Ua Faamamaluina Iesu a o Leʻi Fanau Mai

Ua uma nei ona taʻu atu e le agelu o Kaperielu i le tamaʻitaʻi o Maria, o le a ia fanauina se tama tama e faaigoa iā Iesu, ma o le a pule o ia o se Tupu e faavavau. O lea, ua fesili atu ai Maria: “E faapefea ona tupu o lenei mea, ae e ma te leʻi momoe ma se tamāloa?”—Luka 1:34.

Ua tali mai Kaperielu: “E iā te oe le agaga paia, ma e faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.”—Luka 1:35.

Ina ia fesoasoani iā Maria e talia lenā feʻau, ua faapea atili atu Kaperielu: “Faauta! O lou tausoga o Elisapeta o lē na fai mai e pā, ua tō o ia a ua loomatua, o le tama tama lana tama, ma o le ono lenei o masina o lona maʻitaga; auā e faataunuuina e le Atua ana folafolaga uma.”—Luka 1:36, 37.

Ua talia e Maria le faamatalaga a Kaperielu i le faapea atu: “Faauta! O aʻu o le teine pologa a Ieova! Ia faia iā te aʻu le mea ua e folafolaina mai.”—Luka 1:38.

Ua alu ese nei Kaperielu, ma ua sauni Maria e asiasi atu iā Elisapeta, lea o loo nonofo ma lana tane o Sakaria e latalata i Ierusalema, i atumauga o Iutaia. E tusa e tolu i le fā aso e malaga ai mai i le fale o Maria i Nasareta, e agaʻi atu i le fale o Elisapeta ma Sakaria.

Ua taunuu Maria i le fale o Sakaria, ma ua feiloaʻi atu i lona tauaiga o Elisapeta. O le taimi lava lea ua faatumulia ai Elisapeta i le agaga paia, ma ua ia faapea atu iā Maria: “Amuia oe i fafine, amuia foʻi lē o le a fanau mai iā te oe! Ua faapefea ona ou maua lenei faamanuiaga, ina ua asiasi mai le tinā o loʻu Alii iā te aʻu? Auā faauta foʻi! ina ua ou faalogo atu i lou leo, ona osooso ai lea ma le olioli o le pepe o loo i loʻu manava.”—Luka 1:42-44.

Ae ua tali mai Maria ma le lotofaafetai: “Ou te vivii atu iā Ieova, ma ua tumu loʻu loto i le olioli i le Atua loʻu Faaola; auā ua ia silasila mai i le tulaga faatauvaa o lana teine pologa. Faauta! e amata atu nei ona faaamuia mai o tupulaga uma iā te aʻu; auā ua faia e Lē e sili ona malosi o galuega tetele mo aʻu.” Ia mātau mai, e ui i le alofateleina o Maria, ae ua ia avatu uma le viiga i le Atua e ala i le faapea atu: “E paia lona suafa. E alofa mutimutivale o ia i ē e matataʻu iā te ia mai i lea tupulaga ma lea tupulaga.”—Luka 1:46-50.

Ua faaauau ona vivii atu Maria i le Atua e ala i upu faavaloaga nei: “Ua ia faia galuega mamana i lona aao, ua faataapeapeina i latou o ē e faamaualuluga o latou loto. E lafoina e ia i lalo tagata malolosi mai nofoālii, ae e faaeaina o ē e faatauvaa; ua ia faamaoona i mea lelei o ē ua fia aai, ma ua ia aauina ese atu le ʻaumauʻoa e aunoa ma ni mea. Ua ia fesoasoani atu i lana auauna o Isaraelu, ina ia manatua ai e ia lona alofa mutimutivale e faavavau e pei ona ia fetalai atu ai i o tatou augātamā, iā Aperaamo ma i lana fanau.”—Luka 1:51-55.

Ua pe ā ma le tolu nei masina o nofo pea Maria i le fale o Elisapeta, e avea ma fesoasoani i vaiaso mulimuli o le maʻitaga o Elisapeta. O se mea lelei le nonofo faatasi o nei fafine faamaoni e toʻalua, o loo tauaveina ni tamaiti faatasi ma le fesoasoani a le Atua.

Ia mātau mai, na faamamaluina Iesu a o leʻi fanau mai o ia. Na taʻua e Elisapeta o ia o “loʻu Alii,” ma na ʻosooso ma le olioli’ le pepe o loo i lona manava i le uluaʻi taimi na asiasi atu ai Maria. Ae e lē o le auala lenā o le a feutagaʻi ai isi tagata ma Maria ma lana pepe e leʻi fanau mai, i se taimi mulimuli ane.