Tusi o le Tusi Paia Numera 2—Esoto

Lē na Tusia: Mose

Nofoaga na Tusia Ai: Le Vaomatua

Maeʻa Ona Tusia: 1512 T.L.M.

Vaitaimi na Aofia Ai: 1657-1512 T.L.M.

1. (a) O ā mea o faamatilatila mai e le tusi o Esoto? (e) O ā igoa ua tuuina atu i le Esoto, ma o le ā le tala ua ia faaauauina?

O TALA faagaee loto o faailoga ma vavega ofoofogia na faia e Ieova i le laveaiina o ona tagata ua faaigoa i lona suafa mai mafatiaga i Aikupito, lona faamaopoopoina o Isaraelu e avea ma ana oloa tāua o se “malo o ositaulaga ma nuu paia,” ma le amataga o le talafaasolopito o Isaraelu i le avea ma atunuu faatiokarate—o mea nei o loo faamatilatila mai e le tusi o Esoto i le Tusi Paia. (Eso. 19:6) Ua taʻua i le faa-Eperu o le Weʼelʹleh shemohthʹ, o lona uiga, “O igoa nei,” pe na o le Shemohthʹ, “Igoa,” e tusa ai ma ona upu amata. O le igoa lea ua faaigoa ai i aso nei e sau mai le Tusi Paia faa-Eleni o le Septuagint, ua taʻua ai iina o le Eʹxo·dos, ua faapea ona faa-Latina ai o le Exodus (Esoto), o lona uiga o le “Malaga Ese Atu” po o le “Ō Ese Atu.” Ua avea le Esoto o se faaauauga o le tala o i le Kenese e pei ona faaalia e le upu amata, “Now,” (NW, faa-Peretania) (o le uiga moni lava, “Ma”), ma i le toe tusia mai ai o igoa o atalii o Iakopo, e pei ona sii mai i le faamaumauga atoa o le Kenese 46:8-27.

2. O le ā ua faailoa mai e le Esoto e tusa ai ma le suafa o IEOVA?

² Ua faailoa mai e le tusi o Esoto le suafa mamalu o le Atua, o IEOVA, i le pupula atoatoa o lona mamalu ma lona paia. A o ia faaalia le uiga loloto o lona suafa, na fetalai atu ai le Atua ia Mose, “O LE A OU FAAMAONIA AʻU I LE TULAGA E TATAU ONA OU FAAMAONIA AI AʻU,” ma ua ia faaopoopo mai faapea e tatau ona ia fai atu ia Isaraelu, “O LE A OU FAAMAONIA AʻU [faa-Eperu: אהיה, ʼEh·yehʹ, mai le veape Eperu o le ha·yahʹ] o lē ua auina mai aʻu ia te oe.” O le suafa IEOVA (יהוה, YHWH) e sau mai le veape Eperu e tutusa talaaga o le ha·wahʹ, “avea ma,” ma o le uiga moni lava “O Ia Lava ua Māfua ai Ona Iai.” E mautinoa lava o le silisili ma le matautia o gaoioiga a Ieova, lea ua amata nei ona ia faataunuuina mo ona tagata, o Isaraelu, na faasilisilia ma teuteuina ai lena suafa i se mamalu ofoofogia, ma faia ina ia avea o se mea e manatuaina pe a mavae atu “lea tupulaga ma lea tupulaga,” le suafa e ao ona faapaiaina e oo i le faavavau. O se mea e silisili lona aogā lo tatou iloa o le talafaasolopito ofoofogia o loo siomia ai lea suafa ma tatou tapuai atu i le Atua moni e toatasi o Lē ua folafola mai, “O aʻu o Ieova.”a—Eso. 3:14, 15, NW; 6:6.

3. (a) E faapefea ona tatou iloa o Mose na tusia le Esoto? (e) O anafea na tusia ai le Esoto, ma o le ā le vaitaimi o aofia ai?

³ O Mose na tusia le Esoto, e pei ona aliali mai i le avea ai ma tusi lona lua o le Penetatuka. Ua taʻua e le tusi lava ia ni faasinoga se tolu o le faia e Mose o se faamaumauga tusitusia ona o le faatonuga a Ieova. (17:14; 24:4; 34:27) E tusa ai ma tagata atamamai o le Tusi Paia o Westcott ma Hort, o Iesu ma tusitala o Tusitusiga Kerisiano Eleni na latou siiina mai po o le faasino atu i le Esoto i le silia ma le faaselau, e pei ina ua fetalai atu Iesu: “E lei tuuina atu ea e Mose le tulafono ia te outou”? Na tusia le Esoto i le vaomatua o Sinai, i le tausaga e 1512 T.L.M., ina ua mavae se tausaga talu ona tuua e Isaraelu Aikupito. O loo aofia ai se vaitaimi e 145 tausaga, e mai le maliu o Iosefa i le 1657 T.L.M. e oo atu i le faatuina o le falefetafai o le tapuaiga ia Ieova i le 1512 T.L.M.—Ioa. 7:19; Eso. 1:6; 40:17.

4, 5. O le ā le faamaoniga mai suesuega i toega mea i le eleele e lagolagoina ai faamatalaga o i le Esoto?

⁴ E ui ina tutupu pe ā ma le 3,500 tausaga ua tuanai mea o loo iai i le Esoto, ae e faateia ai i le tele o faamaoniga mai suesuega o toega mea o le eleele ma mai isi puna e ese mai i le Tusi Paia e molimau i le saʻo aʻiaʻi o le faamaumauga. Ua faaaogā ma le saʻo igoa Aikupito i le Esoto, ma o tofiga o loo taʻua e talafeagai ma pine faamau a Aikupito. Ua faaalia e suesuega o toega mea i le eleele e faapea sa fai ma tu a tagata Aikupito le faataga o tagata ese e nonofo i Aikupito ae e faaesea le mea e nonofo ai. Na faaaogā vai o le Naila e taeele ai, ua faapea ona faamanatu mai ai le faamālū o le afafine o Farao iina. Ua maua ai piliki na fausia i ʻau o saito ma isi piliki e lei faaaogaina ai ni ʻau o saito. E lē gata foi i lena, sa lausilafia taulaitu popoto i Aikupito a o avea ma atunuu lauiloa.—Eso. 8:22; 2:5; 5:6, 7, 18; 7:11.

⁵ Ua faaalia i maafaamanatu na taitaia totino e Farao a latou ʻau tietie kariota i le taua, ma ua faailoa mai e le Esoto faapea na mulimuli atu le Farao i le vaitaimi o Mose i lenei tu. Pagā le tele o lona faalumaina na oo i ai! Ae aisea ua lē taʻua ai e faamaumauga anamua a Aikupito se faamatalaga i le aumau ai o Isaraelu i lo latou laueleele po o le mala lea na oo ia Aikupito? Ua faaalia e suesuega o toega mea i le eleele e faapea o se tu masani i se aigatupu fou e tulai mai i Aikupito le tapeina o so o se mea e lē lelei i isi faamaumauga na muamua atu. Latou te lē faamauina lava ni toilalo na faalumaina ai. O le toilalopopo o atua o Aikupito—e pei o le atua o le Naila, le atua o le rane, ma le atua o le la—sa faaleaogaina ai nei atua sese ma faaalia ai le silisili o Ieova, o le a lē talafeagai ai lea ma le talafaasolopito o se malo faamaualuga.—14:7-10; 15:4.b

6. O ā nofoaga na tolauapi ai anamua Isaraelu ua tele ina iloaina?

⁶ O le auaunaga a Mose e 40 tausaga o se leoleo mamoe i le vaavaaiga a Ietero na masani atu ai o ia i tulaga o le olaga ma vaipanoa o loo iai vai ma meaʻai i lea oganuu, o lea na lava saunia ai o ia e taitaiina ai le Malaga Ese Atu. O le ala tonu o le savaliga o le Malaga Ese Atu e lē mafai ona iloa moni i aso nei, talu ai o nisi nofoaga o loo taʻua i le tala ua lē mafai ona iloa ma le mautinoa. Peitai, o Mara, o se tasi o uluai nofoaga o le tolauapiga na iai i le Penisula o Sinai, e masani ona manatu e tutusa ma ʽEin Hawwara, e 50 maila [80 kilomita] i le itu e mātele i Saute Sisifo o Suez i ona po nei. O Ailima, o le nofoaga lona lua o le tolauapiga, ua masani ona manatu e tutusa ma Wadi Gharandel, pe ā ma le 55 maila [88 kilomita] e mātele i le itu i Saute Sisifo o Suez. O se mea ua matauina, o lenei nofoaga i ona po nei ua lauiloa o se nofoaga o vai, e lauusiusi laau ma pama, ua faamanatu mai ai Ailima o i le Tusi Paia, lea na iai “vaipuna e sefulu ma le lua, ma pama e fitugafulu.”c Ae peitai, o le moni aʻiaʻi o tala a Mose e lē faalagolago i faamatalaga a le au suesue i toega mea i le eleele e faafesootai atu i nofoaga eseese na iai i le ala.—15:23, 27.

7. O ā isi faamaoniga, e aofia ai le fausiaina o le falefetafai, e faamaonia ai e faagaeeina le tusi o Esoto?

⁷ O le tala i le fausiaina o le falefetafai i laufanua laugatasi a o lei oo i Sinai e fetaui lelei ma tulaga o lea vaipanoa. Na faapea mai se tasi tagata poto: “O lona foliga, fausaga, ma mea na faaaogaina, ua avea ai le falefetafai i ona tulaga uma ma fale na fausia mai le vaomatua. O laau na faaaogā e fau ai o loo fau ma soloi iina.”d Po o igoa, o tu masani, tapuaiga, nofoaga, tulaga i laufanua, o mea o loo iai, o le faateleina o faamaoniga e ese mai le Tusi Paia ua faamautinoa ai le tala faagaeeina o tala o i le Esoto, o lea ua tusa nei ma le 3,500 tausaga le leva.

8. E faapefea ona faaalia o loo fesootai atu le tusi o Esoto ma isi vaega uma o le Tusi Paia ia e faagaeeina ma aogā?

⁸ E tele ina faasino mai e isi tusitala o le Tusi Paia i le Esoto, o loo faaali mai ai lona aogā ma le tāua faavaloaga. I le silia ma le 900 tausaga mulimuli ane, na tusi ai Ieremia e faatatau i “le Atua moni, Lē e sili, Lē e malosi, o Ieova o ʻau o lona suafa lea,” o lē na ia aumaia ona tagata, o Isaraelu, nai Aikupito i “faailoga, ma vavega, ma le aao malosi, ma le aao faaloaloa, ma mea matuā matautia.” (Iere. 32:18-21, NW) E silia ma le 1,500 tausaga mulimuli ane, na faavae ai i faamatalaga o i le Esoto le tele o le molimau faagaeetia a Setefano, lea na oo atu ai i le faamaturoina o ia. (Galu. 7:17-44) Ua toe taʻua mai mo i tatou le tala i le olaga o Mose i le Eperu 11:23-29, e avea o se faaaoaoga o le faatuatua, ma ua tele foi ina faia e Paulo nisi o faasinoga i le Esoto i le aumaia ai o faaaoaoga ma lapataiga mo i tatou i aso nei. (Galu. 13:17; 1 Kori. 10:1-4, 11, 12; 2 Kori. 3:7-16) O nei mea uma ua fesoasoani ia i tatou e talisapaia ai le auala o loo fesootai atu ai le tasi vaega o le Tusi Paia i le tasi, o vaega taitasi uma lava o loo se vaega i le faailoa mai o le fuafuaga a Ieova i se auala e aogā.

LE POGAI E AOGĀ AI

26. (a) E faapefea ona faamautuina e le Esoto le faatuatua ia Ieova? (e) E faapefea ona faatuputeleina lo tatou faatuatua ona o mau mai Tusitusiga Kerisiano Eleni o loo faasino atu i le Esoto?

²⁶ I lona tulaga silisili, ua faailoa mai e le Esoto o Ieova o le Laveai sili, lē Faamaopoopo sili ma lē Faataunuu i ana fuafuaga ofoofogia, ma ua faamautuina ai lo tatou faatuatua ia te ia. E faatuputeleina lenei faatuatua a o tatou suesueina le tele o mau mai Tusitusiga Kerisiano Eleni o loo faasino atu i le Esoto, o loo faailoa mai ai le faataunuuina o vala e tele o le feagaiga o le Tulafono, le faamautinoa mai o se toetu, le sauniuniga a Ieova ina ia tausia ai ona tagata, o faiga faavae o galuega laveai faa-Kerisiano, o fautuaga i le amanaiaina o mātua, mea o manaomia ina ia maua ai le ola, ma le auala e manatu ai i taui o le faamasinotonu. Na mulimuli ane ai taaofai mai le Tulafono i poloaiga e lua e faatatau lea i le faaalia o le alofa i le Atua ma uso a tagata.—Mata. 22:32—Eso. 4:5; Ioa. 6:31-35 ma le 2 Kori. 8:15—Eso. 16:4, 18; Mata. 15:4 ma le Efe. 6:2—Eso. 20:12; Mata. 5:26, 38, 39—Eso. 21:24; Mata. 22:37-40.

27. O le ā le aogā o le talafaasolopito o i le Esoto i le Kerisiano?

²⁷ I le Eperu 11:23-29, tatou te faitau ai i le faatuatua o Mose ma ona mātua. O le faatuatua na ia tuua ai Aikupito, o le faatuatua na ia osia ai le Paseka, ma o le faatuatua na ia aveina ai Isaraelu a o ui atu i le Sami Ulaula. Na papatisoina Isaraelu ia Mose ma aai i meaʻai faaleagaga ma feinu i vai faaleagaga. Na latou tepa taulai atu i le papa faaleagaga, po o Keriso, ae na lē maua lava e i latou le finagalo malie o le Atua, auā na latou tofotofo i le Atua ma avea ma ē ifo i tupua, ē faitaaga, ma ē muimui. Ua faamatala mai e Paulo faapea e iai se faatatauga o lenei mea i Kerisiano i aso nei: “Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai. O lenei, o lē manatu o loo o tu ia, ina faaeteete ia neʻi paū.”—1 Kori. 10:1-12; Epe. 3:7-13.

28. Ua faapefea ona faataunuuina mea na faaatagia mai e le Tulafono ma le tamai mamoe o le Paseka?

²⁸ O le tele o mea tāua loloto faaleagaga o le Esoto, faatasi ai ma ona faatatauga faavaloaga, o loo aumaia ia i tusitusiga a Paulo, ae maise lava le Eperu mataupu e 9 ma le 10. “Auā o le tulafono ua i ai le ata o mea lelei atali, a e le o le matuā tusa o ia mea, e le mafaia lava i ia taulaga o loo avatua soo lava i lea tausaga ma lea tausaga ona faaatoatoaina o e faalatalata i ai.” (Epe. 10:1) O lea, tatou te naunau ai ia iloa le ata ma malamalama i le faatatauga moni. Na ‘avatu e Keriso le taulaga e tasi mo agasala.’ Ua faamatalaina o ia o ‘le Tamai Mamoe a le Atua.’ E leai foi se ivi o lenei “Tamai Mamoe” na gauia, e pei ona lē gauia se ivi o le tamai mamoe moni lea na fai ma ata. Ua faaopoopo mai le aposetolo o Paulo: “O Keriso la tatou paseka ua fasia mo i tatou. O lenei, aua tatou te faia le tausamiga ma le mea faafefete tuai, o le loto leaga ma le amio leaga; a ia faia ma le mea e le faafefeteina, o le loto lelei ma le faamaoni.”—Epe. 10:12; Ioa. 1:29 ma le Ioa. 19:36—Eso. 12:46; 1 Kori. 5:7, 8—Eso. 23:15.

29. (a) Faatusatusa le eseesega o le feagaiga o le Tulafono ma le feagaiga fou. (e) O ā taulaga o loo ofoina atu nei e tagata Isaraelu faaleagaga i le Atua?

²⁹ Sa avea Iesu ma Puluvaga o le feagaiga fou, e pei ona sa avea foi Mose ma puluvaga o le feagaiga o le Tulafono. O le faaeseesega o nei feagaiga e lua ua faamatala manino mai foi e le aposetolo o Paulo, ua ia taʻua ai le ‘poloaiga tusilima,’ ua aveeseina e ala i le maliu o Iesu i le laau faaoosala. O Iesu ua toe faatuina o le Ositaulaga Sili ua avea “o le auauna i le mea paia, ma le fale fetafai moni, sa faatuina e le Alii, a e le o tagata.” O ositaulaga na i lalo o le Tulafono na “auauna i le mea faaaʻoaʻo ma le ata o mea faalelagi” e tusa ma le ata na tuuina atu ia Mose. “A o lenei, ua maua e [Iesu] le faiva e sili, e pei ona faia o ia ma puluvaga o le feagaiga e sili ona lelei, o le ua faamauina i mea na folafolaina e sili ona lelei.” Na avea le feagaiga tuai ma mea ua taʻutuai ma na mavae auā o se tulafono e aumaia ai le oti. O tagata Iutaia na lē malamalama i lenei mea ua faamatalaina faapea ua faatauasoina o latou manatu, ae o ē talitonu ua latou talisapaia ua iai nei Isaraelu faaleagaga i se feagaiga fou, ua mafai i “mata, e lē ufitia ona atagia mai e pei o le faata le mamalu o Ieova,” ma ua agavaa lelei e avea ma ana faifeau. Faatasi ma loto fuatiaifo ua faamamāina, ua mafai ai ona ofoina atu a latou lava “taulaga o le viiga, o lona uiga, o le fua o laugutu, o loo faapea ona faalauiloa i le lautele o lona suafa.”—Kolo. 2:14; Epe. 8:1-6, 13; 2 Kori. 3:6-18, NW; Epe. 13:15, NW; Eso. 34:27-35.

30. O le ā ua faaatagia mai e le laveaiina o Isaraelu ma le faasilisilia o le suafa o Ieova i Aikupito?

³⁰ Ua faasilisilia e le Esoto le suafa o Ieova ma lona silisili ese, o loo faasino atu i luma i se laveaiina mamalu o le nuu Kerisiano o Isaraelu faaleagaga, o le nuu lea o loo faatatau atu i ai upu nei: “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai e le Atua ina ia outou taʻutaʻu atu ana galuega lelei—o le na valaau ia te outou nai le pouliuli e oo i lona lava malamalama e matuā ofo ai; o e na le fai ma nuu anamua, a o ona po nei ua fai ai ma nuu o le Atua.” O le mana o Ieova e pei ona faaalia mai i le aoaoina o lana Isaraelu faaleagaga mai le lalolagi ina ia faasilisilia ai lona suafa ua avea foi o se vavega tele e pei o le mana na ia faaalia ona o ona tagata i Aikupito anamua. I le faatuina pea o Farao ina ia faaali atu ai ia te ia Lona mana ma ia faalauiloa atu ai Lona suafa, na faaatagia mai ai e Ieova se molimau sili atu o le a faataunuuina e ala i Ana Molimau Kerisiano.—1 Pete. 2:9, 10; Roma 9:17; Faaa. 12:17.

31. O le ā ua faaatagia mai e le Esoto e faatatau i se malo ma le faatasi ai o Ieova?

³¹ O lea, e mafai ona tatou fai atu e tusa ai ma le Tusi Paia, o le malo na faia aʻe i lalo o Mose na faasino atu lea i se nuu fou i lalo o Keriso ma i se malo o le a lē taitai ona luluina. Ona o lenei tulaga, ua faalaeiauina ai i tatou e ‘auauna i le Atua ma le migao, ma le mataʻu.’ E pei lava ona sa ufitia le falefetafai i le vaomatua i le faatasi ai o Ieova, ua faapena foi ona ia folafola mai o le a ia faatasi e faavavau ma i latou o ē matataʻu ia te ia: “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. . . . Ia e tusi; auā o upu nei e moni ma le faamaoni ia.” E mautinoa lava ua avea le tusi o Esoto ma se vaega matuā manaomia ma aogā o tala faamaumau o le Tusi Paia.—Eso. 19:16-19—Epe. 12:18-29; Eso. 40:34—Faaa. 21:3, 5.

[Faaopoopoga i lalo]