Faatū e Iesu Ē ua Oti

O LE teine o loo e vaai atu i ai e 12 ona tausaga. O loo uuina e Iesu lona lima, a o lona tamā ma lona tinā o loo tutu latalata i ai. Pe e te iloa le mafuaaga ua latou foliga fiafia ai?

O le tamā o le teine o se tamaloa tāua e igoa i a Iairo. O le isi aso na maʻi ai lona afafine, ma taoto o ia i le moega. Ae e lei faasolo ina malosi o ia. Ae na atili ai ona maʻi. Na popole tele Iairo ma lana avā auā e foliga mai o le a iʻu ina oti la la tama teine. Na o le toatasi lava la la tama. Ona alu ai lea o Iairo ma saili i a Iesu. Na ia faalogo o loo faia e Iesu ni vavega.

Ina ua maua e Iairo Iesu, sa toatele tagata na siomiaina o ia. Ae na sao Iairo i totonu ma faapau i vae o Iesu. ‘Ua maʻi tigaina si ou afafine,’ o lana tala lea. ‘Faamolemole sei e maliu mai e faamalosi iā te ia.’ Na fai atu Iesu o le a alu atu o ia.

A o latou savavali, sa tautulei pea le motu o tagata i le fia latalata atu. Na tu faafuasei Iesu. ‘O ai na paʻi mai i a te au?’ o lana fesili lea. Na iloa e Iesu ina ua alu ese se malosi mai iā te ia. Ae o ai? O se fafine na maʻi tigaina mo le 12 tausaga. Na paʻi atu i ofu o Iesu, ma faamalolo ai!

Na fiafia Iairo i lenei mea, auā ua ia iloa ai e faigofie i a Iesu ona faamalolo i se tasi. Ona sau lea o se avefeau: ‘Aua e te toe faalavelave i a Iesu,’ o lana upu lea i a Iairo. ‘Ua oti lou afafine.’ Na iloa mamao atu e Iesu lenei mea ma na ia fai atu i a Iairo: ‘Aua e te popole, o le a le afaina o ia.’

Ina ua latou oo atu i le fale o Iairo, sa fetagisi tagata ma le faanoanoa. Ae ua fai atu Iesu: ‘Aua tou te fetagisi. E lei oti le teine itiiti. O loo moe o ia.’ Ae na latou toē ma ula i a Iesu, auā ua latou iloa ua oti o ia.

Ona ave lea e Iesu matua o le teine ma le toatolu o ona aposetolo i le potu o loo taatia ai le teine itiiti. Na ia tago atu i lona lima ma fai atu: ‘Nofo i luga!’ Ona toe ola lea o ia e pei ona e vaai atu i ai. Na tu o ia i luga ma savalivali solo! O le mafuaaga lena ua fiafia ai lona tinā ma lona tamā.

E le o le tagata muamua lenei na faatuina e Iesu mai le oti. O le tagata muamua o loo taʻua e le Tusi Paia o le tama a se fafine ua oti lana tane e nofo i Naina. Ona toe faatuina foi lea e Iesu Lasalo, le tuagane o Maria ma Mareta, mai le oti. A pule loa Iesu o le tupu a le Atua, o le a ia toe faatutuina le toatele o tagata oti i le ola. Pe tatou te le fiafia i lenei mea?