“Inā Aami ia e Ia o Toeaina”

1. Ua faapefea ona faailoa mai e Ieova e tautele ana mamoe iā te ia?

E MATUĀ tautele iā Ieova ana mamoe, ona na faatauina mai i le toto o lona Alo o Iesu. O lea, ua ia tofia toeaina o le faapotopotoga ina ia tausia ma le faapelepele lana lafu mamoe. (Galu. 20:28) E mulimuli toeaina i le taʻitaʻiga a Iesu Keriso, e ala i le puipuia o le lafu mai i mea e lamatia ai faaleagaga, ma faamautinoa e latou te maua le faafouina.—Isa. 32:​1, 2.

2. O ai i latou e manatu mamafa mai i ai Ieova? (Esekielu 34:​15, 16)

² E manatu mamafa Ieova i ana mamoe po o ana auauna uma, aemaise lava i latou ua faamanuʻalia faaleagaga. Ua ia saunia mai toeaina ina ia fesoasoani iā i latou na. (Faitau le Esekielu 34:​15, 16.) Peitaʻi, e finagalo foʻi o ia iā i tatou uma ina ia tāpā le fesoasoani a toeaina pe a manaʻomia. E lē gata e na te faalaeiauina i tatou ina ia tatalo faatauanau atu mo lana fesoasoani, ae e finagalo foʻi ia tatou talosagaina le fesoasoani a “leoleo mamoe ma ē e aʻoaʻo atu” i le faapotopotoga.—Efe. 4:​11, 12.

3. E faapefea ona tatou maua aogā mai i le iloiloina o le auala o loo faaaogā ai e Ieova toeaina?

³ I lenei mataupu, o le a talanoaina ai le faatulagaga a Ieova, lea e faaaogā ai toeaina e saunia mai le fesoasoani faaleagaga. O le a tatou talanoaina fesili nei: O ā taimi e manaʻomia ai ona tatou talosagaina le fesoasoani a toeaina? Aiseā e tāua ai le faia faapea? E faapefea ona latou fesoasoani mai? E tusa pe e tatou te lē o feagai ma se tulaga faigatā i le taimi lenei, ae o le iloiloina o nei manatu, o le a atili faalolotoina ai lo tatou talisapaia o le faatulagaga a Ieova, lea e faaaogā ai toeaina e fesoasoani mai iā i tatou. O le a tatou iloa ai foʻi mea e mafai ona tatou faia pe a manaʻomia le fesoasoani.

O Ā TAIMI E ʻAAMI AI TOEAINA’?

4. Aiseā e faapea atu ai o loo talanoa le Iakopo 5:​14-16, 19, 20, i se tasi ua maʻi faaleagaga? (Tagaʻi foʻi i ata.)

⁴ Na faamatala e le soo o Iakopo le auala o loo faaaogā ai e Ieova toeaina e fesoasoani iā i tatou. Na ia tusi e faapea: “Pe e iai ea se tasi o outou ua maʻi. Inā aami ia e ia o toeaina o le faapotopotoga.” (Faitau le Iakopo 5:​14-16, 19, 20.) O loo talanoa Iakopo e faatatau i se tasi ua maʻi faaleagaga. E tatou te iloa lenā mea auā na ia taʻua e tatau i lenā tagata ona saʻili i le fesoasoani a toeaina, ae e lē o se fomaʻi. Na taʻua atili foʻi e Iakopo, e mafai ona faamālōlōina lenā tagata pe a faamagaloina ana agasala. I nisi taimi, e taitutusa le auala e saʻili ai le vaifofō mo le maʻi faaleagaga, ma le auala e saʻilia ai se vaifofō mo se maʻi faaletino. Pe a tatou mamaʻi, e masani ona tatou ō e vaai le fomaʻi, faamatala i ai āuga o lo tatou maʻi, ma mulimuli i faatonuga e na te aumaia. E faapena foʻi pe a tatou mamaʻi faaleagaga. E ao ona tatou saʻili atu i toeaina mo le fesoasoani, faamatala i ai lo tatou tulaga, ma gaoioi e tusa ma a latou fautuaga faale-Tusi Paia.

5. E faapefea ona iloa ua amata ona maʻi faaleagaga se tasi?

⁵ I le Iakopo mataupu e 5, o loo faalaeiauina ai i tatou e talosaga mo le fesoasoani a toeaina, pe afai ua amata ona tatou mamaʻi faaleagaga. O se mea e matuā atamai lo tatou faia faapea, a o leʻi oo ina tatou faia se mea e faaleagaina ai la tatou faiā ma Ieova. Ua lapataʻi mai le Tusi Paia, pe afai e tatou te lē faaeteete, e ono faasesēina i tatou i le manatu o loo tatou maua le finagalo malie o Ieova, ae o le mea moni e leai. (Iako. 1:22) O le mea lenā na tupu i nisi o uluaʻi Kerisiano i Sarataisa, ma na lapataʻia i latou e Iesu e tusa ai o lenā tulaga. (Faaa. 3:​1, 2) Ina ia iloa la po o faapeʻī mai lo tatou tulaga faaleagaga, e lelei ona faatusatusa lo tatou maelega sa iai i le taimi muamua ma le taimi lenei. (Faaa. 2:​4, 5) E faapefea ona tatou faia lenā mea? Ia fesili ifo: ʻPo ua seāseā ona ou fiafia e fai laʻu faitauga Tusi Paia ma manatunatu loloto i ai? Po ua fai ma misi aʻu sauniga pe e lē sauniuni lelei foʻi mo sauniga? Po ua amata ona mou atu loʻu maelega mo le faiva? Po o alu le tele o loʻu taimi e mafaufau ai i mea faafiafia ma le mauaina o meafaitino?’ Pe afai o lau tali i se tasi o na fesili o le ioe, o se faailoilo la lenā o loo iai sou vaivaiga e manaʻomia ona e vave gaoioi e foʻia a o leʻi faateteleina. Pe afai e faigatā ona e manumalo mai i se vaivaiga, po ua iʻu atu foʻi i lou faia o se gaoioiga e solia ai tapulaa a Ieova, e ao la ona e talosaga atu i toeaina mo la latou fesoasoani.

6. O le ā e tatau ona faia e se tasi pe a ia faia se agasala matuiā?

⁶ Pe a faia e se tasi se agasala matuiā lea e mafai ona aveesea ai mai i le faapotopotoga, e tatau la ona ia talanoa atu i se toeaina. (1 Kori. 5:​11-13) E lē mafai e lenā tagata ona faaleleia lana ia lava faiā ma Ieova. E pau le auala e na te maua ai le faamagaloga a Ieova, o le “faia lea o galuega ua tatau mo le salamō.” (Galu. 26:20) O se tasi o na galuega, o le faailoa atu lea i toeaina o se agasala matuiā na ia faia.

7. O ai isi e fesoasoani foʻi i ai toeaina?

⁷ E lē gata e fesoasoani toeaina iā i latou ua faia se agasala matuiā, ae o i latou foʻi ua vaivai faaleagaga. (Galu. 20:35) O se faataʻitaʻiga, e mafai ona latou fesoasoani iā te oe pe afai o loo faigatā ona e tauivi ma ni tuʻinanauga sesē. Atonu e matuā faigatā ona e manumalo mai i na faalogona, pe afai na fai ma au masaniga le faaaogā o fualaau faasāina, matamata i ata matagā taufeusuaʻiga, pe ola i se olaga lē mamā a o e leʻi mauaina le upu moni. Peitaʻi, aua e te lotovaivai pe manatu e leai sou fesoasoani. Ia talanoa atu i se toeaina e te māfana i ai, ma e te iloa o le a faalogologo lelei mai iā te oe, aumaia ni fautuaga aogā, ma faamautinoa mai e mafai lava ona e faafiafiaina Ieova pe afai e faaauau ona e teena ou tuʻinanauga sesē. (Fai. 4:12) Pe a e lotovaivai ona o na tulaga, e mafai ona faamanatu atu e toeaina, o lou talanoa atu iā i latou o se faailoga lenā o lou lē faalagolago i lou lava malosi, ma lou manatu mamafa i la oulua faiā ma Ieova.—1 Kori. 10:12.

8. Pe e manaʻomia ona tatou talanoa i toeaina i taimi uma e tatou te faia ai se mea sesē? Ia faamatala.

⁸ Peitaʻi, e lē o taimi uma e manaʻomia ai ona tatou talanoa atu i toeaina i se faafitauli e aafia ai lo tatou tulaga faaleagaga. O se faataʻitaʻiga, seʻi faapea ua e faia se tala e faatigā ai i se uso po o se tuafafine, po ua lē pulea foʻi lou ita. Nai lo o le talanoa atu i toeaina, e mafai ona e faatatauina le fautuaga a Iesu ina ia e alu e faalelei le lua vā ma lou uso, ma ia tausia le filemu. (Mata. 5:​23, 24) E mafai foʻi ona fai ni au lava saʻiliʻiliga i le uiga o le agamalu, onosaʻi ma le amio pulea, ina ia mafai ai ona e faaalia na uiga pe a toe tulaʻi mai se faafitauli. Peitaʻi, pe afai e uma ane e lē mafai lava ona foʻia lou vaivaiga, e mafai la ona e tāpā le fesoasoani a se toeaina. I le uluaʻi senituri, ina ua lē mafai ona foʻia se feeseeseaʻiga i le vā o Evotia ma Sunetui, na talosagaina e le aposetolo o Paulo se isi uso ina ia fesoasoani iā i laʻua. E mafai foʻi ona fesoasoani atu se toeaina iā te oe, pe afai e tulaʻi mai se tulaga tai faapena.—Fili. 4:​2, 3.

AISEĀ E TĀUA AI LE AAMI O TOEAINA?

9. Aiseā e lē tatau ai ona tatou matamumuli e tāpā le fesoasoani a toeaina? (Faataoto 28:13)

⁹ E tatou te manaʻomia le faatuatua ma le lototele e talosaga atu ai mo le fesoasoani a toeaina, pe a tatou faia se agasala matuiā, pe manatu e lē mafai ona teena tuʻinanauga sesē. E lē tatau ona tatou matamumuli pe faatalatū e faia faapea. Aiseā? Ua saunia mai e Ieova toeaina, ina ia fesoasoani mai e faamalosia pea la tatou faiā ma ia. Pe a tatou talanoa la i toeaina, e faaalia ai lo tatou maufaatuatuaina ma le usiusitaʻi iā Ieova. E iloa ai foʻi lo tatou faalagolago i le fesoasoani a Ieova e faia ai pea le mea saʻo. (Sala. 94:18) Pe afai foʻi ua tatou faia se agasala, e mafai ona faamagaloina i tatou e Ieova, pe afai e taʻutino atu a tatou agasala i toeaina ma lafoaʻi o tatou ala leaga.—Faitau le Faataoto 28:13.

10. O le ā le mea e tupu pe a tatou taumafai e nanā a tatou agasala?

¹⁰ Pe a taʻutino atu a tatou agasala i toeaina, o le a faamagaloina i tatou e Ieova. Peitaʻi, pe a tatou taumafai e nanā a tatou agasala, o le a atili ai ona tatou mafatia i faalogona nofosala. Seʻi mafaufau i le tupu o Tavita. Ina ua taumafai o ia e nanā ana agasala, na faaleagaina ai lona itu faaleagaga, lofitūina ai o ia i le itu tau faalogona, ma aafia ai lona malosi faaletino. (Sala. 32:​3-5) O le mea moni, e faateteleina le tugā o se manuʻa po o se maʻi faaletino, pe afai e lē vave ona saʻilia se togafitiga. E faapena foʻi ona atili faaleagaina la tatou faiā ma Ieova, pe afai e umi se taimi e tatou te lē tāpā le fesoasoani a toeaina. O le māfuaaga lea ua pulunaunauina ai i tatou e Ieova ina ia “faaleleia” la tatou faiā ma ia, e ala i le talanoa i toeaina ua ia saunia mai e fesoasoani iā i tatou.—Isa. 1:​5, 6, 18.

11. E faapefea ona aafia isi pe a tatou nanāina se agasala matuiā?

¹¹ O lo tatou taumafai e nanā a tatou agasala, e mafai foʻi ona aafia ai isi. E faapefea? O le a lē toe maua ai e le faapotopotoga le agaga paia o Ieova, ma o le a aafia ai foʻi lo latou filemu. (Efe. 4:30) I le taimi e tasi, pe a tatou iloa se agasala matuiā na faia e se isi, ae e tatou lē faailoaina atu, o lona uiga la ua tatou saosaolaumea i lana agasala na fai. (Levi. 5:1) O lea, e tatau ona tatou fautua atu i le tagata faimea sesē ina ia talanoa i toeaina. Pe afai e mavae sina taimi e na te leʻi faia faapea, o lo tatou alofa ma le faamaoni iā Ieova, o le a tatou faamatala atu ai i toeaina le mea na tupu. O le faia faapea, e faatumauina ai le mamā o le faapotopotoga, ma toe maua ai e le tagata faimea sesē se faiā lelei ma Ieova.

E FAAPEFEA ONA FESOASOANI MAI TOEAINA?

12. E faapefea ona fesoasoani toeaina i ē ua vaivai faaleagaga?

¹² Ua fautuaina toeaina ina ia fesoasoani i ē ua vaivai faaleagaga. (1 Tesa. 5:14) Pe a e faia la se mea sesē, e ono faaaogā e toeaina ni fesili agalelei e “utufia” mai ai ou manatu ma faalogona. (Faata. 20:5) E mafai ona e fesoasoani i le galuega a toeaina, e ala i le saʻoloto e faamatala atu iā i latou ou faalogona, e tusa pe e faigatā ona o oe o se tagata matamuli, o le ituaiga aganuu na e ola aʻe ai, pe e te mā foʻi e taʻu atu le faafitauli o loo e fesagaʻia. Aua foʻi e te popole ina neʻi e faia ni faamatalaga “soonafai.” (Iopu 6:3) O le mea moni, e lē vave ona faia e toeaina se faaiʻuga. Nai lo o lea, e latou te faalogologo lelei ma taumafai e malamalama i le mea atoa na tupu, a o leʻi aumaia se fautuaga mai i le Tusi Paia. (Faata. 18:13) E iloa lelei e toeaina, e umi se taimi e alu i la latou galuega o le leoleoina o le lafu mamoe a Ieova, ma e lē faatalitalia e uma ane le uluaʻi talanoaga ua foʻia le faafitauli.

13. E faapefea i tatalo ma fautuaga a toeaina mai i le Tusi Paia ona fesoasoani iā i tatou? (Tagaʻi foʻi i ata.)

¹³ Pe a e talanoa i toeaina, e latou te lē faia se gaoioiga po o se faamatalaga e atili ai ona e lagona le nofosala. Nai lo o lea, e latou te tatalo mo oe, ma e “matuā malosi le aafiaga” o a latou tatalo. E te lagona ai le toʻafilemu ma le faamāfanafanaina. O la latou fesoasoani, e aofia ai foʻi le “uu iā te [oe] i le suāuu i le suafa o Ieova.” (Iako. 5:​14-16) O lenā “suāuu” e faasino atu i upu moni o le Tusi Paia. E faaaogā ma le tomai e toeaina le Tusi Paia ina ia faamāfanafanaina ai oe ma toe faaleleia le lua faiā ma Ieova. (Isa. 57:18) O a latou fautuaga foʻi mai i le Tusi Paia e faamalosia ai oe e faia pea le mea saʻo. O lo latou faia faapea, e tai pei ai o loo e faalogo atu i le siʻufofoga o Ieova o loo faapea mai: “O le ala lenei. Ia outou savavali ai.”—Isa. 30:21.

14. O le ā le auala e ao ona fesoasoani ai toeaina i se tasi ua uia se “laasaga sesē”? (Kalatia 6:1) (Tagaʻi foʻi i ata.)

¹⁴ Faitau le Kalatia 6:1. Pe a uia e se Kerisiano se “laasaga sesē,” o lona uiga ua lē ola o ia e tusa ma tapulaa amiotonu a Ieova. E faasino atu le laasaga sesē i le faia o se filifiliga sesē po o se agasala matuiā. E ao i toeaina ona faaalia le alofa, a o latou “taumafai e faasagatonu lenā tagata i le agaga o le agamalu.” O le upu Eleni ua faaliliuina i le “faasagatonu,” e uiga atu i le faasaʻo o se ponaivi ina ia aua ai neʻi iai se aafiaga tumau i se tasi. E taumafai malosi se fomaʻi tomai e faasaʻo se ponaivi ua gau, i se auala e lē atili ai ona tigāina le tagata. E taumafai foʻi toeaina e faasaʻo i se auala agamalu se tagata ua maʻi faaleagaga, ina ia lē atili ai ona ia lagona le tigā. I le taimi e tasi, ua fautuaina toeaina ina “ia taʻitasi [i latou] ma faaeteete.” O lea, a o latou fesoasoani e faasaʻo se tagata faimea sesē, e tatau i toeaina ona manatua e latou te lē lelei atoatoa foʻi, ma e mafai ona latou uia se laasaga sesē. Nai lo o le faamasinosino pe faafiaamiotonu, e tatau ona latou faaalia le tigā alofa.—1 Pete. 3:8.

15. O le ā e ao ona tatou faia pe a iai so tatou faafitauli?

¹⁵ E mafai ona tatou maufaatuatuaina toeaina o le faapotopotoga. Aiseā? Ua aʻoaʻoina i latou ina ia aua neʻi faailoa atu i isi faamatalaga e fitoitonu iā i tatou. E faavae a latou fautuaga mai i le Tusi Paia nai lo o latou lava manatu, ma e faaauau ona fesoasoani mai i so tatou faafitauli. (Faata. 11:13; Kala. 6:2) O le mea moni, e eseese uiga ma le poto masani o toeaina taʻitoʻatasi. Ae e ao ona tatou saʻoloto e talanoa atu i so o se toeaina. Peitaʻi, ia ʻalofia le fesili solo i toeaina mo se fautuaga, ma le faamoemoe e suʻe se toeaina e ioe i ou manatu. Pe a e faia faapea, o lona uiga o loo e fia ʻfaalogo i mea e logolelei iā te oe lava,’ ae e lē o “aʻoaʻoga aogā” mai i le Afioga a le Atua. (2 Timo. 4:3) Pe a e talanoa i se toeaina i sou faafitauli, e ono toe fesili mai o ia pe na e talanoa i nisi toeaina, ma po o le ā foʻi sa latou fautuaga. O le lotomaulalo e ono uunaʻia ai lenā toeaina ina ia fesili atu mo se fautuaga mai i se isi toeaina.—Faata. 13:10.

LA TATOU MATAFAIOI

16. O le ā le matafaioi a i tatou taʻitoʻatasi?

¹⁶ E ui e leoleoina e toeaina i tatou o le lafu mamoe a Ieova, ae e latou te lē taʻuina mai iā i tatou le mea e fai. O le matafaioi a i tatou taʻitoʻatasi le ola i se olaga e faafiafiaina ai Ieova, e ala i a tatou upu ma gaoioiga. (Roma 14:12) O le fesoasoani a Ieova e mafai ai ona tatou faia ni filifiliga atamai. Nai lo o le faia e toeaina o le faaiʻuga mo i tatou pe taʻu mai le mea e fai, e latou te faaaogā le Tusi Paia e fefulifulisaʻi ai ma i tatou ina ia tatou iloa ai manatu o Ieova. O le mulimuli i a latou fautuaga mai i le Tusi Paia, e toleni ai o tatou “mafaufau” ina ia faia filifiliga atamai.—Epe. 5:14.

17. O le ā e finagalo Ieova e tatou te faia?

¹⁷ Maʻeu lo tatou lotofaafetai ona o le tausia faapelepele o i tatou e Ieova! Na ia auina mai le “leoleo mamoe lelei” o Iesu e faia le togiola, ina ia tatou maua ai le faamoemoe o le ola e faavavau. (Ioa. 10:11) Ua faaaogā foʻi e Ieova toeaina o le faapotopotoga ina ia faataunuu ai lana folafolaga lenei: “Ou te avatu iā te outou o leoleo mamoe e malie i ai loʻu loto, e latou te fafaga foʻi iā te outou i le poto ma le tofā mamao.” (Iere. 3:15) O lea, pe a tatou vaivai pe mamaʻi faaleagaga, ia aua neʻi faatalatū e aami toeaina pe talosaga mo la latou fesoasoani. O le faia faapea, o le a tatou tofo ai i aogā o le faatulagaga ua saunia mai e Ieova, o toeaina o le faapotopotoga.