Lagolagoina o Galuega o le Malo i Lou Lava Atunuu ma le Lalolagi Aoao

I LE faataunuuina o le valoaga a Iesu e faatatau i aso e gata ai, ua talaʻia ai e Molimau a Ieova le tala lelei i “tuluʻiga uma o le lalolagi.” (Galu. 1:8; Mata. 24:14) Ina ia faia faapea, ua tauofo atu ai lo latou taimi ma le malosi i le faasoaina atu o mea faaleagaga. O lo latou maufaatuatuaina o Ieova e na te saunia mai mea mo ē galulue faatasi ma ia, ua faaauau ai pea ona latou faamuamua manaʻoga o le Malo o le Atua. (Mata. 6:25-34; 1 Kori. 3:5-9) O iʻuga ua oo i ai, o faailoga manino na o le iai o le finagalo malie ma faamanuiaga a Ieova.

TAUSIA O MANAʻOGA O LE MALO I LE LALOLAGI AOAO

² Pe a mātauina e isi le auala o loo tatou tufatufaina atu ai Tusi Paia ma lomiga faale-Tusi Paia i le lautele e aunoa ma se tau, e latou te fesili: “E faapefea ona faia nei mea uma?” O le mea moni, e tele tupe e faaalu i le saunia ma le lomiaina o Tusi Paia ma lomiga faale-Tusi Paia. E faaaluina foʻi le tele o tupe mo le fausiaina ma le tausia o maota Peteli mo faifeʻau talaʻi o loo faafoeina masini lomitusi, vaavaaia le galuega talaʻi, ma auauna i isi vala ina ia lagolagoina ai le talaʻia o le tala lelei. E saunia foʻi le fesoasoani faaletino mo ovasia o le matagaluega, o misionare o loo galulue i le fanua, paeonia faapito, ma isi o loo i le auaunaga faapitoa faataimi atoa ina ia faaauau ai pea i o latou faaeaga. Ua manino mai la, o le galuega o le talaʻia o le tala lelei i aso nei e tusa pe i se atunuu po o le lalolagi aoao, e faaaluina ai le tele o tupe. O fea e maua mai ai nei tupe?

³ O le toʻatele o ē e talisapaia le galuega tauaʻoaʻoga faale-Tusi Paia a Molimau a Ieova, e fiafia e faia ni tauofo mo le galuega i le lalolagi aoao. Peitaʻi, o le auala autū o loo faatupe ai la tatou galuega, o le lagolagosua a Molimau lava latou. O nisi o i latou e auina atu a latou meaalofa tauofo i ofisa o lālā a Molimau a Ieova. E faaalia e i latou uma le lotomalie e pei o auauna a le Atua anamua, o ē na faaalia le limafoaʻi i le fausiaina o maota mo le tapuaʻiga iā Ieova. (Eso. 35:20-29; 1 No. 29:9) O nisi o meaalofa e maua mai i uili, a o isi e maua mai i tagata taʻitoʻatasi, faapotopotoga, ma matagaluega ma e masani ona auina atu i ni aofaʻiga lāiti. Pe a tuufaatasi nei meaalofa, e maua ai tupe e faaauau ai le faiva.

⁴ E manatu Molimau a Ieova o se matuā faaeaga le faaaogāina o a latou tupe ma alāmanuia, e lagolagoina ai le galuega talaʻi. Na iai se pusa tupe na faaaogā e Iesu ma ona soo e tuu ai tupe na maua mai i meaalofa tauofo, auā le totogiina o a latou tupe faaalu. (Ioa. 13:29) Ua taʻua i le Tusi Paia ni fafine na fesoasoani atu iā Iesu ma ona soo. (Mare. 15:40, 41; Luka 8:3) Na talia ma le lotofaafetai e Paulo le fesoasoani faaletino na saunia ma le alofa e isi, o ē na naunau e faaauilumaina le tala lelei, ma mananaʻo e faia se sao i lana faiva. (Fili. 4:14-16; 1 Tesa. 2:9) O loo faaauau ona mulimuli Molimau a Ieova i nei faaaʻoaʻoga anamua o le maelega i le auaunaga ma le limafoaʻi. O le faia faapea, ua mafai ai ona “ave fua le vai o le ola” i tagata lotofaamaoni i so o se mea.​—Faaa. 22:17.

TAUSIAINA O MANAʻOGA O LE FAAPOTOPOTOGA

⁵ O tupe faaalu a le faapotopotoga, e faatupeina foʻi e ala i meaalofa tauofo. E leai ni peleti e aoina po o ni aofaʻiga patino o tupe e tatau ona totogi e tagata, ma e leai foʻi ni suʻegātupe. E iai pusa mo meaalofa i nofoaga e fai ai sauniga, lea e mafai ai e so o se tasi ona faia se sao, e foaʻi atu “e tusa ma le mea ua filifili i lona loto.”​—2 Kori. 9:7.

⁶ O tupe e maua mai i meaalofa tauofo, e muamua ona faaaogā i mea e manaʻomia mo le faaaogāina ma le faatumauina o le lelei o le Maota mo Sauniga. E ono filifili le ʻautoeaina e auina atu se vaegātupe mai nei foaʻi i le ofisa o le lālā a Molimau a Ieova mo lea vaipanoa, e faaaogā mo le faaauilumaina o le galuega i le lalolagi aoao. Pe afai o lea, e tatau ona faia se iʻugāfono ia talia e le faapotopotoga. I lea auala, ua faia ai pea e lē aunoa e le tele o faapotopotoga meaalofa tauofo mo le galuega i le lalolagi aoao. Pe a mataʻalia tagata uma i mea e manaʻomia e le faapotopotoga mai i lea taimi i lea taimi, e tau lē manaʻomia la ona faamanatu pea i le faapotopotoga e faatatau i meaalofa tauofo.

TAULIMAINA O MEAALOFA FOAʻI

⁷ E toʻalua ni uso e la te aoina mai ma faamau le aofaʻi o tupe mai i pusa o meaalofa, pe a māeʻa sauniga uma. (2 Tu. 12:9, 10; 2 Kori. 8:20) E faia e le ʻautoeaina ni fuafuaga talafeagai mo le vaaia lelei o tupe, seʻia oo i le taimi e auina atu ai i le ofisa o le lālā pe faaaogā foʻi mo mea e manaʻomia e le faapotopotoga. E faia e le uso o loo gafa ma tupe a le faapotopotoga se tala o le tupe i masina taʻitasi mo le silafia e le faapotopotoga. E taʻitolu masina ma faatulaga e le sooupu a le ʻautoeaina, le suʻeina o tusi mo tupe a le faapotopotoga.

TUPE FAAALU A LE MATAGALUEGA

⁸ O tupe e faaalu mo fonotaga ma isi tupe faaalu a le matagaluega, e mafai ona totogi e ala i meaalofa tauofo a Molimau o loo iai i lenā matagaluega. E faatulaga ni pusa mo meaalofa tauofo i nofoaga o loo faia ai fonotaga, ina ia mafai ai ona faia ni meaalofa tauofo mo le matagaluega. E ono mafai foʻi ona faia ni foaʻi a faapotopotoga i nisi taimi e fesoasoani i tupe faaalu a le matagaluega.

⁹ E lelei pe afai e mafai ona totogi uma tupe faaalu a le matagaluega i meaalofa tauofo e maua mai ai, ona foaʻi lea o ni tupe totoe mo le galuega i le lalolagi aoao. Pe afai e lē lava le tupe o loo i le tusitupe a le matagaluega e totogi ai nei tupe faaalu o le fonotaga, po o tupe faaalu mo tapenaga mo se isi fonotaga e sosoo ai, e pei o tupe e totogi e taofi ai se maota, e ono fautuaina e le ovasia o le matagaluega ina ia logo faapotopotoga e faailoa i ai lo latou faaeaga e faia ai ni meaalofa tauofo. O le a talanoaina e ʻautoeaina o faapotopotoga taʻitasi lenei mataupu, ma iloilo pe fia se meaalofa e mafai ona tuuina atu e le faapotopotoga mo le matagaluega. Ona latou tuuina atu lea o se iʻugāfono i le faapotopotoga e tusa ai ma lea mataupu.

¹⁰ Pe a tulaʻi ni faafitauli tau tupe, e manaʻomia ona uaʻi totoʻa iai toeaina o le matagaluega ma o le a faia se latou fono i le aso o le fonotaga matagaluega. O faaiʻuga uma mo tupe faaalu e ese mai i tupe faaalu ua filifilia e le matagaluega, e tatau ona faia ai ni iʻugāfono e talia e toeaina. O nei iʻugāfono e tatau ona tusia ai le aofaʻiga tonu o tupe ma faatū atu mo se faamaoniga i so o se taimi e faaaogā ai le tupe a le matagaluega.

¹¹ E faia se faatulagaga mo le suʻeina o tusi mo tupe a le matagaluega.

TAUSIAINA O Ē MATITIVA

¹² O se tasi o fuafuaga o le pusa tupe na iai iā Iesu ma ona soo, o le faia ai lea o ni fesoasoani mo ē matitiva. (Mare. 14:3-5; Ioa. 13:29) O loo faaauau mai pea lenā tiute tauave faa-Kerisiano auā na fetalai Iesu: “Tou te faatasi pea ma tagata matitiva.” (Mare. 14:7) E faapefea ona faatino e Molimau a Ieova lenei tiute tauave i aso nei?

¹³ I nisi taimi, e ono manaʻomia e ē faamaoni i le faapotopotoga se fesoasoani faaletino ona ua afu lo latou soifua, lē atoatoa le malosi o le tino po o nisi foʻi tulaga faigatā e lē maʻalofia. Atonu o le a gaoioi o latou aiga, tauaiga, ma nisi ua iloa lenei manaʻoga ina ia avatu se fesoasoani. E ōgatusa lea ma upu a le aposetolo o Ioane: “O sē ua tele ana meafaitino i lenei lalolagi ma ua vaai atu i lona uso ua lē tagolima o ia, a ua lē faaalia e ia le alofa faapelepele iā te ia, pe faapefea la ona tumau iā te ia le alofa o le Atua? Le fanau e, aua neʻi o tatou alolofa tau o le upu ma le gutu, ae e ala foʻi i gaoioiga ma le faamaoni.” (1 Ioa. 3:17, 18; 2 Tesa. 3:6-12) O le tapuaʻiga moni, e aofia ai le tausia o ē faamaoni i le faapotopotoga e ono manaʻomia se fesoasoani faaletino.​—Iako. 1:27; 2:14-17.

¹⁴ I lana uluaʻi tusi iā Timoteo, na faamatala ai e Paulo le auala e ono avatu ai le fesoasoani faaletino i ē ua tatau i ai. E mafai ona e faitau i lenei fautuaga i le 1 Timoteo 5:3-21. O tiute tauave autū a Kerisiano taʻitoʻatasi, o le tausia lea o manaʻoga o lona lava aiga. O ē ua matutua pe lē atoatoa le malosi, e tatau ona maua le fesoasoani mai i a latou fanau, o fanau a ā latou fanau po o isi tauaiga vavalalata. I nisi taimi, e maua ai le fesoasoani faaletino mai i faalapotopotoga a le malo po o faalapotopotoga a tagata lautele. E mafai ona fesoasoani tauaiga ma isi iā i latou ina ia faia talosaga mo na fesoasoani. E ono tulaʻi mai nisi o tulaga atonu e manaʻomia ai mo le faapotopotoga atoa, ona manatunatu i le saunia o fesoasoani mo ni uso ma tuafāfine o loo manaʻomia le fesoasoani, o ē ua loa ona tumau faamaoni i le auaunaga. Pe afai e leai ni tagata o o latou aiga po o tauaiga e fesoasoani iā i latou, ma e lē lava foʻi fesoasoani mai i le malo, e mafai e le ʻautoeaina ona saunia ni fautuaga talafeagai i le auala e avatu ai ni fesoasoani. E manatu Kerisiano, o se faaeaga le faasafua atu o a latou meafaitino iā i latou nei o loo manaʻomia le fesoasoani.

¹⁵ E toʻatele uso ma tuafāfine atonu ua iai ni manaʻoga ona o sauāga, taua, mafuiʻe, lologa, oge po o isi faalavelave mataʻutia o loo taatele i nei aso faigatā. (Mata. 24:7-9) I tulaga faapena, e ono lē gafatia e faapotopotoga i na vaipanoa ni mea e fesoasoani atu ai. O lea, ua faamaopoopoina ai e le Vaega Pule taumafaiga a uso i isi vaipanoa po o isi atunuu, ina ia saunia ai mea e manaʻomia. E talitutusa lenā ma le auala na saunia ai e Kerisiano i Asia Itiiti taumafa mo uso i Iutaia i le taimi o le oge. (1 Kori. 16:1-4; 2 Kori. 9:1-5) E ala i le mulimuli i la latou faaaʻoaʻoga, ua faamaonia atu ai le alofa mo o tatou uso ma faaalia atu ai o i tatou moni lava o soo o Iesu Keriso.​—Ioa. 13:35.

TUFAINA ATU O LOMIGA

¹⁶ O Tusi Paia ma lomiga faale-Tusi Paia, e telē se sao i le faalauiloaina atu o le feʻau o le Malo. E masani lava e tofia e le ʻautoeaina se auauna o le faiva e na te vaaia lomiga. E tatau i uso o loo gafa ma le faasoasoaina o nei lomiga ona manatu mamafa i o latou tiute tauave. E latou te faia faamaumauga, ina ia faamautinoa ai o loo lava pea lomiga o loo iai mo le faaaogāina e le faapotopotoga.

¹⁷ I le avea ai o ni Kerisiano tuuina atu, ua tatou iloa ai o o tatou taimi, tomai, agavaa, meafaitino e oo lava foʻi i o tatou ola o ni meaalofa mai i le Atua, mo le fuafuaga e faaaogā mo le auaunaga iā te ia. (Luka 17:10; 1 Kori. 4:7) E ala i le faaaogāina tatau o a tatou alāmanuia ma tomai uma, ua faaalia atu ai le loloto o lo tatou alofa mo Ieova. O lo tatou faanaunauga ia faamamaluina Ieova i a tatou ʻoa, i le iloaina o loo ia finagalo malie i so o se meaalofa e tatou te ofoina atu, e faaalia ai o loo tatou tuutoina atu iā te ia ma le lotoatoa. (Faata. 3:9; Mare. 14:3-9; Luka 21:1-4; Kolo. 3:23, 24) Na fetalai Iesu: “Ia outou avatu fua, auā ua outou maua fua.” (Mata. 10:8) A o tatou ofoina atu i tatou lava faapea ma a tatou alāmanuia ma tomai uma mo le auaunaga iā Ieova, o le a tatou maua ai le fiafiaga sili.​—Galu. 20:35.