Iona ma le Iʻa Lapo‘a

VAAI i le tamaloa o loo i le vai. Ua i ai o ia i se faalavelave tele, a ea? Ua toeitiiti folo o ia e le iʻa! Pe e te iloa lea tamaloa? O ia o Iona. Sei o tatou vaai pe na faapefea ona oo i ai ni faalavelave se tele.

O Iona o se perofeta a Ieova. E lei umi lava ona oti le perofeta o Elisaia, ae fetalai Ieova i a Iona: ‘Alu i le aai tele o Nineva. Ua tele le leaga o tagata i ina, ma ou te manao e te tautala i a i latou e uiga i lea mea.’

Ae na le manao Iona e alu. O lea na sola ai o ia i se vaa e alu i le isi itu e faafeagai ma Nineva. Na le fiafia Ieova ina ua sola Iona. O lea na ia faaosoina ai se matagi tele. Ua malosi tele ma ua oo ai le vaa i se mea mataʻutia o le a goto. Ua fefefe tele le auvaa, ma na latou valaau i o latou atua mo se fesoasoani.

Mulimuli ane na fai atu Iona i a i latou: ‘Ou te tapuai i a Ieova o le Atua o le na faia le lagi ma le lalolagi. Ma ua ou sola ese mai i le faia o le mea na fai mai ai Ieova.’ Ona fesili lea o le auvaa: ‘O le ā tatou te faia e taofi ai le matagi?’

‘Lafo aʻu i le sami, ona toe malū ai lea, o le tala lea a Iona. Na le mananao le auvaa e fai, ae ina ua malosi tele mai le matagi ona latou lafoina lea o Iona i lalo. Na uma i le taimi lava lena le afā, ma ua toe malū le sami.

A o magato ifo Iona i le vai, na foloina o ia e le iʻa lapoa. Sa lei oti o ia. E tolu ao ma po e tolu o i ai pea o ia i le manava o le iʻa. Ua salamo Iona i lona le usitai i a Ieova e alu atu i Nineva. O lea pe tou te iloaina le mea na ia faia?

Na tatalo Iona i a Ieova mo se fesoasoani. Ona luai lea e le iʻa Iona i le laueleele matutu. Mavae lena ona alu lea o Iona i Nineva. Pe e le aʻoaʻoina ai ea i tatou e tāua ona tatou faia mea uma e fetalai mai ai Ieova?