Faafetaiaia o Ona Āuga

A O TAOTO i le moega i le falemai ua lē toe gaoioi le vae ma le lima, na fesili atu Gilbert i lana fomai: “Pe e toe mafai ea ona ou toe faaaogā loʻu lima ma loʻu vae?” Na ia maua se tali sa fai ma lui ia te ia: “O le tele o au taumafaiga, o le tele foi lena o le a e mafai ai, ma o le vave foi lena ona fai.” Na ia tali atu: “Ua ou sauni!” O le faiga faamalositino atoa ma le vaaiga mautinoa sa fesoasoani ia te ia e agaʻi ai i luma, mai lona matua ua 65, na see ese ai mai le faaaogā o le nofoa faataavalevale, sosoo ai ma le faaaogā o le tootoo faapitoa mo tagata lē atoatoa le malosi, sosoo ai ma le tootoo e tasi, seia oo ina toe alu e faigaluega.

“O le tele o faalapotopotoga e fesoasoani i ē na pē se itu o le tino ina ia toe malolosi e lagolagoina le manatu e faapea, afai e faaleagaina se tasi vaega o le faiʻai, e mafai e isi vaega o le faiʻai ona faaauau galuega a le pito o le faiʻai lea ua faaleagaina. O se tasi o fuafuaga o le togafitiga e lē gata ina ia iloa ai po o le ā se malosi o iai i vaega ia e lē o faaaogaina ae ia faapogaia ai foi le faiʻai ia iloa ma fetuunai atu i ai,” e pei ona taʻua ai e le ʻau suesue o Weiner, Lee, ma Bell. Peitai, e iai foi isi mea e faalagolago i ai le toe manuia, e pei o le vaega o le faiʻai lea ua afaina atoa ma le matuia o le pē o se itu o le tino, o le soifua maloloina masani o le tagata lava ia, o le tulaga o le tausiga faafomai, atoa ma le lagolago mai a isi.

Le Lagolago a Aiga ma Uo

Sa auai Erikka i faamalositino mo le tolu tausaga ina ia toe maua le malosi mai le pē o se itu o le tino, tau faamasani ai e savali ma faaaogā lona lima taumatau e fesoasoani i lona lima tauagavale ua afaina. Na ia faamatala mai le pogai na ia faaauau ai: “O le mea sili ona tāua o le tumau pea o le faamaoni o laʻu tane ma aʻu uo ia te au. I le iloaina latou te alolofa ia te au na aumai ai le malosi, ma pe a latou faamalosiau mai e aua ou te fiu, sa faamalosia ai aʻu.”

Ua avea tagata o aiga o nisi e fesoasoani mai i taumafaiga ina ia toe manuia ē pele ia i latou. E manaomia ona latou fesili i fomai ma ia mātau ma le faaeteete togafitiga ia e ono manaomia ona faaauau ona fai i le fale ia faaauau ai pea i le tulaga lelei ua iai. O le onosai, le agalelei, o le malamalama, ma le faapelepele lea e faaalia e tagata o le aiga ma uo e avatu ai se siomaga toafimalie tau faalogona lea e mafai ai ona toe aʻoaʻoina le tautala, le faitau, ma isi tomai o le olaga i aso faisoo.

I le taumafai e faapaleni ina ia maeʻa togafitiga ma ia avatu le faapelepele talafeagai, sa galue mamafa ai Ioane e fesoasoani i lana avā o Elena i le faia o faamalositino ma togafitiga. Sa ia faamatala mai taumafaiga a lona aiga e faapea: “Matou te lē tuulafoaia Elena e oo atu i le loloto o faalogona ootia faapea o ia ua lē taulau. E iai taimi matou te matuā uunai ai ia te ia, peitai matou te amanaiaina le mea e gata mai ai lona malosi ma avatu ia te ia le fesoasoani. Ua afainagofie lava ona faalogona, o lea ua ou matuā taumafai ina ia aua le faatiga atu.”

A o faamasani atu Elena e toe tautala e ala i fesoasoani a togafitiga sa fai, sa fesoasoani atu i ai Ioane. O le faia faatasi o mea sa avea ma faalaeiauga, o lea la ma te faitauina faatasi le Tusi Paia ma le leotele, lea sa fesoasoani e toe faaleleia lana tautala. E lē gata i lena, sa faifai mālie foi ona fai i le amataga, ma te auai i le faiva, ona o i maʻua o ni Molimau a Ieova. O le faia faapea sa fetufaai ai Elena ma isi i le faamoemoe o loo ia i maʻua mo le lumanai. Ia Elena sa avea lenei mea o se togafitiga.” E oo ane i le faaiuga o le tolu tausaga ua matuā telē le suiga lelei o Elena.

E lē tatau ona manatu māmā i le faamalosiau ma le malosi e maua mai uo, auā e iai sona āuga telē i le toe manuia o i latou ua maua i le pē o se itu o le tino. Sa lipotia mai e se mekasini faafomai e taʻu o le Stroke e faapea “o le toe manuia mai le pē o se itu o le tino, e faalagolago i le tele o le fesoasoani ma le lagolago faapelepele atu i ai, e oo lava ia i latou e matuia aafiaga o le pē o o latou tino.”

Sa matuā talisapaia tele e Peni le lagolago na avatu ia te ia e ana uo. Na ia faamanatu mai ia i tatou: “E aogā tele asiasiga a uo e fesoasoani ai i lē ua pē se itu o le tino ina ia onosai. E siitia le tulaga o faalogona ona o se leo faapelepele ma ni uiga manatu mamafa mai. Nai lo le tatou faasino atu i mea ua lē taulau ai le tagata, e faalaeiau tele lo tatou faamautinoa atu o le iai o se suiga lelei.” O ā mea e mafai e i tatou uma ona fai e fesoasoani ai ia i latou ua aafia i le pē o se itu o le tino? Na fautua mai Peni: “Ave se teu fugalaau e fai ma meaalofa, po o le talanoa i se manatu mai le Tusi Paia po o tala i mea tutupu. O mea na sa fesoasoani tele ia te au.”

Sa iloa e Melva o ia o se tuafafine matua o loo soifua mai ina ua pē se itu o lona tino, e aogā tele le iai o sona tuagane faaleagaga e tatalo faatasi ma ia. Sa fautua mai foi e Gilbert le mea lenei, fai mai a ia: “E faaalia e te matuā manatu mamafa moni lava pe a lua tatalo faatasi ma se isi.” O Peteru o lē na afaina lana vaai ona o le pē o se itu o lona tino, na ia talisapaia le malamalama o isi i lona faafitauli ma faaalu se taimi e faitau atu ia te ia.

O le fesoasoani i se tasi e ave ma toe aumai mai le nofoaga o togafitiga o se gaoioiga alofa tele. E talafeagai foi le faamautinoa e lē o iai se mea i lona fale e ono lavea ai lē ua maua i le pē o se itu o le tino. O se lamatiaga tele le fai ma paʻū ona o le lē paleni. Mo se faataitaiga o Gilbert, sa ia talisapaia le fesoasoani alofa a ana uo, o ē na latou faia le tele o mea e aofia ai ma le fausia o se uamea i le fale taele ina ia pipii i ai mo le saogalemu.

Faamasani e Tuuina Atu le Fesoasoani

O uiga femoumouai ma le oo mai o le lagona ua fia tagi e mafai ona faamasiasi ai le tagata o loo maua i le pē o se itu o le tino, ae e fememeai ai foi le tagata o loo tilotilo mai pe afai na te lē iloa le mea e fai. Peitai, o le tuuina atu o se fesoasoani, e mafai ai e uo ona faasaoina le tagata ua pē se itu o le tino mai le oo i ai o se faalogona tuua toatasi. E masani lava o le tulaga mātagitagi e fai ma aliaʻe mai lea taimi i lea taimi o le a faaitiitia. Ae a maligi loa loimata, ia faatoʻatoʻa pea ma nonofo ai ma le tagata, fai i ai ni upu e te fia faalogo i ai pe ana faapea o oe lea ua tupu ai le faafitauli.

E sili i na mea uma, ia ati ae le alofa faaleatua mo i latou atonu ua aliali mai ai faafitauli ua suia ai uiga nai lo uiga sa e iloa muamua. Latou te matauina ou faalogona, ma e ono mafai e lena mea ona aafia ai la latou tali mai ia te oe. Na faapea mai Erikka: “Atonu e lē mafai ona ou toe oo i loʻu tagata sa ou iai muamua. Ae e lē tatau ona faatalitalia e se tasi lena mea mai se tagata ua pē se itu o le tino. E ao i aiga ma uo ona faamasani e alolofa atu i le tagata i lona tulaga lea ua iai. Pe afai latou te iloiloina ma le faaeteete ona uiga totino o loo iai, o le a latou iloaina ai o loo iai pea ona uiga sili ona tāua sa iai muamua.”

E matuā paʻū maulalo lava le tulaga aloaia o le tagata pe afai e lē mafai ona tautala ia pe malamalama atu foi i ai se isi. O le fai la o se taumafaiga e talanoa atu ia i latou, o le a faamautū ai e uo le tulaga aloaia o i latou ua faaleagaina le tautala. O le faamatalaga lenei a Takashi: “O oʻu manatu ma oʻu faalogona i le loto e lei suia lava. Peitai, e taumafai tagata e alofia le talanoa mai ia te au ona e lē mafai ona ou faia ma i latou se talanoaga e masani ai. E faigata ia te au ona faalatalata atu i tagata, ae pe a sau se tagata ma talanoa mai ia te au, o se matuā faalaeiauga tele lava ma ou te matuā fiafia ai lava!”

O nisi nei o taiala e fesoasoani ia i tatou uma e lagolago ai ma faalaeiau i latou ua afaina le tautala.

O le tele lava o lenei maʻi o le pē o se itu o le tino e lē aafia ai le atamai. O le toatele lava o i latou ua toe manuia mai le pē o se itu o le tino o loo tumau pea le ala o le mafaufau, e ui lava atonu e faigata ona malamalama i a latou tautala. Aua lava e te tautala faafiapoto atu i ai po o le tautala i ai e pei o se pepe. Ia feagai ai ma i latou i se auala faaaloalo.

Faalogo atu ma le onosai. Atonu latou te manaomia se taimi ina ia latou faavasega ai se manatu pe ia faauma ai se upu, ni nai upu, po o se fuaiupu. Ia manatua, o le tagata e faalogo lelei e lē fiu e faalogo.

Aua le faafoliga mai ua e malamalama pe afai e te lei malamalama. Tautino atu ma le agalelei: “Faamalie atu, ou te lē o malamalama. Seʻi ta toe taumafai i se isi taimi mulimuli.”

Tautala faagesegese ma manino i le leo e masani ai.

Faaaogā fuaiupu pupuu ma upu e masani ai.

Faaaogā fesili ia e tali i le ioe, po o le leai, ma faalaeiau se tali mai. Aua foi neʻi galo latou te ono lē malamalama i au upu.

Taumafai e faaitiitia le pisa o le siomaga.

Feagai ai e Ala i le Lagolago Alofa Mai a Ieova

A o tāua le iloa o le mafuaaga o le pē o se itu o lou tino, auā o le a faigofie ai ona e gaoioi ma faaitiitia le ono toe aafia ai i le lumanai, e tāua foi le pulea o le fefe lea e aumai ai. Na faapea mai Elena: “Sa faamafanafanaina faapitoa lava aʻu e le Afioga a le Atua i le Isaia 41:10. Iina o loo ia faapea mai ai: ‘⁠Aua e te fefe, auā ou te ia te oe; aua le fetepatepai, auā o aʻu o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i loʻu lima taumatau e i ai le amiotonu.’ Sa matuā moni lava Ieova ia te au, na māfua ai ona ou lē fefe.”

Sa fesoasoani foi le Tusi Paia ia Anand e feagai ai ma faalogona lē taulau sa ia te ia: “Sa maua mai ai se fesoasoani tele mo aʻu, a o faamalosia ma faafouina ai aʻu.” O le faafitauli o Hiroyuki o le faapefea lea ona aogā ia te ia le Tusi Paia, auā sa lē faigofie ona ia manatunatu loloto i ai. Ua ia faapea mai: “Sa ou maua mai faamafanafanaga i le faalogologo atu i tusi o le Tusi Paia ua uma ona pueina i kaseti.”

Na faapea mai le aposetolo o Paulo: “Auā pe a ou vaivai, ona ou malosi ai lea.” (2 Korinito 12:10) O le agaga o Ieova lea sa fesoasoani ia Paulo e faataunuuina mea sa lē mafai ona faia e ia lava. O i latou ua toe manuia mai le pē o se itu o le tino e mafai foi ona faalagolago atu ia Ieova mo le malosi faaleagaga. Ua faamatala mai e Erikka e faapea: “A o tatou malolosi ma fai mea uma i lo tatou lava malosi, tatou te lē tuuina atu ia Ieova se avanoa tele e fesoasoani mai ai ia i tatou. Peitai ona ua lē atoatoa loʻu malosi ua mafai ai ona ou faamalosia le ma faiā ma ia i se auala faapitoa lava.”

Lagolago Atu i Ē o Avatua le Tausiga

E manaomia e i latou o loo avatua le tausiga se fesoasoani i o latou taimi faigata. O fea latou te liliu i ai mo se lagolago mai? O se tasi o nofoaga o le aiga. E ao i tagata uma ona fai se sao i le avatuina o le tausiga. Na taʻua e Yoshiko le auala sa avatu ai le fesoasoani tau i faalogona e lana fanau tama ia te ia e faapea: “Latou te faalogologo mai i oʻu faafitauli e pei lava o latou e ona ia faafitauli.” E ao i tagata uma o le aiga ona maua mai faamatalaga uma o loo iai ina ia mafai ai ona latou faamasani i le tausia o lē ua aafia i le pē o se itu o le tino ma ia iloa foi ona feagai ai ma suiga i uiga totino ua tulai mai i ē pele ia i latou.

O ai isi e mafai ona fesoasoani atu i ē o loo avatua le tausiga? Sa saili atu Tavita ma lona aiga i o latou aiga faaleagaga i totonu o le faapotopotoga a Molimau a Ieova e fesoasoani mai i le tausiga o Victor: “Sa latou tali mai i lo matou manao. Sa latou feauauai mai, mai lea taimi i lea taimi e ō mai ma momoe i lo matou fale ina ia latou tausia ai Victor i le po atoa mo i maʻua.”

E manaomia uma lava e i latou o loo avatua le tausiga le faalogoina o le alofa mafana ma le lagolago mai a o latou aiga faaleagaga. Peitai e faafaigata e nisi ona fesili atu mo se fesoasoani. Na faamatala mai e Haruko e faapea: “E tele taimi e taʻu mai ai ia te au e faapea: ‘A iai se mea e te manaomia ai se fesoasoani, aua e te faatalatū ae taʻu mai ia i matou.’ Peitai ona ou te iloa lo latou pisi uma, o le pogai lea ou te lē fai atu ai mo se fesoasoani. Ou te matuā faafetai lava pe a ofo mai e tagata le fesoasoani i ni auala faapitoa e pei o le: ‘E mafai ona ou fesoasoani atu e faamamā lou fale. O fea le aso lelei mo oe ou te sau ai?’ ‘E mafai ona ou sau e fai lau faatau, o talafeagai ma oe ae ou alu atu nei loa e fai?’”

E ui lava ina sa maua le avā a Kenji i le pē o se itu o le tino, ae sa mafai ona ia saunia le fesoasoani na ia manaomia. Sa ia iloa e mafai ona ia lafo atu ona popolega ia Ieova e ala i le tatalo. O le mea na iu i ai, sa lē toe mafai e lana avā ona tautala, ona o lena mea, ua leai se paaga a Kenji e talanoa atu i ai. Peitai na te faitau le Tusi Paia i aso uma. Na ia faapea mai: “Sa faamanatu mai ai ia te au le alofa mutimutivale o Ieova mo i latou ua maua i le lotomafatia, ma ona o lenei mea sa taofia ai aʻu mai le lotonutimomoia ma le tuua toatasi.”

Pe a foliga mai o le a lutia i tatou i faalogona ootia e fesoasoani tele le faalagolago atu i le agaga o Ieova. Sa faamatala mai e Yoshiko, o lē sa feagai ma suiga o uiga totino ma le itaitagofie o lana tane ina ua maua i le pē o se itu o le tino e faapea: “O nisi taimi e uunaia ai aʻu e le lagona o le eʻē i le mea e gata ai loʻu leo. O taimi faapena ou te tatalo ai e lē aunoa ia Ieova, ma e aumaia e lona agaga ia te au le filemu.” I le faaalia o lona talisapaia o le faamaoni mai o Ieova ia te ia, na te lei faatagaina ai lava se mea e faalavelaveina lona soifuaga faa-Kerisiano. E auai o ia e lē aunoa i sauniga faa-Kerisiano, e auai i le faiva, ma fai suesuega totino faale-Tusi Paia. Na faapea mai Yoshiko: “Afai e fai laʻu vaega, ou te iloa o le a lē tuulafoaia aʻu e Ieova.”

Pe a oo ina saputu mai popolega, e faafofoga mai Ieova i taimi uma lava. Sa maua e Midori, o lē na toe manuia le pē o se itu o le tino o lana tane, se faamafanafanaga mai le mea moni e faapea, i se tulaga faafaatusa, o loo utu uma e Ieova ona [Midori] loimata i lana “fagu.” (Salamo 56:8) Na te manatua foi upu a Iesu e faapea: “Aua tou te popole i le aso a taeao.” Sa ia faapea mai: “Ua uma ona fai laʻu filifiliga ia ou onosai sei oo mai le lalolagi fou.”—Mataio 6:31-34.

Fesagaia o Tulaga ua Faatapulaa Mea e Mafai Ona Fai

E moni lava i a latou togafitiga ma faamalositino o isi e toe faafoisia le tele o le malosi, ae o nisi e itiiti lava sina malosi lea sa iai a o lei maʻi e toe maua mai. O le ā la e fesoasoani ia i latou ia e tau lē tele se malosi e toe maua ina ia fesagaia le luitau e talia le mea moni ua iai mea ua latou lē toe mafai ona fai, e ui ina matuā faigata ma faaumiumi?

Sa tali mai Peni o lē sa toetoe lava mou uma atu lona malosi e gaoioi ai ona o le pē o se itu o lona tino, e faapea: “O le olioli i loʻu faamoemoe o le ola e faavavau i le lalolagi parataiso o loo fotuai mai ma le tatalo i loʻu Tamā faalelagi o Ieova, ua fesoasoani ia te au e talia ma le toafimalie mea ua lē toe mafai ona ou faia.”

O le faamoemoe lava foi lena sa fesoasoani ia Erikka ma lana tane, o Georg, e talia le mea moni faapea ua faatapulaa mea e mafai ona fai e Erikka ma faatumauina pea lo la olioli i le soifuaga. Na faamatala mai e Georg e faapea: “Ua ia i matou le folafolaga a le Atua e iai le aso o le a matuā faamaloloina atoatoa lelei ai. O lea la matou te lē o popole tele ona o le faatapulaa o le malosi. O le mea moni, o loo matou faia le mea e sili matou te mafaia mo le soifua maloloina o Erikka. Peitai e mafai lava ona e faamasani e ola faatasi ai ma le lē lelei atoatoa o maso ma taulai atu i mea e aogā.”—Isaia 33:24; 35:5, 6; Faaaliga 21:4.

I tulaga e itiiti lava se suiga lelei o maua mai, e matuā tāua tele ai le fesoasoani a aiga ma uo. E mafai ona latou fesoasoani i lē ua pē se itu o lona tino e tauivi seia oo i le taimi a le Atua e faaleleia ai faaletonu uma tau le soifua maloloina.

O le iloaina e faapea o loo iai se lumanai matagofie mo ē ua maua i le pē o se itu o le tino ma o latou aiga, pe a toe faafoi mai le soifua maloloina lea o le a mafai ai ona latou taulimaina tulaga masani o le soifuaga i aso taitasi. E mafai ai ona latou faatalitali ma le onosai i suiga mai mafatiaga, i le lalolagi fou a le Atua ua lata tele mai. (Ieremia 29:11; 2 Peteru 3:13) I le taimi nei, o i latou uma e liliu atu ia Ieova e mafai ona latou mautinoa e oo lava i le taimi nei e mafai ona ia fesoasoani ma lagolago mai ia i latou e fesagaia tulaga lē taulau o le pē o se itu o le tino.—Salamo 33:22; 55:22.

[Faamatalaga faaopoopo i le itulau 24]

E mafai e aiga ma uo ona fesoasoani i lē ua pē se itu o lona tino e tauivi seia oo i le taimi a le Atua e faaleleia ai faaletonu uma tau le soifua maloloina

[Pusa/Ata i le itulau 22]

Puipuiga o le Pē o se Itu o le Tino

“O LE auala sili lava e faafesagaia ai le pē o se itu o le tino o le taumafai lea ia puipui mai ai,” o le tala lea a Dr. David Levine. Ma o le vala numera tasi e ō mai faatasi ma le tele o pē o se itu o le tino o le toto maualuga.

O le toatele o tagata, e mafai ona puleaina le toto maualuga e ala i le fua o meaʻai, o meaʻai e tele ai minerale (potassium) ma tau leai se masima, tau leai se gaʻo, ma maulalo foi le fua o le cholesterol. O le faaitiitia o le faaaogaina o le ʻava malosi e tāua foi. O se polokalame faifai pea o faamalositino e fetaui mo le matua ma le tulaga o se tasi e mafai ona fesoasoani e faaitiitia ai le mamafa, lea e iu ai ina ono faaitiitia ai le toto maualuga. E ono tatau ona inumia fualaau—ua faatonuina e se fomai, e tele vailaau eseese o loo mafai ona mauaina.

O le faamaʻi i le alatoto tele o le ua (carotid), e faapuiti ai le ala tele e agaʻi atu ai le toto i le faiʻai ma e telē se vaega i le faapogaia o le pē o se itu o le tino. E faalagolago i le tele o le poloka ua iai, ona foliga mai lea ua manaomia se taotoga e taʻua o le carotid endarterectomy ina ia faaleleia ai alatoto ua poloka. Ua faaalia i suesuega e faapea o tagata na iloa faamaoniga vaaia o lea faamaʻi ma matuā puiti lava alatoto, na faamanuiaina i taotoga sa fai faatasi ma togafitiga faafomai. E ui i lea, e mafai ona iai faafitauli e fesootai i taotoga, e tatau ai la ona iloiloina ma le faaeteete lea tulaga.

O le maʻi fatu e mafai ona faateleina ai le ono lamatia i le pē o se vaega o le tino. O le fetoitoi ona tātā o le fatu (atrial fibrillation), lea e faapogaia ai alualutoto ia potopotoi ma ō atu agaʻi i le faiʻai, e mafai ona togafitia i vailaau e soloia ai alualutoto. O isi faafitauli tau i le fatu e ono manaomia ai taotoga ma vailaau faafomai e faaitiitia ai le ono lamatia i le pē o se itu o le tino. Ua taʻua foi le maʻi suka mo le mafuaaga o le tele o maʻi pē o se itu o le tino, o le puleaina lelei la e fesoasoani e puipuia ai mai le pē o se itu o le tino.

O osofaiga pupuu o le lē sologa lelei o le toto (transient ischemic), o lapataiga manino ia e faapea e ono tupu mai le pē o se itu o le tino. Ia mautinoa ua lē o faaleamanaiaina ia lapataiga. Ia vaai lau fomai, ma feagai ai ma le tulaga ua aliali mai, ona e faateleina e osofaiga ia (transient ischemic), le ono lamatia i le tele o taimi i le pē o se itu o le tino.

O se olaga e soifua maloloina lelei ma pulea e mafai ona tele se sao e puipuia ai mai le pē o se itu o le tino. O le fua paleni o meaʻai masani ma faamalositino faifai pea atoa ai ma le faaitiitia o le taumafaina o le ʻava malosi ma taofia le ulaula, e mafai ona fesoasoani e lelei ai pea alatoto ma oo ina faaleleia ai alatoto ua faaleagaina. O le tele o le taumafaina o fualaau fou taumafamata ma fualaau ʻaina ma fatu o laau ʻaina, e fesoasoani lena e faaitiitia ai le ono lamatia i le pē o se itu o le tino, e tusa ai i le tele o suesuega ua faia.