Le Manatu o le Tusi Paia
Po o le Nofofua o se Mea e Tatau Ona Tausisia e Faifeau Kerisiano?
O LE nofofua (celibacy), o le uiga moni lava, o le lē faaipoipo. Peitai, e tusa ai o le New Encyclopædia Britannica, o lea faaupuga, “e masani ona faaaogā e fesootai atu i le nofofua o se tasi ona o se tofiga faalelotu, se tagata tāua i le lotu, po o sē ua tuutoina atu.” O le faaupuga “celibate” (nofofua) ua faasino atu ia i “latou ua lē faaipoipo ona o se tautoga paʻia po o se gaoioiga e faafitia ai po o se talitonuga faapea o le nofofua e fetaui atu i se tagata ona o lona tulaga faalelotu po o le tele o lona maelega faalelotu.”
I nisi o taimi ua mavae, na iai ni lotu patino lauiloa na filifilia le nofofua o se mea e tatau ona tausisia e a latou faifeau. Peitai, e leai lava se isi lotu o Kerisinetoma na sili atu ona iloga i le faatāuaina o le nofofua na i lo le lotu Katoliko. I aso nei, ua iai se fefinauaiga tele e faatatau i le nofofua o loo faia e le lotu Katoliko. Na matauina e le Wilson Quarterly e faapea “ina ua maeʻa le tele o suesuega i le faitau sefulu o tausaga talu ai nei na faaiuina ai e faapea o le nofofua faapena sa o se faatonuga, ma o se mea e tausisia mo patele Katoliko talu mai le senituri lona 12, ua avea lea ma faafitauli autū o le lotu i le mauaina mai o nisi patele ma le faatumauina o i latou.” E tusa ai ma le tagata suesue i le vafealoai ma tagata o Richard A. Schoenherr, na ia faapea mai, “o mea moni e faatalitonu ai i suiga i le talafaasolopito ma tulaga i le vafealoai ua matuā faasagatau atu i le tulaga nofofua i le faiva faapatele i le lotu Katoliko.” O le ā le manatu o le Tusi Paia i le nofofua?
Faaipoipo po o le Nofofua?
I le gasologa mai o le talafaasolopito e lē mafaitaulia ai alii ma tamaitai, i le tele o lotu eseese, ua filifili e nofofua. Aisea? I le tele o itu ona ua latou talitonu faapea o le itu faaletino, ma mea faitino o le “nofoaga lea o le agasala.” O lenei manatu na māfua ai le filosofia lea e faapea e lē mafai ona mamā faaleagaga pe afai e lē faamamao mai faiga faaleituaiga. Peitai, e lē o le manatu lenei o le Tusi Paia. I le Tusi Paia, o le faaipoipoga o se meaalofa e mamā ma paia mai le Atua. I le faamatalaga a le Kenese e uiga i le foafoaga ua faailoa manino mai ai o le faaipoipoga o se mea e “lelei” i le silafaga a le Atua ma e manino ai e lē o se pa pupuni lea i se faiā mamā faaleagaga ma le Atua.—Kenese 1:26-28, 31; 2:18, 22-24; tagai foi i le Faataoto 5:15-19.
Na avea le aposetolo o Peteru ma isi auauna faamaonia a le Atua o ni tane faaipoipo na umia ni tofiga pule i uluai faapotopotoga Kerisiano. (Mataio 8:14; Galuega 18:2; 21:8, 9; 1 Korinito 9:5) O faatonuga a le aposetolo o Paulo ia Timoteo i le tofiaina o ovasia o le faapotopotoga, po o “epikopo,” ua faamanino mai ai lenei mea. Ua ia tusi mai: “E tatau i le epikopo ia le mataʻuleagaina, o lē faiavā i le fafine e toatasi.” (O upu faasisipa o ā matou ia; 1 Timoteo 3:2) Ia mātau foi, e leai lava se manatu faapea e lē talafeagai i se “epikopo” i so o se itu lava ona faaipoipo. Ua na ona faapea mai Paulo e lē tatau i ‘se epikopo’ ona faia sana autaunonofo; pe afai foi e faaipoipo, e tatau lava ona toatasi lana avā. O le mea moni, ua faaiu mai e le Cyclopedia of Biblical, Theological, and Ecclesiastical Literature, a McClintock ma Strong e faapea: “E leai se vaega i le F[eagaiga] F[ou] e mafai ona faaliliuina e faasaina ai le faaipoipo o taʻitaʻi lotu e tusa i mea o faatonuina mai i le Evagelia.”
A o matuā faaaloalogia faaipoipoga, e mautinoa e lē o tausalaina mai e le Tusi Paia le nofofua, pe afai ua filifilia mai le loto. Ua fautuaina mai e le Tusi Paia o le nofofua o se olaga sili lea mo isi. (1 Korinito 7:7, 8) Na faapea mai Iesu Keriso o nisi o alii ma tamaitai ua filifilia e i latou lava ma le loto i ai le nofofua. (Mataio 19:12) Aisea? E lē ona e faapea e iai se mea lē mamā i le faaipoipoga lea o le a ono faalavelavea ai lo latou agaigai i luma faaleagaga. Ua latou filifilia lenei ala ina ia taulai atu ai a latou taumafaiga i le faia o le finagalo o le Atua ona ua latou malamalama i le faanatinati o le taimi.
Le Ala na Taitaiina Atu ai i le Fai Faamalosi o le Nofofua
Peitai, na suia le tulaga o mea, i senituri na mulimuli ane i taimi o Keriso. A o faagasolo uluai senituri e tolu o o tatou Aso Taatele, “sa iai patele sa faaipoipo ma patele sa lē faaipoipo,” o le faamatalaga lea a David Rice, o se sui o le ituaiga o le Dominican, o lē na lafoaia le tulaga faapatele ae faaipoipo. O lea, na amata ai loa ona aafia i latou na faapea mai o Kerisiano, i le mea na faamatalaina mai e se tusitala faalelotu, e pei o se “tuufaatasiga o manatu faa-Eleni ma manatu faale-Tusi Paia” ia e fafau aʻe ai se manatu sese i feusuaiga ma faaipoipoga.
O le mea moni, o nisi na tuliloaina pea le nofofua ina ia “mauaina ai le saolotoga atoatoa e tuutoina atu ai i [latou lava] i le galuega o le malo o le Atua.” Peitai, o isi, na sili atu ona uunaia e filosofia faapaupau ia na latou taliaina. Ua taʻua e le New Encyclopædia Britannica e faapea: “O se talitonuga e faapea o feusuaiga faaleituaiga e faaleagaina ai ma e lē ogatusa ma le mamalu, ua avea ai [lotu ua faapea mai o Kerisiano] ma uunaiga malosi o le tu ina ia nofofua.”
I le senituri lona fa, ua faapea mai Rice, na “faasaina ai [e le lotu] se patele faaipoipo mai le faia o se feusuaiga faaleituaiga i le po a o lei faamanatuina le Komenio.” Ina ua faamanatuina e le lotu le Komenio i aso uma, o lona uiga sa tatau i patele ona lē faia lava ni feusuaiga faaleituaiga i aso uma. Mulimuli ane, na faasaina atoatoa ai loa le faaipoipo o patele. O lea na fai faamalosi ai le nofofua i so o se tasi lava o le a avea ma faifeau i le lotu.
Na lapataia e le aposetolo o Paulo le tupu o se mea faapena. Na ia tusi: “O loo taʻutino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma aʻoaʻoga a temoni . . . Latou te vavao i le faaipoipo.”—1 Timoteo 4:1, 3.
“E taʻuamiotonuina le poto i ana galuega,” o le fetalaiga lena a Iesu Keriso. (Mataio 11:19) E faamaonia le valea o le see ese mai faatulagaga a le Atua e ala i gaoioiga po o taunuuga. Na faatalanoaina e le tusitala o David Rice le toatele o patele i le lalolagi i le mataupu lea o le fai faamalosi o le nofofua. Na faapea ane nisi na ia talanoa i ai: “A o avea pea oe ma patele, fai le mea e sili ona e mafai e fesoasoani ai i tagata, i le taimi e tasi, ia e mataalia e faaaogā avanoa uma e ofoina mai e fafine ua tuutoina, ua nofo sauni ma faaavanoa mai i latou lava mo feusuaiga.
I le siiina mai o le Mataio 7:20, ua taʻua ai e Rice e faapea: “ʻTou te iloa ai i latou i o latou fua,’ na fetalai ai Iesu.” Ona ia faaopoopo mai lea i mala ua iu i ai ona o le fai faamalosi o le nofofua: “O fua o le fai faamalosi o le nofofua ua taitaiina ai le faitauafe o alii i ni olaga uigalua, e faitauafe tamaitai ua oo atu ai i ni olaga ua faaleagaina, e faitauafe tamaiti ua teena e o latou tamā ua faauuina faapatele, e faaopoopo atu i ai ma patele ua afaina o latou faalogona ona o na tulaga.”
O faaipoipoga e faia i se tulaga mamalu o se faamanuiaga mai le Atua. O le nofofua ua fai faamalosi ua iu ina faaleagaina ai faaleagaga. I le isi itu, o le filifili mai le loto e nofofua, e lē faapea ina ia paia ai pe mo le faaolaina ai, ae ua faamaonia le avea ma olaga e tauia ma faamalieina ai faaleagaga mo isi o nofofua.—Mataio 19:12.
[Ē Ana le Ata i le itulau 22]
Life