Na Filifili Mose e Tapuaʻi iā Ieova

Na taʻua le aiga o Iakopo i totonu o Aikupito, o tagata Isaraelu. Ina ua maliliu Iakopo ma Iosefa, ona pule lea o se isi Farao. Sa popole o ia ona ua amata ona malolosi atu tagata Isaraelu nai lo o tagata Aikupito. O lea na ia faia ai tagata Isaraelu ma pologa. Na ia faamalosia i latou e faia piliki, ma faia galuega mamafa i le fanua. Ae o le tele lava e faamalosia ai e tagata Aikupito ia tagata Isaraelu e faia galuega mamafa, o le atili toʻatele foʻi lenā o tagata Isaraelu. O le lē fiafia o Farao i lenā mea, na ia faatonuina ai le fasiotia o pepe tama uma faatoʻā fananau mai a Isaraelu. Seʻi mafaufau i le fefefe o tagata Isaraelu i lenā faatonuga.

Sa iai se fafine Isaraelu e igoa iā Iokapeta, ma na iai sana pepe tama aulelei. Ina ia puipuia lana pepe, sa ave ai e lenei tinā lana tama ma tuu i se ato ma nanā i laau o ū i le vaitafe o le Naila. E latalata ane i inā o loo tūtū ai Miriama le tuafafine o le pepe. Na ia vaavaai ane po o le ā se mea o le a tupu.

Na alu atu le afafine o Farao e taʻele i le vaitafe ae ia vaaia ai le ato. I totonu o le ato na ia maua ai se pepe o loo tagi, ma na ia alofa i ai. Na fesili atu Miriama: ʻPo ou te alu e suʻe mai se fafine e tausia le pepe mo oe?’ Ina ua fai atu le afafine o Farao e alu e suʻe mai se fafine, ona alu ai lea o Miriama ma aumai lona tinā o Iokapeta. Na faapea atu le afafine o Farao iā Iokapeta: ʻIa e ave lenei pepe ma tausi o ia mo aʻu, ma o le a ou totogiina oe.’

Ina ua matua le tamaitiiti, ona ave lea o ia e Iokapeta i le afafine o Farao, o lē na faaigoaina le tamaitiiti iā Mose ma tausi aʻe o ia e pei o sana lava tama. Na ola aʻe Mose o se perenise, ma na mafai ona ia maua so o se mea lava na ia manaʻo ai. Ae e leʻi galo iā te ia Ieova. Na iloa e Mose o ia moni o se tagata Isaraelu ae lē o se tagata Aikupito. Na ia filifili foʻi e auauna iā Ieova.

I le 40 o tausaga o Mose, na ia filifili ai e fesoasoani i ona tagata. Ina ua ia iloa atu se tagata Aikupito o loo fasia se pologa Isaraelu, ona matuā tā ai lea e Mose o le tagata Aikupito ma oti ai. Ona ia nanāina lea o le tino o le tagata Aikupito i le oneone. Ina ua iloa e Farao le mea na tupu, ona ia taumafai lea e fasioti Mose. Ae na sola Mose ma alu atu i le nuu o Mitiana, ma na tausia o ia e Ieova a o iai i inā.