Fesili Mai le Au Faitau

Pe na maʻito Maria, lea na avea ma tinā o Iesu, i le taimi na asiasi atu ai i lona tauaiga o Elisapeta?

Ioe, e foliga mai o le tulaga lena na i ai o ia.

I le mataupu muamua o le Luka, o loo tatou faitau muamua ai i le maʻito o Elisapeta, le avā a le ositaulaga o Sakaria, o lē na fanaua mai Ioane (le Papatiso). I le “ono o masina” o le maʻito o Elisapeta, na asiasi atu ai ‘le agelu o Kaperielu’ ia Maria ina ia taʻu atu ia te ia e faapea, o le a maʻito o ia ma na te fanaua mai le “Alo o le Silisili ese.” (Luka 1:26, 30-33) A e o anafea na maʻito ai Maria?

Ua faaauau mai le faamatalaga a Luka e faapea, ona faimalaga atu ai lea o Maria i Iuta e asiasi i lona tauaiga o loo maʻito, o Elisapeta. Ina ua feiloai fafine e toalua, ona osooso ai lea o le tamameamea (o Ioane) o loo i le manava o Elisapeta. Sa faasino atu Elisapeta i ‘lē a fanau mai ia Maria,’ ma ia taʻua ai Maria o “le tinā o loʻu Alii.” (Luka 1:39-44) O le faaiuga fetaui lava la e faapea, ua uma ona afuafua le maʻi o Maria, ma maʻito o ia i le taimi lea na alu atu ai e vaai Elisapeta.

Ua faitauina faapea le Luka 1:56: “Ua nofo Maria ma ia, pe tolu masina, ona foi ai lea o ia i lona aiga.” E lē o aumaia e lenei fuaiupu se faatatauga saʻo aʻiaʻi i se aso tonu lava o le kalena. Ua faapea mai, “pe tolu masina” lea ua mafai ai ona oo atu le maʻito o Elisapeta i le iva o masina.

Ina ua maeʻa lana fesoasoani atu ia Elisapeta i le taimi a o latalata ina o le a fanau Elisapeta, ona toe foi ai lea o Maria i lona aiga i Nasareta. E foliga mai na iloa e Maria, e oo loa i le taimi e fanaua ai e Elisapeta (ia Ioane), atonu o le a toatele ni tagata e asiasi ane, o nisi lava atonu o ni tauaiga. O se tulaga faalemanuia la pe faalumaina ai foi, mo se tamaitai talavou e leʻi faaipoipo e pei o ia, a e o lea e maʻito. O le ā la le umi talu ona maʻito Maria a e toe foi loa i Nasareta? Talu ai o lea sa nonofo faatasi ma Elisapeta i le “pe tolu masina,” atonu la po o le faaiuiuga o le lona tolu o masina po o le amatamataga foi o le lona fa o masina o le maʻito o Maria, na toe foi atu ai o ia i Nasareta.