Puapuaga o Tagata—Aisea ua Faataga ai e le Atua?

I LE amataga o le talafaasolopito o le tagata, sa matuā leai lava ni loimata o le faanoanoa po o le tiga. Sa leai ni puapuaga o le tagata. Sa tuuina atu i tagata se amataga lelei atoatoa. “Ua silasila atu le Atua i mea uma ua na faia, faauta foi, ua matuā lelei lava.”—Kenese 1:31.

Ae ua tetee mai nisi e faapea, ‘O le tala e uiga i a Atamu ma Eva i le faatoaga o Etena, ua na o se tala faatusa.’ E faanoanoa lava, ona o le mea lena ua fai mai ai le toatele o taʻitaʻi lotu o Kerisinetoma. Ae peitai, e leai se pule e sili atu na i lo o le pule a Iesu Keriso lava ia na faamautinoa mai ai le moni o mea na tutupu i Etena e tusa ai ma talafaasolopito. (Mataio 19:4-6) E lē gata i lea, e na o le pau lava le auala e malamalama ai i le pogai ua faatagaina ai e le Atua puapuaga o tagata, o le suesueina lea o mea na tutupu i le amataga o le talafaasolopito o le tagata.

Na tuuina atu i le uluai tagata o Atamu se galuega faamalie loto o le tausia o le faatoaga o Etena. Na faataatia foi e le Atua i ona luma le sini o le faalautele atu o lona aiga faa-Etena e avea o se faatoaga o le fiafia i le lalolagi aoao. (Kenese 1:28; 2:15) Ina ia fesoasoani i a Atamu e faataunuuina lenei galuega tele, na saunia ai e le Atua mo ia se paaga faaipoipo, o Eva, ma fetalai atu i a te i laua ina ia fanafanau ma ia uluola, ma faatoilalo le laueleele. Ae peitai, sa manaomia foi se isi mea ina ia faamautinoa ai le taulau manuia o le fuafuaga a le Atua mo le lalolagi ma tagata. I le faia i le faatusa o le Atua, na tuuina atu ai i le tagata le filifiliga saoloto; i lea, sa tatau ona aua neʻi feteenai le loto o le tagata ma le finagalo o le Atua. Auā afai o lea le tulaga, o le a iai se fenuminumiai i le vateatea, ma o le a lē mafai ona faataunuuina le fuafuaga a le Atua ina ia faatumuina le lalolagi i se aiga faaletagata filemu.

O le gauai atu i le pule a le Atua, e lē otometi. Sa tatau ona avea o se faaaliga o le alofa mai le filifiliga saoloto a le tagata. Mo se faaaoaoga, ua tatou faitau ai e faapea, ina ua fesagai Iesu Keriso ma se tofotofoga ogoogo, na ia tatalo e faapea: “Loʻu Tamā e, a e finagalo i ai, ia e ave ese lenei ipu ia te au; a e aua le faia loʻu loto, a o lou finagalo.”—Luka 22:42.

Na faapena foi ona tuu atu i a Atamu ma Eva ina ia faamaonia pe la te mananao e gauai atu i le pule a le Atua. O lea la, na fuafuaina ai e Ieova se tofotofoga faigofie. O se tasi o laau sa i le faatoaga na taʻua “o le laau e iloa ai le lelei ma le leaga.” Sa fai ma sui o le aiā a le Atua e filifili ai i tapulaa o amioga saʻo. I se faamatalaga manino ma faigofie, na faasā ai e le Atua le ʻaina o le fua mai lenei laau faapitoa. Pe afai e lē usiusitai Atamu ma Eva, o le a iu ai i lo la oti.—Kenese 2:9, 16, 17.

Le Amataga o Puapuaga o le Tagata

I se tasi aso, na faafiapoto ai se atalii agaga o le Atua ma fesiligia le auala o le pulega a le Atua. I le faaaogaina o se gata e tautala atu ai, na ia fesili atu ai i a Eva e faapea: “E moni ea, na fetalai mai le Atua, lua te le aai i laau uma o le faatoaga?” (Kenese 3:1) I lea, ua amata ai ona totō i le mafaufau o Eva le masalosalo, po o saʻo le auala o faia ai le pulega a le Atua.a I le tali atu, na taʻu atu ai e Eva le tali saʻo, lea na ia iloa mai i lana tane. Ae peitai, i lena taimi, na tetee ai le meafaiola agaga i le Atua ma pepelo ai e uiga i iuga o le lē usiusitai i le faapea atu: “Lua te le oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.”—Kenese 3:4, 5.

E faanoanoa lava, ona sa faaseseina Eva i le manatu e faapea, o le lē usiusitai, o le a iu ai, e lē i puapuaga, ae i se olaga e sili ona lelei. O le umi ona ia vaavaai i le fua o le laau, o le tele foi lena o lona naunau i ai, ma na ia ʻaia ai loa. Mulimuli ane, na ia faatosina Atamu ina ia ʻai ai foi. O le tulaga faanoanoa na oo i ai, ona ua filifili Atamu e faafiafia lana avā na i lo o le faafiafia o le Atua.—Kenese 3:6; 1 Timoteo 2:13, 14.

E ala i le faapogaia o lenei fouvalega, na liua ai e lenei meafaiola agaga o ia lava ma sē e fouvale i le Atua. O lea, na taʻua ai o ia o Satani, e sau mai le upu Eperu o lona uiga “o lē tetee.” Sa ia pepelo foi e uiga i le Atua, ua avea ai o ia ma taufaaleaga. I lea, ua taʻua ai foi o ia o le Tiapolo, e sau mai le upu Eleni o lona uiga “o le taufaaleaga.”—Faaaliga 12:9.

I lea, na amata ai puapuaga o tagata. E toatolu meafaiola a le Atua na faaaogaseseina le meaalofa na tuuina atu i a i latou, o le filifiliga saoloto, e ala i le filifilia o se auala manatu faapito o le olaga e tetee atu ai i Lē na foafoaina i latou. Ua mapuna aʻe ai nei le fesili e faapea, O le a faapefea ona taulimaina e le Atua lenei fouvalega i se auala amiotonu ina ia mafai ai ona faamautinoaina isi uma o ana foafoaga atamamai, e aofia ai ma agelu faamaoni i le lagi, ma fanau a Atamu ma Eva o le a tutupu mai i le lumanai?

Le Tali Atamai a le Atua

Atonu o le a finau mai nisi e faapea, sa sili ona lelei pe ana faaumatia loa e le Atua i lena taimi Satani, Atamu, ma Eva. Ae o le a lē faaleleia ai i inā le finauga na lagā i le fouvalega. Na luʻia e Satani le auala o le pulega a le Atua, i le faapea atu, o le a sili ona lelei mo tagata pe a ola pea i latou e aunoa ma le pulea e le Atua. O lona taulau i le faaliliueseina o uluai tagata e toalua e faasagatau i le pulega a le Atua, ua lagā ai foi isi fesili. Talu ai ua agasala Atamu ma Eva, po o lona uiga la sa iai se mea sese i le auala na foafoaina ai e le Atua le tagata? Po o le a iai se tagata i le lalolagi e mafai ona tumau lona faamaoni i le Atua? Ae faapefea atalii agelu a Ieova o ē na molimauina le fouvalega a Satani? Po o le a latou lagolagoina le amiotonu o Lana pule silisiliesee? E mautinoa lava, sa manaomia se taimi umi, e lava ina ia faaleleia ai nei finauga. O le pogai lena ua faataga ai e le Atua ia Satani e iai pea e oo mai i ō tatou aso.

A o Atamu ma Eva, i le aso na la lē usiusitai ai, na faasalaina ai i laua e le Atua i le oti. O lea na amata ai ona o la oti. O ē na tupuga mai i a i laua, o ē na afuafuaina ina ua uma ona agasala Atamu ma Eva, na tuufaasolo i ai le agasala ma le oti mai i ō latou mātua lē lelei atoatoa.—Roma 5:14.

Na amata lava le itu a Satani o le finauga i uluai tagata e toalua. Ua ia faaaogaina le taimi atoa lea ua faatagaina atu mo ia e taumafai ai e taofia fanau uma lava a Atamu i lalo o lana pulega. Ua taulau foi o ia i le faaseseina o nisi o agelu e aufaatasi atu ma ia i lana fouvalega. Ae peitai, o le toatele o atalii agelu o le Atua o loo latou lagolagoina pea ma le faamaoni le amiotonu o le pule a Ieova.—Kenese 6:1, 2; Iuta 6; Faaaliga 12:3, 9.

O le finauga, e faatatau lea i le pule a le Atua faasaga i le pule a Satani, o se finauga sa matuā olaola i aso o Iopu. Sa faamaonia e lenei tane faamaoni e ala i lana amio e faapea, sa ia filifilia le pulega amiotonu a le Atua na i lo o le fia tutoatasi faasatani, e pei ona sa faia e na tagata matatau i le Atua, o Apelu, Enoka, Noa, Aperaamo, Isaako, Iakopo, ma Iosefa. Sa avea Iopu ma taulaiga o talanoaga ia na faia i le lagi i luma o agelu faamaoni a le Atua. I le lagolagoina o Lana pule amiotonu, na fetalai atu ai le Atua i a Satani: “Ua e mafaufau ea i laʻu auauna o Iopu, auā ua leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua , ma ʻaloʻalo ese i mea leaga?”—Iopu 1:6-8.

I le musu e ioe e faapea ua toilalo, na faapea atu ai Satani, ua ala ona auauna Iopu i le Atua ona e na o ni mafuaaga manatu faapito, talu ai ua faamanuia e le Atua Iopu i le tele o mea faitino. O lea na finau atu ai Satani e faapea: “Ae peitai, ia e aapa atu lou aao, ma e tago atu i ana mea uma, pe na te le faifai ai ea ia te oe i ou lava luma?” (Iopu 1:11) Na oo lava ina luʻia e Satani le faamaoni o foafoaga faiola uma a le Atua i lona faapea atu: “O mea uma foi ua i ai i le tagata, e avatua e ia e sui aʻi lona ola.” (Iopu 2:4) O lenei osofaiga taufaaleaga, na aafia ai e lē na o Iopu, ae faapea foi ma ē uma o tapuai faamaoni i le Atua i le lagi ma le lalolagi. O le uiga o le faamatalaga a Satani e faapea, e mafai ona lafoaia lo latou faiā ma Ieova pe a oo ina lamatia ō latou ola.

Sa mautinoa atoatoa e Ieova le Atua le faamaoni o Iopu. I le faamaonia o lena mea, na ia faatagaina ai Satani e faapogaia puapuaga faaletagata i a Iopu. Ona o lona faamaoni, sa lē gata ina taʻumamāina ai e Iopu lona lava igoa, ae o le mea e sili ona tāua, o le faaeaina ai o le amiotonu o le pule silisiliesee a Ieova. Na faamaonia ai le Tiapolo o se pepelo.—Iopu 2:10; 42:7.

Ae peitai, o le faaaoaoga sili ona lelei o le faamaoni i lalo o tofotofoga, o Iesu Keriso. Na faaliliuina e le Atua le soifua o lona Atalii agelu mai le lagi i le manava o se taupou. O le mea lea, e leʻi tuufaasolo atu ai le agasala ma le lē lelei atoatoa i a Iesu. Na i lo o lea, na soifua aʻe o ia o se tagata lelei atoatoa, le faatusa talafeagai lelei o le uluai tagata, a o leʻi leiloa le tulaga lelei atoatoa o lena tagata. Na taulai faapitoa Satani i a Iesu, i le tuuina atu i ai o faaosoosoga ma tofotofoga e tele, ma na taualuga i se maliu faalumaina. Ae sa lē taulau ona lepetia e Satani le faamaoni o Iesu. I se tulaga atoatoa, na lagolagoina ai e Iesu le pule amiotonu a lona Tamā. Sa ia faamaonia ai foi e faapea, sa leai se faamolemolega a le tagata lelei atoatoa o Atamu i lona aufaatasi atu i le fouvalega a Satani. Sa ono tatau ona faamaoni Atamu i si ona tofotofoga faatauvaa.

O le ā le Isi Mea na Faamaonia?

Ua tusa nei ma le 6,000 tausaga ua mavae o puapuaga o le tagata talu mai le fouvalega a Atamu ma Eva. Talu mai lena vaitaimi, na faatagaina ai e le Atua tagata e tofo i le tele o ituaiga o pulega. O le faamaumauga matautia o puapuaga faaletagata, ua faamaonia ai e lē mafai e le tagata ona pulea o ia lava. O le mea moni, ua salalau atu le lē pulea i le tele o vaipanoa o le lalolagi. O le fia tutoatasi mai le Atua ua avea ma mala, e pei ona fautuaina e Satani.

E lē tau manaomia ona faamaonia e Ieova se mea i a te ia lava. Ua ia silafia o lana pulega e amiotonu ma e sili ona aogā mo ana foafoaga faiola. Ae peitai, ina ia taliina ma le manuia fesili uma na lagā i le fouvalega a Satani, ua ia faatagaina ai se avanoa mo ana foafoaga faiola e faaalia ai lo latou filifilia o lana pulega amiotonu.

O taui mo le alofa i le Atua ma le faamaoni i a te ia, e sili mamao atu na i lo o se vaitaimi puupuu o puapuaga ua aumaia e le Tiapolo. Ua faaatagia lenei mea i le tulaga o Iopu. Na faamālōlō e Ieova le Atua Iopu mai le maʻi na tuu atu i ai e le Tiapolo. E lē gata i lea, “ua sili foi ona faamanuia e Ieova o le gataaga o Iopu i lona amataga.” I le iuga, ina ua mavae le 140 o tausaga faaopoopo o le ola faafualoa, “ona oti lea o Iopu, ua toeaina, ma ua tuutuluʻi lona ola.”—Iopu 42:10-17.

Ua tataʻi e le tusitala Kerisiano o le Tusi Paia o Iakopo manatu i lenei mea, i le faapea mai: “Ua outou faalogologo i le onosai o Iopu, ua outou iloa foi le iuga i la le Alii [“o Ieova,” NW], ina ua mutimuti vale tele le Alii ma le alofa naunau.”—Iakopo 5:11, faamatalaga i lalo.

Ua uma nei le taimi mo Satani ma lana lalolagi. O le a lē pine ae aveesea loa e Ieova puapuaga uma na aumaia e le fouvalega a Satani i tagata. E oo lava i ē ua oti, o le a toe faatutuina. (Ioane 11:25) Ona maua ai lea e tagata faamaoni e pei o Iopu le avanoa e ola ai e faavavau i le lalolagi parataiso. O nei faamanuiaga o le a liligi mai e le Atua i le lumanai i luga o ana auauna, o le a viia ai o ia e faavavau lava, o le Pule Silisili Ese amiotonu o lē e “mutimuti vale tele ma le alofa naunau.”

[Faaopoopoga i lalo]

[Pusa/Ata i le itulau 8]

O ATUA SAUĀ O TAGATA

O ATUA anamua, na masani ona faafoliga mai e tumu i le fia faamasaa toto ma le sauā. Ina ia faatoafilemuina i latou, e susunu ola ai e mātua ā latou fanau i le afi. (Teuteronome 12:31) I le isi itu, ua aʻoaʻo e faifilosofia faapaupau e faapea, e leai ni faalogona o le Atua e pei o le ita po o le alofa mutimutivale.

Na taaina ai tagata Iutaia o ē na faapea mai o i latou o tagata o le Atua i nei manatu faafilosofia e faagaee e temoni. O le tagata faifilosofia Iutaia o Philo, i le vaitaimi o Iesu, na manatu faapea “e matuā leai ni lagona e tutupu aʻe” i le Atua.

E leʻi sao mai foi le lotu Iutaia fia mamapo a le au Faresaio mai le taaina i filosofia faa-Eleni. Na latou taliaina le aʻoaʻoga a Plato e faapea o loo faia aʻe le tagata i se solu e lē mafai ona oti, ma o loo apilitia i totonu o se tino faaletagata. E faaopoopo atu i ai, e tusa ai ma faamatalaga a le tusitala o talafaasolopito o le uluai senituri o Josephus, na talitonu le au Faresaio e faapea o solu po o agaga o tagata amioleaga, “e faapuapuagatia e faavavau.” E ui i lea, e leai lava se aʻoaʻoga faapea o aumaia e le Tusi Paia.—Kenese 2:7; 3:19; Failauga 9:5; Esekielu 18:4.

Ae faapefea soo o Iesu? Pe na latou faatagaina i latou e taaina i filosofia faapaupau? Ina ua iloa o lenei lamatiaga, na lapatai atu ai le aposetolo o Pauro i uso Kerisiano e faapea: “Ia outou, neʻi faapologaina outou e se tasi i le poto le aoga e faasese ai, e tusa ma le uputuu a tagata, e tusa ma aitu o le lagi ma le lalolagi, a e le tusa ma Keriso.”—Kolose 2:8; tagaʻi foi i le 1 Timoteo 6:20.

E faanoanoa lava, o le toatele o ovasia Kerisiano i le senituri lona lua ma le lona tolu, na lē amanaiaina lea lapataiga ma aʻoaʻo atu e faapea e leai ni lagona o le Atua. Ua faapea mai le Encyclopedia of Religion: “Sa tele ina iloa uiga o le Atua e pei ona manatu i ai e tusa ai ma mafaufauga faafilosofia a Iutaia i lea taimi . . . O le manatu faapea o le Atua o le Tamā e ono iai ni ona lagona e pei o le mutimutivale o le alofa . . . ua masani ona manatu i ai e lē talia e le lautele seia oo mai i le taufaaiuiuga o le senituri lona luasefulu.”

O lea, ua talia ai e Kerisinetoma aʻoaʻoga sese o se atua e sauā o lē na te faasalaina ē agasala e ala lea i le faatigaina o i latou i le faapuapuagatia e faavavau. I le isi itu, ua faaali manino mai e Ieova i lana Afioga o le Tusi Paia, “o le oti, o le totogi lea o le agasala,” ae lē o le faapuapuagatia e faavavau.—Roma 6:23.

[Ē Ana le Ata]

Above: Acropolis Museum, Greece

Courtesy of The British Museum

[Ata i le itulau 7]

O le fuafuaga a le Atua e faaliliuina le lalolagi ma parataiso faa-Etena, e tatau ona faataunuuina!