Apoapoaʻiga Uigā

E TATAU i toeaina Kerisiano ona mafai ona “apoapoai atu i le aʻoaʻoga e ola ai.” (Tito 1:9) I nisi taimi e tatau ai ona faia lenei mea a o fesagaʻi ma tulaga e sili ona faigatā. E tāua ona avatu fautuaga e ōgatasi ma taʻiala faale-Tusi Paia. O lea, e tatau ai i toeaina ona utagia le fautuaga: “Ia e faasaga i le . . . apoapoai atu.” (1 Timo. 4:13) E ui ina o loo faasino patino atu la tatou talanoaga i toeaina po o i latou o loo aapa atu mo lenei faaeaga, e iai taimi e tatau ai i mātua ona apoapoaʻi i a latou fanau, pe manaʻomia foʻi e i latou o loo taulimaina suʻesuʻega faale-Tusi Paia ona apoapoaʻi i a latou tagata aʻoga o le Tusi Paia. I na tulaga, o taʻiala foʻi faapenei o le a faatatau i ai.

Tulaga e Manaʻomia Ai. Ina ia faamautinoa po o afea e manaʻomia ai apoapoaʻiga, o le a fesoasoani le iloiloina o tulaga ua faamauina i le Tusi Paia sa faapea ona avatu ai apoapoaʻiga. Na apoapoaʻi e le aposetolo o Peteru toeaina ina ia uaʻi totoʻa atu i la latou avega tauave o ni leoleo mamoe o le lafu a le Atua. (1 Pete. 5:1, 2) Sa fautua atu Paulo iā Tito ina ia apoapoaʻi i tauleleʻa ia “faautauta.” (Tito 2:6) Na uunaʻia e Paulo uso Kerisiano ina ia “tasi la outou upu uma” ma ia ʻalofia i latou o ē saʻili e faatupu fevaevaeaʻiga i le va o uso. (1 Kori. 1:10; Roma 16:17; Fili. 4:2) E ui sa faamālō atu Paulo i sui o le faapotopotoga i Tesalonia mo mea lelei sa latou faia, ae na ia apoapoaʻia i latou ina ia atili ona faatatau atoatoa faatonuga na latou maua. Sa ʻaiʻoi atu Peteru i uso Kerisiano ina “ia mamao outou ma tuʻinanau o le tino.” (1 Pete. 2:11) Na apoapoaʻi atu Iuta i ona uso ia “faamalolosi ona finau mo le faatuatua” ona o aafiaga a tagata lē faatuatua o ē sa pupū i amioga lē taupulea. (Iuta 3, 4) Sa uunaʻia Kerisiano i le lautele e apoapoaʻi le tasi i le isi ina ia leai se tasi e faamaaa ona o le malosi taufaasesē a le agasala. (Epe. 3:13) Na apoapoaʻi atu Peteru i tagata Iutaia o ē sa leʻi faatuatua iā Keriso e faapea: “Ia faaolaina outou ai lenei tupulaga faapiopio.”—Galu. 2:40.

O ā uiga e manaʻomia ina ia faia ai ni apoapoaʻiga malolosi i na tulaga? E mafai faapefea e lē o loo avatua le apoapoaʻiga ona ʻaiʻoi atu ma le faanatinati e aunoa ma le otegiaina po o le ʻinaʻinā?

“Ona o le Alofa.” Afai e lē avatua a tatou apoapoaʻiga “ona o le alofa,” atonu la o le a logo tigā. (File. 9) E moni, pe a manaʻomia se gaoioiga vave, e ao i le taulimaga a le failauga ona faaoo atu ai le faanatinati o le tulaga. O le tautala atu i se leo mālū e mafai ona peiseaʻī o loo faatoese atu. I le taimi e tasi, e ao ona faatalosaga atu ma le lotonaunau ma faalogona loloto. O se faatalosaga alofa o le a sili atu ona faagaee ai le aofia. Ina ua tautala mo ia ma ana aumea, na taʻu atu e Paulo i tagata Tesalonia e faapea: “Pei ona outou iloa, sa matou i ai ia te outou taʻitasi, pei o le tamā i lana lava fanau, na matou apoapoai atu ia te outou”. (1 Tesa. 2:11) O na ovasia Kerisiano sa ʻaiʻoi atu ma le alolofa i uso. Ia e faia la au faamatalaga ona o le manatu mamafa moni mo lau ʻaufaalogologo.

Ia magafagafa. Aua le faaesea i latou o loo e taumafai e uunaʻia ina ia gaoioi. I le taimi e tasi, aua neʻi taofia le taʻuina atu i lau aofia o “le finagalo uma o le Atua.” (Galu. 20:27) O ē loto talisapaia latou te lē tetee pe faaitiitia lo latou alolofa mo oe ona sa e uunaʻia ma le agalelei i latou ia faia le mea ua saʻo.—Sala. 141:5.

O le tulaga masani, e aogā ona faatomua apoapoaʻiga i le faamālō atu mo se mea patino ma ia moni. Ia mafaufau i mea lelei o loo faia e ou uso—mea ia o loo matuā faamalieina ai Ieova: le faatuatua o loo faaalia i a latou galuega, le alofa o loo uunaʻia ai i latou ina ia pulunaunauina i latou lava, ma lo latou tumau i le faafetaiaʻia o tulaga e tofotofoina ai. (1 Tesa. 1:2-8; 2 Tesa. 1:3-5) O le a fesoasoani lenei i ou uso ina ia iai le lagona o loo talisapaia ma malamalama iā i latou, ma o le a faafaigofie ai ona latou talia faatalosaga o loo sosoo atu ai.

Ma le “Onosai Uma.” O apoapoaʻiga e ao ona avatu “ma le onosai uma.” (2 Timo. 4:2) O le ā e aofia ai? O le onosai e aofia ai le tumau ma le faapalepale i mea sesē po o mea e faaita ai. O sē tasi e onosai e iai le faamoemoe o le a faatatauina e lana ʻaufaalogologo mea na ia taʻua. O le avatuina o apoapoaʻiga i lenei auala o le a taofia ai lau ʻaufaalogologo mai le mafaufau faapea e lē lelei ni ou manatu e faatatau iā i latou. O lou mautinoa faapea o loo mananaʻo ou uso ma tuafāfine e auauna iā Ieova i le mea e gata ai lo latou mafai, o le a faaalia lea i lo latou faanaunauga e faia le mea ua saʻo.—Epe. 6:9.

“I le Aʻoaʻoga e Ola Ai.” E mafai faapefea e se toeaina ona “apoapoaʻi atu i le aʻoaʻoga e ola ai.” E ala i le “uumau i le afioga faamaoni e tusa ai ma lona tomai o le aʻoaʻo atu.” (Tito 1:9, NW) Na i lo le faamatala o ou lava manatu, ia fai le Afioga a le Atua ma malosiaga o lau faatalosaga atu. Faataga le Tusi Paia e faailoa atu iā te oe le mea o loo manaʻomia ona tautalagia. Ia faamatala atu aogā taʻitasi o le faatatauina o mea o loo fai mai ai le Tusi Paia e uiga i le mataupu o loo taulimaina. Ia matuā teu foʻi i le mafaufau iʻuga—i le taimi nei ma le lumanaʻi—o le lē pipii i le Afioga a le Atua, ma ia faaaogā e faatalitonu ai lau aofia i le manaʻoga ina ia faia ni gaoioiga talafeagai.

Ia faamautinoa ua e faamatala manino i lau aofia mea e ao ona latou fai ma le auala e ao ona faia ai. Ia faamanino atu faapea o au faamatalaga o loo faavae mausalī i le Tusi Paia. Afai o loo iai i le Tusi Paia sina avanoa e fai ai so o se faaiʻuga, ia faailoa atu le telē o lenā avanoa. A oo i au toe upu, fai se faatalosaga faaiʻu o le a faapea ona faamalosia ai le filifiliga a lau ʻaufaalogologo e gaoioi.

Ma le “Saʻolotoga Tele e Tautala Atu Ai.” Ina ia uigā le apoapoaʻi atu i isi, e tatau i se tasi ona iai le “saʻolotoga tele e tautala atu ai i le faatuatua.” (1 Timo. 3:13, NW) O le ā e mafai ai e se tasi ona saʻoloto e tautala atu? O le mea moni o lana ‘faaaʻoaʻoga i galuega lelei’ e ōgatasi lea ma mea o loo ia uunaʻia ona uso e fai. (Tito 2:6, 7; 1 Pete. 5:3) I tulaga faapenei, o le a iloa ai e i latou o loo uunaʻia ia gaoioi e faapea, o lē o loo apoapoaʻia i latou na te lē o faatalitalia i latou e faia se mea na te lē o faia. O le a latou iloa atu e mafai ona latou faaaʻoaʻo i lona faatuatua e pei ona ia taumafai e faaaʻoaʻo iā Keriso.—1 Kori. 11:1; Fili. 3:17.

O apoapoaʻiga e faavae i le Afioga a le Atua ma avatu i se agaga alofa e telē se lelei e maua ai. O i latou o iai le tiute e avatu ai na apoapoaʻiga e ao ona latou faasaga e fai ia sili atu ona lelei.—Roma 12:8.