Sa Onosaʻi Ieova iā Iona

Sa amioleaga tagata na iai i Nineva, o se aai i le atunuu o Asuria. Na faatonu e Ieova lana perofeta o Iona e alu i Nineva ma lapataʻi i latou ina ia suia a latou amioga. Peitaʻi na sola ese Iona, ma alu i se vaa na malaga atu i Tasesa.

A o iai le vaa i le sami, na agi mai se matagi malosi ma na matuā fefefe ai le ʻauvaa. Na latou tatalo atu i o latou atua e faapea: ʻAiseā ua tupu ai lenei mea?’ Ona fai atu lea o Iona iā i latou: ʻO aʻu le māfuaaga. Na ou sola ese ma lē faia le faatonuga a Ieova. Ia lafo aʻu i le sami, ona toʻa ai lea o le matagi.’ E leʻi mananaʻo le ʻauvaa e lafo Iona i le sami, ae na ia talosaga atu pea ina ia faia lenei mea. Ina ua latou lafo o ia i le sami, ona toʻa ai lea o le matagi.

Na mafaufau Iona o le a oti o ia. A o magoto ifo o ia i le sami, na ia tatalo atu iā Ieova. Ona aumaia lea e Ieova o se iʻa telē. Ua folo e le iʻa Iona ae e leʻi oti ai o ia. Na tatalo Iona mai i le manava o le iʻa e faapea: ʻOu te tautō atu o le a ou usitaʻi iā te oe.’ Na puipuia e Ieova Iona a o iai i totonu o le manava o le iʻa mo aso e tolu, ona ia faapogaia lea o le iʻa e luai i fafo Iona i le laueleele mātūtū.

Talu ai na faasaoina e Ieova Iona, po o lona uiga la e lē o toe manaʻomia ona ia alu i Nineva? E leai. Na toe faatonu e Ieova Iona e alu atu i inā. Ae o le taimi la lea ua usiusitaʻi Iona. Na ia alu i Nineva ma fai atu i tagata amioleaga: ʻE toe 40 aso ona faaumatia lea o Nineva.’ Ona faafuaseʻi lea ona usiusitaʻi o tagata Nineva ma suia a latou amioga. Na faapea atu le tupu o Nineva i ona tagata: ʻIa valaau atu i le Atua ma ia salamō. Atonu o le a ia lē faaumatia ai i tatou.’ Ina ua silasila mai Ieova ua salamō tagata, ona ia lē faaumatia lea o Nineva.

Na ita Iona ina ua lē oo le faaumatiaga o le aai. Seʻi mafaufau: Na onosaʻi ma alofa mutimutivale Ieova iā Iona, ae e leʻi alofa mutimutivale Iona i tagata o Nineva. Nai lo o lea, na ia nofo i fafo o le aai i lalo o le paolo o le laau o le kikaiona, ma ua faaʻūʻū o ia. Ona pē lea o le laau, ma ua ita ai Iona. Ona faapea mai lea o Ieova iā te ia: ʻUa sili atu ona e popole i lenei laau nai lo o tagata Nineva. Na ou alofa mutimutivale iā i latou ma faasaoina i latou.’ O le ā le lesona? Na sili atu ona tāua tagata Nineva nai lo o so o se laau.