AUALA E OLA AI O SE KERISIANO
O Leoleo Mamoe e Galulue mo le Lelei o Tagata o Ieova
E toʻatele tagata e sesē la latou vaaiga i ē e iai le tulaga pule. E lē faateʻia ai i tatou, ona ua tele tausaga o faaaogā sesē e tagata le pule mo lo latou lava lelei. (Mi 7:3) Maʻeu lo tatou lotofaafetai, ona ua toleniina toeaina o le faapotopotoga e faaaogā o latou tulaga pule mo le lelei o tagata o Ieova!—Est 10:3; Mat 20:25, 26.
E lē pei toeaina o tagata e iai le tulaga pule i le lalolagi, auā e latou te aapa atu i le tulaga pule ona o le alofa mo Ieova ma ona tagata. (Ioa 21:16; 1Pe 5:1-3) E ala i le taʻitaʻiga a Iesu, e fesoasoani nei leoleo mamoe i tagata talaʻi taʻitoʻatasi ina ia lagona o i latou o se vaega o le aiga o Ieova, ma vavalalata atu iā te ia. E vave lava ona latou saunia le fesoasoani faaleagaga mo mamoe a Ieova, ma fesoasoani foʻi pe a tupu se mala po o se maʻi faafuaseʻi. Pe a e manaʻomia se fesoasoani, aiseā e te lē tausolomua ai e faafesootaʻi se toeaina o lau faapotopotoga?—Ia 5:14.
MAIMOA I LE VITIŌ O LEOLEO MAMOE E MANATU MAMAFA I LE LAFU MAMOE, ONA TALI LEA O FESILI NEI:
Na faapefea ona aogā iā Mariana le fesoasoani na saunia e toeaina?
Na faapefea ona aogā iā Elias le fesoasoani na saunia e toeaina?
Ua faapefea i nei mea na tutupu ona aafia ai la tatou vaaiga i galuega o loo faia e toeaina?