AUALA E OLA AI O SE KERISIANO
Tauaofiaga Faaletausaga—O se Avanoa e Faaalia ai le Alofa
Aiseā e tatou te matuā fiafia ai i tauaofiaga faaletausaga? I le pei o Isaraelu anamua, o tauaofiaga i aso nei e tatou te maua ai le avanoa e tapuaʻi atu ai iā Ieova faatasi ma le faitau selau e oo lava i le faitau afe o o tatou uso talitonu. E tatou te fiafia i le mauaina o tausamiga o meaʻai faaleagaga. E tatou te faatāua le taimi e faaalu ma uō ma aiga. O le lototalisapaia e uunaʻia ai i tatou e auai i aso uma e tolu o le tauaofiaga.
Pe a maua le avanoa e tatou te faapotopoto faatasi ai, ia mafaufau e lē gata o mea e tatou te aʻoaʻoina mai ai, ae o le auala foʻi e tatou te faaalia ai le alofa i isi. (Ka 6:10; Epe 10:24, 25) Pe a tatou faamuamua manaʻoga o isi pe taofi na o nofoa e tatou te manaʻomia, e faaalia ai o loo tatou naunau mo le lelei o isi. (Fil 2:3, 4) O tauaofiaga o se avanoa lelei e maua ai ni uō fou. Ia fai ma o tatou sini le talanoa atu i isi e tatou te lē masani ai, a o leʻi amata ma pe a māeʻa le polokalame, po o taimi foʻi o mālōlōga. (2Ko 6:13) O le a tatou maua i nei faatasiga ni faauōga tumau e faavavau! Ae sili atu i lenā, pe a mātauina e isi lo tatou alofa moni e ala i gaoioiga, latou te ono filifili foʻi e tatou te auauna faatasi iā Ieova.—Ioa 13:35.
MAIMOA I LE VITIŌ TAUAOFIAGA FAAVAOMALO “E LĒ UMA LE ALOFA”!, ONA TALI LEA O FESILI NEI:
Na faapefea ona faaalia le alofa i sui usufono i tauaofiaga faavaomalo o le 2019?
Aiseā e mataʻina ai le autasi ma le alofa i le va o tagata o Ieova?
O ā vala o le alofa faa-Kerisiano sa faamatilatila mai e sui o le Vaega Pule?
O le ā lau vaega fai i le faaalia o le alofa i a tatou tauaofiaga?
Na faapefea i le alofa ona autasia ai o tatou uso i Siamani ma Korea i Saute?
O le ā ua tatou maumauaʻi e fai?