Ua Toe Ola Se Teineitiiti

Ua iloa e Iairo, ua faamālōlōina e Iesu le fafine lea sa maua i le punatoto. Ua ia mautinoa foʻi la, e mafai e Iesu ona faamālōlōina lona afafine, e ui ua manatu o ia ʻua oti lona afafine i le taimi lea.’ (Mataio 9:18) Faamata e iai se mea e mafai ona faia e Iesu?

A o fetalai atu Iesu i le fafine lea ua faamālōlōina, ae ō atu ni tamāloloa mai i le aiga o Iairo ma faapea atu iā Iairo: “Ua oti lou afafine! Aiseā e toe faalavelave ai i le aʻoaʻo?”—Mareko 5:35.

Pagā se tala faanoanoa! O lenei tamāloa o se tasi e matuā faaaloalogia i le nuu, ae o lea ua leai se isi mea e mafai ona ia faia e fesoasoani ai i lona afafine e toʻatasi, auā o lea ua oti o ia. Peitaʻi, ua lagona atu e Iesu le mea ua tupu, ona ia fetalai atu lea iā Iairo i upu faalaeiau nei: “Aua e te fefe, ae ia faatuatua.”—Mareko 5:36.

Ua ō atu nei Iesu ma Iairo i lona fale. Ina ua la taunuu atu, o loo lauē ma tagituʻi tagata i le faavauvau. Ua ulufale atu nei Iesu ma fai atu se faamatalaga e faateʻia ai: “E leʻi oti le teine, ae o loo moe o ia.” (Mareko 5:39) Peitaʻi, ua toē faaamuamu tagata iā te ia auā ua latou iloa ua oti le teineitiiti. O le faaaogāina e Iesu o lona mana na tuuina mai e le Atua, ua faamaonia atu ai e mafai ona toe faatūina se tagata mai i le oti, e pei lava o le fafaguina o se tagata sa moe gase.

Ua fai atu nei Iesu i tagata uma e ō i fafo, seʻi vaganā ai Peteru, Iakopo, Ioane ma mātua o le teineitiiti. Ua latou ō atu i le potu o loo taoto ai le teineitiiti. Ua tago atu Iesu i lona lima ma fetalai atu: “ʻTalita kumi,’ o lona uiga pe a faaliliuina: ʻLe tamaʻitaʻi e, ou te fai atu iā te oe, Inā tū ia i luga!’” (Mareko 5:41) O le taimi lava lea ua tū ai i luga le teineitiiti ma amata ona savali. Seʻi mafaufau i le matuā fiafia o Iairo ma lana avā i le mea ua tupu. Ina ia faamautinoa atu e moni lava o lea ua toe ola le teineitiiti, ua faatonuina e Iesu i latou ina ia avatu se meaʻai iā te ia.

I taimi ua teʻa, sa faatonuina ai e Iesu i latou e na te faamālōlōina, e aua le faasalalauina atu vavega na ia faia mo i latou. O lana faatonuga foʻi lenā i mātua o lenei teineitiiti. Peitaʻi, o le fiafia tele o Iairo ma lana avā faapea isi tagata, ua latou faasalalau atu ai le mea ua tupu “i lenā vaipanoa uma.” (Mataio 9:26) Pe e lē o lau gaoioiga foʻi lenā e fai, pe afai o lea na e vaai i se tasi e pele iā te oe ua toe faatūina mai i le oti? Ua toʻalua ai i inei tagata ua faamauina i le Tusi Paia, ua toe faatūina e Iesu mai i le oti.