Na Latou Faia Le Finagalo o Ieova

Le Sailia o se Avā mo Isaako

NA MATUĀ vāivai lava le toeaina matua lea na nofonofo i tala ane o le vaieli. O ia ma ana auauna ma a latou kamela e sefulu na latou faimalaga mai i se malaga umi lava mai le nuu tuaoi o Peresepa agaʻi atu i mātū o Mesopotamia—e sili atu ma le 500 maila [800 kilomita] le mamao.a O lenei la, ua latou taunuu i le nuu na fuafua e ō i ai, ona mālōlō ai lea o lenei tagata malaga ua lē lavā ina ia toe mafaufau i lona tofiga faigata. O ai lenei tamaloa, ma aisea ua ia faia ai lenei faigamalaga fitā?

O le tamaloa o se auauna a Aperaamo, “o le toeaina o le aiga.” (Kenese 24:2) E ui e lē o taʻua le igoa i le tala, ae faigofie ona iloa o ia lea o Elisara, o lē na taʻua e Aperaamo i se isi taimi e faapea o ‘se atalii i lona aiga’ o lē na ia taʻua e soloai ane e avea ma “suli.” (Kenese 15:2, 3) O le taimi lena a o lei iai se tama a Aperaamo ma Sara. O lenei la, ua fasefulu tausaga o le la tama o Isaako, ma e ui lava ua lē toe avea Elisara ma suli autū o le aiga o Aperaamo, ae o loo tumau pea le avea o ia ma ana auauna. O lea na ia gauai atu ai ina ua faia e Aperaamo se talosaga faigata. O le ā lena talosaga?

Se Sāvali Faigata

O faaipoipoga i le vaitaimi o Aperaamo, e lē gata e aafia ai le aiga ae sa faapena foi ona aafia ai le ituaiga uma po o le nuu atoa o le augātamā. O lea la, sa fai ma tū masani mo mātua le filifilia o se paaga mo a latou fanau. Peitai, i le sailia o se avā mo lona atalii o Isaako, na fesagai ai Aperaamo ma se tulaga faigata. O ala lē amioatua o tagata Kanana na lē manaomia ai le faaipoipo atu i se tasi o i latou. (Teuteronome 18:9-12) Ma a o avea ma tū masani mo se tane le faaipoipo atu i se tasi mai lona lava ituaiga, ae e faitau selau maila [kilomita] le mamao ese o le mea na nonofo ai tauaiga o Aperaamo, i Mesopotamia i mātū. E lē mafai ona ia faanofoina Isaako iina, auā na folafola atu e Ieova ia Aperaamo e faapea: “Ou te foaiina lenei lava nuu mo lau fanau,” le nuu lea o Kanana. (Kenese 24:7) O lea, na fai atu ai Aperaamo ia Elisara: “Ia e alu atu i loʻu nuu ma loʻu aiga, ma e au mai ai se avā mā loʻu atalii o Isaako.”—Kenese 24:4.

Ina ua taunuu le faimalaga umi, ona mālōlō lea o Elisara i tala ane o le vaieli seʻi manatunatu i lana sāvali na ala ai ona alu. Na ia iloa e lē o toe umi ae gasolo ane fafine i le vaieli e utu ni vai mo le po. O lea na ia aioi atu ai ia Ieova e faapea: “O le teine ou te faapea atu i ai, Seʻi e tuutuu ifo lau kate soʻu inu ae; ona faapea mai lea o ia, Ina inu ia, ou te faainua foi au kamela; o le teine lea ua e tofia mā lau auauna o Isaako; ou te iloa foi i lea mea ua e alofa mai i loʻu matai.”—Kenese 24:14.

A o faaauau pea lana tatalo, na agaʻi ane se fafine talavou lalelei e igoa ia Repeka. Ona faapea atu lea o Elisara ia te ia: “Seʻi oʻu inu ae sina vai ai lau kate.” Ona faia lava lea e Repeka, ma ia faapea atu: “Ou te utufia foi ma au kamela, seia latou feinu ia malilie.” O se ofo e sili ona agalelei lea, auā o se kamela ua fiainu e oo atu i le 25 kalone [95 lita] vai le tele e mafai ona ia inuina i le na o le sefulu minute! E tusa lava pe na fia feinu kamela a Elisara pe leai, ae na iloa lava e Repeka o le ofo lea na ia faia o se galuega e faigata. O lea, na ia “faataalise . . . ma sasaa atu lana kate i le umete, ona toe momoʻe ifo lea o ia i le vai e utu ae, i le ua utu ae e ia ma ana kamela uma.”—Kenese 24:15-20.

O le lagonaina o le taitaiga a Ieova, na avatu ai e Elisara ia Repeka se mama auro ma taulima auro e lua, e tusa le tau ma le $1,400 Amerika i aso nei. Ina ua ia taʻu atu o ia o le tama a le afafine o Nakori, le uso o Aperaamo, ona ofoina atu lea e Elisara se tatalo faafetai i le Atua. Na ia faapea atu: “Ona taʻitaʻiina ai lea o aʻu e Ieova i le fale o uso o loʻu matai.” (Kenese 24:22-27) Ona ave atu ai lea o Elisara i le aiga o Repeka. Mulimuli ane, na avea ai Repeka ma avā a Isaako, ma na ia maua le faaeaga i le avea ma sē na tupuga mai ai le Mesia, o Iesu.

O Lesona mo i Tatou

Na faamanuiaina e Ieova taumafaiga filigā ma tatalo a Elisara i le sailia o se paaga e mataʻu i le Atua mo Isaako. Ia manatua foi, o le faaipoipoga a Isaako e fesootai tuusaʻo lava ma le fuafuaga a le Atua i le aumaia o se fanau e ala mai ia Aperaamo. O lea la, e lē tatau ai ia i tatou ona manatu faapea, o lenei mataupu ua taʻu mai ai o ē uma e tatalo atu mo se paaga o le a faavavega ona tuuina mai i ai. O le mea mautinoa, afai tatou te usiusitai atu i mataupu silisili a Ieova, o le a ia tuuina mai ia i tatou le malosi e onosaia ai luʻi ia e ō mai faatasi ma tulaga eseese o le olaga—o le faaipoipo po o le nofofua.—1 Korinito 7:8, 9, 28; faatusatusa i le Filipi 4:11-13.

Na tatau foi ia Elisara ona matuā taumafai malosi e faia mea i le auala a Ieova. Atonu e lē o taimi uma foi e faigofie ai ona tatou gauai atu i faatulagaga a Ieova. O se faataitaiga, atonu e faigata ona mauaina se galuega e lē omia ai galuega faatiokarate, se paaga e mataʻu ia Ieova, ni aumea e faalaeiauina ai, o faafiafiaga e lē faaleagaina ai. (Mataio 6:33; 1 Korinito 7:39; 15:33; Efeso 4:17-19) Peitai, e mafai e Ieova ona faatumauina i latou o ē e lē faagutugutulua i mataupu silisili o le Tusi Paia. Ua folafola mai e le Tusi Paia e faapea: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

[Faaopoopoga i lalo]