Se Atalii Lelei ma Sē e Leaga

VAAI atu nei i a Kaino ma Apelu. Ua matutua uma i laua. Ua avea Kaino ma se faifaatoaga. Na te totoina ni fatu ma laau aina ma fuālaau.

Ua avea Apelu ma se e tausi mamoe. E fiafia o ia e tausi tamai mamoe. E tutupu aʻe i latou e avea ma mamoe lapopoa, ma e lei umi ae maua sana lafu mamoe na te tausia.

O se tasi aso sa avatu ai ni a la mea alofa i le Atua. Sa aumaia e Kaino ni fua sa ia totoina. Ae o Apelu o ana mamoe e sili atu ona lelei. Sa fiafia Ieova i a Apelu ma lana mea alofa. Ae sa le fiafia o ia i a Kaino. Pe e te iloa ai se ā?

E le gata sa lelei le mea alofa a Apelu, ae o ia foi o se tagata lelei. E alofa o ia i a Ieova ma lona uso. Ae o Kaino e leaga; e le alofa o ia i lona uso.

Sa fai atu le Atua i a Kaino e sui ona ala. Ae sa le faalogo i ai Kaino. Sa ita tele o ia auā sa fiafia le Atua i a Apelu. Sa fai atu loa Kaino i a Apelu, ‘Seʻi ta o ia i le fanua.’ I ina, ina ua na o i laua, sa ta ai loa e Kaino lona uso o Apelu. Sa telē le ta sa ia fasiotia ai o ia. Pe e le o se mea leaga ea lea ua faia e Kaino?

E ui lava ina oti Apelu, ae o loo manatua pea o ia e le Atua. Sa lelei Apelu, ma e le faagaloina e Ieova tagata faapena. O lea la i se isi aso o le a toe faaola mai e le Atua Apelu, ma o le a le toe oti o ia. E mafai ona ola e faavavau o ia i lenei lalolagi. Pe e le o se mea lelei le iloaina o tagata lelei faapena e pei o Apelu?

Ae e le fiafia le Atua i tagata e pei o Kaino. Ina ua uma ona fasiotia e Kaino lona uso, sa faasala loa o ia e le Atua i lona tuli mamao eseina o ia mai le tele o isi tagata o lona aiga. Ina ua alu ese atu Kaino e ola i le isi vaega o le lalolagi, sa ia aveina se tasi o ona tuafafine, ma avea ma ana avā.

Mo se vaitaimi na nonofo ai Kaino ma lana avā ma fai ai se la fanau. Sa faaipoipo isi atalii ma afafine o Atamu ma Eva ma sa maua foi ni fanau. Ma ua toatele loa tagata i le lalolagi. Seʻi o tatou aʻoaʻoina e uiga i ni isi o i latou.