“Se Tulaga Autasi o le Saʻo Aʻiaʻi o le Taimiga”

TUSIA E LE SUI O LE ALA MAI! I AFERIKA I SAUTE

O LE tautala a le tagata o se mea e maofa ai. Pe tusa o le selau o musele i le fatafata, faaī, auvae, laulaufaiva, ma laugutu e galulue faatasi i le aumaia o le lē mafaitaulia o ituaiga o leo eseese. O musele taitasi o loo faia aʻe e se tuufaatasiga o alava e faitau selau i le faitau afe. E tele atu sela o le faiʻai o loo puleaina nei alava o musele (muscle fibers) e faaaogā mo le tautala nai lo ia e manaomia e faagaoioia ai musele o vae o se tagata taalo. E tasi le sela o neula e manaomia e faagaoioia ai le 2,000 alava o musele o atevae. O le eseesega, o sela o neula ia e pulea le pusa leo, po o le punāleo, atonu e faagaoioia a itiiti mai o le lua i le tolu alava o musele.

O upu taitasi po o se fuaiupu puupuu lea e te faaaogaina e iai lona lava faatulagaga o gaoioiga o musele. O faamatalaga uma e manaomia e taʻu ai se fuaiupu e pei o le “O faapefea mai oe?” o loo teuina i le vaega o lou faiʻai lea e puleaina le tautala. Po o le uiga ea la, o lou faiʻai e na te faaaogaina se polokalame faasolosolo tutasi e lē masuia o musele ina ia toe taʻua ai upu uma po o fuaiupu? E leai. O le vavega o le tautala e sili atu le ofoofogia nai lo lena. Mo se faataitaiga, atonu e iai se papala i lou fofoga lea ua faigata ai ona faaleo atu upu i lau auala tutasi. E aunoa ma le manatu i ai, ua fetuunai e le faiʻai le gaoioiga a musele o le tautala, ina ia mafai ai ona e faaleoina upu i se auala e latalata i lau tautala masani. Ua faasino atu ai e lenei mea i se isi mea moni ofoofogia.

O se faafeiloaiga faigofie e pei o le “Mālo” e mafai ona avatua ai le tele o uiga. O faaleoga a se tasi e mafai ona faaalia ai po o fiafia le tagata lea e tautala, faagaeetia, fiu, pisi, lē fiafia, faanoanoa, po o le fefe ma atonu e faaalia ai foi tulaga eseese o ia faalogona. Ioe, o le suia o le uiga o se faaupuga e tasi e faalagolago lea i le tele o le gaoioiga ma le taimiga o le tele o musele eseese.

“I se faatulagaga sologa lelei,” e pei ona faamatalaina e Dr. William H. Perkins i lana tusi Stuttering Prevented, “e tatou te faaleoina ai pe tusa o le 14 leo i le sekone e tasi. Tusa e faaluaina le vave nai lo le mea e tatou te mafaia i le puleaina o o tatou laulaufaiva, laugutu, auvae po o so o se isi lava vaega o puleaina la tatou tautala pe a tatou faagaoioia eseese ia mea. Ae a tuufaatasi la nei mea uma mo le tautala ona gaoioi ai lea e pei ona faia e tamatamailima o tagata lomitusi atamamai ma tagata ta piano i koneseti. O loo felagolagomai gaoioiga o ia mea i se tulaga autasi o le saʻo aʻiaʻi o le taimiga.”

I se tulaga faatapulaaina, o nisi o manulele e mafai ona latou faataitaia leo o tautala a tagata. Ae e leai se meaola e iai se faiʻai ua faapolokalameina e aumaia ai faamatalaga i le auala o loo faia ai e le tagata. Ua lē o se mea la e ofo ai le lē taulau manuia o saienitisi i a latou taumafaiga ina ia aʻoaʻoina le isi ituaiga o manuki (apes) e tautala ma le manino i leo. E tusa ai ma le tagata suesue i tulaga tau i neula (neurobiologist) o Ronald Netsell, o le tomai e manaomia i le tautala e mafai ona faatusaina i se “tagata na ia aʻoaʻo e ta le piano e fua i le na o le ‘⁠faalogo’ lava.” Po o le pei o le faaiuga a le tusitala o lomifefiloi o Ludwig Koehler: “O le tautala a le tagata o se mea lilo; o se meaalofa tauatua, o se vavega.”