Ua Pē se Itu o le Tino!

O LE mafuaaga numera tasi lea o le maliliu ma le lē toe mafai ona fai o se mea i atunuu tamaoaiga i Sisifo, o le pē o se itu o le tino. O le upu lava ia o le “pē o se itu o le tino” (stroke), e aofia ai le tulaga faafuasei lea e tupu ai foi se “osofaiga i le faiʻai.” Atonu, e te ono faalogoina o loo e malosi, ae e faafuasei lava ona e faalogoina e pei sa taia oe i se ʻave o le uila—o le matuā aafia atoa o le itu o le tino lea ua pē (major stroke) e mafai ona suia atoa ai lou olaga e aunoa ma lou faatalitalia. I lona faaleagaina atoa ai ma faapipili oe, e ono faapogaia ai lou lē tautala, faaoso ai le faaleagaina atoa o ou faalogona, suia atoa ai lou tagata ma lou malosi faalemafaufau e fai ai au faaiuga ma filifiliga, ma tuu atu ia te oe se tauiviga e foliga mai e leai sona mutaaga ina ia toe faafoisia mai le olaga masani lea na e iai ma iloa ai oe e lou aiga.

Seʻi manatu ia Elena Mokeni.a I le Aso Lulu, sa soifua maloloina lelei lava Elena ma tiotio, o sē e 64 tausaga le matua. I le Aso Tofi, a o fai le la faatauga ma lana tane, sa faafuasei ai ona lē mafai ona tautala Elena, ma na amata ona pio ona foliga. Na vāivai lona tino, ma na tifatifa e pei o sē ua onā. Na pagatia Elena i le matuā aafia atoa o le itu o le tino lea ua pē!

I āuga mulimuli ane o le pē o se itu o le tino, na matuā lē gaoioi ai Elena, na lē mafai ai ona ia faia sina tamai gaoioiga faigofie lava, e pei o le taele po o le faia o ona ofu. I le lē mafai ona tusitusi, lalaga, pe suʻisuʻi, na pagatia ai o ia i le lē mataofiofia o ona loimata ma matuā lē lavā ai lava. I nei tulaga uma, sa lei faaleagaina tele ai faagaoioiga o le mafaufau o Elena; peitai, sa mapuna aʻe faalogona o le masiasi pe a ia lagona faapea atonu o loo vaai atu isi ia te ia o se tagata maʻi. Mulimuli ane, na faamatalaina e Elena faapea: “E toaitiiti tagata e iloa le tulaga leaga ona o nei suiga faafuasei e aafia ai lagona o se tasi ma lona mafaufau. Na toeitiiti lava oo mai ia te au le lagona e faapea o le iuga lea o loʻu iai o se tagata ola.”

O le ā e faapogaia ai le pē o se itu o le tino? Po o tagata uma o maua i le pē o se itu o le tino o aafia i le auala lava e tasi? Ua faapefea e i latou ua toe manuia mai ai ona faafesagaia le faamaʻi? O faapefea e aiga o ē o soifua mai o maua i le pē o se itu o le tino ona faafesagai ai? O le ā e mafai e i tatou uma lava ona fai ia avatua ai le lagolagosua? Ua iloiloina e le Ala Mai! na fesili ma avatu ia te oe faataitaiga o soifuaga o ē o soifua na maua i le pē o se itu o le tino ma o latou aiga o ē o saosaolaumea i a latou tauiviga.

[Faaopoopoga i lalo]