Fafaga e Iesu Tagata e To‘atele

O SE mea mataʻutia na tupu. Faatoa uma lava le fasiotia o Ioane le papatiso. O Herotia, le avā a le tupu sa lei fiafia iā te ia. Ma na ia mafai ona faaosoina le tupu ia tipi ese le ulu o Ioane.

Ina ua faalogo i ai Iesu, sa faanoanoa tele o ia. Ona alu lea o ia i se nofoaga tuufua. Ae na mulimuli atu i ai tagata. Ina ua iloa e Iesu, sa alofa o ia i a i latou. Ona ia talanoa lea i a i latou i le malo o le Atua, ma faamalolo i e mamaʻi.

I le afiafi lena, na o atu ai le au soo iā te ia ma fai atu: ‘Ua fai si tuai, ma o se nofoaga tuufua lenei. Ia tuuina atu tagata e o e faatau ni a latou mea ai i le isi nuu o latalata mai.’

‘E le tatau ona latou o,’ o le tali lea a Iesu. ‘Ia outou tuuina atu i ai ni mea ai.’ Na faliu Iesu i a Filipo, ma fesili: ‘O fea tatou te faatau ai ni mea ai e tofu ai ia tagata e toatele uma?’

‘O le a tele ni tupe e faatau ai ni mea ai ina ia tofu ai tagata,’ o le tali lea a Filipo. Ona fai mai lea o Aneterea: ‘O lenei tama itiiti o loo tauaveina a tatou mea ai, o loo iā te ia papa falaoa e lima ma iʻa e lua. Ae e le taitai lava mo nei tagata uma.’

‘Ia fai atu i tagata e nonofo uma i le mutia,’ o le tala lea a Iesu. Ona ia faafetai lea i le Atua mo mea ai ma amata ona ia tofitofi i vaega. Ona sosoo ai lea ma le tuuina atu e le au soo o falaoa ma iʻa i tagata. E toa 5,000 tamaloloa ma le tele o afe o fafine ma tamaiti. Na latou aai seia maoona i latou. Ma ina ua aoina e le au soo mea na totoe, e 12 ato na tutumu!

Ona o ai lea o soo o Iesu i se vaa i le isi itu o le Sami o Kalilaia. I le po na oso ai se afā, ma na felafoaiina solo ai e galu tetele le vaa i lea mea ma lea mea. Ua fefefe le au soo. Ma i le ogatotonu o le po, na latou vaaia ai se tagata o savali atu i a i latou i luga o le sami. Na latou alalaga i le fefe, auā latou te le malamalama i lenei mea.

‘Aua tou te fefefe,’ o upu ia a Iesu. ‘O au lenei!’ A e lei talitonu i latou. Sa fai atu Peteru: ‘Afai o oe moni le Alii e, ia e fai mai ou te savali atu i luga o le sami iā te oe.’ Na tali atu Iesu: ‘Sau!’ Ona savali lea o Peteru i luga o le vai! Ona fefe ai lea o ia ma goto ifo i lalo, ae na laveaiina o ia e Iesu.

Mulimuli ane, ona toe fafaga lea e Iesu le afe ma afe o tagata. E na o le fitu papa falaoa ma nai tamai iʻa laiti. Ma sa tele ma tele mea ai mo tagata uma. Pe e le manaia ea le tausiga a Iesu i tagata? Afai o le a pule o ia o se tupu a le Atua o le a tatou le popole lava i soo se mea!