Olioli ma Viia le Atua i Fonotaga

Mai le amataga o tausaga e sefulu sa amata i le 1880, na iloa ai e Tagata Aʻoga o le Tusi Paia e faapea, i le faaopoopo atu i sauniga a le faapotopotoga, o le a aogā mo i latou pe a faamasani atu i o latou uso talitonu mai isi vaipanoa. O lea na amata ai ona latou faatulagaina tauaofiaga faaletausaga a Tagata Aʻoga o le Tusi Paia mai itu uma o le Iunaite Setete, faapea foi ma Kanata mulimuli ane. Sa avea ia mea ma vaitaimi e faafouina ai faaleagaga; mo ni nai aso sa saunia ai faatonuga maeʻaeʻa faale-Tusi Paia, ma sa olioli tagata uma i fetufaaiga fiafia o faalaeiauga. Na avea foi le papatisoga o tagata talitonu fou ma se vala masani i tauaofiaga. Sa faaaogā foi tauaofiaga e tuuina atu ai se molimau e sili atu ona tele i le lautele.​—Roma 1:11, 12.

I aso nei ua olioli ai Molimau a Ieova i fonotaga e lē aunoa. E masani lava pe tusa ma le 18 i le 25 faapotopotoga e faatasitasi ai i mea e taʻua o matagaluega, na e asiasia, pe auauna ai ovasia faimalaga. E faalua i le tausaga ona faatulaga fonotaga i se nofoaga e feiloai faatasi uma i ai faapotopotoga o se matagaluega, po o se vaega foi o lena matagaluega, i le Aso Toonai ma/po o le Aso Sa.

O tauaofiaga tetele e taʻitolu pe taʻifa aso, ua taʻua o tauaofiaga itumalo, e faatasi i le tausaga ona faatulagaina i atunuu taitasi, i le mea e mafai e se faitau afe ona potopoto faatasi i ai i se nofoaga e tasi. O nei tauaofiaga ua saunia ai faamalosiauga faaleagaga mo Molimau a Ieova ma isi o loo naunau fiafia i a latou galuega, ma avatu ai foi se molimau i le lautele.

O le polokalama mo nei fonotaga ma tauaofiaga e saunia e le Vaega Pule o Molimau a Ieova ma e faavae i manaoga o Molimau i le lalolagi aoao. E aofia ai lauga, o talanoaga, ma ni taulimaina e tutusa moni ma mea tutupu i le olaga ua taʻua o faataʻitaʻiga, e tauaaoina mai e ovasia faimalaga ma Molimau agavaa mai faapotopotoga. E faamatala foi e tagata eseese ni mea tutupu e uiga i le auala o latou faafetaiaia ai le luʻi o le ola i le avea o ni Kerisiano i se lalolagi faalēmataʻu po o iʻuga na latou oo i ai i le faiva. I tauaofiaga itumalo, e iai se vala faaopoopo​—o ni taulimaga e faia e tagata, o tala faale-Tusi Paia po o tala i ni faatulagaga faaonaponei, e faaalia ai pe o faapefea e Kerisiano ona faafetaiaia faafitauli o loo latou fesagai i aso nei.

E saunia ai foi taumafataga ma mea taumafa māmā mo se meaalofa itiiti. Ua faaavanoa ai e lenei mea se mafutaga olioli pe a malolo mai i sauniga o le fono. O galuega uma lava ua aofia ai i le faatinoina o nei mea ua faia e tagata tauofo mai o Molimau a Ieova. O le tau o mea o loo faaaogā ma isi tupe faaalu ua totogiina uma lava i foai tauofo. E ulufale fua, ma e leai foi ni lafoga po o peleti e aoina.

E mafai ona e maua mai i le faapotopotoga a Molimau a Ieova i lou nuu po o afea ma o fea foi ua fuafua e fai ai nei faatasiga i lou vaipanoa. O le a maua mai ai foi ni faamatalaga e faatatau i ni fuafuaga tau femalagaaiga, faapea foi ma le auala e mafai ai ona maua ni nofoaga e api ai.

O nei fonotaga ma tauaofiaga ua fesoasoani i Molimau a Ieova ma ē uma o loo auaufaatasi ma i latou, ina ia tagai i tala atu o a latou faapotopotoga, ma ia talisapaia le aufaatasiga atoa a o latou uso i le lalolagi.​—1 Peteru 2:17.

• O ā aogā na maua e uluai Tagata Aʻoga o le Tusi Paia mai a latou tauaofiaga?

• Faamatala le faatulagaga ma le polokalama mo fonotaga matagaluega ma tauaofiaga itumalo.

[Ata i le itulau 18]

Tala faale-Tusi Paia i se tauaofiaga itumalo, Iunaite Setete

Tauaofiaga faavaomalo, Polani

Tauaofiaga faavaomalo, Anitenitina

Fonotaga matagaluega, Iapani

Ua maua e usufono tusi faale-Tusi Paia, Suiselani

Papatisoga i se tauaofiaga faavaomalo, Aferika i Saute

Ua tatalaina se lomiga fou faale-Tusi Paia, Kanata

Ua aufaatasi usufono i le usuina o le pese, Sepania