Le Tusi Paia​—Pe e Moni “e Mai i le Agaga o le Atua”?

PE E te talitonu o le Tusi Paia e mai i le Atua, pe ua na o se tusi o loo iai manatu o tagata?

O loo faaauau pea ona faia felafolafoaʻiga i lea mataupu i le va o i latou ua faapea mai o Kerisiano. O se faataʻitaʻiga i le 2014, sa fai ai se suʻesuʻega i le Iunaite Setete ma iloa ai o le toʻatele o i latou ua faapea mai o Kerisiano, na ioe “e iai se sootaga o le Tusi Paia i le Atua.” Ae i le isi itu, pe ā ma le tasi mai i le lima tagata na manatu o le Tusi Paia o se tusi o “tala o le vavau, talaaga o tagata, talafaasolopito, ma manatu na tusia e tagata.” O lenā felafolafoaʻiga, ua fesiligia ai le uiga moni o le faaupuga “e mai i le agaga” le Tusi Paia.​—2 Timoteo 3:16.

O LE Ā LE UIGA O LE FAAUPUGA “E MAI I LE AGAGA”?

O loo faia aʻe le Tusi Paia i se tuufaatasiga o ni tamaʻi tusi e 66, ia na tusia e ni tusitala pe tusa ma le 40 i se vaitaimi e silia ma le 1,600 tausaga. Ae pe afai na tusia e tagata le Tusi Paia, e faapefea la ona “mai i le agaga o le Atua”? I se faaupuga faigofie, o le faaupuga “e mai i le agaga o le Atua” o lona uiga o le Puna o faamatalaga i nei tusitusiga, o le Atua. Ua faamatalaina faapea i le Tusi Paia: “Na tautatala tagata i mea na faailoa mai e le Atua e ala i le taʻitaʻiga a le agaga paia.” (2 Peteru 1:21) I nisi faaupuga, na faaaogā e le Atua lona mana e lē vaaia, le agaga paia, e faailoa mai ai lana feʻau i tusitala o tusi o le Tusi Paia. E tai pei lea o se tagata faipisinisi o loo taʻu atu upu e tusi i lalo e lana failautusi. O le tusitala o le tusi, e lē o le tagata o loo tusia i lalo faamatalaga, ae o lē o loo taʻuina atu upu e tusi i lalo.

O isi tusitala o le Tusi Paia na faalogo a o faailoa manino mai e se agelu le feʻau a le Atua. O isi na vaaia ni vaaiga mai i le Atua. Ae o isi taimi, na faailoa mai e le Atua lana feʻau e ala i ni miti. E ui lava sa iai taimi na faataga ai e le Atua tusitala o le Tusi Paia e faaaogā a latou faaupuga e tusia ai lana feʻau, ae e iai taimi na ia faailoa mai ai ni faaupuga maʻoti e faaaogā. Po o le ā lava le tulaga, na faailoa mai e na tusitala manatu o le Atua ae e lē o o latou lava manatu.

E faapefea ona tatou mautinoa o le Atua na faagaeeina tusitala o le Tusi Paia? Seʻi iloilo ni faamaoniga se tolu e maufaatuatuaina ai, o le Tusi Paia e mai i le Atua.