Amata Mai i le Ita ae Iʻu i le Fasioti Tagata

Ina ua tuliese Atamu ma Eva mai i le faatoʻaga, e tele ni a la fanau na fananau mai. O le la tama muamua o Kaino, o se faifaatoʻaga. O le la tama lona lua o Apelu, o se leoleo mamoe.

I se tasi aso, na ofo atu ai e Kaino ma Apelu ni taulaga iā Ieova. E te iloa le uiga o le taulaga? O le taulaga, o se ituaiga o meaalofa faapitoa. Sa fiafia Ieova i le taulaga a Apelu, ae e leʻi fiafia i le taulaga a Kaino. O le māfuaaga lea na ita tele ai Kaino. Na faapea atu Ieova iā Kaino ina ia faaeteete, auā o lona ita e mafai ona iʻu atu ai i lona faia o se mea leaga. Ae e leʻi faalogo Kaino.

Nai lo o lea, na fai atu Kaino iā Apelu: ʻSeʻi o ta ō i le fanua.’ A o iai na o i laʻua i le fanua, na osofaʻi ai e Kaino lona uso ma fasiotia o ia. O le ā o le a faia e Ieova i le mea ua tupu? Na faasala e Ieova Kaino, e ala i le tuli o ia i se nuu e mamao ese mai i lona aiga. E leʻi toe faatagaina Kaino e toe foʻi mai ai i le mea sa iai lona aiga.

Pe e iai se mea e tatou te aʻoaʻoina mai i inei? Atonu e amata ona tatou lagona le ita, pe afai e lē taunuu mea e tatou te mananaʻo i ai. Pe afai la e amata ona tuputupu aʻe lo tatou ita, pe iloa mai foʻi e nisi ua tatou feita ma lapataʻia ai i tatou, e tatau ona tatou vave gaoioi ma pulea o tatou faalogona. O le faia faapea, o le a lē pulea ai i tatou e o tatou faalogona.

E manatua pea e Ieova Apelu, talu ai sa alofa Apelu iā Ieova ma faia le mea saʻo. O le a toe faatū mai e Ieova Apelu mai i le oti, pe a toe faia e Ieova le lalolagi e avea o se parataiso.