Aʻoaʻoina e se Leoleo o le Falepuipui le Upu Moni

Sa iai i Filipi se auauna teine na uluitinoina e se temoni. Na faaaogā e le temoni le teine e faia ni valovaloga, ma na maua ai e ona matai le tele o tupe. Ina ua taunuu Paulo ma Sila i Filipi, na mulimuli solo iā i laʻua le teine mo le tele o aso. Na faapogaia o ia e le temoni e alaga atu: “O nei tane o pologa a le Atua Silisili Ese.” O lea na faapea atu ai Paulo i le temoni: ʻOu te faatonu iā te oe i le suafa o Iesu, inā alu ia i fafo mai iā te ia.’ Ona alu ese ai lea o le temoni mai i le teine.

Ina ua iloa e matai o le auauna teine ua latou lē toe maua ni tupe mai iā te ia, ona matuā feita ai lea o i latou. Na latou puʻea Paulo ma Sila ma avatu i alii faamasino ma faapea atu: ʻUa solia e nei tagata le tulafono ma ua matuā faalavelave i le aai atoa.’ Na faatonu e alii faamasino ina ia sasa Paulo ma Sila ma tuu i le falepuipui. Na tuu i laʻua e le leoleo o le falepuipui i le potu e sili ona pogisa o le falepuipui, ma faamau o la vae i laau.

Na faalogologo ane isi pagota a o usu e Paulo ma Sila viiga iā Ieova. Ina ua oo i le vaeluapō, na faafuaseʻi ona lūlū se mafuiʻe malosi ma na lūlūina ai le falepuipui atoa. Na matalatala faitotoʻa o le falepuipui, ma mamulu ese filifili ma laau faamau na lokaina ai pagota. Na tamoʻe atu le leoleo o le falepuipui i le potu pito i totonu o le falepuipui, ma na ia vaaia ai ua matalatala faitotoʻa. Na manatu o ia ua sosola uma pagota, o lea na ia seʻi aʻe ai loa le pelu o le a pule i lona ola.

Peitaʻi ua alaga atu Paulo: “Aua neʻi e faia lenā mea iā te oe, o loo matou iai uma lava i inei!” Ua tamoʻe atu le leoleo o le falepuipui ua faapaʻū i luma o Paulo ma Sila ma faapea atu: “O le ā se mea e ao ona ou faia ina ia faaolaina ai aʻu?” Ua la tali mai: ʻE tatau ona e talitonu ma lou aiga iā Iesu.’ Ona aʻoaʻo atu lea e Paulo ma Sila o le afioga a Ieova iā i latou, ma na papatisoina le leoleo o le falepuipui ma lona aiga atoa.