O le ā se Lumanai o le a Iai mo Fafine?

“O LE talafaasolopito o tagata o se talaaga o faiga faifai pea o le faamanualia ma le pule lē amiotonu a tamaloloa faasaga i fafine.” O upu ia mai le Seneca Falls, New York, Declaration of Sentiments, sa tusia i Amerika i le 150 tausaga ua tuanai o se tetee faasaga i faiga lē tonu i fafine.

Na mautinoa le faaleleia o ia tulaga talu mai na taimi, ae pei ona taʻua e le tusi a Malo Aufaatasi The World’s Women 1995, o loo tele pea se faaleleia e tatau ona faia. Ua lipotia mai e le tusi faapea: “E masani lava, o fafine ma tane o loo ola i ni olaga e matuā eseese lava, e eseese i le lē mafai e fafine ona maua avanoa mo le aʻoaʻoina ma avanoa i le mauaina o galuega, le soifua maloloina, le saogalemu totino ma taimi paganoa.”

O le faatuputeleina o le amanaiaina o lenei mea ua taitaiina atu ai malo e pasia tulafono e puipuia ai aiā tatau a fafine. Peitai o tulafono e lē mafai ona suia ai loto, o le pogai lea o faiga lē tonu ma le faaituau. Mo se faataitaiga, seʻi mafaufau i tulaga o teineiti ua tuuina atu i faiga faatalitane. Sa taʻua e le Newsweek lenei faiga lē alofa faava-o-malo e faapea: “Sa taulai tulafono i le taofia o le faileagaina faaleituaiga o tamaiti, ma o se mea lelei tele, ae e masani lava ona lē mauaina ai ni aogā lelei.” E faapena foi, o le iai o tulafono lava latou e lē puipuia ai faiga sauā. “Ua faaalia e mea moni le sauā faasaga i tamaitai o se faafitauli ua salalau atu i le lalolagi atoa,” o le faamatalaga lea a le Human Development Report 1995. “O le tele o tulafono e lē atoatoa mo le taofia o na sauaga—seʻi vaganā ai ua suia aganuu ma amioga o loo faatāuaina i aso nei.”—O upu faasisipa o a matou.

“O aganuu ma amioga o loo faatāuaina” e masani lava ona faavae aʻe i aganuu ua mauaʻa—o se mea ua matuā faigata lava ona suia. “O aganuu ua māfua ai ona talitonu tane faapea o fafine e tatau ona faaaogaina nai lo o le alofa i ai, ia faafaigaluega nai lo o le tausia,” o le faamatalaga lea a se fafine mai i Sasaʻe Tutotonu. “O le iuga, ua leai ai se leo o fafine e fai atu, leai se aiā, ma ua itiiti ai se avanoa pe afai e maua e faaleleia ai lona tulaga o iai.”

Aʻoaʻoina o Tane ma Tamā

O le Faalauiloaina o Āiāiga mo Gaoioiga na faaofi i totonu o le fonotaga a le lalolagi na faia i Beijing, Saina, e faatatau i fafine na faalauiloa ai faapea e na o “gaoioiga vave ma le autasi a tagata uma” e mafai ai ona ausia se “lalolagi filemu, e saʻo ma amanaiaina ai isi” lea o le a amanaiaina ai fafine.

So o se gaoioiga e maua ai se olaga e sili atu ona ‘filemu, saʻo, ma amanaiaina ai isi’ e tatau ona amataina i le aiga, i tane ma tamā. I lenei la tulaga, ua faamaonia ai e Molimau a Ieova faapea o le aʻoaʻoina o le Tusi Paia o le auala lea e taulau manuia ai. Ua latou vaai i ai, o le taimi lava e aʻoaʻoina ai e tane faapea o loo faatalitalia e le Atua i latou e tausia a latou avā ma fanau teine i le āva ma le amanaiaina o i latou, ona latou teulotoina loa lea ma faia faapea.

I Aferika Tutotonu, ua amanaiaina ai nei e Pedro manaoga o lana avā, o ia o se tamā faaipoipo e toʻafā lana fanau. Ua ia fesoasoani atu i le tausia o le fanau, ma ua oo foi ina ia laulauina meaʻai pe a aai faatasi malo ma le aiga. O lea uiga magafagafa e seāseā lava ona maua i lona atunuu. O le ā na māfua ai ona ia talisapaia lana avā ma lagolagosua atu ia te ia?

“Ina ua amata ona ou suesueina le Tusi Paia, sa ou aʻoaʻoina ai mataupu silisili tāua se lua e faatatau i le tiute tauave a le tane,” o le faamatalaga lea a Pedro. “Sa iai se aafiaga tele i na mataupu silisili i le auala ou te vaai ai i laʻu avā. Muamua lava, i le 1 Peteru 3:7, ua faamatalaina ai faapea o le tane e tatau ona tuuina atu i le avā le āva ona “o le ipu ia ua sili ona vaivai.” Lona lua, i le Efeso 5:28, 29, ua faapea mai e tatau i le tane ona alofa i lana avā ‘faapei o lona lava tino.’ Talu ona ou mulimuli i lena fautuaga, ua sili atu ona ma vavalalata. O lea la o i tatou tane e tatau ona tatou matuā faatāuaina le fautuaga a le Atua nai lo o aganuu e masani ai.”

O Mikaele e sau mai i le itu i Sisifo o Aferika, na ia taʻua faapea a o lei amata ona ia suesueina le Tusi Paia ma Molimau, sa ia lei faia lelei lana avā. “Sa masani ona ou tāina o ia pe a ou ita,” o lana tautinoga lea. “Peitai na aʻoaʻoina aʻu e le Tusi Paia e tatau ona suia oʻu ala. Ua ou taumafai malosi nei e puleaina loʻu ita ma ia alofa i laʻu avā e pei o loʻu lava tino. Ma ua sili atu nei ona ma fiafia.” (Kolose 3:9, 10, 19) Ua faaalia e lana avā o Comfort, lona faamaonia o lana tane faapea: “O le taimi nei ua sili atu ona faaaloalogia ma alofagia aʻu e Mikaele nai lo le aganuu o loo masani ai tane i lo matou vaipanoa. Ua mafai ona ma talanoa i o ma faafitauli ma galulue faatasi o se ʻau.”

O Pedro ma Mikaele sa la aʻoaʻoina ia āva ma faapelepele i a la avā talu ai ua la teulotoina faatonuga mai i le Afioga a le Atua, lea ua faamanino mai ai o faiga lē tonu e faia i fafine, e matuā lē fiafia i ai Lē na Foafoaina i tatou.

Le Manatu Mamafa o le Atua i Fafine

O le Atua e manatu mamafa pea o ia i fafine ma lo latou lelei. E ui sa ia taʻu atu i o tatou uluai mātua faapea ona o lo la lē usiusitai, o le a oo ai ina lē lelei atoatoa ma ‘pule’ ai le tane i le fafine, ae peitai lē o le fuafuaga lea a le Atua sa iai. (Kenese 3:16) Sa ia foafoaina Eva o se “fesoasoani e tatau” o Atamu ma o se aumea mo ia. (Kenese 2:18) I le Tulafono faa-Mose, na tuuina atu i Isaraelu anamua, sa patino ona taʻusalaina e Ieova le faileagaina o fafine ua oti a latou tane ma sa aʻoaʻoina tagata Isaraelu ia agalelei ma fesoasoani ia i latou.—Esoto 22:22; Teuteronome 14:28, 29; 24:17-22.

O le faataitai atu o Iesu i lona Tamā faalelagi, sa ia lē mulimuli atu ai i aganuu taatele o ona aso lea e vaai maulalo ai i fafine. Sa ia tautala ma le agalelei i fafine—e oo lava ia i latou sa leaga o latou talaaga. (Luka 7:44-50) E lē gata i lea, sa fiafia Iesu e fesoasoani atu i fafine o ē sa iai faafitauli tau i le soifua maloloina. (Luka 8:43-48) I se tasi o mea na tupu, ina ua ia vaaia se fafine ua oti lana tane o loo faanoanoa i le oti o lana tama tama e toatasi lava, sa faanatinati atu o ia i le solo o le maliu ma toe faatūina le tama talavou.—Luka 7:11-15.

O fafine sa iai i uluai soo o Iesu ma o i latou sa muamua ona molimauina lona toetu mai. Ua tautala faaviivii le Tusi Paia i fafine e pei o Litia, Toreka, ma Pisila o ni faataitaiga o le talimalo, alofa mutimutivale, ma le lototele. (Galuega 9:36-41; 16:14, 15; Roma 16:3, 4) Ma sa toleniina uluai Kerisiano e faaalia le faaaloalo i fafine. Sa taʻu atu e le aposetolo o Paulo i lana aumea misionare o Timoteo ia feagai ma “loomatutua, peiseai o tinā; o fafine muli foi, peiseai o tuafafine ia, ma le amio mamā lava.”—1 Timoteo 5:2.

O Fafine o Ē na Mauaina le Faaaloalo

Afai o oe o se tamaloa Kerisiano, o le a e faaalia lena faaaloalo i fafine. O le a lē mafai ona e faaaogā aganuu e avea o se faamolemolega mo le faileagaina o i latou. E lē gata i lena, o le feagai ai ma le faaaloalo ma fafine, e mafai ona faaalia manino ai lou faatuatua. (Mataio 5:16) O Salima, o se fafine talavou mai Aferika, sa ia faamatalaina lona mauaina o aogā i le matauina o le faagaoioia o mataupu silisili faa-Kerisiano.

“Sa ou ola aʻe i se siomaga, lea e leaga lava le faiga o fafine ma teine. Sa faigaluega loʻu tinā i le 16 itula i le aso, ae peitai e na o le pau lana mea na maua o le faitioina pe a iai se mea na te lei faia. Ae sili atu ona leaga, pe a onā loʻu tamā e na te fasia o ia. O isi fafine i lo matou vaipanoa e mafatia foi faapena. Peitai sa ou iloa o na faiga sa sese—sa faatumulia ai o matou olaga i le lē faamalieina ma le lē fiafia. E ui i lea, e foliga mai e leai se mea e suia ai ia tulaga o mea.

“Peitai, ina ua ou talavou, sa amata loa ona ou suesue le Tusi Paia ma Molimau a Ieova. Sa faagaeetia lava aʻu ina ua ou faitauina upu a le aposetolo o Peteru, lea na fai mai e tatau ona feagai ma fafine i le faaaloalo. Peitai sa ou manatu, ‘⁠E foliga mai e ono faigata ona faatatauina e tagata lenei fautuaga, ae maise lava i le vaai atu i la matou aganuu o loo iai.’

“Peitai ane, ina ua ou alu atu i le Maota o le Malo, lea o loo faia ai e Molimau a Ieova a latou sauniga, sa agalelei mai ia te au tamaloloa faapea foi ma fafine. E sili atu foi ona mataina, o tane na iai e tausia lelei a latou avā. Ina ua ou iloa lelei tagata iina, sa ou iloa ai faapea o se mea lenei e faatalitalia Molimau a Ieova uma e faia. E ui o nisi o tamaloloa e ō mai i se siomaga e pei foi o aʻu, ua latou feagai nei ma fafine ma le faaaloalo. Na ou manao e avea aʻu o se vaega o lenei aiga toatele.”

O se Vaifofo Tumau

O le faaaloalo lea sa matauina e Salima e lē se mea na teʻi ua tupu. O le iuga lelei o se polokalame tau aʻoaʻoga, e faavae i le Afioga a le Atua, lea e fesoasoani i tagata e faatāuaina ai e le tasi le isi e pei ona faia e le Atua. O se faailoga o le mea e mafai ona faia i le taimi nei ma le mea o le a mafai ona faia i so o se vaipanoa pe a pule le Malo o le Atua i le lalolagi atoa. (Tanielu 2:44; Mataio 6:10) O lenei malo faalelagi o le a ia aveesea mea lē tonu uma. Ua faamautinoa mai e le Tusi Paia ia i tatou: ‘Auā e aʻoaʻoina e o nonofo i le atu laulau i le amiotonu, pe a faia au [Ieova] faamasinoga i le lalolagi.’—Isaia 26:9.

E oo lava i le taimi nei, o le aʻoaʻoina i le amiotonu ua suia ai le auala o loo mafaufau ai le faitau miliona o tagata. Pe a oo ina gauai uma tagata soifua i le Malo o le Atua, o le a faaauau lenei aʻoaʻoga i le lalolagi atoa ma o le a faaiua ai le faileagaina o fafine e tamaloloa, o se iuga ona o le agasala a Atamu. O le Tupu tofia a le Atua o Iesu Keriso, o le a ia lē faatagaina faiga lē tonu i fafine e faaleagaina ai lana pulega. O le faamatalaina o lena pulega a Keriso, ua faapea mai le Tusi Paia: “E laveai e ia o le mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo.”—Salamo 72:12-14.

O lenei faasologa o mataupu ua taulai atu i faafitauli o fafine. Peitai, ua iloaina foi faapea o le tele o tamaloloa ua faapea foi ona faileagaina. I le faagasologa o le talafaasolopito, o tamaloloa ua iai le pule ma tamaloloa leaga ua latou faia ni faiga leaga e faigata ona faamatalaina agaʻi i le itupā o alii faapea foi ma tamaitai. Ma o nisi o fafine ua latou faia foi faapena. Mo se faataitaiga, ua taʻua i le Tusi Paia le faamasaaina o le toto o ē e lē sala e fafine amioleaga e pei o Iesepela, Atalia, ma Herotia.—1 Tupu 18:4, 13; 2 Nofoaiga a Tupu 22:10-12; Mataio 14:1-11.

O lea, ua manaomia uma e tagata le lalolagi fou a le Atua, i lalo o le pulega a lona Malo. I se taimi e lē o toe mamao, ua lata mai lena aso, o le a lē toe iai ni faiga faaesea po o le faileagaina o fafine po o tamaloloa. Nai lo lena, o aso taitasi o le a avea ma aso e “faafiafia” ai mo tagata uma.—Salamo 37:11.

[Ata i le itulau 13]

O tane Kerisiano e latou te mulimuli atu i taiala a le Tusi Paia ma faaaloalo ma āva i a latou avā