Auala e Faaalia ai le Alofa Mutimutivale i le Tagata Faimea Sesē

1. E tusa po ua faia e se tasi se agasala matuiā, ae o le ā e mafai ona faia e le Atua?

I LE mataupu ua mavae, na tatou talanoaina ai le auala na taulima ai e le aposetolo o Paulo se mataupu i Korinito, e faatatau i se tagata na faia se agasala matuiā. Talu ai e leʻi salamō le tagata faimea sesē, o lea na aveesea ai o ia mai i le faapotopotoga. Peitaʻi, e pei ona faaalia i le matua o lenei mataupu, e mafai e le Atua ona taʻitaʻiina i le salamō se tasi na faia se agasala matuiā. (Roma 2:4) E faapefea ona fesoasoani i ai toeaina ina ia salamō?

2-3. O le ā e tatau ona fai pe a tatou iloa o loo faia e se tasi se agasala matuiā, ma aiseā?

² E lē mafai ona fesoasoani atu toeaina, pe afai e latou te lē iloa muamua po ua faia e se tasi se agasala matuiā. O lea, o le ā e tatau ona tatou faia pe a tatou iloa o loo faia e se uso po o se tuafafine se agasala matuiā, lea e ono aveesea ai o ia mai i le faapotopotoga? E tatau ona tatou faalaeiau le tagata faimea sesē, e talosaga i toeaina mo le fesoasoani.—Isa. 1:18; Galu. 20:28; 1 Pete. 5:2.

³ Ae e faapefea pe afai e musu le tagata faimea sesē e talanoa i toeaina? E tatau la ona tatou talanoa saʻo i toeaina, ina ia faamautinoa e maua e le tagata le fesoasoani o loo ia manaʻomia. O le gaoioiga alofa lenā e tatau ona fai, ina ia fesoasoani ai i le uso po o le tuafafine. Ae pe afai e faaauau ona faia e le tagata faimea sesē le agasala, o le a atili faaleagaina la le la faiā ma Ieova. E lē gata i lea, ae e ono taʻuleagaina ai foʻi le faapotopotoga. O lea, e tatau ona tatou gaoioi ma le lototetele, ona e tatou te alolofa iā Ieova ma le tagata faimea sesē.—Sala. 27:14.

AUALA E FESOASOANI AI TOEAINA I Ē UA FAIA AGASALA MATUIĀ

4. O le ā le sini o toeaina pe a talanoa ma se tasi ua faia se agasala matuiā?

⁴ Pe a faia e se tasi i le faapotopotoga se agasala matuiā, e filifili e le ʻautoeaina ni toeaina agavaa se toʻatolu e faia aʻe ai se komiti.a E ao i nei toeaina ona faaalia le faamaulalo ma le lotomaulalo. E ui e latou te fesoasoani i le tagata faimea sesē ia faaalia le salamō, ae e lē mafai ona latou faamalosia o ia e faia suiga. (Teu. 30:19) E iloa e toeaina, e lē o tagata faimea sesē uma e tali lelei mai e pei o le tupu o Tavita. (2 Samu. 12:13) E ono filifili nisi tagata faimea sesē e teena le aʻoaʻiga mai iā Ieova. (Kene. 4:​6-8) E ui i lea, o le sini o toeaina ia taʻitaʻiina le tagata faimea sesē i le salamō, pe afai e mafai. O ā mataupu silisili e fesoasoani iā i latou pe a talanoa ma le tagata faimea sesē?

5. O le ā le mataupu silisili e ao ona manatua e toeaina pe a talanoa ma le tagata faimea sesē? (2 Timoteo 2:​24-26) (Tagaʻi foʻi i le ata.)

⁵ E vaai toeaina i le tagata faimea sesē o se mamoe pele ua leiloa. (Luka 15:​4, 6) O lea, pe a latou talanoa ma se tagata faimea sesē, e lē tatau ona latou faaali atu ni uiga, pe fai atu ni faamatalaga e lē agalelei. E lē tatau foʻi ona latou manatu i lenā feiloaʻiga o se mea e tau lava ina fai. Nai lo o lea, e latou te faaalia uiga o loo taʻua i le 2 Timoteo 2:​24-26. (Faitau.) E ao i toeaina ona toʻa, agamalu, ma agalelei a o taumafai e pāʻia le loto o le tagata faimea sesē.

6. E faapefea i toeaina ona sauniunia o latou loto a o leʻi feiloaʻi ma le tagata faimea sesē? (Roma 2:4)

⁶ E ao i toeaina ona sauniunia o latou loto. E latou te taumafai e faaaʻoaʻo iā Ieova i a latou feutagaʻiga uma ma le tagata faimea sesē, ma manatua upu a Paulo e faapea: “O le agalelei o le Atua ua taumafai ai e taʻitaʻiina oe i le salamō.” (Faitau le Roma 2:4.) E ao foʻi i toeaina ona manatua, o i latou o leoleo mamoe i lalo o le taʻitaʻiga a Keriso. (Isa. 11:​3, 4; Mata. 18:​18-20) A o leʻi feiloaʻi ma le tagata faimea sesē, e ao i le komiti ona tatalo iā Ieova mo le fesoasoani, ina ia ausia lo latou sini o le taʻitaʻiina lea o le tagata faimea sesē i le salamō. E fai a latou saʻiliʻiliga i le Tusi Paia ma a tatou lomiga, ma tatalo mo le atamai. E latou te iloiloina foʻi mea e manaʻomia ona latou iloa e faatatau i le talaaga o le tagata faimea sesē, lea atonu ua māfua ai ona sesē ona manatu, uiga ma amioga.—Faata. 20:5.

7-8. E faapefea ona faaaʻoaʻo toeaina i le onosaʻi o Ieova a o feutagaʻi ma se tagata faimea sesē?

⁷ E faaaʻoaʻo toeaina i le onosaʻi o Ieova. E ao i toeaina ona manatua le auala na feutagaʻi ai Ieova ma tagata faimea sesē, i aso ua mavae. O se faaaʻoaʻoga, na onosaʻi Ieova a o talanoa atu iā Kaino. Na ia lapataʻia Kaino i iʻuga leaga o le faia o le agasala, ma e iai le faamoemoe e mafai ona Ia toe talia o ia pe afai e usitaʻi. (Kene. 4:​6, 7) Na aʻoaʻia e Ieova Tavita e ala mai i le perofeta o Natano, o lē na faaaogāina se talafaatusa ina ia pāʻia ai le loto o le tupu. (2 Samu. 12:​1-7) E lē gata i lea, na “aauina atu pea lava pea” e Ieova ana perofeta, e lapataʻia le nuu faalogogatatā o Isaraelu. (Iere. 7:​24, 25) E leʻi faatalitali Ieova seʻiloga e salamō ona tagata, ona faatoʻā fesoasoani lea i ai. Nai lo o lea, na ia tausolomua e faalaeiau i latou ia salamō.

⁸ E faaaʻoaʻo toeaina iā Ieova, a o latou taumafai e fesoasoani i se tasi na faia se agasala matuiā. E pei ona taʻua i le 2 Timoteo 4:​2, e latou te faaalia le “onosaʻi” a o feutagaʻi ma le tagata faimea sesē. O lea, e ao i toeaina ona toʻa ma onosaʻi i taimi uma, ina ia fesoasoani ai i se tagata faimea sesē e faasaʻo ona ala. Pe afai e ʻinaʻinā pe ita le toeaina, atonu la o le a lē fia faalogo le tagata i le fautuaga, pe musu foʻi e faaalia le salamō.

9-10. E faapefea ona fesoasoani toeaina i se tagata faimea sesē ina ia iloa le sesē o sana gaoioiga na fai?

⁹ E taumafai toeaina e iloilo po o ā ni mea na tutupu, ua māfua ai ona faia e le tagata le agasala. O se faataʻitaʻiga, po ua amata ona vaivai faaleagaga le tagata, ona ua faatalalē i lana faiva ma ana lava suʻesuʻega o le Tusi Paia? Po ua amata ona avea ana tatalo o se mea e tau lava ina fai, po ua seāseā foʻi ona tatalo? Po ua fai ma ana masani le lolo atu i ona faanaunauga sesē? Ae e faapefea ana filifiliga e tusa ai o aumea ma faafiafiaga? E faapefea i ana filifiliga i na vala ona aafia ai lona loto? Po o ia malamalama o ana filifiliga ma gaoioiga ua aafia ai lona Tamā o Ieova?

¹⁰ O le fai atu o ni fesili faautauta e aunoa ma le suʻesuʻevale, o le a mafai ai e toeaina ona utufia mai manatu o le tagata faimea sesē, ma fesoasoani ai foʻi iā te ia e iloa le sesē o lana gaoioiga na fai. (Faata. 20:5) E lē gata i lea, e ono faaaogā e toeaina se talafaatusa e fefulifulisaʻi ai ma le tagata ina ia iloa ai lana gaoioiga sesē, e pei ona sa faia e le perofeta o Natano iā Tavita. Atonu i le feiloaʻiga muamua, o le a faaalia ai e le tagata lona matuā faanoanoa ona o lana mea sesē na fai, ma atonu e oo lava foʻi ina faaalia le salamō.

11. Na faapefea ona feutagaʻi Iesu ma tagata agasala?

¹¹ E taumafai toeaina e faaaʻoaʻo iā Iesu. Ina ua feutagaʻi Iesu ma Saulo o Taso, na ia fai atu se fesili faatupu manatu e faapea: “Saulo, Saulo e, aiseā ua e faasauā mai ai iā te aʻu?” O le faia faapea, na fesoasoani ai Iesu iā te ia e iloa le sesē o lana gaoioiga o loo fai. (Galu. 9:​3-6) E lē gata i lea, ina ua feutagaʻi Iesu ma “le fafine o Iesepela,” na ia faapea mai, “na ou tuu atu le avanoa iā te ia ina ia salamō ai.”—Faaa. 2:​20, 21.

12-13. E ono faapefea ona tuu atu e toeaina le avanoa i le tagata faimea sesē e salamō ai? (Tagaʻi foʻi i le ata.)

¹² E faaaʻoaʻo toeaina iā Iesu e ala i le lē vave faia o se faaiʻuga e faapea, e lē taitai salamō le tagata faimea sesē. E ui e faaalia e nisi le salamō i le uluaʻi taimi e feiloaʻi ai ma le komiti, ae o nisi e ono manaʻomia sina taimi. O lea, e ono faatulaga e toeaina nisi a latou feiloaʻiga ma le tagata faimea sesē. Atonu pe a uma le uluaʻi feiloaʻiga, e toe mafaufau le tagata faimea sesē i mea na latou talanoa ai ma toeaina, ma talosaga ai iā Ieova e faamagalo o ia. (Sala. 32:5; 38:18) O lea, atonu e oo ane i le isi a latou feiloaʻiga ua suia manatu ma uiga o le tagata faimea sesē, mai i le taimi muamua na latou feiloaʻi ai.

¹³ E faaalia e toeaina le agalelei ma le tigā alofa, ina ia fesoasoani ai e taʻitaʻiina le tagata faimea sesē i le salamō. E latou te tatalo ma faamoemoe o le a faamanuia e Ieova a latou taumafaiga, ma ia toe sagatonu le mafaufau o le tagata faimea sesē ma faaalia le salamō.—2 Timo. 2:​25, 26.

14. O ai moni e fesoasoani i se tagata faimea sesē ina ia salamō, ma e faapefea ona tatou iloa?

¹⁴ Pe a salamō le tagata faimea sesē, e tatou te lagona le fiafia! (Luka 15:​7, 10) E ui na faia e toeaina le mea sili e toe faasaʻo ai le tagata, ae o ai moni na fesoasoani i le tagata faimea sesē ina ia salamō? Ia mātau le faamatalaga a Paulo e faatatau i tagata agasala: “Atonu e tuu atu e le Atua le avanoa ina ia salamō ai i latou.” (2 Timo. 2:25) O lea la, e lē o tagata ae o Ieova na fesoasoani i le Kerisiano faimea sesē, ina ia toe faasaʻo ona manatu ma ona uiga. Na faamatala e Paulo iʻuga lelei e oo i se tasi pe a ia faaalia le salamō. O le a faalolotoina le malamalama o lenā tagata i le upu moni, toe sagatonu lona mafaufau, ma sao mai i mailei a Satani.—2 Timo. 2:26.

15. E faapefea ona fesoasoani pea toeaina i le tagata faimea sesē ua salamō?

¹⁵ Pe a salamō se tagata faimea sesē, o le a faatulaga e le komiti ni asiasiga faaleoleo mamoe ina ia maua ai pea e le tagata le fesoasoani, e tetee ai i mailei a Satani ma faia ai pea le mea saʻo. (Epe. 12:​12, 13) O le mea moni, e lē faailoa atu e toeaina i so o se tasi faamatalaga o le agasala na faia e se tasi. Ae o ā la mea e manaʻomia ona faailoa atu i le faapotopotoga?

“IA AʻOAʻI I LUMA O TAGATA UMA”

16. E tusa ai o le 1 Timoteo 5:​20, o ai na faasino atu ai Paulo ina ua ia taʻua “tagata uma”?

¹⁶ Faitau le 1 Timoteo 5:20. Na tusi atu e Paulo nei upu iā Timoteo, o sē na avea foʻi ma toeaina, e faatatau i le auala e feutagaʻi ai ma “ē e faia pea le agasala.” O le ā le uiga o lana faamatalaga? Ina ua taʻua e Paulo “tagata uma,” e leʻi uiga atu o ia i le faapotopotoga atoa. Nai lo o lea, na faasino atu o ia iā i latou atonu na iloa le mea sesē na fai. O i latou ia na vāaitino i le mea na tupu, pe na faamatala foʻi i ai e le tagata faimea sesē lana agasala sa fai. E na o i latou na e faailoa atu i ai ma le faautauta e toeaina, ua uma ona taulima le mataupu, ma ua aʻoaʻia le tagata faimea sesē.

17. O ā ni tulaga e manaʻomia ai ona faasilasila ua aʻoaʻia se tasi, ma aiseā?

¹⁷ Ae i nisi taimi, atonu e toʻatele nisi i le faapotopotoga ua iloa se mea sesē ua faia e se tasi, pe atonu foʻi e mulimuli ane o latou iloa. I tulaga faapena, e faasino atu la “tagata uma” i le faapotopotoga atoa. O lea, e faia e se toeaina se faasilasilaga i le faapotopotoga, e faailoa atu ai ua aʻoaʻia se uso po o se tuafafine. Aiseā? Na faapea mai Paulo, ina ia “fai ma lapataʻiga mo isi uma lava.”

18. E faapefea ona taulima e toeaina tulaga e aafia ai fanau e 18 tausaga ma lalo ifo ua uma ona papatiso? (Tagaʻi foʻi i le ata.)

¹⁸ Ae e faapefea fanau e 18 tausaga ma lalo ifo ua uma ona papatiso, ae ua faia se agasala matuiā? E faatulaga e le ʻautoeaina ni toeaina se toʻalua e talanoa ma le tamaitiiti ma ona mātua Kerisiano.b E fesili atu toeaina i mātua po o ā ni auala ua la fesoasoani ai i le la tama, ina ia faia ni suiga ma faaalia le salamō. Pe afai e talia e le tamaitiiti aʻoaʻiga a ona mātua ma faia suiga i ona uiga ma mafaufauga, e ono filifili la toeaina nei e toʻalua e lē manaʻomia ona iai se komiti e feiloaʻi ma le tamaitiiti ma ona mātua. Aemaise lava e iloa e toeaina, o le tiute tauave a mātua mai i le Atua le saunia o aʻoaʻiga mo a latou fanau. (Teu. 6:​6, 7; Faata. 6:20; 22:6; Efe. 6:​2-4) E mai i lea taimi i lea taimi, e ao i toeaina ona faamautinoa mai i mātua, o loo la fesoasoani pea i le la tama. Ae e faapefea pe afai e lē salamō o ia ma uia pea le ala sesē? E ao la i ni toeaina se toʻatolu e faia aʻe ai le komiti, ona talanoa faatasi ma le tamaitiiti ma ona mātua Kerisiano.

“E ALOFA FAAPELEPELE MA ALOFA MUTIMUTIVALE IEOVA”

19. E faapefea ona taumafai toeaina e faaaʻoaʻo iā Ieova pe a feutagaʻi ma tagata faimea sesē?

¹⁹ O toeaina e aofia ai i se komiti, e iai iā i latou le tiute tauave i luma o Ieova ina ia faatumauina le mamā o le faapotopotoga. (1 Kori. 5:7) E latou te mananaʻo foʻi e fesoasoani i le tagata faimea sesē ia faaalia le salamō, pe afai e mafai. O lea, e ao ona iai i toeaina se vaaiga saʻo ma faamoemoe o le a suia le tagata faimea sesē. Aiseā? Talu ai e latou te mananaʻo e faaaʻoaʻo iā Ieova, o lē “e alofa faapelepele ma alofa mutimutivale.” (Iako. 5:11) E faapena le uiga na faaalia e le aposetolo ua matua o Ioane. Na ia faapea mai: “Si aʻu fanau e, ua ou tusi atu nei mea iā te outou ina neʻi outou faia se agasala. Ae afai e faia e se tasi se agasala, ua iā i tatou le fesoasoani faatasi ma le Tamā, o Iesu Keriso lea, o lē e amiotonu.”—1 Ioa. 2:1.

20. O le ā o le a talanoaina i le mataupu o loo sosoo mai?

²⁰ O le mea e faanoanoa ai, e iai taimi e mumusu ai nisi Kerisiano e faaalia le salamō. Pe afai o le tulaga lenā, e tatau la ona aveesea i latou mai i le faapotopotoga. Ae o le ā le auala e ao ona taulima ai e toeaina lenā tulaga? O le a talanoaina lenā manatu i le mataupu o loo sosoo mai.