Aiseā e Faaaloalo ai i le Pule?

1, 2. (a) O ā tauiviga ua tatou fesagaʻia pe a oo i le tulaga pule? (e) O ā fesili o le a tatou talanoaina?

PE SA e mātauina uiga o se tamaitiiti ina ua faatonuina o ia e faia se mea e matuā musu lava e fai? Atonu e te iloa lelei atu lava i ona foliga le musu. Ua faalogo o ia i le leo o ona mātua, ma ua ia iloa e tatau ona faaaloalo i le pule a ona mātua. Ae i le tulaga lea, e matuā lē manaʻo lava o ia e usiusitaʻi. Ua faaalia i lana tauiviga le mea moni o loo fesagaʻi ma i tatou uma.

² E lē faigofie iā i tatou i taimi uma ona faaaloalo i le pule. Pe e te iloa i nisi taimi le faigatā ona faaaloalo iā i latou o loo pule iā te oe? Afai o lea, e lē na o oe la o tauivi ma lenā mea. O loo tatou ola i se taimi ua matuā lē faaaloalo ai lava tagata i le pule. Peitaʻi, ua faapea mai le Tusi Paia, e manaʻomia ona tatou faaaloalo iā i latou o loo pule iā i tatou. (Faataoto 24:21) O le mea moni, afai e tatou te mananaʻo e tumau i le alofa o le Atua, e tatau la ona tatou faia faapea. E masani foʻi ona lāgā ai ni fesili. Aiseā e matuā faigatā ai iā i tatou ona faaaloalo i le pule? Aiseā ua faafinagaloina ai e Ieova lenei mea mai iā i tatou, ma o le ā e fesoasoani iā i tatou e usiusitaʻi ai? O ā ni auala tatou te faaalia ai le faaaloalo i le pule?

AISEĀ E FAIGATĀ AI?

3, 4. Na faapefea ona amata mai le agasala ma le lē lelei atoatoa, ma aiseā e faigatā ai ona tatou faaaloalo i le pule ona o lo tatou tino agasala?

³ Seʻi o tatou iloiloina puupuu ni māfuaaga se lua e matuā faigatā ai mo i tatou ona faaaloalo i ē e pule. Muamua lava, o i tatou e lē lelei atoatoa; lona lua, e lē lelei atoatoa foʻi tagata o loo pule iā i tatou. Ua leva ona amata mai le tulaga agasala ma le lē lelei atoatoa, ina ua fouvale Atamu ma Eva i le pule a le Atua i tuā i le faatoʻaga o Etena. Na amata le agasala ina ua fouvale. E oo mai lava i aso nei, e iai lo tatou faanaunauga masani ina ia fouvale.​—Kenese 2:15-17; 3:1-7; Salamo 51:5; Roma 5:12.

⁴ Ona o lo tatou tino agasala, e mātele ai ina faamaualuluga ma fiasili le toʻatele o i tatou, ae o le lotomaulalo o se uiga e seāseā ona maua, lea e ao ona tatou taumafai malosi e atiaʻe ma faatumauina. E iai taimi tatou te ono faaali ai le lotomaaa ma le faamaualuga, e tusa lava po ua umi ona tatou auauna ma le faamaoni i le Atua. O se faaaʻoaʻoga, ia manatu iā Koru, o lē na piiama atu ma le faamaoni i tagata o Ieova, e ui i le tele o tulaga faigatā. Peitaʻi, na faananau o ia ina ia sili lana pule, ma taʻitaʻia ai ma le lē fefe le fouvalega iā Mose, o le tagata e sili ona agamalu i na ona pō. (Numera 12:3; 16:1-3) Seʻi manatu foʻi i le tupu o Usia, o lona faamaualuga na māfua ai ona ia ulufale atu i le malumalu o Ieova, ma faatino se tofiga paia e na o ositaulaga e faatinoina. (2 Nofoaiga a Tupu 26:16-21) Na matuā faasalaina nei tane ona o le fouvale. Ae e aogā iā i tatou la laʻua faaaʻoaʻoga lē lelei. E tatau ona tatou faatoʻilaloina le faamaualuga lea e ala ai ona faigatā mo i tatou ona faaaloalo i le pule.

5. Na faapefea ona faaaogā sesē e tagata lē lelei atoatoa la latou pule?

⁵ E tele mea ua faia e tagata agasala o ē e iai le pule, ua māfua ai ona lē toe fia faaaloalo tagata i le pule. Na faasauā, faasaunoa, ma pulepuletutū le toʻatele o pule. Na faaaogā sesē e tagata la latou pule i le talafaasolopito o tagata. (Faitau le Failauga 8:9.) O se faaaʻoaʻoga o Saulo, o ia o se tagata lelei ma le lotomaulalo ina ua filifilia o ia e Ieova e fai ma tupu. Peitaʻi, na iʻu ina faamaualuga ma lotoleaga, ma sauāina ai le tagata faamaoni o Tavita. (1 Samuelu 9:20, 21; 10:20-22; 18:7-11) Na avea mulimuli ane Tavita ma tupu e sili ona lelei o Isaraelu, ae na ia faaaogā sesē foʻi lana pule ina ua ia faoa le avā a Uria le sa Hetī, ma ia auina atu lenā tagata e lē sala i muaʻau o le taua ina ia fasiotia ai o ia. (2 Samuelu 11:1-17) Ioe, o le tino lē lelei atoatoa ua faigatā ai i tagata ona faatino lelei le pule. E atili soonafai e tagata le pule, pe afai e latou te lē faaaloalo iā Ieova. Na tusi se tagata o le malo o Peretania, ina ua ia faamatalaina sauāga ogaoga na faapogaia e pope Katoliko, e faapea: “E masani ona faaleagaina se tasi pe a maua le pule, ma e sili ona leaga le pulega e leai ni tapulaa.” A o manatunatu i lenā talafaasolopito lē lelei, seʻi o tatou iloiloina la le fesili: Aiseā tatou te faaaloalo ai i le pule?

AISEĀ E FAAALOALO AI I LE PULE?

6, 7. (a) O le ā le mea tatou te faia ona o lo tatou alolofa iā Ieova, ma aiseā? (e) O le ā le uiga e aofia ai i le gauaʻi, ma e faapefea ona tatou faaalia?

⁶ O māfuaaga sili e faaaloalo ai i le pule, e pogai mai i le alofa, o lo tatou alolofa iā Ieova, o o tatou uso a tagata, ma i tatou lava. Talu ai e aupito i sili lo tatou alofa iā Ieova, ua tatou mananaʻo ai e faafiafia lona finagalo. (Faitau le Faataoto 27:11; Mareko 12:29, 30.) Ua tatou iloa o lana pule silisili ese ma lana aiā e pule ai i le aoao o mea, na luʻia i le lalolagi talu mai le fouvalega i Etena, ma ua ʻau le toʻatele o tagata i le itu a Satani ma teena ai le pule a Ieova. Ae tatou te fiafia ona o loo tatou tutū i le isi itu. Pe a tatou faitau i upu matagofie i le Faaaliga 4:11, ua pāʻia ai o tatou loto. Ua matuā manino mai ai iā i tatou, o Ieova o le Pule tonu i le aoao o mea! Ua tatou talisapaia le pule silisili ese a Ieova, ma talia lana pule i o tatou olaga i aso faisoo.

⁷ O le faaaloalo i le pule e aofia ai le usiusitaʻi ma isi foʻi mea. Ua tatou lotomalilie e usiusitaʻi iā Ieova auā tatou te alolofa iā te ia. Peitaʻi, e mautinoa e iai taimi e matuā faigatā ai iā i tatou ona usiusitaʻi. I taimi faapena, e pei o le tamaitiiti na faamatalaina i le amataga, e manaʻomia ai ona tatou gauaʻi. Ua tatou manatua na gauaʻi Iesu i le finagalo o lona Tamā, e ui lava ina matuā faigatā. Na ia faapea atu i lona Tamā: “E lē o loʻu loto, ae ia faia lou finagalo.”​—Luka 22:42.

8. (a) O ā mea e masani ona aofia i le gauaʻi atu i le pule a Ieova i aso nei, ma o le ā ua faaalia ai e faatatau i faalogona o Ieova? (e) O le ā e fesoasoani iā i tatou e faalogo ai i fautuaga ma talia aʻoaʻiga? (Tagaʻi i le pusa “Ia Faalogo i le Fautuaga ma Talia le Aʻoaʻiga.”)

⁸ O le mea moni e lē o fetalai tuusaʻo mai Ieova iā i tatou taʻitoʻatasi i aso nei; ua ia faaaogā lana Afioga ma tagata ua fai ma ona sui i le lalolagi. O lea la, e faaalia lo tatou gauaʻi i le pule a Ieova e ala i le faaaloalo i tagata ua ia tofiaina, pe faatagaina ia faaauau pea ona pule iā i tatou. O se faaaʻoaʻoga afai tatou te fouvale i na tagata i lo tatou teena o a latou fautuaga ma faasaʻoga mai le Tusi Paia, ua tatou faatigā ai i le Atua. Ina ua muimui Isaraelu ma fouvale iā Mose, sa silasila Ieova i a latou gaoioiga e pei o loo fai tuusaʻo atu iā te ia.​—Numera 14:26, 27.

9. Aiseā e tatou te faaaloalo ai i le pule e ala i lo tatou alolofa i uso a tagata? Ia faataʻitaʻi.

⁹ Tatou te faaalia foʻi le faaaloalo i le pule ona o le alolofa i o tatou uso a tagata. E faapefea? Seʻi mafaufau faapea o oe o se fitafita i se vaegaʻau. E faalagolago le taulau ma le faasaoina o le vaegaʻau i le felagolagomaʻi ma le usiusitaʻi o fitafita taʻitasi i taʻitaʻiʻau. Afai e te faavaivaia lenā faatulagaga e ala i le fouvale, e ono lamatia ai ou uso a fitafita uma. O le mea moni, ua matuā faatamaʻia le lalolagi e vaegaʻau a tagata i aso nei. Peitaʻi, o ʻautau a Ieova e na o mea lelei lava e latou te faia. E faitau selau ona taʻua le Atua i le Tusi Paia o “Ieova o ʻau.” (1 Samuelu 1:3) O ia o le Taʻitaʻi o le ʻautau matuā toʻatele ma malolosi o foafoaga agaga. I nisi taimi, e faatusaina ai e Ieova ana auauna i le lalolagi o se ʻautau. (Salamo 68:11; Esekielu 37:1-10) Afai la e tatou te fouvale i tagata ua tuu e Ieova e pule iā i tatou, pe e lē lamatia ai ea o tatou uso a fitafita faaleagaga ona o i tatou? Pe a fouvale la Kerisiano i toeaina tofia, e faapea foʻi ona pagatia ai isi o le faapotopotoga. (1 Korinito 12:14, 25, 26) Pe a fouvale se tamaitiiti, e pagatia ai le aiga atoa. Tatou te faaalia la le alofa i o tatou uso a tagata, e ala i le atiina aʻe o se agaga faaaloalo ma le felagolagomaʻi.

10, 11. E faapefea i le faanaunauga ina ia tatou maua ni aogā ona uunaʻia ai i tatou e usiusitaʻi i le pule?

¹⁰ E tatou te faaaloalo foʻi i le pule ona e tele aogā e tatou te maua ai. Pe a talosaga mai Ieova e tatou te faaaloalo i le pule, e masani lava ona ia taʻua aogā e oo iā i tatou ona o le faia faapea. O se faataʻitaʻiga, ua ia faatonuina le fanau ina ia usiusitaʻi i o latou mātua, ina ia ola umi ma manuia ai. (Teuteronome 5:16; Efeso 6:2, 3) Ua ia faatonuina foʻi i tatou ina ia faaaloalo i toeaina o le faapotopotoga, auā a leai, e afāina ai lo tatou itu faaleagaga. (Eperu 13:7, 17) Ua ia faatonuina foʻi i tatou ina ia usiusitaʻi i pule o i le lalolagi mo lo tatou lava puipuiga.​—Roma 13:4.

¹¹ Pe e te lē ioe o le iloa o le māfuaaga e finagalo ai Ieova ina ia tatou usiusitaʻi, e fesoasoani iā i tatou e faaaloalo ai i le pule? Seʻi o tatou talanoaina pe e faapefea ona faaalia le usiusitaʻi i le pule i vala tāua e tolu o le olaga.

LE FAAALOALO I LE AIGA

12. O le ā le matafaioi ua tofia e Ieova i le tane ma le tamā o le aiga, ma e faapefea ona faatinoina e se tane?

¹² Na faavaeina e Ieova le faatulagaga o le aiga. Ona o ia o le Atua maopoopo, ua ia faamaopoopoina ai le aiga ina ia sologa lelei. (1 Korinito 14:33) Ua ia tuuina mai i le tane ma le tamā le pule e avea ma ulu o le aiga. E faaalia e le tane le faaaloalo i lona Ulu o Keriso Iesu, i lona faaaʻoaʻo i le auala na faatino ai e Iesu lana pule i le faapotopotoga. (Efeso 5:23) E lē tatau la i le tane ona faatalalē i lana tiute tauave ae ia faatinoina faatamatane; e lē tatau ona pulepuletutū pe sauā, ae ia agaalofa, magafagafa ma agalelei. E na te manatuaina e faatapulaa lana pule, e lē sili atu i le pule a Ieova.

13. E faapefea ona faatino e se avā ma se tinā lana matafaioi i le aiga ina ia faafiafia ai Ieova?

¹³ O le avā ma le tinā, e fai o ia ma fesoasoani i le tane, e lagolagosua iā te ia. Ua tuuina mai foʻi i le avā le pule i le aiga, auā o loo taʻua i le Tusi Paia “le tulafono [faatonuga] a lou tinā.” (Faataoto 1:8) Ae e maulalo ifo lana pule i le pule a le tane. E faaalia e se avā Kerisiano le faaaloalo i le pule a lana tane, i le fesoasoani iā te ia e faatino lona tulaga o le ulu i le aiga. E na te lē taʻufaatauvaaina lana tane, pe faaōleōle i ai, pe e fia pule foʻi iā te ia. Nai lo o lea, e felagolagomaʻi ma feoeoeaʻi o ia. Afai e lē fiafia o ia i faaiʻuga a le tane, e mafai ona faailoa atu ma le faaaloalo ona manatu, ae e gauaʻi pea i le tane. Afai e lē talitonu lana tane, e iai tulaga faigatā e tulaʻi mai ai, ae o lona gauaʻi pea, atonu e uunaʻia ai le tane e saʻili atu iā Ieova.​—Faitau le 1 Peteru 3:1.

14. E faapefea ona faafiafiaina e le fanau o latou mātua ma Ieova?

¹⁴ E faafiafia e le fanau le finagalo o Ieova pe a usiusitaʻi i o latou tamā ma tinā. E taʻuleleia ai ma faafiafiaina ai foʻi o latou mātua. (Faataoto 10:1) E faatatau atu foʻi lenā taʻiala o le usiusitaʻi i fanau o aiga e toʻatasi le matua, auā e latou te iloa e sili atu ona manaʻomia e lo latou matua la latou lagolagosua. E matuā toʻafilemu ma olioli aiga o ē e faatino e sui uma o latou matafaioi ua tuuina mai e le Atua mo i latou. E viia ai Lē na faavaeina aiga uma, o Ieova le Atua.​—Efeso 3:14, 15.

LE FAAALOALO I LE FAAPOTOPOTOGA

15. (a) E faapefea ona tatou faaalia le faaaloalo i le pule a Ieova i le faapotopotoga? (e) O ā mataupu silisili e fesoasoani iā i tatou e usiusitaʻi ai i ē o taʻimua? (Tagaʻi i le pusa “Ia Usiusitaʻi i Ē o Taʻimua iā te Outou.”)

¹⁵ Ua tofia e Ieova lona Alo e fai ma Pule o le faapotopotoga Kerisiano. (Kolose 1:13) Ae ua tofia e Iesu lana “pologa faamaoni ma le faautauta” e tausia manaʻoga faaleagaga o tagata o le Atua i le lalolagi. (Mataio 24:45-47) Ua avea le Vaega Pule o Molimau a Ieova ma “pologa faamaoni ma le faautauta.” E pei o le faapotopotoga Kerisiano i le uluaʻi senituri, ua maua foʻi e toeaina i aso nei faatonuga ma fautuaga mai le Vaega Pule, e tuusaʻo pe e ala mai i ona sui, e pei o ovasia femalagaaʻi. Afai e taʻitasi i tatou ma faaaloalo i le pule a toeaina Kerisiano, ua tatou usiusitaʻi la iā Ieova.​—Faitau le 1 Tesalonia 5:12; Eperu 13:17.

16. E faapefea ona tofia toeaina e le agaga paia?

¹⁶ E lē lelei atoatoa toeaina ma auauna o le faiva. E iai o latou vaivaiga, e pei foʻi o i tatou. Ae peitaʻi, o toeaina o “meaalofa i tagata,” ua tofia e fesoasoani i le faapotopotoga ina ia tumau ai ona malosi faaleagaga. (Efeso 4:8) Ua tofia toeaina e le agaga paia. (Galuega 20:28) E faapefea? E tatau i nei tane ona ausia muamua agavaa o loo tusia i le Afioga a le Atua lea e mai i lona agaga. (1 Timoteo 3:1-7, 12; Tito 1:5-9) E lē gata i lea, o toeaina o ē e iloiloina agavaa o se uso, e latou te tatalo faatauanau i le taʻitaʻiga a le agaga paia o Ieova.

17. Aiseā e fai ai ufiulu o fafine Kerisiano i nisi taimi i meafai a le faapotopotoga?

¹⁷ I le faapotopotoga, e iai taimi e lē avanoa ai se toeaina po o se auauna o le faiva e faia tiute e masani ona tofia atu iā i latou, e pei o le taʻimua i feiloaʻiga mo le talaʻiga. I na tulaga, e mafai e nisi uso ua papatiso ona faia lenā mea. Afai e leai se uso o avanoa, e mafai e se tuafafine Kerisiano ua agavaa ona faatino lenā manaʻoga. Peitaʻi, e tatau i se fafine ona fai sona ufiulu pe afai e na te faatinoina le tiute e masani ona tofia i se tane ua papatiso.a (1 Korinito 11:3-10) O lenei faatulagaga e lē taʻufaatauvaa ai fafine. Nai lo o lea, ua maua ai se avanoa e faaalia ai le faaaloalo i faatulagaga a Ieova mo le tulaga ulu i totonu o le aiga ma le faapotopotoga.

LE FAAALOALO I PULE O I LE LALOLAGI

18, 19. (a) E faapefea ona e faamatala mataupu silisili o loo taʻua i le Roma 13:1-7? (e) E faapefea ona faaalia lo tatou faaaloalo i pule o i le lalolagi?

¹⁸ E matuā utagia e Kerisiano moni mataupu silisili o loo i le Roma 13:1-7. (Faitau.) A o e faitauina lenā mau, o le a e iloa ai o “faipule silisili” e faasino atu i pule o malo. Po o le ā lava le umi e faataga ai e Ieova nei tagata e pule, ae e latou te faataunuuina ni matafaioi tāua, e latou te aumaia se tulaga maopoopo ma saunia auaunaga e moomia e tagata. Tatou te faaalia le faaaloalo i nei pule e ala i lo tatou usiusitaʻi i tulafono. Tatou te faamautinoa e totogi a tatou lafoga uma, e faatumuina ma le saʻo pepa e moomia e le malo, ma usiusitaʻi i tulafono uma e aafia ai i tatou, o o tatou aiga, o pisinisi ma meafaitino. Peitaʻi, tatou te lē gauaʻi atu i pule o i le lalolagi pe a faatonu i tatou e aua le usiusitaʻi i le Atua. Ae e tatou te tali atu e pei ona sa faia e le ʻauaposetolo: “E tatau ona matou usiusitaʻi i le Atua o le pule, nai lo o tagata.”​—Galuega 5:28, 29; tagaʻi i le pusa “O le Pule a Ai Ou te Usiusitaʻi i Ai?”

¹⁹ E faaalia foʻi lo tatou faaaloalo i pule o i le lalolagi e ala i a tatou amio. E iai taimi e tatou te feutagaʻi ai ma tagata o le malo. Na feutagaʻi foʻi le aposetolo o Paulo ma pule e pei o le Tupu o Herota Akeripa ma le Kovana o Feso. Na matuā lē lelei amio a na tagata, ae na talanoa faaaloalo i ai Paulo. (Galuega 26:2, 25) Tatou te mulimuli i le faaaʻoaʻoga a Paulo, e tusa pe tatou te talanoa i se tagata maualuga o le malo, po o se alii leoleo. E faapena foʻi ona faaaloalo talavou Kerisiano i o latou faiaʻoga i le aʻoga, o tagata aloaʻia ma tagata e faigaluega i le aʻoga. O lo tatou faaaloalo e lē faatapulaa na o ē e lagolagoina o tatou talitonuga; ae tatou te faaaloalo foʻi i ē e tetee mai i Molimau a Ieova. O le mea moni, e tatau ona mātau mai e tagata lē talitonu lo tatou faaaloalo.​—Faitau le Roma 12:17, 18; 1 Peteru 3:15.

20, 21. O ā ni faamanuiaga e maua ona o le faaaloalo tatau i le pule?

²⁰ E lē tatau ona tatou musuā i le faaalia o le faaaloalo. Na tusi le aposetolo o Peteru: “Ia āva i ituaiga uma o tagata.” (1 Peteru 2:17) Afai e mātau mai e tagata lo tatou faaaloalo moni iā i latou, e matuā fiafia ai i latou. Ia manatua, ua seāseā ona toe faaalia lenei uiga. O lea la, o le faaalia o le faaaloalo o se tasi lea o auala e mulimuli ai i le poloaʻiga a Iesu e faapea: “Ia faapea foʻi ona susulu atu lo outou malamalama i luma o tagata, ina ia latou iloa a outou galuega lelei ma vivii atu ai i lo outou Tamā o i le lagi.”​—Mataio 5:16.

²¹ Ua tosina mai i le malamalama faaleagaga tagata lotofaamaoni o i lenei lalolagi pogisa. O le mea lea, o le faaalia o le faaaloalo i le aiga, le faapotopotoga, ma i tulaga eseese i le lalolagi e ono tosina mai ai nisi ma uunaʻia i latou e savavali ma i tatou i le malamalama. Ioe, o se faamoemoe matagofie! Ae e tusa foʻi pe afai e lē tupu lenā mea, ae e iai le mea e mautinoa ai. O lo tatou faaaloalo i tagata, e faafiafia ai Ieova le Atua ma e fesoasoani ina ia tatou tumau ai i lona alofa. O le ā se isi taui e sili atu i lo o lenā?