Sa Usiusitaʻi Aperaamo ma Sara i le Atua

E lē mamao mai i Papelu, sa tu ai se aai e taʻua o Uro. Na tapuaʻi tagata o lenā aai i le tele o atua e ese mai iā Ieova. Ae e iai se tamāloa i Uro e na o Ieova lava na tapuaʻi i ai. O lona igoa o Aperaamo.

Na faapea atu Ieova iā Aperaamo: ʻIa e tuua lou nuu ma ou tauaiga, ae alu i le nuu o le a ou faasino atu iā te oe.’ Ona folafola atu lea e le Atua: ʻO le a avea oe ma nuu tele, ma o le a ou faia mea lelei mo le toʻatele o tagata i le lalolagi ona o oe.’

E leʻi iloa e Aperaamo po o fea o le a faasino atu e Ieova e alu i ai, ae na ia talitonu pea iā Ieova. O lea na usiusitaʻi ai Aperaamo, o lana avā o Sara, o lona tamā o Tara ma Lota le atalii o lona uso, ma tapena a latou mea, ma amata loa la latou malaga umi.

Na taunuu Aperaamo ma lona aiga i le nuu sa faasino i ai e le Atua, ua 75 ona tausaga. O lenā nuu o Kanana. O i inā na fetalai atu ai le Atua iā Aperaamo, ma fai atu le folafolaga lenei: ʻO le a ou avatu i lau fanau le laueleele o loo e vaai atu i ai.’ Ae ua matutua Aperaamo ma Sara ma e leʻi iai foʻi sa la fanau. O le ā la le auala o le a faataunuu ai e Ieova lana folafolaga?