Le Vaaiga Faa-Kerisiano i le Pule
“E leai se pule pe a le mai le Atua.”—ROMA 13:1.
1. O le ā e sootaga atu i ai le upu “pule,” aisea la ua mafai ai ona faapea atu o Ieova o le Pule Silisili lea?
E IAI le sootaga a le pule ma le tulaga faalefoafoaga. O le upu “pule” e fesootai atu i le upu “o lē ana,” o lona uiga, “o se tasi na amataina, na faia, pe na aumaia le ola.” O Lē Silisili na aumaia le ola i foafoaga uma, i mea e iai ola ma mea e leai ni ola, o Ieova le Atua lea. Ua lē mafaafitia le avea o ia ma Pule Silisili. Ua iai foi i Kerisiano moni faalogona lava ia o loo iai i foafoaga faalelagi o ē ua folafola mai e faapea: “Le Alii e, [“Ieova,” NW] e tatau lava oe ina ia tuu atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.”—Faaaliga 4:11.
2. Na faapefea i uluai taʻitaʻi faaletagata ona taʻutino mai sa leai sa latou aiā e pulea ai isi o latou uso a tagata, ma o le ā na taʻu atu e Iesu ia Ponotio Pilato?
2 O le mea moni e faapea sa taumafai uluai taʻitaʻi faaletagata e matuā faamaonia a latou pulega i le faapea mai o i latou o ni atua po o ni sui o atua, o se talia aloaia e aunoa ma ni upu, e faamaonia ai ua lē iai i se tagata se aiā ua tuufaasolo mai na te pulea ai isi tagata.a (Ieremia 10:23) Ua na o le pau lava le puna faamaonia o le pule, o Ieova le Atua lea. Na fetalai atu Keriso ia Ponotio Pilato, le kovana Roma o Iutaia e faapea: “E leai sau pule ia te au, ana le tuuina mai ia te oe mai i lugā.”—Ioane 19:11.
“E Leai se Pule pe a Le Mai le Atua”
3. O le ā na taʻua e le aposetolo o Pauro e faatatau i “faipule silisili,” ma o ā fesili ua lāgā mai faamatalaga a Iesu ma Pauro?
3 Na tusi atu le aposetolo o Pauro i Kerisiano o ē sa pulea e le Emepaea o Roma e faapea: “Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina [“i se tulaga faatatau,” NW] e le Atua.” (Roma 13:1) O le ā na uiga i ai Iesu ina ua ia taʻua e faapea o le pule a Pilato na foai atu ia te ia “mai lugā”? Ma i le ā le itu na manatu ai Pauro e faapea ua iai pulega faapolotiki i tulaga ua tuu i ai e le Atua i ona aso? Pe na la uiga ea faapea, e matuā iai totino lava Ieova i le tofiaina o pule faapolotiki taitoatasi o lenei lalolagi?
4. O le ā na taʻua ai e Iesu ma Pauro ia Satani, ma o le ā le folafolaga a Satani sa leʻi faafitia e Iesu?
4 Ua faapefea ona fetaui lenei mea, ae na taʻua e Iesu Satani o “le alii o lenei lalolagi,” ma na taʻua foi o ia e le aposetolo o Pauro e faapea o “le atua o le lalolagi nei”? (Ioane 12:31; 16:11; 2 Korinito 4:4) E lē gata i lea, ina ua tofotofoina Iesu e Satani, sa ia ofo atu ia te ia le “pule” i “malo uma o le lalolagi,” i le faapea atu ua uma ona tuuina atu ia te ia lea pule. Na teena e Iesu lana ofo, ae na te leʻi faafitia le iai ia Satani o lena pule na ia ofoina atu.—Luka 4:5-8.
5. (a) O le ā lo tatou malamalamaga e uiga i upu a Iesu ma Pauro e faatatau i le pule faaletagata? (e) I le ā le uiga ua “faatuina ai i se tulaga faatatau e le Atua” faipule silisili?
5 Na tuuina atu e Ieova le tulaga pule o lenei lalolagi ia Satani, e ala i le faataga o ia e ola pea ina ua mavae lana fouvalega ma ina ua mavae lona tofotofoina o Atamu ma Eva ma faapogaia ai lo la fouvale atu i Lana pule silisiliesee. (Kenese 3:1-6; faatusatusa i le Esoto 9:15, 16.) O lea la, atonu o upu a Iesu ma Pauro sa uiga e faapea, ina ua teteeina e le uluai ulugalii faaletagata le faatiokarate i Etena, po o le pulea e le Atua, ona faataga ai lea e Ieova tagata ua taasē e faatuina se pulega lea o le a faatagaina ai i latou e ola i se sosaiete maopoopo. I nisi taimi, ina ia faataulauina lana fuafuaga, ua faapogaia ai e Ieova nisi o pule po o faiga mālō ina ia faatoilaloina. (Tanielu 2:19-21) O isi ua ia faatagaina e tumau pea i le pule. O pule o ē ua faatagaina e Ieova lo latou iai pea, e mafai ona faapea atu, ua “faatuina i se tulaga faatatau e le Atua.”
Uluai Kerisiano ma Pule i Roma
6. Sa faapeī le manatu o uluai Kerisiano i pule o Roma, ma aisea?
6 Sa leʻi auai uluai Kerisiano i vaegaau ma ē sa i le lotu Iutaia o ē na faufau faalilolilo ma tau e tetee atu i tagata Roma sa nonofo i Isaraelu. E tusa ai ma pule i Roma ma la latou faiga faaletulafono, na tausisia ai le filemu i le laueleele ma le sami; na fausia le tele o galuega aogā, o auala, o alalaupapa; ma e tusa ai ma gaoioiga autū mo le lelei lautele, sa manatu ai Kerisiano ia i latou na, o ni ‘auauna a le Atua [po o, “faifeau,” NW] mo i latou mo lo latou lelei.’ (Roma 13:3, 4) O tulafono ma le pule ua faia ai se siomaga ina ia mafai e Kerisiano ona talaʻi atu le tala lelei i so o se mamao, e pei ona poloaiina ai e Iesu. (Mataio 28:19, 20) Latou te totogi atu a latou lafoga na faavasega mai e tagata Roma, ma se loto fuatiaifo lelei, e tusa lava po o nisi o na tupe sa faaaogā i ni mea e lē faamaonia e le Atua.—Roma 13:5-7.
7, 8. (a) O le ā ua faaalia mai i le faitauina ma le faaeteete o le Roma 13:1-7, ma o le ā ua faaalia e le ʻauʻau o le mataupu atoa? (e) I lalo o ā tulaga na lē gaoioi ai pule o Roma e avea o se “auauna o ia a le Atua,” ma i lenei tulaga, o le ā le uiga na iai i uluai Kerisiano?
7 O le faitauina ma le faaeteete o uluai fuaiupu e fitu o le mataupu e 13 o le Roma, ua faaalia ai o “faipule silisili” faapolotiki o le “auauna o ia a le Atua” na te viiviia i latou o loo faia mea lelei, ae faasalaina i latou o loo faia mea leaga. Ua faaalia e le ʻauʻau o le mataupu atoa e faapea o le Atua, ae lē o faipule silisili, na te filifilia po o le ā e lelei ae o le ā e leaga. O lea la, afai na manaomia e le emeperoa o Roma po o so o se isi lava pule faapolotiki ni mea na faasaina e le Atua, pe i se isi itu sa latou faasaina ni mea e manaomia e le Atua, ona lē avea ai lea o ia ma auauna a le Atua. Na fetalai Iesu: “O mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) Afai na manaomia e le Setete o Roma ni mea e ā le Atua, e pei o le tapuaiga po o le ola o se tagata, ona mulimuli ai lea o Kerisiano moni i le fautuaga faaaposetolo e faapea: “E tusa ona sili o lo matou anaana i le Atua i lo matou anaana i tagata.”—Galuega 5:29.
8 O le mumusu o uluai Kerisiano e faia le tapuaiga i le emeperoa ma le ifo i tupua, ma mumusu e taofia a latou sauniga faa-Kerisiano ma le talaʻia o le tala lelei, na oo ai sauaga ia i latou. E talitonuina i le lautele e faapea, na faaoo le sala oti i le aposetolo o Pauro e ala mai i faatonuga a le Emeperoa o Neru. O isi emeperoa, e pei o Domitian, Marcus Aurelius, Septimius Severus, Decius, ma Diocletian, sa latou faasaua foi i uluai Kerisiano. Ina ua sauaina Kerisiano e nei emeperoa ma o latou pule lagolago, na mautinoa ai lo latou lē gaoioi o se “auauna o ia a le Atua.”
9. (a) O le ā o loo moni pea e faatatau i faipule silisili faapolotiki, ma o ai o loo maua mai ai e le manu feai faapolotiki le mana ma le pule? (e) O le ā ua mafai ona fai atu ai ma le talafeagai e faatatau i le gauai faa-Kerisiano i faipule silisili?
9 O nei mea uma ua faataitaia ai e faapea, e ui ina faia e faipule silisili faapolotiki ni mea ua pei o se “sauniga a le Atua” ina ia tausisia ai se sosaiete faaletagata ia maopoopo, ae o loo avea pea i latou ma vaega o le faiga o mea faalelalolagi, lea e avea ai Satani ma atua. (1 Ioane 5:19) O i latou o se vaega o le faalapotopotoga faapolotiki i le lalolagi aoao lea ua faaatagia mai i “le manu feai” a le Faaaliga 13:1, 2. Ua maua e lena manu feai lona mana ma lana pule mai “le tarako tele,” o Satani le Tiapolo. (Faaaliga 12:9) Ua talafeagai ai la, le fai faatatau o le gauai atu faa-Kerisiano i na faipule silisili, ae lē o le tuuina atu atoatoa i ai.—Faatusatusa i le Tanielu 3:16-18.
Le Faaaloalo Tatau mo le Pule
10, 11. (a) Na faapefea ona faaalia e Pauro faapea e ao ona tatou faaaloalo i tane o loo iai le pule? (e) E faapefea ma aisea e mafai ai ona tatalo “mo tupu ma i latou uma ua i ai le pule”?
10 Peitai ane, e lē o le uiga o lenei mea faapea, e tatau i Kerisiano ona iai so latou uiga leaga pe faatautee atu i faipule silisili faapolotiki. E moni o le toatele o nei tagata ua lē tatau i ai le faaaloalo i o latou olaga totino, pe i o latou tulaga faalemalo. Peitai o le faaaoaoga a le au aposetolo ma la latou fautuaga, na faaalia ai e ao ona faaalia le faaaloalo i tagata o loo iai le pule. Ina ua tulai Pauro i luma o le tupu mataifale o Herota Akeripa II, na ia tautala atu i ai ma le faaaloalo e tatau ai.—Galuega 26:2, 3, 25.
11 Na fai mai foi Pauro e talafeagai ona taʻua faipule silisili faalelalolagi i a tatou tatalo, ae maise lava pe afai e manaomia i latou i le faia o ni filifiliga e aafia ai o tatou ola ma a tatou gaoioiga faa-Kerisiano. Na ia tusi e faapea: “O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua i ai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie; auā o le mea lelei lea ma le mālie i luma o lo tatou Faaola le Atua, o lē finagalo ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:1-4) O o tatou uiga faaaloalo i na pule atonu e oo ai ina latou faatagaina i tatou e faaauau ma le saoloto la tatou galuega o le taumafai ina ia faaolaina “tagata uma lava.”
12, 13. (a) O le ā le fautuaga paleni e faatatau i le pule, na tuuina mai e Peteru? (e) E ono mafai faapefea ona tatou tali fuaitau atu i le “valea o tagata” o ē o loo faatupuina faiga faaituau faasaga i Molimau a Ieova?
12 Na tusi le aposetolo o Peteru: “Ia outou usiusitai atu i tofiga uma a tagata auā o le Alii; po o le tupu ina ua sili; po o alii, o i latou ua aauina mai e ia ina ia faasalaina ai ē amio leaga, a ia viia ē amio lelei. Auā o le finagalo lea o le Atua, o la outou amio lelei ia faalologo ai le valea o tagata pouliuli; pei o e saʻoloto, a e aua neʻi fai le saʻolotoga ma ufiufi o le loto leaga, a ia faapei o auauna a le Atua. Ia outou ava i tagata uma; ia alolofa atu i le au uso; ia matatau i le Atua; ia ava i le tupu.” (1 Peteru 2:13-17) Maeu se fautuaga paleni! Ua tatou aitalafu i le Atua mo le gauai atoatoa atu ia te ia i le avea o ni ana auauna, ma tatou te tuuina atu le gauai ma le faaaloalo e fai faatatau i pule faapolotiki, o ē ua tuuina mai e faasala i ē amio leaga.
13 Ua matauina le toatele o pule faalelalolagi e matuā sese lava o latou manatu e uiga i Molimau a Ieova. Ua masani ona iai lenei mea ona ua talaseseina i latou e fili leaga o tagata o le Atua. Pe atonu foi na pau lava mea latou te iloa e uiga ia i tatou, o mea na latou faalogo i ai mai tagata faasalalau, lea e masani lava ona faaituau i a latou faasalalauga. O nisi taimi e mafai ai ona tatou aveesea lenei faaituau e ala i a tatou amio faaaloalo, ma pe afai e mafai ai, e ala i le tuuina atu i pule o se faamatalaga saʻo aʻiaʻi o le galuega ma talitonuga o Molimau a Ieova. Mo tagata i ofisa o le malo e tele naua a latou galuega i taimi uma, o le polosiua Jehovah’s Witnesses in the Twentieth Century ua sauniunia ai se faamalamalamaga saʻo. Mo ni faamatalaga atili, e mafai ona tuuina atu ia i latou le tusi Jehovah’s Witnesses—Proclaimers of God’s Kingdom, o se meafaigaluega lelei ua onomea ona iai i fatatusi a le atunuu lava ia po o faletusi faavaomalo.
Le Pule i Totonu o Aiga Kerisiano
14, 15. (a) O le ā le faavae o le pule i se aiga Kerisiano? (e) O le ā le uiga e tatau ona amioai avā Kerisiano i a latou tane, ma aisea?
14 Ua manino lava, afai ua finagalo le Atua e faaalia e Kerisiano le faaaloalo tatau mo pule faalelalolagi, e tatau foi la ona faapena lo latou faaaloalo i le faatulagaga o le pule ua faavaeina e le Atua i totonu o aiga Kerisiano. Na otooto mai e le aposetolo o Pauro i ni faaupuga e saʻo aʻiaʻi le mataupu silisili o le tulaga ulu lea e iai i tagata o Ieova. Na ia tusi e faapea: “A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) O le mataupu silisili lenei o le faatiokarate, po o le pulea e le Atua. O le ā e aofia ai?
15 O le faaaloalo i le faatiokarate e amata mai i le aiga. O se avā Kerisiano e lē faaalia le faaaloalo tatau i le pule a lana tane—e tusa lava po o le tane o se tagata talitonu pe leai—ua lē faatiokarate. Na fautuaina e Pauro Kerisiano e faapea: “Ia usiusitai le tasi i le tasi ma le mataʻu i le Atua [“Keriso,” NW]. O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino. O lenei, faapei ona usiusitai o le ekalesia ia Keriso, ia faapea foi fafine i a latou lava tane i mea uma lava.” (Efeso 5:21-24) E pei lava ona tatau i tane Kerisiano ona gauai atu i le tulaga ulu o Keriso, ua tatau ai foi i fafine Kerisiano ona amanaiaina le atamai o le gauai atu i le pule na tuuina mai e le Atua i a latou tane. O lenei mea o le a aumaia ai ia i latou se matuā faamalieina o le loto, ae sili ai ona tāua, o le faamanuia a Ieova.
16, 17. (a) E mafai faapefea e fanau ua tausia aʻe i aiga Kerisiano ona matuā iloga lo latou ese mai le toatele o talavou i aso nei, ma o le ā le faanaunauga ia iai ia i latou? (e) Na faapefea ona avea Iesu ma faaaoaoga lelei mo talavou i aso nei, ma o le ā ua faalaeiauina i latou e fai?
16 E fiafia fanau faatiokarate e faaalia le faaaloalo tatau i o latou mātua. E tusa ai i tupulaga talavou i aso e gata ai, na valoia ai o le a latou “le faalogo i mātua.” (2 Timoteo 3:1, 2) Ae ua faapea mai le Afioga faagaeeina a le Atua i fanau Kerisiano: “O outou le fanau, ia outou faalogo i o outou mātua i mea uma; auā o le mea mālie lea i le Alii.” (Kolose 3:20) O le faaaloalo mo le pule a mātua e faafiafiaina ai le finagalo o Ieova ma aumaia ai lana faamanuiaga.
17 Ua faataitaia mai lenei mea i le tulaga o Iesu. Ua taʻua i le tala a Luka e faapea: “Ua latou o ifo ma i laua [ona mātua], ua oo i Nasareta, ua anaana o ia ia te i laua; . . . Ua tupu le poto ma le tino o Iesu, ua alofagia o ia e le Atua atoa ma tagata.” (Luka 2:51, 52) O le taimi lena ua 12 tausaga le matua o Iesu, ma o le veape faa-Eleni ua faaaogā i inei ua faamamafa ai le manatu e faapea sa “faaauau pea ona gauai atu” o ia i ona mātua. E leʻi muta mai la lona gauai atu ina ua oo o ia i ona tausaga talavou. Pe afai tou te mananao talavou ina ia outou agaigai i luma faaleagaga ma ia tou maua le finagalo malie o Ieova ma fiafia ai foi tagata faaleatua, e ao la ona outou faaalia le faaaloalo mo le pule i totonu o o outou aiga po o fafo atu foi o le aiga.
Le Pule i Totonu o le Faapotopotoga
18. O ai le Ulu o le faapotopotoga Kerisiano, ma o ai ua ia faasoa atu i ai le pule?
18 I le taʻua o le manaoga mo le maopoopo i totonu o le faapotopotoga Kerisiano, na tusi ai Pauro e faapea: “O le Atua, e le o le Atua ia o le faasoesa [“lē maopoopo,” NW], a o le filemu; . . . Ia faia mea uma lava ma le matagofie ma le sauni lelei [pe, “ia tusa ma le tulaga maopoopo,” faamatalaga i le pito i lalo, NW].” (1 Korinito 14:33, 40) Ina ia faia mea uma i se tulaga maopoopo, ua faasoa atu ai e Keriso, o le Ulu o le faapotopotoga Kerisiano, le pule i tane faatuatua. Ua tatou faitau ai e faapea: “Na ia tuuina mai foi nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma aʻoaʻo; ina ia faaatoatoaina ai le au paia, latou te fai ai le galuega a auauna . . . A ia amio faamaoni i le alofa, ia tutupu i tatou ia te ia i mea uma, o le ulu lava ia, o ia foi o Keriso.”—Efeso 4:11, 12, 15.
19. (a) O ai ua tofia e Keriso e pule i ana mea uma i le lalolagi, ma ia te ai ua ia tuuina atu i ai le pule faapitoa? (e) O le ā le faasoaga o le pule o loo faia i le faapotopotoga Kerisiano, ma o le ā ua manaomia e lenei mea mai ia i tatou?
19 I lenei taimi o le iuga, ua tofia ai e Keriso le vaega ua faapotopotoina o le “auauna faamaoni ma le mafaufau” e pule i “ana mea uma” po o manaoga o le Malo i luga o le lalolagi. (Mataio 24:45-47) E pei ona iai i le uluai senituri, sa fai ai ma sui o lenei auauna, le vaega pule o tane Kerisiano faauuina, o ē na tuuina atu i ai e Keriso le pule e faia ai filifiliga ma tofia nisi ovasia. (Galuega 6:2, 3; 15:2) Ona faasoa atu foi lea e le Vaega Pule le pule i Komiti o Lālā, i ovasia itumalo ma ovasia matagaluega, ma toeaina i faapotopotoga taitasi o faapotopotoga e silia i le 73,000 o Molimau a Ieova i le lalolagi aoao. O nei uma tane Kerisiano tuutoina ua onomea i ai la tatou lagolagosua ma le faaaloalo.—1 Timoteo 5:17.
20. O le ā le faaaoaoga e faaalia ai e lē fiafia le finagalo o Ieova ia i latou o ē leai se faaaloalo mo o latou uso Kerisiano o loo iai le pule?
20 E tusa ai ma le faaaloalo lea e tatau ona tatou faaalia ia i latou o loo i tulaga pule i le faapotopotoga Kerisiano, e mafai ona fai se faatusatusaga ma le gauai lea e tatau ona tatou faaalia i pule faalelalolagi. Pe a solia e se tasi se tulafono a tagata lea e faamaonia e le Atua, o le faasalaga la e fuafuaina e “alii [“i latou o loo pule,” NW]” o le mea moni, o le faaooina mai lena o le toasa o le Atua i se auala lē tuusaʻo “i lē amio leaga.” (Roma 13:3, 4) Pe afai e toasa Ieova ona ua solia e se tasi tulafono a tagata ma leai se faaaloalo tatau i pule faalelalolagi, pagā la se sili atu ona lē fiafia o lona finagalo pe afai e lē amanaia e se Kerisiano tuuina atu mataupu silisili faale-Tusi Paia ma faaalia le lē faaaloalo mo uso Kerisiano o ē o loo iai le pule!
21. O le ā le fautuaga faale-Tusi Paia o le a tatou fiafia e usitaia, ma o le ā o le a talanoaina i le mataupu o sosoo mai?
21 Na i lo o le faatupuina o le lē finagalo malie o le Atua ona o le faia o uiga fouvale ma le fia tutoatasi, ae o le a tatou usitaia le fautuaga a Pauro i Kerisiano i Filipi e faapea: “O lenei, aʻu pele e, faapei ona outou anaana mai e le aunoa, e le gata ina o tatou nonofo ma outou, a o lenei ua atili ai ina ua ou le i ai ia te outou, ia outou galulue aiai ma le mataʻu atoa ma le gatete, ina ia faaolaina outou. Auā o le Atua, o ia lē galue i totonu ia te outou i lona finagalo alofa, ina ia outou loto ma galulue i ai. Ia outou faia mea uma lava ma le le muimui, ma le le fefinauai; ina ia avea outou ma e ua le mataʻuleagaina, ma e ua sao le amio, o le fanau a le Atua, e le ponā i luma o le tupulaga amio faapiopio ma le finau vale; ua pupula ia te i latou la outou amio, faapei o mea e faamalamalama aʻi le lalolagi.” (Filipi 2:12-15) I le lē pei o le tupulaga amio faapiopio ma le lē faamaoni o loo iai nei, lea ua latou aumaia ia i latou lava se mala tau pulega, ae o tagata o Ieova o loo sauni pea e gauai atu i le pule. Ona latou seleseleina ai lea o aogā sili, e pei ona o le a tatou tilofaia i le mataupu o loo sosoo mai.
[Faaopoopoga i lalo]
a Tagai i le mataupu i le itulau e 14-17.
I se Tulaga Faaautaluga
◻ O ai le Pule Silisili, ma aisea ua matuā faamaonia ai lana pule?
◻ I le ā le itu ua “faatuina ai i se tulaga faatatau e le Atua” faipule silisili?
◻ O le ā le taimi e lē avea ai faipule silisili o se “auauna o ia a le Atua”?
◻ O le ā le faatulagaga o le pule o loo iai i aiga Kerisiano?
◻ O le ā le faasoaga o le pule o loo iai i le faapotopotoga Kerisiano?
[Ata i le itulau 18]
Na fetalai Iesu: “O mea a Kaisara, ia outou avatu ia Kaisara”