Tofotofoina e le Atua le Faatuatua o Aperaamo

PE E te iloa le mea o loo faia e Aperaamo i inei? O loo iā te ia se naifi, ma e foliga mai e pei o le a ia fasiotia lona atalii. Aiseā o le a ia faia ai lena mea? Muamua, sei o tatou vaai pe na faapefea ona maua e Aperaamo ma Sara la la tama.

Manatua, na tauto atu le Atua i a te i laʻua o le a i ai se la tama. Peitai ua matutua tele Aperaamo ma Sara. Ae e ui i lea sa talitonu Aperaamo e mafai e le Atua ona faia mea e foliga mai e le mafai. O le ā la sa tupu?

Ua mavae le tausaga talu ona faia e le Atua lana folafolaga. Ma ina ua 100 tausaga o Aperaamo ae 90 tausaga o Sara, sa fanau loa Isaako. Sa tausia pea e le Atua lana folafolaga!

Peitai ina ua matua Isaako, sa tofotofoina e Ieova le faatuatua o Aperaamo. Sa ia valaau mai: ‘Aperaamo! Ave lou atalii e toatasi, o Isaako, ma e alu atu i le mauga o le a ou faasino atu iā te oe. O i ina e te fasiotia ai lou atalii ma e osia ai se taulaga.’

O se tala faanoanoa tele lena mo Aperaamo, talu ai sa alofa tele o ia i lona atalii. Ma manatua, na tauto atu le Atua o le a ola lana fanau i le nuu o Kanana. E faapefea la ona taunuu pe afai o le a oti Isaako? Sa le malamalama Aperaamo ae na usiusitai pea i le Atua.

Ina ua oo atu i laʻua i le mauga, ona saisai ai lea e Aperaamo o Isaako ma tuu i luga o le fata faitaulaga sa ia faia. Ona ia tago lea i le naifi o le a fasioti i lona atalii. Ae na valaau mai le agelu a le Atua: ʻAperaamo, Aperaamo!’

‘Aua nei oo lou lima i le tama,’ sa tulei mai ai le Atua. ‘Ma ua ou iloa nei e te faatuatua mai i a te aʻu, auā ua e le taofia lou atalii, lou atalii e toatasi, mai i a te aʻu.’

Sa tele le faatuatua o Aperaamo i le Atua! Na ia talitonu e mafai e Ieova ona faatuina mai Isaako mai le oti. Ae e lei finagalo moni le Atua ia fasiotia Isaako. Sa faalavelavea loa e le Atua se tamai mamoe i le togavao latalata ane, ma sa ia fai atu i a Aperaamo na te faaaogaina e sui ai lona atalii.