Ua Avatu e Iesu Fautuaga Tāua i le ʻAuaposetolo

Ua faatoʻā māeʻa ona avatu e Iesu se faataʻitaʻiga i le uiga e tatau ona faaalia e ona soo. E tatau ona pei i latou o tamaiti, e leai ni o latou tulaga maualuluga pe taʻutaʻua foʻi. E tatau i le ʻausoo ona ʻtalia nei tamaiti ona o le igoa o Iesu,’ o le faia faapea, ʻua latou taliaina ai foʻi o ia.’—Mataio 18:5.

Sa fefinauaʻi le ʻauaposetolo po o ai o i latou e sili. O lea, e latou te ono manatu i fetalaiga a Iesu o se aʻoaʻiga. Ua faamatala atu e Ioane se mea na tupu: “Na matou vāai i le tasi tagata ua ia tutuli temoni i lou suafa, ma na matou taumafai e taofia o ia, auā e lē o ʻau o ia faatasi ma i tatou.”—Luka 9:49.

Pe e manatu Ioane ua na o le ʻauaposetolo e iai le faatagaga e faamālōlō ai isi, pe e tuliesea ai foʻi temoni? Pe afai o lea, aiseā la ua mafai ai e lenei tamāloa Iutaia ona tuliesea agaga leaga? E foliga mai i le manatu o Ioane, e lē tatau ona faia e lenei tagata galuega mamana, auā e latou te lē o malaga faatasi.

Peitaʻi, ua faateʻia Ioane i le fetalai atu o Iesu: “Aua tou te taofia o ia, auā e leai se tasi e faia se galuega mamana i loʻu igoa, e mafai ona vave faia ni upuleaga iā te aʻu; auā o sē e lē tetee mai iā i tatou, ua ʻau ma i tatou. Auā o sē na te avatu se ipu vai tou te inu ai ona o outou o soo o Keriso, E moni ou te fai atu iā te outou, e maua lava lona taui.”—Mareko 9:39-41.

E lē manaʻomia i lenei taimi ona malaga faatasi lenei tamāloa ma Iesu ina ia ʻau ai ma ia. E leʻi oo i le taimi e amata ai le faapotopotoga Kerisiano. O lea, e tusa pe e lē o faimalaga faatasi lenei tamāloa ma Iesu, ae e lē faapea ai ua ia tetee atu iā te ia pe faalauiloa foʻi se tapuaʻiga sesē. E faatuatua o ia i le suafa o Iesu, ma ua faailoa mai i upu a Iesu e maua lava le taui o lenei tamāloa.

Peitaʻi, o se mea matuiā pe afai e tausuai le tamāloa ona o faamatalaga ma gaoioiga a le ʻauaposetolo. Ua fetalai atu Iesu: “O se tagata e na te faatausuai i se tasi o i latou nei e faatauvaa ua talitonu, e lelei pe a nonoa se maa olo e toso e asini i lona ua, ma lafo o ia i le sami.” (Mareko 9:42) Ua faapea atu Iesu i ona soo, pe afai e tausuai se tasi ona o lona lima, lona vae, po o lona mata, e tatau la ona tipiesea. E sili atu ona lelei le tipiesea o nei vaega tāua ma ulu atu i le Malo o le Atua, nai lo o le taofimau i ai ma lafoina ai le tagata i Kena (vanu o Hinoma). Atonu ua vāai le ʻauaposetolo i lenei vanu e susunu ai otaota lea e lata i Ierusalema, ma ua latou malamalama ai o loo faaatagia ai le faaumatiaga e faavavau.

Ua lapataʻi atu foʻi Iesu: “Vaai lelei ia aua neʻi o outou ʻinoʻino i se tasi o i latou nei e faatauvaa, auā ou te fai atu iā te outou o loo vaavaai atu pea a latou agelu i le lagi, i fofoga o loʻu Tamā o i le lagi.” O le ā le tāua “o i latou nei e faatauvaa” i lona Tamā? Ua faamatala e Iesu se tamāloa e iai ana mamoe e 100, ae ua leiloa le tasi. Ua ia tuua mamoe e 99, ae alu atu e saʻili lenei mamoe e tasi. Ina ua ia maua lenei mamoe, ua sili atu ona olioli o ia ona o lea mamoe, nai lo o isi mamoe e 99 o loo iai. Ua toe fetalai atu Iesu: ʻE lē finagalo foʻi loʻu Tamā o i le lagi e faaumatia se tasi o i latou nei e faatauvaa.’—Mataio 18:10, 14.

Atonu ua toe mafaufau Iesu i le fefinauaʻiga a ona aposetolo po o ai o i latou e sili. O lea, ua ʻaiʻoi atu ai o ia: “Ia iā te outou le masima, ma ia faatupu le filemu i le va o le tasi ma le isi.” (Mareko 9:50) E sili atu ona manaia i le taumafa se meaʻai pe a faamasima. E faapena foʻi pe a faaaogā le masima faafaatusa. O le a faigofie ai i isi ona talia faamatalaga e fai atu, ma faatumauina ai pea le filemu, lea e lē mafai ona maua pe a fefinauaʻi pea.—Kolose 4:6.

E iai taimi e tulaʻi mai ai faafitauli matuiā, ma ua fetalai Iesu i le auala e taulimaina ai na faafitauli: “Afai ua faia e sou uso se agasala, ia e alu lua te talanoa na o oulua e faaali i ai lana mea sesē. A faalogo o ia, ua e maua la lou uso.” Ae faapefea pe afai e lē faalogo o ia? Ua fautua atu Iesu: “Ia lua ō ma se toʻatasi po o se toʻalua, ina ia faamaonia ai mataupu uma i le molimau a le toʻalua po o le toʻatolu.” Pe afai e lē foʻia ai i inā le faafitauli, e tatau iā i latou sa taumafai e faia se faaleleiga ona talanoa atu loa i “le faapotopotoga,” po o toeaina e latou te taulimaina le mataupu. Ae afai lava e lē faalogo le tagata agasala, “ona e vaai lea iā te ia e pei o se tagata o nuu ese ma se aolafoga.” E lē faifaimea faatasi tagata Iutaia ma tagata faapena.—Mataio 18:15-17.

E tatau i toeaina o le faapotopotoga ona utagia le Afioga a le Atua. Pe a faamaonia ua faia e se tasi se agasala ma e manaʻomia ona avatu i ai se aʻoaʻiga, “ua uma ona fusifusia i le lagi” lo latou faamasinoga. Ae afai e faamaonia e leʻi faia e se tasi se agasala, ua uma la ona “tatalaina i le lagi.” O le a aogā nei taʻiala pe a amata le faapotopotoga Kerisiano. E tusa ai ma iloiloga tāua faapena, ua fetalai Iesu: “A faapotopoto ai se toʻalua po o se toʻatolu i loʻu igoa, ou te iai faatasi ma i latou.”—Mataio 18:18-20.