O Ai Aperaamo?

E TOʻAITIITI lava ni tagata na taaʻina e o latou olaga lotu a le lalolagi. Na faamamaluina Aperaamoa e lotu Iutaia, Musalimi ma Kerisiano, na latou faamatalaina foʻi o ia “o se tagata tāua i Tusitusiga Paia,” ma “o se faaaʻoaʻoga mataʻina o le faatuatua.” O loo taʻua o ia i le Tusi Paia o le “tamā o i latou uma e faatuatua.”—Roma 4:11.

Aiseā na matuā faaaloalogia ai Aperaamo? O se tasi o māfuaaga, ona e na o ia le tagata o loo taʻua patino i le Tusi Paia, o le uō a le Atua!—Isaia 41:8; Iakopo 2:23.

Ae peitaʻi, o Aperaamo o se tagata e pei lava o i tatou. Na ia fesagaʻia le tele o faigatā e pei foʻi o i tatou, ae na taulau ona ia foʻia na faafitauli. Pe e te fia iloa le auala na ia faia ai? Seʻi o tatou iloiloina mea o loo taʻua i le Tusi Paia e uiga i lenei tagata taʻutaʻua.

Lona Talaaga

Na fanau Aperaamo i le tausaga 2018 T.L.M., ma na soifua aʻe i Uro. (Kenese 11:27-31) O Uro, o se aai telē ma tamaoaiga, sa tumu foʻi i ifoga i tupua. O Tara le tamā o Aperaamo, atonu na tapuaʻi foʻi o ia i na tupua eseese. (Iosua 24:2) Ae na filifili pea Aperaamo e tapuaʻi na o Ieova,b nai lo o faatusa o atua e leai ni ola.

O le ā na uunaʻia ai Aperaamo e faia lenā filifiliga? E tusa ma le 150 tausaga talu ona fanau Aperaamo, ae maliu loa Semu le atalii o Noa. Afai na faatasi o ia ma lenei tagata ua matuā toeaina lava, na faapefea la ona taaʻina ai lona olaga? Atonu na faamatala e Semu iā Aperaamo le auala na faasaoina ai i latou mai i le Lolo. E foliga mai sa ia iloa foʻi le tāua o le tapuaʻi iā Ieova, le Atua na faasaoina Semu ma lona aiga mai i lenā Lolo Tele.

E tusa lava pe na ia iloa mai iā Semu po o se isi, ae na talia fiafia e Aperaamo mea na ia aʻoaʻoina e uiga i le Atua moni. Ina ua silasila mai Ieova o lē na te “suʻesuʻeina loto” iā Aperaamo, na ia silafia ai se mea lelei i lenei tagata—ma na fesoasoani o ia iā Aperaamo ia avea ma tagata e sili ona lelei.—Faataoto 17:3; 2 Nofoaiga a Tupu 16:9.

Lona Soifuaga

Na soifua aʻe Aperaamo i se olaga e tumu i le fiafia, ma e tele ni luʻi sa ia fesagaʻia ae na mafai ona ia foʻia. Seʻi iloilo nisi o mea na oo iā te ia.

▪ A o iai Aperaamo i Uro, na faatonuina o ia e le Atua e tuua lona nuu na fanau ai, ae alu atu i se nuu o le a ia faasino atu iā te ia. E ui e leʻi malamalama Aperaamo ma Sara i faatonuga uma—i le mea e ō i ai ma le pogai na faatonuina ai i laʻua e le Atua e ō—ae na la usiusitaʻi. Na mulimuli ane nonofo Aperaamo ma Sara i faleʻie i le nuu o Kanana, ma ola ai e pei o ni tagata aumau i o la olaga atoa.—Galuega 7:2, 3; Eperu 11:8, 9, 13.

▪ A o leʻi iai se fanau a Aperaamo ma Sara, na folafola mai e Ieova o le a tupuga mai iā Aperaamo se nuu tele. Na toe fetalai mai Ieova, o le a faamanuiaina aiga uma o le lalolagi e ala iā Aperaamo. (Kenese 11:30; 12:1-3) Mulimuli ane, na toe faamaonia mai e Ieova o le a ia faataunuuina lana folafolaga. Sa ia toe taʻu atu iā Aperaamo, o le a faatoʻateleina lana fanau e pei o fetu o le lagi.—Kenese 15:5, 6.

▪ Ina ua 99 tausaga o Aperaamo ma ua lata i le 90 tausaga o Sara, na folafola atu ai e Ieova o le a maua sa la tama. I manatu o tagata, atonu e lē mafai ona tupu lenā mea, ae e leʻi umi ae iloa e Aperaamo ma Sara e leai se mea e “faigatā iā Ieova.” (Kenese 18:14) Ua mavae le tausaga, ma ua 100 tausaga o Aperaamo, na maua ai sona atalii ma faaigoa iā Isaako. (Kenese 17:21; 21:1-5) Na folafola patino mai e le Atua, o le a maua e le fanau a tagata le tele o faamanuiaga, e ala iā Isaako.

▪ I ni tausaga mulimuli ane, na faatonu e Ieova Aperaamo e faia se mea e lē masani ai: Na ia poloaʻia Aperaamo e avatu lona atalii pele e toʻatasi o Isaako e fai ai le taulaga, e ui e leʻi iai sana avā ma sana fanau i lenā taimi.c E ui ina iloa e Aperaamo lona matuā mafatia pe a oti lona atalii, ae na sauni o ia e usitaʻi, ma ofo atu lona atalii o Isaako e osi ai le taulaga. Na talitonu atoatoa Aperaamo, e iai i le Atua le mana e toe faatū mai ai Isaako pe a talafeagai, ina ia faataunuu ai Lana folafolaga. (Eperu 11:19) I le taimi e sili ona faigatā ina o le a ofo atu e Aperaamo lona atalii, ae faalaa ane loa le Atua ma faasao le ola o Isaako. Na ia viiviia Aperaamo ona o le maoaʻe o lona usiusitaʻi. Ona toe taʻu atu lea e Ieova iā Aperaamo lana uluaʻi folafolaga.—Kenese 22:1-18.

▪ Na maliu Aperaamo ina ua 175 ona tausaga. Ua taʻua i le Tusi Paia, na ʻmaliu o ia ina ua matuā toeaina lava, ua matua tele ma ua faamalieina.’ (Kenese 25:7, 8) O lea, ua faataunuuina ai se tasi o folafolaga a le Atua iā Aperaamo—e te oti filemu pe a e matuā toeaina lava.—Kenese 15:15.

Ona Uiga

O Aperaamo, e lē na o se tagata lotu po o sē e taʻutaʻua mai i taimi ua mavae. E oo mai lava i aso nei, o loo manatua pea le tala i lona soifuaga, ma o loo aumaia ai ni faaaʻoaʻoga lelei e tatou te mulimuli ai. (Eperu 11:8-10, 17-19) Seʻi o tatou iloiloina ni uiga lelei se fā sa faaalia e Aperaamo. Seʻi o tatou amata i le uiga e aupito sili ona lauiloa ai o ia—o le faatuatua.

[Faaopoopoga i lalo]

[Pusa i le itulau 4]

O se Tagata Tāua i le Talafaasolopito o le Tusi Paia

I uluaʻi mataupu e sefulu o le Tusi Paia, o loo faamatala ai i le tusi o Kenese talaaga o nisi o tane faatuatua, e aofia ai Apelu, Enoka ma Noa. Peitaʻi, o mataupu e 15 e sosoo ai, o loo faasino uma atu i le olaga o se tagata e toʻatasi—o Aperaamo.

E lē gata i lea, o le taimi muamua lea o loo taʻua ai i le Tusi Paia nisi o manatu e sili ona tāua, e fesootaʻi atu iā Aperaamo. O se faaaʻoaʻoga, i le tala i le soifuaga o Aperaamo, e tatou te maua ai le uluaʻi taimi na . . .

▪ taʻua ai le Atua o se Talita, po o Sē e puipuia ana auauna.—Kenese 15:1; tagaʻi i le Teuteronome 33:29; Salamo 115:9; Faataoto 30:5.

▪ taʻua ai le faatuatua i le Atua.—Kenese 15:6.

▪ faaaogā ai le upu perofeta.—Kenese 20:7.

▪ taʻua ai le alofa o se matua.—Kenese 22:2.