Faatumauina o le Filemu ma le Mamā o le Faapotopotoga

I TAUSAGA taʻitasi, e faitau afe tagata e lolofi mai i le fale o Ieova mo le tapuaʻiga mamā, ma ua faataunuuina ai le valoaga o le Tusi Paia. (Mika 4:1, 2) Maʻeu lo tatou fiafia e talia i latou i totonu o “le faapotopotoga a le Atua”! (Galu. 20:28) Ua latou talisapaia le avanoa e tatou te auauna faatasi ai iā Ieova, ma maua se siʻomaga e mamā ma filemu i lo tatou parataiso faaleagaga. O le agaga paia o le Atua faapea fautuaga atamai o loo i lana Afioga, ua fesoasoani iā i tatou ina ia faatumauina ai le filemu ma le mamā o le faapotopotoga.—​Sala. 119:105; Saka. 4:6.

² E ala i le faatatauina o mataupu silisili o le Tusi Paia, ua tatou oofu ai i “le tagata fou.” (Kolo. 3:10) E tatou te lē amanaʻia ni feeseeseaʻiga lāiti ma mea e eseese ai o tatou manatu. O le vaai i mea e pei o le auala o loo silasila mai ai Ieova, o le a tatou ʻalofia ai uiga fevaevaeaʻi o le lalolagi, ma galulue autasi ai ma lo tatou ʻauuso i le lalolagi aoao.​—Galu. 10:34, 35.

³ E ui i lea, e iai lava faafitauli e tulaʻi mai i lea taimi ma lea taimi e aafia ai le filemu ma le autasi o le faapotopotoga. O le ā le māfuaaga? O le tele o taimi, e māfua mai i le lē faatatauina o fautuaga o le Tusi Paia. O loo tatou tauivi pea ma o tatou tuʻinanauga lē lelei atoatoa faaletagata. E tatou te agasala uma lava. (1 Ioa. 1:10) E ono uia e se isi se laasaga sesē e mafai ona pisipisia ai le tulaga mamā faaleagaga ma tau amio o le faapotopotoga. E tatou te ono faia i nisi taimi ni tala po o ni gaoioiga e faatigā ai i isi. Pe atonu foʻi e tatou te tausuai ona o se tala po o se gaoioiga na fai mai e se isi. (Roma 3:23) Pe afai e tulaʻi mai ni faafitauli faapea, o le ā e mafai ona tatou faia e faasaʻo ai le tulaga o mea?

⁴ O loo silasila mai ma le alofa Ieova i nei mea uma. O lana Afioga ua saunia mai ai taʻiala i le mea e tatau ona fai, pe a tulaʻi mai faafitauli faapea. E tatou te maua foʻi fesoasoani mai i toeaina, o ni leoleo mamoe faaleagaga alolofa. O le faatatauina o a latou fautuaga mai i le Tusi Paia, e mafai ona tatou toe maua ai ni faiā lelei ma isi i le faapotopotoga, ma faatumauina se tulaga lelei i luma o Ieova. Pe afai e tatou te maua ni faasaʻoga po o ni aʻoaʻiga ona o ni mea sesē na tatou faia, e tatou te mautinoa o lenā faasaʻoga o se faailoaga o le alofa o lo tatou Tamā i le lagi mo i tatou.​—Faata. 3:11, 12; Epe. 12:6.

FOʻIAINA O FEESEESEAʻIGA LĀITI

⁵ E iai taimi atonu e tulaʻi mai ai ni feeseeseaʻiga po o ni faafitauli lāiti i le va o tagata i totonu o le faapotopotoga. O tulaga nei e tatau ona vave foʻia i se agaga o le alofa faaleuso. (Efe. 4:26; Fili. 2:2-4; Kolo. 3:12-14) O le tele lava o taimi, o faafitauli lāiti i le lua va ma se isi uso Kerisiano, e mafai ona foʻia e ala i le faatatauina o le fautuaga a Peteru ina ia “tele le alofa o le tasi i le isi, auā o le alofa e ufiufi ai le anoanoaʻi o agasala.” (1 Pete. 4:8) Ua taʻua i le Tusi Paia: “E sesē i tatou uma i mea e tele.” (Iako. 3:2) Pe a tatou faatatauina le Tulafono Faaauro o le faia i isi o le mea e tatou te mananaʻo e latou te faia mai iā i tatou, e masani lava ona tatou foʻia ai feeseeseaʻiga lāiti e ala i le faamagalo ma faagalo.​—Mata. 6:14, 15; 7:12.

⁶ Pe a e iloa ua tigā faalogona o se isi ona o se tala po o se gaoioiga na e faia, e tatau ona e tausolomua e faia se faaleleiga ma ia e aunoa ma le faatuai. Ia manatua, o loo aafia ai foʻi le lua faiā ma Ieova. Na fautuaina e Iesu ona soo: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.” (Mata. 5:23, 24) Atonu o le tulaga ua tulaʻi mai o le lē femalamalamaaʻi. Pe afai o lea, ia lelei pea fesootaʻiga. O le lelei o fesootaʻiga i le va o tagata uma o le faapotopotoga, e telē se aogā i le ʻalofiaina o le lē femalamalamaaʻi, ma foʻia ai faafitauli e tulaʻi mai ona o le tulaga lē lelei atoatoa o le tagata.

AVATUINA O FAUTUAGA MANAʻOMIA FAALE-TUSI PAIA

⁷ E iai taimi e manaʻomia ai e ovasia ona avatu se fautuaga i se isi, ina ia faasagatonu ai lona mafaufau. E lē faigofie i taimi uma le faia o lenei mea. Na tusi atu Paulo i Kerisiano i Kalatia: “Le ʻauuso e, e ui lava ina uia e se tagata se laasaga sesē ae e na te leʻi iloaina, o outou o ē ua agavaa faaleagaga, ia taumafai e faasagatonu lenā tagata i le agaga o le agamalu.”​—Kala. 6:1.

⁸ E ala i le leoleoina o le lafu, ua mafai ai e ovasia ona puipuia le faapotopotoga mai i le tele o lamatiaga faaleagaga, ma ʻalofia ai le tulaʻi mai o ni faafitauli matuiā. O loo taumafai toeaina e faia lea auaunaga mo le faapotopotoga, e ōgatusa ma le folafolaga lenei a Ieova e ala mai iā Isaia: “E avea i latou taʻitoʻatasi ma lafitaga mai i le matagi ma se mea e malu ai mai i timuga mamafa, e pei o vaitafe i atunuu e leai ni vai, e pei foʻi o le paolo o le papa tele i le laueleele naumati.”​—Isa. 32:2.

FAAILOGAINA O I LATOU E LĒ TAUPULEA

⁹ Na lapataʻi atu Paulo e faatatau iā i latou ia e mafai ona avea ma taaʻiga e lamatia ai i totonu o le faapotopotoga e faapea: “O la matou faatonuga lenei iā te outou . . . ia ō ese mai i so o se uso e faalogogatā [e lē taupulea], e lē amioaʻi e tusa ma mataupu na outou maua mai iā i matou.” Na ia faamanino atu lenā faamatalaga ina ua ia tusi: “Afai e lē usiusitaʻi se tasi i la matou upu o loo i lenei tusi, ia faailogaina lea tagata, ma aua neʻi toe auaumea ma ia ina ia māsiasi ai o ia. Aua foʻi le manatu iā te ia o se fili, a ia apoapoaʻi atu pea iā te ia e pei o le uso.”​—2 Tesa. 3:6, 14, 15.

¹⁰ I nisi taimi, e lē o faia e se tasi se agasala matuiā lea e ono faateʻaina ai mai i le faapotopotoga, ae o loo ia faaalia le tetee ma le loto i ai i tapulaa a le Atua lea e taʻitaʻia ai Kerisiano. E aofia ai mea e pei o le matuā paiē, le matuā faitio, po o le matuā faatalalē i le tausia o le tumamā. E aofia ai foʻi sē e ʻisuisu fua i mea e leai sana feʻau i ai.’ (2 Tesa. 3:11) E ono aofia ai foʻi se tasi ua faufau leaga e faaaogā isi e maua ai ni meafaitino i ni auala faatogafiti, po o le auai i faafiafiaga e manino mai le lē talafeagai. O nei amioga lē taupulea e matuiā ma e mafai ona taʻuvalea ai le faapotopotoga, ma e ono sosolo atu ma aafia ai isi Kerisiano.

¹¹ E muamua ona taumafai toeaina e fesoasoani i lea tagata lē taupulea, e ala i le avatu i ai o ni fautuaga mai i le Tusi Paia. Peitaʻi, afai e faaauau pea ona teena e lea tagata mataupu silisili o le Tusi Paia e ui lava i apoapoaʻiga a toeaina, e ono filifili toeaina e faia se lauga lapataʻi i le faapotopotoga. E faaaogā e toeaina le faautauta pe e manaʻomia ona faia se lauga lapataʻi e fua i le matuiā o le tulaga ua tulaʻi mai, ma pe e ono afāina ai faalogona o isi i le faapotopotoga ona o amioga a lea tagata. O le a saunia e le failauga ni fautuaga talafeagai e faatatau i le gaoioiga lē taupulea, ae e lē faailoaina ai le igoa o le tagata o loo faia lea gaoioiga. O lea la, o ē ua iloa le tulaga o mea e pei ona taʻua i le lauga, o le a latou ʻalofia faatasitasiga faasamasamanoa ma lea tagata, e ui o loo faaauau pea ona auaufaatasi ma ia i faatasiga faaleagaga ma “apoapoaʻi atu pea iā te ia e pei o le uso.”

¹² E faamoemoe o le pipiimau o Kerisiano faamaoni i lea faatulagaga, o le a fesoasoani i le tagata lē taupulea e māsiasi ai i ona ala ma uunaʻia ai o ia e faia se suiga. Pe a manino mai ua lafoaʻia e lea tagata ona ala lē taupulea, e lē toe manaʻomia la ona feutagaʻi ma ia o se tagata o loo faailogaina.

FOʻIAINA O NISI MEA SESĒ MATUIĀ

¹³ O lo tatou lotomalilie e lē amanaʻia ni masei lāiti o isi ma faamagalo atu, e lē uiga atu ai faapea e tatou te lē ano i mea sesē pe lagolagoina na gaoioiga. E lē o mea sesē uma e māfua ona o lo tatou tulaga lē lelei atoatoa ua tuufaasolo mai. E lē talafeagai foʻi ona lē amanaʻiaina lea mea sesē matuiā. (Levi. 19:17; Sala. 141:5) Na faailoa mai i le feagaiga o le Tulafono e sili atu ona matuiā isi agasala nai lo o isi agasala, ma o le tulaga foʻi lenā i faatulagaga faa-Kerisiano i aso nei.​—1 Ioa. 5:16, 17.

¹⁴ Na faataatia mai e Iesu se faatulagaga maʻoti mo le foʻiaina o ni faafitauli matuiā e ono tulaʻi mai i le va o ni Kerisiano. Ia mātau nei laasaga na ia faatulaga mai: “Afai ua faia e sou uso se agasala, [1] ia e alu lua te talanoa na o oulua e faaali i ai lana mea sesē. A faalogo o ia, ua e maua la lou uso. Ae afai e lē faalogo o ia, [2] ia lua ō ma se toʻatasi po o se toʻalua, ina ia faamaonia ai mataupu uma i le molimau a le toʻalua po o le toʻatolu. Afai e lē faalogo o ia i na tagata, [3] ia talanoa atu i le faapotopotoga. Afai foʻi e lē faalogo o ia i le faapotopotoga, ona e vaai lea iā te ia e pei o se tagata o nuu ese ma se aolafoga.”​—Mata. 18:15-17.

¹⁵ Pe a fua i le talafaatusa lea na faamatalaina mulimuli ane e Iesu o loo i le Mataio 18:23-35, e foliga mai o se tasi o agasala lea e faasino i ai le Mataio 18:15-17, e aofia ai mataupu tau tupe, fanua po o meatotino e pei o le lē totogiina o aitalafu, po o ni gaoioiga taufaasesē. E aofia ai foʻi atonu o ni tala taufaaleaga lea e taʻuleagaina ai le talaaga o se tasi.

¹⁶ Pe afai ua e faamaonia ua faia e se isi i le faapotopotoga se mea sesē faapea iā te oe, aua neʻi e vave talanoa atu i toeaina e latou te taulimaina le mataupu. E pei ona fautua mai Iesu, ia talanoa muamua i le tagata lea na faia le mea sesē iā te oe. Ia taumafai e fofō le faafitauli tau lava o oulua e aunoa ma le faaaafia ai fua o isi. Ia manatua, e leʻi fetalai Iesu e ʻfaatasi ona e alu ma faaali i ai lana mea sesē.’ O lea, afai e leʻi taʻutino e le tagata lona sesē ma e leʻi talosaga e faamagalo o ia i la oulua uluaʻi talanoaga, e lelei pe a e toe talanoa iā te ia i se isi taimi mulimuli ane. Pe afai e mafai ona fofō le faafitauli i lenei auala, e mautinoa lava o le a talisapaia e lē na agasala lou lē faailoa atu i isi o lana agasala, pe faaleagaina lona talaaga lelei i totonu o le faapotopotoga. O le iʻuga, ua e “maua la lou uso.”

¹⁷ Pe afai e talia e lē na agasala lona sesē, talosaga mai mo le faamagaloga ma gaoioi e faasaʻo lona sesē, e lē manaʻomia la ona saga faaauau pea le mataupu. E ui e matuiā le agasala na fai, ae o mea sesē faapea e mafai lava ona foʻia i le va o ē o loo aafia ai.

¹⁸ Pe afai ua lē mafai ona maua lou uso e ala i lou “alu lua te talanoa na o oulua” e faaali i ai lana mea sesē, ona fai lea o le mea na taʻua e Iesu o le “ō ma se toʻatasi po o se toʻalua,” ma toe talanoa atu i lou uso. O ē tou te ō faatasi e tatau ona iai le sini o le taumafai ia maua lou uso. E sili atu ona lelei pe afai o i laʻua o ni molimau i le mea sesē na tupu. Ae afai e leai nisi na vaaitino i ai, e mafai ona e filifili e ave se toʻatasi po o se toʻalua e fai ma molimau i le talanoaga. Atonu e iai so la poto masani i mataupu faapea, ma e la te ono faamautinoa mai ai pe faamata e sesē le mea na fai pe leai. Pe afai e filifilia ni toeaina e fai ma molimau, e lē avea i laʻua ma sui o le faapotopotoga, talu ai e leʻi tofia aloaʻia i laʻua e le ʻautoeaina e fai ma molimau.

¹⁹ Pe afai lava e lē foʻia le mataupu e ui i au taumafaiga faifai pea e pei o le talanoa atu iā te ia na o oulua, ma na lua ō foʻi i ai ma se toʻatasi po o se toʻalua, ma e te manatu e lē mafai ona e faagalo lea mataupu, e tatau loa ona faailoa atu i ovasia o le faapotopotoga. Ia manatua, o le sini o ovasia o le faatumauina lea o le filemu ma le mamā o le faapotopotoga. O lou talanoa atu i toeaina, ua e tuuina atu ai le mataupu i o latou aao ma tuu atu lou faatuatuaga iā Ieova. Aua lava e te faatagaina amioga a se isi e te tautevateva ai, ma aveesea ai lou olioli i le auaunaga iā Ieova.​—Sala. 119:165.

²⁰ O le a iloiloina e leoleo mamoe o le lafu lenei mataupu. Pe afai e faamaonia mai i iloiloga na faia moni lava e le uso po o le tuafafine se agasala matuiā faasaga iā te oe, ma e lē salamō ma e lē manaʻo e fai ni taumafaiga talafeagai e toe faasaʻo le mea sesē, e ono manaʻomia i se komiti o ovasia ona faateʻaina lea tagata fai mea sesē mai i le faapotopotoga. O le faia faapea, o le a latou puipuia ai le lafu ma leoleoina ai le tulaga mamā o le faapotopotoga.​—Mata. 18:17.

TAUAAOINA O MEA SESĒ MATUIĀ

²¹ O nisi o agasala matuiā e aofia ai le faitaaga, mulilua, tauatane ma le tauafafine, liliu ese mai i le upu moni, ifo i tupua ma isi agasala matuiā faapena, e lē lava le tau ina faamagalo atu e lē na agaleagaina o lē na faia le agasala. (1 Kori. 6:9, 10; Kala. 5:19-21) Talu ai o nei agasala matuiā e lamatia ai le tulaga mamā tau amio ma le mamā faaleagaga o le faapotopotoga, e tatau la ona faailoa atu nei agasala i toeaina e latou te taulimaina. (1 Kori. 5:6; Iako. 5:14, 15) E ono talanoa atu tagata taʻitoʻatasi i toeaina e taʻutino i ai a latou lava agasala, pe faailoa atu mea sesē ua latou iloa na faia e isi. (Levi. 5:1; Iako. 5:16) Po o le ā lava le auala na muaʻi iloa ai e toeaina lipoti o mea sesē matuiā na faia e se Molimau papatiso, e muamua lava faia e ni toeaina se toʻalua se iloiloga. Pe afai ua maua ni faavae e faamautū ai le lipoti ma o loo iai faamaoniga na faia le agasala matuiā, ona tofia loa lea e le ʻautoeaina o se komiti faafaamasinoga e lē itiiti ifo ma le toʻatolu toeaina, e taulimaina le mataupu.

²² E faaalia e toeaina le mataala i le leoleomaluina o le lafu, ma puipuia i latou mai i so o se mea e lamatia ai faaleagaga. E latou te taumafai e faaaogā le Afioga a le Atua ma le uigā, e aʻoaʻi ai sē ua sesē ma toe faafoʻisia lona malosi faaleagaga. (Iuta 21-23) E ōgatusa lenei mea ma le faatonuga na tuu atu e le aposetolo o Paulo iā Timoteo: ʻOu te matuā fai atu iā te oe i luma o le Atua ma Keriso Iesu, o lē ua tofia e faamasino i ē e ola ma ē ua oti. Ia aʻoaʻi atu, ia matuā faatonu atu, ia apoapoaʻi atu ma le faapalepale ma le tomai e aʻoaʻo atu.’ (2 Timo. 4:1, 2) O le faia faapea e ono tele se taimi e alu ai, ae o se vaega lea o le galuega fitā a toeaina. E talisapaia e le faapotopotoga taumafaiga a toeaina, ma e manatu iā i latou “e tatau ona faaluaina i ai le āva.”​—1 Timo. 5:17.

²³ I tulaga uma e faamaonia ai ua nofosala se tasi, o le taumafaiga autū a ovasia, o le toe faafoʻisia lea o le tulaga lelei faaleagaga o le tagata fai mea sesē. Pe afai ua salamō moni le tagata, o le a mafai ona fesoasoani toeaina iā te ia. O lo latou avatuina o se aʻoaʻiga a lē na o ia pe avatu foʻi i luma o ē atonu na avea ma molimau i le taimi o le iloiloga faafaamasinoga, o le a aʻoaʻia ai o ia ma o le a matataʻu ai ē o iloa le mea na tupu. (2 Samu. 12:13; 1 Timo. 5:20) O mataupu uma lava e aʻoaʻia ai faafaamasinoga, e tuu atu ai foʻi ma taofiofiga. O lea auala e ono fesoasoani i le tagata fai mea sesē, ʻia faasaʻo ai ala’ mo ona vae. (Epe. 12:13) Pe a māeʻa se taimi, o le a toe aveesea ai nei taofiofiga pe a mātaulia ua toe faafoʻisia le tulaga faaleagaga o le tagata.

FAASILASILAGA O LE AʻOAʻIA

²⁴ Pe afai e manatu le komiti faafaamasinoga ua salamō le tagata, ae e foliga mai e oo ina iloa e le faapotopotoga po o tagata o le vaipanoa le mea na tupu, pe e manaʻomia foʻi ona puipuia le faapotopotoga mai i le tagata fai mea sesē lea ua salamō, o le a faia se faasilasilaga puupuu i le taimi o le Sauniga o le Faiva ma le Olaga Faa-Kerisiano. O le auala lenei e tatau ona faia ai le faasilasilaga: “Ua aʻoaʻia nei [suafa o le tagata].”

PE AFAI O LE FAAIʻUGA E FAATEʻAINA

²⁵ I nisi tulaga, atonu o lē na faia le mea sesē ua oo ina faauamaaa i ana amioga leaga, ma lē talia ai taumafaiga e fesoasoani iā te ia. Atonu e lē o lava “galuega ua tatau mo le salamō” e mātauina i le taimi o le talanoaga ma le komiti faafaamasinoga. (Galu. 26:20) O le ā le mea e tatau ona fai? I tulaga faapea, e tatau ona faateʻaina mai i le faapotopotoga lē na fai mea sesē e lē salamō, ma lē mafai ai ona ia toe faifaimea faatasi ma tagata mamā o Ieova. E faia lenei mea ina ia aveesea ai le taaʻiga leaga a lē na fai mea sesē mai i le faapotopotoga, ma leoleomalu ai le tulaga mamā tau amio ma le mamā faaleagaga o le faapotopotoga. E puipuia ai foʻi le igoa lelei o le faapotopotoga. (Teu. 21:20, 21; 22:23, 24) Ina ua iloa e le aposetolo o Paulo amioga matagā a se tasi i le faapotopotoga i Korinito, na ia timaʻi atu ai i toeaina e ʻtuuina atu lea tagata iā Satani ina ia faaolaina ai le agaga’ o le faapotopotoga. (1 Kori. 5:5, 11-13) Na lipotia mai foʻi e Paulo le faateʻaina o isi o ē na tetee i le upu moni i le uluaʻi senituri.​—1 Timo. 1:20.

²⁶ Pe afai filifili se komiti faafaamasinoga e tatau ona faateʻaina se tagata fai mea sesē e lē salamō, e tatau ona latou faailoa atu i le tagata le faaiʻuga, ma faailoa manino atu le māfuaaga po o māfuaaga faale-Tusi Paia ua faateʻaina ai o ia. Pe a faailoa atu i lē na faia le mea sesē le faaiʻuga, e faailoa foʻi iai e le komiti faafaamasinoga e mafai ona ia apiliina le faaiʻuga, pe afai e manatu e sesē le auala na faia ai le iloiloga faafaamasinoga. Pe a manaʻo o ia e apili le faaiʻuga, e tatau ona ia faia e ala i se tusi ma taʻu manino atu ai ana māfuaaga mo le apili. E fitu aso e tuu atu iā te ia e mafai ona faaoo mai ai lana apili, e amata mai i le taimi na faailoa atu ai le faaiʻuga a le komiti faafaamasinoga. Pe afai e faaoo mai se apili, e tatau i le ʻautoeaina ona faafesootaʻi le ovasia o le matagaluega. O ia o le a filifilia ni toeaina e agavaa e auauna i se komiti apili e toe iloiloina le mataupu. O le a latou faia taumafaiga uma ina ia iloiloina le apili i totonu o le vaiaso e tasi talu ona faaoo mai le tusi. Pe afai e apili e le tagata le faaiʻuga, o le a taofi le faia o le faasilasilaga mo le faateʻaina. I lea lava taimi, o le a taofia le tagata ua molia mai i le faia o ni tali pe tatalo i sauniga, po o le faatinoina foʻi o ni faaeaga faapitoa i le auaunaga.

²⁷ O se gaoioiga agalelei le faalogo i le apili a lē ua molia, ma mafai ai ona toe faalogologo atu i ona manatu. Ae afai e loto i ai le tagata fai mea sesē e lē auai mai i le taimi e talanoaina ai lana apili, o le a faasilasila le faateʻaina pe a uma ni taumafaiga talafeagai e faafesootaʻi ai o ia.

²⁸ Pe afai e lē manaʻo le tagata fai mea sesē e apili le faaiʻuga, e tatau i le komiti faafaamasinoga ona faamalamalama iā te ia le manaʻoga mo le salamō, ma laasaga e mafai ona ia uia ina ia toe faaaʻe mai ai i se taimi mulimuli ane. O se gaoioiga aogā ma agalelei le faia faapea. E tatau ona faia faapea ma le faamoemoe o le a suia ala o le tagata, ma i se taimi o le a toe agavaa ai o ia e foʻi mai i le faalapotopotoga a Ieova.​—2 Kori. 2:6, 7.

FAASILASILAGA O LE FAATEʻAINA

²⁹ Pe afai ua tatau ona faateʻaina mai i le faapotopotoga se tagata fai mea sesē e lē salamō, e faia se faasilasilaga puupuu e faapea: “Ua lē toe avea nei [suafa o le tagata] o se Molimau a Ieova.” O le faia faapea, ua faailoa atu ai i tagata faamaoni o le faapotopotoga, e aua le toe faifaimea faatasi ma lenā tagata.​—1 Kori. 5:11.

VAVAE ESE

³⁰ O le faaupuga “vavae ese” e faasino atu i le gaoioiga e faia e se Molimau papatiso, ua ia lafoaʻia ma le loto i ai lona tulaga faa-Kerisiano e ala i le faailoa mai ua lē o toe manaʻo e taʻua o ia, pe avea o ia o se tasi o Molimau a Ieova. Pe atonu foʻi e na te lafoaʻia ma le loto i ai lona tulaga i le faapotopotoga Kerisiano e ala i ana gaoioiga, e pei o le avea ma vaega o se faalapotopotoga o o latou sini e feteenaʻi ma aʻoaʻoga a le Tusi Paia, lea o le a faamasinoina e Ieova le Atua.​—Isa. 2:4; Faaa. 19:17-21.

³¹ Na tusi le aposetolo o Ioane e faatatau i ē na lafoaʻia lo latou faatuatuaga faa-Kerisiano i ona aso: “Na latou ō ese mai iā i tatou, auā e lē o i latou o ni o tatou tagata; auā ana o i latou o ni o tatou tagata, semanū e faatasi pea ma i tatou.”​—1 Ioa. 2:19.

³² Pe a vavae ese e se tagata ia lava, e matuā eseese lava lona tulaga i le silafaga a Ieova ma le tulaga o se Kerisiano ua lē o toe talaʻi, lea e lē o toe faia sona sao i le faiva i le fanua. E ono avea se tasi ma sē ua lē o toe talaʻi, ona ua lē taulau ona ia suʻesuʻeina e lē aunoa le Tusi Paia. Pe atonu foʻi ua mou atu lona maelega i le auaunaga iā Ieova, ona o ni ona lava faafitauli po o ni sauāga o loo ia fesagaʻia. O le a faaauau pea ona avatu e toeaina ma isi i le faapotopotoga le fesoasoani faaleagaga talafeagai i se Kerisiano ua lē o toe talaʻi.​—Roma 15:1; 1 Tesa. 5:14; Epe. 12:12.

³³ Peitaʻi, pe afai e filifili se Kerisiano e vavae ese o ia lava, e tatau ona faia se faasilasilaga puupuu e faailoa ai i le faapotopotoga e faapea: “Ua lē o toe avea nei [suafa o le tagata] ma Molimau a Ieova.” Ua tatau loa ona feutagaʻi ma lenā tagata e pei o le auala e feutagaʻi ai ma se tagata ua faateʻaina.

TOE FAAAʻE MAI

³⁴ E mafai ona toe faaaʻe mai se tagata faateʻaina po o se tasi na ia vavae ese o ia lava mai i le faapotopotoga, pe a ia faamaonia manino mai lona salamō, ma ua lava se taimi ua faaalia ai ua ia lafoaʻia ona ala agasala. Ua ia faaalia lona naunau ina ia maua se faiā lelei ma Ieova. E faaeteete toeaina ina ia lava se taimi, o ni masina se tele, se tausaga pe sili atu foʻi e fuafua lava i le tulaga o mea, e faamaonia ai e le tagata le moni o lona salamō. Pe a maua e le ʻautoeaina se tusi talosaga mo le toe faaaʻe mai, o le a talanoa le komiti faaaʻe ma le tagata faateʻaina. O le a iloiloina e le komiti faamaoniga o “galuega ua tatau mo le salamō” ua faia e le tagata, ma filifili pe e tatau ona toe faaaʻe mai o ia i lea taimi pe leai.​—Galu. 26:20.

³⁵ Pe afai o le tagata lea e talosagaina e toe faaaʻe mai na faateʻaina i se isi faapotopotoga, e mafai ona feiloaʻi le tagata ma le komiti faaaʻe a le faapotopotoga o loo iai i le taimi nei, ina ia iloilo lana talosaga. Pe a manatu sui o le komiti faaaʻe o le faapotopotoga lea ua iai le tagata e toe faaaʻe mai, ona faailoa atu lea i toeaina o le faapotopotoga sa taulimaina muamua le mataupu. O le a galulue faatasi nei komiti ina ia faamautinoa ua maua faamatalaga uma e tatau ona iloa, ina ia mafai ai ona faia se faaiʻuga tonu. Peitaʻi, o le filifiliga mo le toe faaaʻe mai o se tasi, e faia lea e le komiti faaaʻe o le faapotopotoga na taulimaina muamua le mataupu.

FAASILASILAGA O LE TOE FAAAʻE MAI

³⁶ Pe afai ua mautinoa e le komiti faaaʻe ua salamō moni le tagata na faateʻaina po o le tagata na vavae ese mai ua tatau ona toe faaaʻe mai, o le a faia se faasilasilaga o le toe faaaʻe mai i le faapotopotoga na taulimaina muamua le mataupu. Pe afai ua auai le tagata i se isi faapotopotoga, o le a faia foʻi le faasilasilaga i lenā faapotopotoga. E tatau ona faia faapea le faasilasilaga: “Ua toe faaaʻe mai nei [suafa o le tagata] e avea o se tasi o Molimau a Ieova.”

MATAUPU E AOFIA AI FANAU LĀITI E TUSA AI MA LE TULAFONO UA PAPATISO

³⁷ O mea sesē matuiā e faia e le fanau lāiti ua papatiso, e tatau ona lipoti atu i toeaina. Pe a tauaaoina e toeaina agasala matuiā ua aafia ai se isi o le fanau lāiti ua papatiso, o se mea lelei pe afai e iai ma mātua ua uma ona papatiso o le tagata talavou. E latou te mananaʻo e felagolagomaʻi ma le komiti faafaamasinoga, ae e lē o le taumafai e puipuia le talavou mai i aʻoaʻiga ua tatau i ai. E pei lava ona feagai ai ma tagata matutua fai mea sesē, o le a faapena foʻi ona taumafai le komiti faafaamasinoga e aʻoaʻi ma toe faasagatonu lea tagata talavou ua fai mea sesē. Ae afai e lē salamō lea talavou, o le a faateʻaina loa o ia.

PE A FAIA E LE TAGATA TALAʻI E LEʻI PAPATISOINA SE MEA SESĒ

³⁸ O le ā e tatau ona fai pe a faia e se tagata talaʻi e leʻi papatiso ni mea sesē matuiā? Talu ai e lē o i latou o ni Molimau papatiso o le faapotopotoga, e lē mafai la ona faateʻaina i latou. Atonu e latou te lē o malamalama atoatoa i tapulaa a le Tusi Paia. O lea, o fautuaga agalelei e ono fesoasoani iā i latou e faasaʻosaʻo ai o latou ala.​—Epe. 12:13.

³⁹ Pe afai e lē salamō se tagata e leʻi papatisoina ua fai mea sesē, ina ua māeʻa ona feiloaʻi ma toeaina e toʻalua o ē na taumafai e fesoasoani iā te ia, e manaʻomia ona faailoa atu i le faapotopotoga. E faia se faasilasilaga puupuu e faapea: “Ua lē o toe avea nei [suafa o le tagata] o se tagata talaʻi e leʻi papatiso.” O le a manatu le faapotopotoga i lenā tagata fai mea sesē e pei o se tagata o le lalolagi. E ui lava e lē o faateʻaina o ia, ae e faaeteete Kerisiano i le auaumea faatasi ma lea tagata. (1 Kori. 15:33) E lē taliaina se lipoti o le auaunaga i le fanua mai iā te ia.

⁴⁰ I se taimi mulimuli ane, atonu o le a manaʻo se tasi ua lē o toe avea ma tagata talaʻi e leʻi papatisoina e toe avea o se tagata talaʻi. Pe afai o le tulaga lea, o le a feiloaʻi o ia ma ni toeaina se toʻalua e faamautinoa lona agaʻigaʻi i luma faaleagaga. Pe afai ua toe agavaa o ia, ona faia lea o le faasilasilaga puupuu lenei: “Ua toe avea nei [suafa o le tagata] ma tagata talaʻi e leʻi papatisoina.”

E FAAMANUIA E IEOVA LE TAPUAʻIGA FILEMU MA MAMĀ

⁴¹ O i latou uma o ē auaufaatasi ma le faapotopotoga a le Atua i aso nei, e mafai ona olioli i le tulaga tamaoaiga faaleagaga ua tuuina mai e Ieova i ona tagata. Ua fuatele mai o tatou laufanua faaleagaga, ma ua tatou maua foʻi vai e tele o le upu moni e faafouina ai. Ua tatou maua foʻi le puipuigamalu a Ieova, e ala mai i lana faatulagaga i lalo o le tulaga ulu o Keriso. (Sala. 23; Isa. 32:1, 2) O lo tatou iai i lenei parataiso faaleagaga, ua tatou lagona ai le saogalemu, a o ola ai i nei aso e gata ai e sili ona faigatā.

⁴² O lo tatou faatumauina o le filemu ma le mamā o le faapotopotoga, ua faaauau ai ona tatou faasusulu atu le upu moni o le Malo. (Mata. 5:16; Iako. 3:18) E ala i le faamanuiaga a Ieova, o le a tatou olioli ai i le mātauina o le faatoʻateleina o tagata ua oo ina iloa Ieova, ma tatou auauna faatasi ai i le faia o lona finagalo.