Mataupu 11
Aiseā ua Faataga ai pea e le Atua le Amio Leaga?
1. (a) O le ā le tulaga o le lalolagi i aso nei? (e) O le ā le faitioga ua faia e ni isi tagata?
I SO O SE mea e te tagai i ai i le lalolagi, ua i ai pea le solitulafono, feitagai ma faalavelave. E masani ona pagatia ai ē lē sala. O isi ua latou tuuaia le Atua. Atonu e fai mai: ‘Afai e i ai se Atua ai se ā ua ia faataga ai nei mea matautia e tutupu?’
2. (a) O ai o faia mea leaga? (e) Atonu e faapefea ona ono mafai ona taofia le tele o puapuaga i le lalolagi, ma ai se ā?
2 Ae o ai ē o faia nei mea leaga i isi? O tagata, a e lē o le Atua. E taʻusalaina e le Atua amio leaga. O le mea moni, o le tele o puapuaga i le lalolagi e mafai ona taofia pe afai e usiusitai tagata i tulafono a le Atua. Ua ia poloaiina i tatou ia alolofa. E faasaina e ia le fasioti tagata, gaoi, faitaaga, matapeapea, onā ma isi amioleaga sese e faapogaia ai ona pagatia le fanau a tagata. (Roma 13:9; Efeso 5:3, 18) Na faia e le Atua Atamu ma Eva ma ni mafaufau ma ni tino ofoofogia faatasi ma se tomai e fiafia atoatoa ai i le olaga. Sa lei finagalo o ia e pagatia i laua po o a la fanau pe oo foi i ai ni faalavelave.
3. (a) O ai e tuuaia mo amio leaga? (e) O le ā ua faaalia ai e ono mafai e Atamu ma Eva ona tetee atu i faaosoosoga a Satani?
3 O Satani le Tiapolo na amataina le amio leaga i le lalolagi. E tatau ona tuuaia foi Atamu ma Eva. Sa lē vaivai tele laua e ono lē mafai ai ona tetee atu ina ua tofotofoina e le Tiapolo. E mafai ona la fai atu i a Satani “ina alu ese ia,” e pei ona sa faia e le tagata lelei atoatoa o Iesu mulimuli ane. (Mataio 4:10) Ae la te lei faia. O le iuga la, ua lē lelei atoatoa ai i laua, ma a la fanau uma, e aofia ai i tatou, ua tuufaasolo mai i ai, ua aumaia ai maʻi, faanoanoa ma le oti. (Roma 5:12) Ae ai se ā ua faataga ai e le Atua le amio leaga e faaauau?
4. O le ā e mafai ona fesoasoani i a i tatou ia malamalama le faatagaina faalētumau e se Atua alofa o le amio leaga?
4 Atonu e muamua ona mafaufau se tagata faapea ua leai lava se mafuaaga ua i le Atua e faataga ai puapuaga uma e oo i le tagata i le tele o senituri ua mavae. E ui i lea, pe ua tonu ea lea faaiuga? Pe ua lē faatagaina ea e matua alolofa moni i o latou fanau ia faia ni taotoga tiga ina ia faaleleia ni isi o faafitauli? Ioe, o le faatagaina o puapuaga pupuu e masani lava ona faapogaia ai le fanau ona fiafia i le soifua maloloina e sili ona lelei mulimuli ane ai i le olaga. O ā lelei ua faia e le Atua i lona faatagaina o le amio leaga?
O SE FINAUGA TĀUA E MANAOMIA ONA FAAIUINA
5. (a) Sa faapefea ona faafeteenai Satani i le Atua? (e) O le ā sa folafola atu e Satani i a Eva?
5 O le fouvalega i le Atua i le faatoaga i Etena ua lagā ai se finauga tāua. E ao ona tatou suesue ia malamalama i le pogai ua faataga ai e le Atua le amio leaga. Sa tulei Ieova le Atua i a Atamu e aua neʻi ʻai i se laau faapitoa i le faatoaga. Afai e ʻaia e Atamu, o le ā e tupu? Ua tulei le Atua: “E te oti ai lava.” (Kenese 2:17) Peitai sa taʻu atu e Satani lona tuufaafeagai. Sa ia fai atu i le avā a Atamu, o Eva, e ʻai le fua o le laau faasaina. “Lua te le oti lava,” o le tala lea a Satani. Na ia fai atili i a Eva: “Auā ua silafia e le Atua, o le aso lua te aai ai e pupula ai o oulua mata; ona avea ai lea o oulua e pei ni atua o loo iloa le lelei ma le leaga.”—Kenese 3:1-5.
6. (a) Ai se ā na lē ausia ai Eva i le Atua? (e) O le ā sa uiga ia i le ʻai mai i le laau faasaina?
6 Sa lē usitai Eva i le Atua. Sa talitonu Eva i a Satani. Sa manatu faapito o ia o le a ona mauaina ni aogā i le lē usitai i le Atua. Ua manatu ia o le a le toe tali atu o ia po o Atamu i le Atua. O le a lē toe gauai i laua i ana tulafono. E mafai ona filifili i laua i le mea ua “lelei” ma le mea ua “leaga.” Sa lolo atu Atamu ma Eva ma ʻai foi o ia. I le taʻua o le uluai agasala i le Atua, fai mai le The Jerusalem Bible: “O le malosi e filifili ai i le mea ua lelei ma le mea ua leaga ma fai, o se tautinoga ia faaatoatoa le saolotoga o tulaga tau amio . . . O le uluai agasala sa o se luitau i le pule silisili a le Atua.” O lea, sa o se osofaiga i le aiā a le Atua o le avea ma pule totino i le tagata.
7. (a) O le ā le finauga sa lagā e ona le lē usitai o le tagata? (e) O ā fesili e manaomia ona taliina i le fesootai ma lenei finauga?
7 I lo la ʻaia o le ua faasaina, sa faaesea ai e Atamu ma Eva i laua mai i le pulega a le Atua. Sa o i lo laua lava ala, faia le mea ua “lelei” po ua “leaga” e tusa ma a la faaiuga. O lea o le finauga tāua na lagā: Pe e i ai i le Atua le aiā e avea ai ma pule atoatoa o le fanau a tagata? I ni isi faaupuga, po o Ieova ea e filifili i le mea ua lelei po ua leaga mo le fanau a tagata? Po o Ia o lē taʻu maia o le ā le amio lelei ma le amio ua leaga? Po o le, pe e mafai e le tagata ona faia se galuega lelei o le pulea o ia lava? O ai e silisili ona lelei lana pule? Pe e mafai e tagata, i le taʻitaʻiga lē vaaia a Satani, ona pule ma le manuia e aunoa ma Ieova? Pe e manaomia le taʻitaʻiga a le Atua ia faavae se pulega amiotonu e aumaia se filemu e faavavau i le lalolagi? O fesili ia na lagā i lenei osofaiga i le pule silisili a le Atua, o lana aiā o le avea ma pule atoatoa mo le fanau a tagata.
8. Ai se ā na lē faaumatia ai loa e Ieova ē fouvale i lea lava taimi?
8 E moni, i le taimi tonu na tupu ai le fouvalega, e mafai e Ieova ona faaumatia loa le toatolu na fouvale. Sa le masalomia lona malosi atu i lo Satani po o Atamu ma Eva. Ae o le faaumatia o i latou o le a lē foia ai le mataupu i le ala e sili ona lelei. O le a lē tali ai le fesili pe e mafai e tagata ona pulea ma le manuia i latou e aunoa ma le fesoasoani mai le Atua. O lea na faataga e Ieova le taimi e faaleleia ai le finauga tāua na lagā.
FAALELEIA O LE FINAUGA
9, 10. O ā iuga o le taumafai o tagata e pulea i latou lava e aunoa ma le taʻitaʻiga a le Atua?
9 Ua mavae atu le taimi. Po o ā iuga? O le ā sau tala? Pe ua faaalia e tala faasolopito i le 6,000 tausaga ua mavae le mafai ona pulea ma le manuia e tagata i latou e aunoa ma le taʻitaʻiga a le Atua? Pe ua saunia e tagata pulega lelei mo faamanuiaga ma le fiafiaga o tagata uma? Po o le, pe ua lē faaalia e faamaumauga o tala faasolopito le faamaoni o upu a le perofeta o Ieremia: “E le o i le tagata e savali ona faatonuina le mea e ui ai o ia”?—Ieremia 10:23.
10 I le tala faasolopito atoa, ua taumafaia ituaiga o pulega uma, ae ua leai se mea ua ona aumaia le saogalemu ma le fiafiaga moni mo i latou uma o ola i a latou pulega. Atonu ua faasino lima isi i ni faailoga o le agai i luma. Ae pe e mafai e se tagata ona tautala i se agai moni i luma pe afai ua suia aū ma fulu aū e pomu atomika, ma ua matataʻu le lalolagi i se isi taua? O le ā le lelei pe afai ua savalia e tagata le masina ae e lē mafai ona ola faatasi i le filemu i le lalolagi? O le ā le lelei o i ai pe a fausia e tagata fale ua faameafaleina i mea uma faaonapo nei ae o aiga o mau ai ua taapeape i faafitauli? Pe e avea sauaga i magaala, le faaleagaina o mea totino ma le ola ma le salalau o le solitulafono ma mea e mitamita ai? E leai! Ae o auga nei o le pulea e tagata o i latou e aunoa ma le Atua.—Faataoto 19:3.
11. O lea, ma le mautinoa lava, o le ā e manaomia e tagata?
11 E ao ona manino faamaoniga i tagata uma. O taumafaiga a le tagata e pulea ia lava e saoloto mai le Atua ua toilalopopo. Ua iu i ni puapuaga matautia faaletagata. Ua tala mai e le Tusi Paia, “e pule le tasi tagata i le tasi, e leaga ai ia lava.” (Failauga 8:9) E manaomia e tagata taʻitaʻiga a le Atua e pulea ai a latou mataupu fai. E pei ona faia e le Atua le tagata ma le manaoga e ʻai ma inu, o lea na faia foi le tagata e naunau e usiusitai i tulafono a le Atua. Afai e lē amanaia e tagata tulafono a le Atua, o le a oo ai i ni faigata, e pei foi ona pagatia pe a lē amanaia manaoga o lona tino mo mea e ʻai ma vai.—Faataoto 3:5, 6.
AISEĀ UA LEVA TELE AI?
12. Ai se ā ua faataga ai e le Atua sea taimi umi e faaleleia ai le finauga?
12 Ae atonu e fesili se tagata, ‘Ai se ā ua faataga ai pea e le Atua se taimi umi, e tusa ma le 6,000 tausaga, e faaleleia ai lenei finauga? Pe e lē ono faaleleia ea i se auala lelei i se taimi umi ua mavae?’ E leai. Ana fai e liuliualo mai le Atua i se taimi umi ua mavae, o le a ono tuuaia faapea sa lei lava le taimi mo tagata e faataʻitaʻia ai. Petai, ua lava nei le taimi ua maua e tagata e faia ai se malo e faamalieina manaoga o ona tagata uma, e faapea foi ma le mauaina o ni matatia foi faasaienisi e ono fesoasoani i le lelei o tagata uma. Ua faatino e tagata toetoe lava o ituaiga uma o pulega i le gasologa o senituri. Ma o lo latou agai i luma i le faasaienisi ua maofa tele. Ua latou faaaogā le malosi o le atoma (atom) ma malaga i le masina. Ae o le ā le iuga? Pe ua na aumaia ea se faiga fou aoao o mea mo le manuia o tagata?
13. (a) E tusa lava po o ā agaigai i luma faasaienisi a le tagata, o le ā le tulaga i aso nei? (e) O le ā ua faamaonia manino e lenei mea?
13 Ua va i sini! I lo lea, ua tele ai le lē fiafia ma faalavelave i le lalolagi i lo muamua. O le mea moni, ua ausia e solitulafono, polusione, taua, aiga malepelepe ma isi faafitauli se tulaga mataʻutia ua talitonu saienitisi ua faamataʻu ai le tumau pea o tagata. Ioe, ua mavae e tusa ma le 6,000 tausaga le pulea e tagata i latou lava, ma le ausia o se matatia fou o le “agai i luma” faasaienitisi, a ua fesagai nei le fanau a tagata ma le faaumatia o ia e ia lava! Paga le manino e lē mafai e tagata ona pulea i latou lava e aunoa ma le Atua! E faapea foi ona lē ono faitio mai se tasi ua lē lava le taimi ua faataga e le Atua e faaleleia ai lenei finauga.
14. Ai se ā e ao ai ona faalototeleina i tatou e suesueina le isi finauga tāua na lagā e Satani?
14 E mautinoa lava, ua i le Atua ni mafuaaga lelei mo le faatagaina o tagata i lalo o le pule a Satani, ia faapogaia ai le amio leaga ua loa ona i ai. E ala i lana fouvalega, ua lagā ai foi e Satani se isi finauga e manaomia ai se taimi ina ia foia. O le iloiloina o lenei finauga o le a saunia ai se fesoasoani atili e malamalama ai i le pogai ua faataga ai e le Atua le amio leaga. E ao ona e naunau faapitoa i lea finauga auā ua aafia totino ai oe.
[Ata i le itulau 100]
Mo se mafuaaga lelei, e faataga ai e se matua se taotoga tiga i sona alo pele. Ua i le Atua foi ni mafuaaga lelei mo le faatagaina lē tumau o puapuaga i tagata.
[Ata i le itulau 101]
I le aina e Atamu ma Eva o le fua faasaina, ua la tuulafoaia ai le pulega a le Atua. Sa amata ona faia ai a laua lava faaiuga i le po o le ā ua lelei po ua leaga.
[Ata i le itulau 103]
E pei lava ona sa foafoaina le tagata ma le manaoga ia ai i mea e ʻai ma inu i vai, sa faapena foi ona foafoaina o ia ma le manaomia o le taʻitaʻiga a le Atua.