Sa Manaʻo Repeka e Faafiafia Ieova

O Repeka o se fafine e alofa iā Ieova. O le igoa o lona toʻalua o Isaako, ma e alofa foʻi o ia iā Ieova. Na faapefea ona masani Repeka ma Isaako? Na faaalia faapefea e Repeka e manaʻo e faafiafia Ieova? Seʻi o tatou iloilo muamua nisi o manatu e uiga i le toʻalua o Repeka, o Isaako.

O igoa o mātua o Isaako o Aperaamo ma Sara. Sa nonofo i latou i Kanana, o se nuu e lē tapuaʻi tagata iā Ieova. Ae sa manaʻo Aperaamo e faaipoipo lona atalii i se fafine e tapuaʻi iā Ieova. O lea na auina atu ai e Aperaamo lana auauna, atonu o Elisara, e suʻe mai se toʻalua o Isaako, mai i le nuu o Karana lea e nonofo ai nisi o ona tauaiga.

E mamao le mea na faimalaga ai Elisara ma isi auauna a Aperaamo. Na latou ō ma ave ni kamela e sefulu o loo ave ai ni meaʻai ma meaalofa. Na faapefea ona iloa e Elisara le fafine ua filifilia mo Isaako? Ina ua taunuu i Karana, sa ō atu loa Elisara ma isi auauna ua mālōlō i se vaieli, auā na ia iloa o le a ō atu tagata e asu vai. Na tatalo Elisara iā Ieova e faapea: ʻAfai ou te talosaga atu i se tamaʻitaʻi mo se vai ou te inu ai, ae ia aumai le vai mo aʻu ma aʻu kamela, ona ou iloa ai lea o ia lea ua e filifilia.’

O le taimi lea na alu ane ai Repeka i le vaieli. Ua taʻua i le Tusi Paia o ia o se tamaʻitaʻi e aulelei tele. Ina ua talosaga atu i ai Elisara mo se vai, na faapea mai o ia: ʻUa lelei. Ou te avatu se vai mo oe faapea au kamela.’ Seʻi mafaufau i le tele o vai na asu mai e Repeka, auā ua matuā fia feinu lava kamela. Po o e mātauina i le ata le galue malosi o Repeka?— Na matuā ofo Elisara i le auala na tali mai ai Ieova i lana tatalo.

Na avatu e Elisara ni meaalofa mananaia iā Repeka. Ona valaaulia lea e Repeka Elisara ma isi auauna e ō atu i lona aiga. Sa faamatala atu e Elisara iā i latou le māfuaaga na auina mai ai o ia e Aperaamo, ma le auala na tali mai ai Ieova i lana tatalo. O lea, na malilie ai loa le aiga o Repeka e tuu atu o ia e alu e faaipoipo ma Isaako.

Ae pe na manaʻo Repeka e faaipoipo ma Isaako?— Na iloa e Repeka o Ieova na auina atu Elisara. O lea, ina ua fesili atu i ai lona aiga pe fia alu i Kanana e faaipoipo ma Isaako, na tali mai o ia: ʻIoe, ou te manaʻo ou te alu.’ Ona ō loa lea o Repeka ma Elisara i Kanana, ma faaipoipo ma Isaako.

Sa faamanuia e Ieova Repeka ona sa ia faia le mea na finagalo i ai Ieova. Ina ua mavae le tele o tausaga, sa fanau mai Iesu i le aiga o Repeka! O le a faamanuia foʻi oe e Ieova, pe afai e te faataʻitaʻi iā Repeka, e ala i le fai o le mea e faafiafia ai Ieova.