Le Malo o le Atua

Po o le Malo o le Atua o se mea i le loto o le tagata?

“E te lē o mamao mai i le malo o le Atua.”​—Mareko 12:34.

TALA A TAGATA

E tusa ai ma se faamatalaga a se tasi o lotu autū ua faapea mai o Kerisiano, e manatu le toʻatele o tagata o le Malo o le Atua, “o le pulega lea a le Atua i le loto ma le olaga o se tagata.”

LE MANATU O LE TUSI PAIA

O le Malo o le Atua o se pulega moni, e lē na o se mea e tau ina faaāta i le mafaufau ina ia talia ai e le tagata le Atua i lona loto. O le a pule lenei Malo i le lalolagi atoa.​—Salamo 72:8; Tanielu 7:14.

Ae faapefea le fetalaiga a Iesu e faapea, “o loo iā te outou le malo o le Atua?” (O upu faasisipa e ā matou; Luka 17:21, King James Version) E mautinoa e leʻi uiga atu Iesu o loo i totonu o loto o lana ʻaufaalogologo le Malo o le Atua. E faapefea ona iloa? Talu ai o lana ʻaufaalogologo i lenā taimi o le ʻau Faresaio. Na fetalai Iesu e latou te lē ulu atu i le Malo, auā e faatagāfai le auala na latou tapuaʻi atu ai ma e leʻi taliaina e le Atua. (Mataio 23:13) Peitaʻi na talafeagai lava le fetalaiga a Iesu, “o loo iā te outou” le Malo o le Atua, po “o loo i lo outou lotolotoi” e pei ona taʻua i le Faaliliuga a le Lalolagi Fou. Aiseā? O lea sa iai faatasi Iesu ma i latou, o ia lea o le a avea ma Tupu o le Malo o le Atua.

O le ā le Malo o le Atua?

“Ia oo mai lou malo. Ia faia lou finagalo i le lalolagi, e pei ona faia i le lagi.”​—Mataio 6:10.

LE MANATU O LE TUSI PAIA

O lenei Malo o se pulega moni a le Atua, ma o Iesu Keriso le Tupu. (Mataio 28:18; 1 Timoteo 6:14, 15) O le fuafuaga o lenei Malo, ia faataunuu le finagalo o le Atua i le lalolagi e pei ona faia i le lagi. (Mataio 6:10) O lea, o le a aumaia e le Atua le vaifofō mo faafitauli o tagata e ala i lea Malo, o se mea e lē mafai e malo faaletagata ona faia.

I le pulega a le Malo o le Atua, o le a maua e le fanau a tagata le filemu, saogalemu, ma le tele o faamanuiaga i se lalolagi parataiso. (Salamo 46:9; Isaia 35:1; Mika 4:4) E lē toe iai se isi e maʻi pe oti, ma o le a aveesea faamaʻi. (Isaia 33:24; Faaaliga 21:4) E lē toe iai foʻi se tasi e oo i le soifua matua. Ua folafola mai i le Tusi Paia: “Ia faafouina lona tino e sili nai lo o le talavou; ia toe foʻi o ia i aso o le malaulau o lona talavou.”​—Iopu 33:25.

LE MEA E AO ONA E FAIA

Po o fea lava na e tupuga pe fanau mai ai, e mafai ona avea oe ma tagatānuu o le Malo o le Atua, pe afai e te faia mea o loo faafinagaloina e le Atua mai iā te oe. Ua faapea mai le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”​—Galuega 10:34, 35.

Pe e mafai e tagata ona aumaia le Malo o le Atua?

ʻO le a faatūina e le Atua o le lagi o le malo e lē faaumatia lava.’​—Tanielu 2:44.

TALA A TAGATA

O nisi e talitonu o le a faavae e tagata le Malo o le Atua i luga o le lalolagi, e ala i le faaliliuina o tagata i a latou lotu, pe galulue foʻi ina ia maua e le lalolagi le filemu ma le autasi.

LE MANATU O LE TUSI PAIA

O le Atua ae lē o tagata e aumaia lenei Malo. (Tanielu 2:44) I le taimi na faavaeina ai le Malo, na fetalai le Atua: “O aʻu lava ua ou tofia laʻu tupu.” (Salamo 2:6) E lē aumaia e tagata le Malo o le Atua, ma e lē mafai ona latou taofia mea o le a faataunuuina e lenei Malo, auā o le a pule mai i le lagi i luga o lenei lalolagi.​—Mataio 4:17.

AISEĀ E TĀUA AI

O le faalogona masani le moomoo i se aso o le a aumaia ai e tagata le filemu ma le autasi. Atonu e te faaaluina foʻi lou taimi ma le malosi e aumaia ai nei suiga, ae pe a lē taunuu e te lagona le lotovaivai. O le iloaina o loo lagolagoina e le Atua lona Malo, o le a uunaʻia ai oe e faia taumafaiga uma e avea ai o se tagatānuu o lenā Malo.