Toe Foʻi Iesu i le Lagi

A O gasolo atu aso, na faaali atu Iesu i ona soo i le tele o taimi. E faatasi ona vaaia o ia e le toa 500 o soo. A o faaali o ia i a i latou, sa ia talanoa e uiga i le malo o le Atua. Na auina mai e Ieova Iesu i le lalolagi e aʻoaʻo e uiga i le Malo. Ma na faaauauina ona ia faia lea mea e oo lava ina ua mavae le faatuina o ia mai le oti.

Pe e te manatua o le ā le malo o le Atua? Ioe, o se pulega moni a le Atua i le lagi, ma o Iesu o Le na filifilia e le Atua e fai ma tupu. E pei ona tatou aʻoaʻoina, ua faaalia e Iesu o le a avea o ia ma se tupu lelei tele, i lona fafagaina o e fia aai, faamalolo e mamaʻi, ma toe faatutuina mai e ua oti!

O lea, a pule loa Iesu o se tupu i le lagi mo le afe o tausaga, o le a faapeʻī le lalolagi? Ioe, o le lalolagi atoa o le a avea ma parataiso matagofie. O le a leai ni taua, solitulafono, po o faamaʻi po o le oti foi. Tatou te iloa e moni, auā na faia e le Atua le lalolagi o se parataiso ia fiafia ai tagata. O le mafuaaga lena na ia faia ai le faatoaga o Etena i le amataga. Ma o le a tagai i ai Iesu o le mea e finagalo i ai le Atua e fai, o le a faataunuuina lava.

Ua oo nei le taimi mo Iesu e toe foi ai i le lagi. E 40 aso na faaali atu ai Iesu i ona soo. Ua latou mautinoa ai ua toe ola o ia. A o lei tuua e ia ona soo, sa ia faapea atu i a i latou: ‘Ia outou nonofo pea i Ierusalema seia outou mauaina le agaga paia.’ O le agaga paia o le malosi galue o le Atua, e pei o se matagi e agi, e fesoasoani ai i ona soo i le faia o le finagalo o le Atua. Mulimuli ane, ona fai atu lea o Iesu: ‘Tou te talaʻi foi e uiga i a te au i vaega mamao o le lalolagi.’

Ina ua uma ona taʻu atu e Iesu na mea, ona tupu ai lea o se mea uiga ese. Ua amata ona ia alu aʻe i le lagi, e pei ona e vaai atu i ai. Ona ufitia ai lea o ia e se ao ua le toe vaaia, ma ua le toe iloa atu e le au soo Iesu. Ua alu atu Iesu i le lagi, ma pule mai o ia i luga o ona soo.