Po o le Malo o le Atua o se Mea e i le Loto o le Tagata?
Tali a le Tusi Paia
Leai, o le Malo o le Atua e lē o se mea e i le loto o Kerisiano.a O loo taʻua i le Tusi Paia le nofoaga moni e iai, e ala i le taʻua “o le malo o le lagi.” (Mataio 4:17, King James Version) Iloilo pe faapefea ona faailoa mai e le Tusi Paia o lenei faigāmalo moni o le a pule mai i le lagi.
O le Malo o le Atua e iai ē pule, tagatānuu, tulafono ma faatonuga e faavae aʻe i le finagalo o le Atua i le lagi ma le lalolagi.—Mataio 6:10; Faaaliga 5:10.
O le faigāmalo a le Atua po o le Malo, o le a pule mai i “tagata ma nuu ma gagana uma” o le lalolagi. (Tanielu 7:13, 14) O i latou e pule e tofia tuusaʻo mai e le Atua aʻe lē mai i tagatānuu.—Salamo 2:4-6; Isaia 9:7.
Na taʻu atu e Iesu i ona aposetolo faamaoni o le a latou faatasi ma ia i le Malo o le lagi ma “nonofo i nofoālii.”—Luka 22:28, 30.
E iai fili o le Malo ma o le a faaumatia.—Salamo 2:1, 2, 8, 9; 110:1, 2; 1 Korinito 15:25, 26.
E lē o faapea mai le Tusi Paia o le Malo i le lagi e i totonu o le loto o le tagata, ma pulea lenā loto. Nai lo o lea, o loo faailoa mai ai e mafai e le “upu o le malo” po o le “tala lelei o le malo” ona aafia ai o tatou loto.—Mataio 13:19; 24:14.
O le ā le uiga o le faaupuga “o loo i lo outou lotolotoi le malo o le Atua?”
O nisi tagata ua lē mautonu po o fea le nofoaga e iai le Malo, ona o le eseese o auala e faaliliu ai le Luka 17:21 i nisi o faaliliuga o le Tusi Paia. Mo se faataʻitaʻiga, o loo faapea mai le King James Version “o loo i totonu iā te outou le malo o le Atua.” Ina ia tatou maua le malamalamaga saʻo o lenei fuaiupu, seʻi o tatou iloiloina le siʻomaga o le mau.
E leʻi iai le Malo o le Atua i loto o i latou na tetee ma fasiotia Iesu
Na talanoa atu Iesu i le ʻau Faresaio, o taʻitaʻi lotu o ē e tetee ia te ia ma taupulepule e fasiotia o ia. (Mataio 12:14; Luka 17:20) Pe e talafeagai la ona faapea atu na iai le Malo i o latou lotomaaa? Na taʻu atu e Iesu iā i latou: “Ua tumu o outou loto i le pepelo ma le amioleaga.”—Mataio 23:27, 28.
O loo faaliliu manino mai i nisi faaliliuga le fetalaiga a Iesu i le Luka 17:21: “O loo faatasi ma outou le malo o le Atua.” (Italics ours; Contemporary English Version) “O loo i lo outou lotolotoi le malo o le Atua.”(New World Translation) O le iai la o le Malo o le lagi “faatasi” ma le ʻau Faresaio, na uiga atu i le iai o Iesu le Tupu o le Malo ua tofia e le Atua, faatasi ma i latou.—Luka 1:32, 33.
a O le tele o lotu Kerisiano latou te aʻoaʻoina o le Malo o le Atua e i totonu o le tagata po o le loto o le tagata. Mo se faataʻitaʻiga, i le Iunaite Setete na faalauiloa ai e se Tauaofiaga a le Lotu Papatiso, o le Malo o le Atua o se vaega o le pulega a le “Atua i loto ma olaga o tagata taʻitoʻatasi.” Na taʻua foʻi e Pope Benedict XVI i lana tusi Jesus of Nazareth, “o le Malo o le Atua e mafai ona maua e ala i le faalogo i lou loto.”