaina i tatou i meaʻai aogā faaleagaga, ona tatou lē toe faapei ai lea o ni pepe o loo vaivai, e lē mafai ona tausia i tatou lava, e maileia i so o se ituaiga o lamatiaga. (Efeso 4:14) Nai lo lea, tatou te tutupu aʻe o ni tagata matutua e malolosi, e mafai ona tatou tau malosi mo le faatuatua auā ua “tausia [i tatou] i upu o le faatuatua.”—1 Timoteo 4:6.

Po o moni ea lena i lou tulaga? Po o e tuputupu aʻe ea faaleagaga? Pe o pei lava oe o se pepe faaleagaga—e faasesegofie, e te faalagolago atoatoa atu i isi, ma e lē mafai ona e tauaveina ni tiute tauave atoatoa faa-Kerisiano? O le mea moni, e iai nisi o i tatou e vave ona faapea mai o loo faapei o ni pepe faaleagaga, peitai e talafeagai le toe tilofaia lelei o i tatou lava. Sa faapena le tulaga o nisi Kerisiano faauuina i le uluai senituri. E ui sa tatau ona avea i latou o ni “aʻoaʻo,” e mafai ma e naunau e aʻoaʻo atu i isi mea o fai mai ai le Afioga a le Atua, ae na tusi atu le aposetolo o Paulo: “E ao ina toe aʻoaʻoina outou e se tasi i mataupu muamua o le afioga a le Atua; ua avea foi outou ma e o tusa i ai le suāsusu, a e le o mea aano.” Pe afai e te manao e tuputupu aʻe faaleagaga, ia e faatupuina la se mataʻai mo meaʻai aano lelei faaleagaga. Aua le faamalieina i meaʻai mo pepe faaleagaga!—Eperu 5:12.

Tatou te manaomia foi nei meaʻai aano faaleagaga ina ia faaleleia ai so o se mea ua faaleagaina ona o tofotofoga i aso taitasi o loo tatou fesagaia i lenei lalolagi leaga. O na mea e mafai ona faavaivaia ai lo tatou malosi faaleagaga. Ae mafai e le Atua ona faafouina lena malosi. Na faapea mai Paulo: “Matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso.” (2 Korinito 4:16) Ua faapefea ona ‘faafouina i tatou i lea aso ma lea aso’? O se tasi o auala, o le fafagaina lea e lē aunoa i le Afioga a le Atua e ala i le suesueina totino ma le suesueina o vaega o le Afioga a le Atua ma lomiga faale-Tusi Paia.

Meaʻai mo le Malosi Faaleagaga

E manaomia foi meaʻai “e faatupu ai le malosi e faamafanafana ai le tino (heat) ma mafai ai ona gaoioi (energy).” E aogā meaʻai mo o tatou tino ina ia faagaoioi lelei ai. Afai e lē lelei ona tatou aai, o le a itiiti foi le malosi e galue mamafa ai. O le lē lava o le uamea (iron) i a tatou meaʻai, e mafai ona tatou lagona ai le vaivai ma le faapalupe. Po o faapena ea ou lagona i nisi taimi e tusa ai ma galuega faaleagaga? Po o avea ea ma ou faafitauli le tauaveina o tiute i le avea o se Kerisiano? O nisi o ē ua faapea mai o soo o Iesu Keriso ua oo ina faapalapala i le faia o mea lelei, ma ua latou lē mataalia mo galuega faa-Kerisiano. (Iakopo 2:17, 26) Pe afai e te iloa o le tulaga moni lena o loo e iai, o le vaifofo e faalagolago tele atu i le faaleleia o meaʻai faaleagaga o loo e faaaogā, po o le faateleina o le fafagaina o oe i meaʻai faaleagaga.—Isaia 40:29-31; Kalatia 6:9.

Aua neʻi faaseseina oe i le faia o ni masaniga lē lelei tau le fafagaina faaleagaga. O se tasi o mailei sili ua faaaogā e Satani i le tele o senituri, o le faatalitonu lea o tagata faapea latou te lē manaomia ona faitau le Tusi Paia ma aʻoaʻoina le poto saʻo o loo iai. Na te faaaogā se togafiti tuai sa masani ona faaaogā e autau e faia se osofaiga, ina ia faatoilalo ai aai o le fili—e lē avatua ni meaʻai ae faamatelaina seia oo ina siilima ane. Ae ua ia toe faaauauina atili lenei togafiti. Ua ia faaseseina i latou o loo ia “osofaia” ina ia latou faamatelaina i latou lava ae o loo siosiomia e se mauga o meaʻai lelei faaleagaga. E lētioa ona toatele tagata e paʻūū atu i ana osofaiga!—Efeso 6:10-18.

Meaʻai mo le Maloloina Faaleagaga

Ua faapea mai le Food and Nutrition o le mafuaaga lona tolu tatou te manaomia ai meaʻai, ina “ia sologa lelei ai le maloloina o le tino . . . ma puipuia ai mai faamaʻi.” E lē vave ona iloa manino mai aogā o meaʻai lelei. Pe a uma sa tatou ʻaiga manaia, e seāseā lava tatou faapea ifo, ‘Ua faia e lea mea se galuega lelei mo loʻu fatu (po o oʻu fatugaʻo po o musele o loʻu tino, ma isi lava mea).’ Ae seʻi faataitai la ona e lē taumafa mo se vaitaimi umi, ma ua amata ona iloa manino mai āuga o lou soifua maloloina. O ā āuga? Ua faapea mai se tasi tusi i mea faafomai: “O āuga e sili ona taatele o le faamaʻi i le lē lava o meaʻai paleni, o se āuga lē lelei: ua lē mafai ona foliga malaulau mai, ua lē mafai ona teena e oo lava i ni faamaʻi laiti, ua leai se malosi e gaoioi ai.” E tali faapena le ituaiga o maʻi faaleagaga na aafia ai Isaraelu anamua i se tasi taimi. Na taʻua e le perofeta o Isaia e faatatau ia i latou: “O loo maʻi le ulu uma, o loo vaivai le loto uma. E afua i le alofivae e oo lava i le ulu, e leai se mea ua sao.”—Isaia 1:5, 6.

O meaʻai lelei faaleagaga e aumaia ai ia i tatou le malosi e teena ai na tulaga e faavaivaia ai faaleagaga ma āuga o maʻi faaleagaga. O le poto mai le Atua e fesoasoani ia i tatou e tumau i se tulaga lelei faaleagaga—pe afai tatou te faaaogaina! Sa fetalai Iesu Keriso i le lē aʻoaʻoina o se lesona e le toatele o tagata o ona aso i le faatalalē o o latou augatamā i le mataupu o le fafagaina lelei faaleagaga. Sa latou teena foi le fafagaina i upu moni na ia aʻoaʻo atu. O le ā na iu i ai? Na fetalai Iesu: “Ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; neʻi vaai o latou mata, ma faalogo o latou taliga, ma lagona o latou loto, ma liliuina i latou, ma ou faamaloloina i latou.” (Mataio 13:15) Sa lē tāitai ona maua e le toatele o tagata ni aogā mai le mana faamālōlō o le Afioga a le Atua. Sa latou tumau ai pea i le mamaʻi faaleagaga. E oo lava i nisi Kerisiano faauuina sa latou “mamai . . . ma vaivai.” (1 Korinito 11:30) Tau ina ia lē tāitai ona tatou faaalia le ʻinoʻino mo meaʻai faaleagaga o loo saunia mai e le Atua.—Salamo 107:20.

Le Faaleagaina Faaleagaga

E lē gata i le faamataʻuga o le matelaina faaleagaga, ae ua iai foi se isi lamatiaga e manaomia ona tatou nofouta i ai—atonu o le ituaiga o meaʻai lea tatou te taumafaina ua faaleagaina. O le aʻoaʻoina o aʻoaʻoga ua faaleagaina e manatu matautia faatemoni e mafai ona faaoonaina ai i tatou e pei lava ona faigofie ona tatou onanā pe a taumafaina ni meaʻai faaletino ua pisipisia i ni siama po o ni mea oona. (Kolose 2:8) E lē faigofie i taimi uma ona iloa meaʻai ua faaoonaina. Ua faapea mai se isi faamatalaga: “O meaʻai, atonu e foliga mai i nisi taimi e aogā peitai o loo iai siama e mamaʻi ai.” O lea e lelei ai pe a tatou iloiloina po o fea o puna mai ai a tatou meaʻai faafaatusa, i le manatuaina lea faapea, o nisi lomiga, e pei o tusitusiga a aposetate, atonu ua faaleagaina i le iai o ni aʻoaʻoga ma ni filosofia e lē faale-Tusi Paia. O nisi ʻau gaosi meaʻai ua latou faapipii mai ni faailoga sese i meaʻai, ina ia faasee ai a latou tagata faatau i mea o loo i totonu o a latou oloa. E mautinoa lo tatou faatalitalia o Satani, le taufaasese sili, na te faia lea lava mea. O lea la, ia mautinoa, ua e maua na meaʻai faafaatusa mai se puna e maufaatuatuaina, ina ia mafai ona e “faamaoni [“maloloina,” NW] i le faatuatua.”—Tito 1:9, 13.

O Thomas Adams, o se faifeau Porotesano o le 17 senituri, na ia faapea mai e faatatau i tagata i ona taimi: “Ua latou elia o latou lava tuugamau i o latou nifo.” I se isi faaupuga, o mea na latou taumafaina na māfua ai ona feoti. Ia faamautinoa o mea o loo e taumafaina faaleagaga e te lē oti ai. Ia saili mo meaʻai lelei faaleagaga. “Se a le mea tou te avatu ai a outou tupe i mea e le ni mea e ʻai?” o le fesili atu lea a Ieova le Atua ina ua liliu atu i aʻoaʻo ma perofeta pepelo, i latou o ē na faapea mai o ona tagata. “Seʻi matuā faalogologo mai ia ia te au, ma outou aai i mea lelei, e fiafia foi o outou loto i mea lololo. Uai mai ia o outou taliga, ma outou o mai ia te au; faalogologo mai ia, e ola ai o outou agaga.”—Isaia 55:2, 3; faatusatusa i le Ieremia 2:8, 13.

Le Anoanoai o Meaʻai Faaleagaga

E mautinoa lava e leai se oge i meaʻai faaleagaga lelei. E pei ona valoia e Iesu Keriso, ua iai nei lana vasega o le auauna faamaoni ma le mafaufau o loo galulue pea i le sauniunia o “mea e ʻai i ona itu aso” mo so o se tasi e manaomia. (Mataio 24:45) E ala mai i le perofeta o Isaia, na folafola ai e Ieova e faapea: “Faauta mai, e aai aʻu auauna, a o outou tou te fia aai; . . . e alalaga aʻu auauna ona o le loto fiafia.” O le mea moni, ua ia folafola mai se faigaai mo i latou o loo fia talisua ai. “E faia e Ieova o ʻau . . . mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei.”—Isaia 25:6; 65:13, 14.

Peitai, seʻi manatu i le mea lenei: E mafai lava ona tatou matelaina ma feoti ai i se faigaai! E tusa pe o tatou iai i le mea e tele ai meaʻai, ae e mafai ona tatou matuā pagatia pe afai tatou te lē uunaia i tatou e aai mai ai. Ua aumaia e le Faataoto 26:15 le faamatalaga moni lenei: “Ua faalilo e le paie lona lima i le tanoa; e musu o ia e faafoi mai ai i lona lava gutu.” Pagā se vaaiga faanoanoa! E faapena foi ona mafai ai ona tatou paie e faamalolosi i le faia o suesuega totino o le Afioga a le Atua ma lomiga faale-Tusi Paia ua fuafuaina e fesoasoani ia i tatou ina ia faaaogā meaʻai faaleagaga. Pe ono oo foi ina tatou matuā vaivai ua lē mafai ai ona sauniuni pe faia se sao i sauniga a le faapotopotoga Kerisiano.

Uiga Masani Lelei e Tusa ai ma le Taumafa

Ua ia i tatou la mafuaaga uma, e faatupu aʻe ai ni uiga masani lelei e tusa ai ma le taumafa faaleagaga. Peitai, o le mea moni lava, e toatele o loo aai togitogi i a latou meaʻai faaleagaga, o nisi ua latou matuā faamatelaina lava i latou. E mafai ona pei i latou o tagata o ē e lē iloa le tāua o se fua paleni lelei o meaʻai seiloga lava ua mafatia i ni āuga mulimuli ane i le olaga. Ua aumaia e le Healthy Eating le mafuaaga lenei atonu tatou te faatalalē ai i uiga masani o la tatou taumafa, e ui lava ina tatou iloa o le taumafa lelei e manaomia tele mo le olaga: “O le faafitauli talu ai [o se āuga o le lē sologa lelei o le ai] e lē vave faaleagaina le soifua maloloina, e leai se iuga faatopetope e pei o lea e oo i ai pe a laasia ma le faatalalē le auala. Nai lo lea, atonu e faaleagaina lemu le soifua maloloina o se tasi, ae faigata ona iloa atu, atonu o le a vave ona aafia i maʻi, atonu o le a vaivai ponaivi, atonu e umi se taimi e tau faapē ai ni manuʻa pe toe malosi mai ai se maʻi.”

I ni tulaga e sili atu ona matuia, e ono pei se tasi o se teine talavou lea ua pagatia i le anorexia nervosa (se maʻi e matuā paʻee ai ona o le lē lelei o meaʻai paleni). E talitonu lava o ia e itiiti se meaʻai na te manaomia, o loo atoatoa lelei lona malosi, e ui lava o le mea moni ua amata ona matuā leaga lona tino. Na iu lava ina matuā musu o ia e toe ai. Ua taʻua i se tusi o mataupu faafomaʻi: “O se tulaga matautia lena.” Aisea? “E ui lava e seāseā maliu moni se maʻi i le matelaina, ae faasolo ina matuā leaga lona tino i le lē lava o meaʻai paleni ma iu ai ina oti i se mea sa na o sina faamaʻi itiiti.”

Na taʻutino mai e se fafine Kerisiano: “E tele tausaga sa ou tauivi ai ma le iloaina o le manaoga o sauniuniga faifai pea mo sauniga ma suesuega totino, ae sa lē mafai ona ou faia.” Mulimuli ane ona faia lea o ni ana suiga ia avea ai o ia ma tagata aʻoga lelei o le Afioga a le Atua, ae na faatoʻā mafai lena mea ina ua ia iloa manino le matuia ua iai lona tulaga.

O lea, ia teu loto le fautuaga na avatu e le aposetolo o Peteru. Ia avea ma “tama meamea faatoa fanau mai,” ma ia “naunau . . . i le suāsusu faaleagaga e le suia, ina ia outou tutupu ai i le faaolataga.” (1 Peteru 2:2) Ioe, “ia naunau”—faatupu aʻe se faanaunauga malosi—ia faatumu lou mafaufau ma lou loto i le poto e uiga i le Atua. E manaomia foi e tagata matutua faaleagaga ona faatupuina pea lena faanaunauga. Aua neʻi avea meaʻai faaleagaga ma ‘se tasi o au mea totino e sili ona e faatalalē i ai.’ Ia lelei ona e taumafa faaleagaga, ma maua uma aogā mai “upu [uma] e ola ai” o loo maua i le Afioga a le Atua, le Tusi Paia.—2 Timoteo 1:13, 14.

[Ata i le itulau 28]

Po o manaomia ona e faaleleia le fua o au meaʻai paleni?